“Katehlapala Ahmw Limpoak ong Riatail kan”
1. Pwukoa dahieu kitail koaros ahneki?
1 Nan pirien en Kristian kan, emen emen kitail kin ahneki pwukoa en kasalehda limpoak ong riatail Kristian kan nan mwomwohdiso. (1 Piter 1:22; 2:17) Ni ahnsou me kitail kin “katehlapala atail limpoak,” met kin kak sewese kitail en kasalehda limpoak ong riatail. (2 Kor. 6:12, 13) Dahme kahrehda e kesempwal en kalaudehla atail wehwehki mwahu riatail brother oh sister kan?
2. Dahme kahrehda e kesempwal en karanih riatail kan?
2 Kompoakepahnki Riatail Kin Kakehlail Atail Limpoak ong Irail: Ni atail kin nantihong en wehwehki mwahu riatail Kristian kan, kitail kak kesempwaliki arail pwoson, kanengamah oh irair teikan me irail kin kasalehda. Arail sapwung kan kin mwomwen solahr laud ong kitail, oh kitail men kompoakepahnki irail. Ma kitail pahn nantihong esehla riatail, kitail kak sewese irail ni pali ngehn oh kamweitih irail ni ahnsou me irail lelohng kahpwal akan. (1 Dese. 5:11) Kitail kak “sewese oh kakehlailihala arail pali ngehn” pwehn kak sewese irail en pelianda kasongosong kan sang Sehdan. (Kolose 4:11) Pwehki kitail mihmi ni imwin rahn me diren kahpwal kan oh pwunod akan, kitail kin inenen kalahnganki kompoakepatail me mehlel ong kitail sang nanpwungen sapwellimen Siohwa aramas akan!—Lepin Padahk 18:24.
3. Iaduwen kitail kak kamweitihala oh sewese riatail ni pali ngehn?
3 Kompoakpatail kan me kin karanih kitail kin kak wia sawas laud ni arail kin kihda kamweit oh kakehlailihala kitail ni ahnsou me kitail kin lelohng kahpwal laud kan. (Lepin Padahk 17:17) Emen sister me kin peiong ah pepehm me e sohte katepe koasoia: “Ekei kompoakepahi kan kin kangoange ie ni arail kin nda soahng kan me kansenamwahu oh kin kapinga ie oh irail inenen sewese ie en kihsang ahi madamadau soangen madamadau kan me sohte konehng en ahneki (me ngehi sohte katepe).” Soangen aramas pwukat kin wia kapai kaselel sang Siohwa.—Lepin Padahk 27:9.
4. Dahme kitail kak wia pwehn wehwehki mwahu riatail nan mwomwohdiso?
4 Kasalehda me Ke Nsenohki Meteikan: Iaduwen kitail kin kak katehlapala atail limpoak ong riatail brother oh sister kan? Likin rahnmwahuwih irail ni mihding kan, e pahn mwahu en koasoiong irail oh koasoia duwen soahng kan me mie katepe. Ke kak kasalehda me ke nsenohki irail, ahpw kanahieng pwe ke sohte pahn koasoia duwen soahng kan me pid duwen arail mour me irail pahn namenengki. (Pilipai 2:4; 1 Piter 4:15) Pil ehu ahl me ke kak kasalehda me ke nsenohki irail iei en luhke irail ong mwenge. (Luk 14:12-14) De ke kak koasoanehdi reh me ke pahn iang ih kalohk. (Luk 10:1) Ni atail kin kasalehda me kitail men wehwehkihla mwahu riatail Kristian kan, kitail pahn sewese kaminiminpene tohnmwomwohdiso.—Kolose 3:14.
5. Ia ehu ahl en katehlapala atail limpoak ong meteikan oh kompoakepahnki meteikan?
5 Ke kin kalap pilada en karanih irail me ahmw dih de irail me kin perenki soahng kan me ke perenki? Kitail anahne kanahieng pwehn dehr mweidohng soahng pwukat en irehdi kitail sang karanih tohnmwomwohdiso teikan. Depit kin karanih Sonadan, oh pil Rud karanih Naomi mendahki arail sounpahr kin wekpeseng oh irail tikida nan wasa me weksang meteio. (Rud 4:15; 1 Sam. 18:1) Iaduwen—ke kak karanih pil ekei nan mwomwohdiso? Ma ke pahn wia met, ke pahn ale kapai kan me ke sohte kin kasik.
6. Ia ekei kapai kan me kitail kak alehdi ma kitail kin katehlapala atail limpoak ong riatail?
6 Ni atail kin katehlapala atail limpoak ong meteikan, kitail kak kakehlaka emen emen oh kahrehiong popohl en miehla nanpwungen tohnmwomwohdiso kan. Oh pil, Siohwa kin ketin kapaiada kitail ni ahnsou me kitail kin kasalehong riatail kan limpoak. (Melkahka 41:1, 2; Ipru 6:10) Dahme ke soh akadeiong wehwehki mwahu riomw brother oh sister kan?