Brother kan, Padokekihdi Sapwellimen Koht Manaman oh Nantihong Ale Pwais nan Mwomwohdiso!
“Ih me kin padokekihdi sapwellimen Koht manaman pahn dolung mour soutuk sang sapwellime manaman.”—KAL. 6:8, NW.
1, 2. Ia duwen Madiu 9:37, 38 eh kin pweipweida rahnpwukat? Met kahrehda dahme kin anahn nan mwomwohdiso?
KE KIN kadekadehde duwen doadoahk ehu me sohte pahn manokonokla kohkohlahte! Doadoahk ehu me Sises mahsanih duwe me kin wiawi laudsang mahs oh pil lalaudla. E mahsanih: “Mehlel pwe rahket me inenen laud, a tohndoadoahk kan me malaulau. Kumwail eri kapakap oh peki rehn Kaunen rahket pwe en ketin kadarodo tohndoadoahk tohto pwe re en iang doadoahk.” (Mad. 9:37, 38) Siohwa Koht ketin sapengla soangen kapakap pwukat ni ahl kaselel ehu. Nan pahr 2009, mwomwohdiso en Sounkadehdehn Siohwa kan nan sampah pwon tohtohkihla 2,031, oh lelehr 105,298. Met kin kasalehda me aramas 757 kin papidaisla ehuehu rahn!
2 Soangen kekeirda wet kin kahrehda anahn ehu ong brother kan me kak tiengla mwowe pwe ren padahkih oh apwalih mwomwohdiso kan. (Ep. 4:11) Erein sounpar tohto, Siohwa ketin kesepwilda ohl akan me kak apwalih anahn en sapwellime sihpw kan, oh kitail kak kamehlele me e pahn ketin pousehlahte wia met. Kokohp me kileldi nan Maika 5:5 kin kamehlelehiong kitail me erein imwin rahn akan, “kaunen sounpei me keieu kehlail kan” pahn mi nanpwungen sapwellimen Siohwa aramas akan. Irail pwukat kin rasehng ohl koahiek tohto me kin tiengla mwowe nanpwungarail.
3. Ia wehwehn “padokekihdi sapwellimen Koht manaman”?
3 Ma kowe ohl papidaisla men en Sounkadehdehn Siohwa kan, dahme kak seweseiuk en men nantihong pwe ken kak ale pwais kan nan mwomwohdiso? Dahme kesempwal iei ken “padokekihdi sapwellimen Koht manaman.” (Kal. 6:8, NW) Met kin pidada omw kin mourki mour me kin mweidohng sapwellimen Koht manaman en kaweid uhk. Koasoanehdi teng pwe ken dehr “padokedi mehkan en uduk.” Liksang mehn kamweit kan oh soahng kan me kin kaperenihuk de kansenamwahwihiuk ahpw kin katikala omw ineng en kalaudehla omw ahnsou en papah Koht. Kristian koaros anahne “padokekihdi sapwellimen Koht manaman,” oh kedekedeo ohl akan me kin wia met pahn kakehr ale pwais nan mwomwohdiso. Iren onop wet kin wiawihda ong ohl Kristian akan pwehki mie anahn laud ong sounsawas akan oh elder kan rahnwet. Kahrehda, se kangoange kumwail brother kan en kapakapki pwe kumwail en tehk mwahu iren onop wet.
Nantihong Wia Doadoahk Mwahu
4, 5. (a) Ohl akan me papidaisla kin ale kangoang en ale soangen pwais dah kan nan mwomwohdiso? (b) Ia duwen arail kak nantihong wia met?
4 Ohl Kristian emen sohte kak wiahla sounapwalih men ma e sohte kin nantihong. E anahne doadoahk laud pwe en kak ale “doadoahk mwahu” wet. (1 Tim. 3:1) Doadoahk wet kin pidada en papah ienge Kristian akan ni eh kin uhdahn apwalih arail anahn kan. (Wadek Aiseia 32:1, 2.) Ohl emen me kin nantihong ale pwais ni madamadau pwung sohte kin men siksang meteikan. Ahpw e kin wia kamwahu ong meteikan oh sohte kin roporop ong pein ih.
5 Emen me kin doadoahk laud pwe en wia sounsawas emen oh pil ale pwais en sounapwalih kin nantihong en kapwaiada kaweid kan nan Paipel duwen pwais pwukat. (1 Tim. 3:1-10, 12, 13; Taitus 1:5-9) Ma kowe emen ohl me papidaisla, idek rehmw: ‘I kin wia uwen ei kak en iang kalohk, oh sewese meteikan en pil wia met? I kin kakehlaka iengei Kristian teikan sang ni ei kin uhdahn nsenohki irail? E kin sansal me ngehi emen me kin perenki onopki Mahsen en Koht? I kin kamwahwihala ei pasapeng kan nan mihting? I kin nantihong ien kapwaiada mwahu ei pwukoa kan me elder kan kin kihong ie?’ (2 Tim. 4:5) Emen anahne medemedewe mwahu peidek pwukat.
6. Dahme emen kak wia pwehn kak ale pwais nan mwomwohdiso?
6 Pil ehu ahl en kak ale pwukoa kan nan mwomwohdiso iei en mweidohng sapwellimen Koht manaman en “kakehlakahda loalamwail.” (Ep. 3:16) Emen en wiahla sounsawas de elder men nan mwomwohdiso sohte kin kohsang usuhs, ahpw met kin kohsang eh kamwahwihala eh nanpwungmwahu rehn Siohwa. Ia duwen omw kak wia met? Iei omw pahn kin weweidki sapwellimen Koht manaman oh kapwarehda wa kan. (Kal. 5:16, 22, 23) Ni omw kasalehda irair kan me anahn pwe ken kak ale pwais kan nan mwomwohdiso, oh doadoahngki kaweid kan en kamwahwihala omw irair kan, aramas koaros pahn “kak kilang omw kekeirda.”—1 Tim. 4:15.
Anahne Ahneki Madamadau en Tounmetei
7. Dahme kin pidada en papah meteikan?
7 En papah meteikan kin pidada doadoahk laud oh pil ahneki madamadau en tounmetei. Pwehki sounapwalih kan kin wia silepen sihpw kei ni karasaras, re kin uhdahn nsenohki kahpwal kan me kin pwarada rehn pwihn en sihpw kan. Tehk ia duwen wahnpoaron Pohl eh kin mwekidki eh pwukoahn silepen sihpw. E ndaiong ienge me pwoson akan nan Korint: “Ihme I ntingwohng kumwail ni kapehd toutou, oh ni pwunod, oh ni sengloal, kaidehk pwe I en kansensuwedihkumwailla, a pwe kumwail en pehmada uwen ei limpoakohng kumwail.” (2 Kor. 2:4) E sansal me Pohl kin wia uwen eh kak koaros pwehn wia eh doadoahk.
8, 9. Menlau kihda karasaras kan sang nan Paipel me kasalehda ia duwen ohl akan ar kin apwalih anahn en meteikan.
8 Madamadau en tounmetei kin ahnsou koaros wia kilelepen ohl akan me doadoahk laud ong sapwellimen Siohwa ladu kan. Karasepe, kitail sohte kak medewehla Noha eh ndaiong eh peneinei met: ‘Kumwail kehsehkin ie iahd kakaudahn warihmwo pahn nek, eri I ahpw pahn iang kumwail.’ Moses sohte padahkihong mehn Israel kan nan Isip: ‘I nek tuhwong kumwail ni Sehd Weitahtao. Kumwail wia uwen amwail kak en lellahng wasao.’ Sosua sohte nda: ‘Kumwail nek kehsehkin ie iahd me kelen Seriko pahn pwupwudi.’ Oh Aiseia sohte idih emen tohrohr oh nda: ‘Io lahpo! Kadarala ih.’—Ais. 6:8.
9 Sises Krais ketin wiahda mehn kahlemeng me keieu mwahu ni eh kin mweidohng sapwellimen Koht manaman en kamwakid ih. E kupwurki en wia pwukoahn Sounkomour ong aramas akan koaros. (Sohn 3:16) Sises eh ketin tounmeteikihla pein ih pwehki limpoak sou kin kamwakid kitail en pil tounmeteikihla pein kitail? Emen me kin wia elder men ahnsou reirei kasalehda eh pepehm duwen tohnmwomwohdiso oh nda: “Sises eh mahsanihong Piter en apwalih sapwellime sihpw kan uhdahn kin kamwakid ie. I wehwehkihda ia duwen lepin lokaia de wiewia kadek kan ar kak kangoange emen. I kin uhdahn perenki wia silepen sihpw men.”—Sohn 21:16.
10. Dahme kak kamwakid ohl Kristian akan pwehn kahlemengih Sises en papah meteikan?
10 Me pid duwen sapwellimen Koht pelin sihpw kan, ohl akan me papidaisla nan mwomwohdiso uhdahn pahn men kasalehda madamadau en Sises me mahsanih: “I ahpw pahn kommoaleikumwailla.” (Mad. 11:28) Pwoson Koht oh poakohng mwomwohdiso kin kamwakid ohl Kristian akan ren nantihong ale doadoahk mwahu wet, oh sohte medewe me re wiahda tounmetei laud de doadoahko nohn apwal en wia. Ahpw ia duwen ma emen sohte men nantihong wia doadoahk wet? Brother men kak kakairada ineng en papah mwomwohdiso?
Kakairada Ineng en Papah
11. Ia duwen emen eh kak kakairada ineng en papah meteikan?
11 Ma ke saikinte nantihong pwe ken ale pwais nan mwomwohdiso pwehki ke pehm me ke sohte ahneki koahiek oh irair kan me anahn, ke kak kapakapki sapwellimen Koht manaman. (Luk 11:13) Sapwellimen Siohwa manaman pahn seweseiuk en powehdi omw pwunodki duwen ire wet. Ineng en papah kin kohsang Koht, pwe sapwellimen Siohwa manaman me kin kamwakid brother men en nantihong ale pwais oh kakehle ih en wia sapwellimen Koht doadoahk. (Pil. 2:13) Kahrehda e konehng en peki rehn Siohwa en ketin seweseiuk ken kalaudehla omw ineng en ale pwais en papah.—Wadek Melkahka 25:4, 5.
12. Ia duwen emen eh kak ale erpit pwe en kapwaiada pwukoa kan me kohwong ih?
12 Pwehki e kilang me anahn en pelin sihpw kan mwomwen apwal oh en apwalih arail anahn akan kahrehiong ih en doadoahk laud, Kristian emen ele pahn pilada en sohte ale pwais wet. De mwein e pehm me e sohte ahneki erpit en kapwaiada pwukoa pwukat. Ma ih duwen met, mwein e kak ale erpit sang ni eh kin pwerisek en onopki sapwellimen Koht mahsen oh pwuhk kan me wia sawaspen Paipel. Ele e pahn idek, ‘I kin koasoanehdi ahnsou ong onopki sapwellimen Koht mahsen, oh I kin kapakapki erpit?’ Tohnpadahk Seims ntingihedi: “Ma emen rehmwail anahne erpit, a en kapakap oh peki rehn Koht, oh Koht ahpw pahn ketikihong, pwe Koht me kupwursapan oh kalahngan ong aramas koaruhsie.” (Seims 1:5) Ke kin kamehlele iren Paipel wet? Ni eh ketin sapeng en Solomon kapakap, Koht ketikihong ih “loalokong oh wehwehki” me sewese ih en kak dehdehki dahme mwahu oh suwed ni eh kin kadeik. (1 Nan. 3:7-14) Mehlel, dahme wiawihong Solomon weksang kitail. Ahpw kitail kamehlele me Koht pahn ketikihong ohl akan me ahneki pwukoa erpit pwe ren kak apwalih mwahu sapwellime pelin sihpw.—Lep. Pad. 2:6.
13, 14. (a) Ia duwen Pohl eh kin mwekidki “limpoak en Krais”? (b) Ia duwen “limpoak en Krais” eh anahne kamwakid kitail?
13 Pil ehu sawas en kakairada ineng en papah meteikan iei en medemedewe duwen soahng koaros me Siohwa oh sapwellime Ohl ketin wiahiong kitail. Karasepe, medewehla 2 Korint 5:14, 15. (Wadek.) Ia duwen “limpoak en Krais” eh kin kamwakid kitail? Limpoak me Krais ketin kasalehda ni eh pwoukinkitailla nin duwen kupwuren Koht kin inenen laud. Kahrehda ni atail wehwehki oh kalahnganki limpoak wet eh wie lalaudla, mohngiongitail kin uhdahn mwekidki. Pohl mweidohng sapwellimen Krais limpoak en kamwakid eh wiewia kan. E kin keinepwihsang ih wiewiahn roporop oh sewese ih en akadeiong papah Koht oh aramas akan me mi nan mwomwohdiso de likin mwomwohdiso.
14 En doudouloale duwen limpoak me Krais ketin kasalehiong aramas akan kin kamwakid kitail en kalahnganki. Kahrehda, kitail pohnese me uhdahn e sohte konehng kitail en usehlahte “padokedi mehkan en uduk” sang atail kin rapahki mour ehu me ihte kaitarala pein atail ineng kan. Ahpw kitail wekidala atail mour pwehn mwohneki mahs doadoahk me Koht ketikihong kitail en wia. Pwehki limpoak, kitail men “uhpahpene” nanpwungatail. (Wadek Kalesia 5:13.) Ma kitail kin kilangwohng pein kitail nin duwen ladu kan me kin doadoahk ni karakarahk ong sapwellimen Siohwa ladu inoudahr kan, kitail pahn wauneki irail. Mehlel, kitail sohte pahn alasang irair en likesekeseu oh mwadang en kadeik me kin kohsang Sehdan.—Kaud. 12:10.
Peneinei Kin Sawaspene
15, 16. Dahme tohnpeneinei kin wia ma ohl emen pahn idihdida nin duwen sounsawas men de elder men?
15 Ma emen brother me pwopwoud oh naineki seri kan, elder kan kin tehk duwen eh irair en peneinei ma e konehng en wia sounsawas men de elder men. Mehlel, arail nanpwungmwahu rehn Koht oh adamwahu en eh peneinei kin pidada eh pahn idihdida. Met kasalehda kesempwalpen pwukoahn tohnpeneinei ni arail utungada arail pwoud oh arail pahpa ni eh kin nantihong papah ong kamwahupen mwomwohdiso nin duwen sounsawas men de elder men.—Wadek 1 Timoty 3:4, 5, 12.
16 Siohwa kin kupwurperenki tohnpeneinei en Kristian kan ni arail kin sawaspene nanpwungarail. (Ep. 3:14, 15) Tapwin peneinei en kin toupahrek ni eh kapwaiada pwukoa kan nan mwomwohdiso oh “apwalih mwahu” eh peneinei. Kahrehda, e kesempwal me elder men de sounsawas men en onop Paipel rehn eh pwoudo oh nah seri kan pwe koaros en kak paiekihda arail Kaudok en Peneinei me kin wiawi wihk koaros. E anahne kaukaule iang eh peneinei nan doadoahk en kalohk. Ni kahrepeohte, e kesempwal ong tohnpeneinei en sewese arail tapwi ni eh kin nannanti.
Ke Pahn Pwurehng Papah?
17, 18. (a) Ma emen brother solahr ahneki pwais nan mwomwohdiso, dahme e mwein anahne wia? (b) Madamadau dahieu me emen brother me papah nin duwen elder men de sounsawas men mahs kasalehda?
17 Ele kowe emen elder de sounsawas men mahs ahpw met solahr wia pwais wet. Ke poakohng Siohwa oh kak kamehlele me e kin ketin pousehlahte apwalihiuk. (1 Pit. 5:6, 7) Ia duwe, ke ale kaweid me ke anahne wia wekidekla kan? Ken pohnese me ke sapwungala oh nantihong kapwungkihla met sapwellimen Koht sawas. Ke dehr nsensuwedkihla. Ahpw loalokongkihla oh kasalehda madamadau pwung. Emen elder me papahki sounpar kei ahpw solahr ahneki pwais nan mwomwohdiso koasoia: “I koasoanehdi teng en kin towehda mihting kan, doadoahk en kalohk, wadawad en Paipel me duwehte mahs ni ei kin papah nin duwen elder men, mehn akadei ehu me I kak kapwaiada. I sukuhlki kanengamah pwehki I medewe me I pahn pwurehng ale pwais wet erein sounpar ehu de riau, ahpw e lel kereniong sounpar isuh mwohn ei kak pwurehng papah nin duwen elder men. Erein ahnsowo, mehn kangoang en dehr pwangada ahpw pousehlahte nantihong ale pwais nan mwomwohdiso uhdahn kin sewese ie.”
18 Ma kowe emen brother me mi nan irair wet, ke dehr nsensuwedkihla. Medemedewe duwen Siohwa eh ketin kapaiada omw doadoahk en kalohk oh omw peneinei. Kakehlaka omw peneinei en ahneki nanpwungmwahu rehn Koht, mwemweitla rehn me soumwahu kan oh kangoange me luwet akan. Ahpw keieu, ken kesempwalki omw pwais kaselel en kapinga Koht oh kalohki rongamwahu en Wehio nin duwen emen Sounkadehdehn Siohwa.a—Mel. 145:1, 2; Ais. 43:10-12.
Pwurehng Kasawih
19, 20. (a) Dahme ohl koaros me papidaisla anahne wia? (b) Dahme iren onop en mwuhr pahn kasalehda?
19 Anahnepen sounapwalih kan oh sounsawas kan kin inenen laud sang mahs. Ihme kahrehda kitail kin kangoange ohl koaros me papidaisla en pwurehng kasawih arail irair kan oh idek rehrail, ‘Ma I sohte wia sounsawas men de elder men, I anahne kasawih kahrepe kan me kahrehda ei sohte kin papah?’ Mweidohng sapwellimen Koht manaman en seweseiuk ken ahneki madamadau pwung duwen ire kesempwal wet.
20 Tohnmwomwohdiso koaros pahn kin paiekihda tounmetei me iengerail kan kin nannanti en kasalehda. Ni atail kin kadek oh sohte roporop, kitail ahneki peren me kin kohsang atail papah meteikan oh padokekihdi sapwellimen Koht manaman. Iren onop en mwuhr pahn kasalehda me kitail en dehr wia mehkot me uhwong kaweid en sapwellimen Koht manaman. Ia duwen atail kak liksang met?
[Nting tikitik me mi pah]
a Menlau kilang The Watchtower (lokaiahn wai), August 15, 2009, pali 30-32.
Ia Duwen Omw Pahn Sapeng?
• Dahme kokohp en Maika 5:5 kamehlelehiong kitail?
• Menlau kawehwehda dahme kin pidada madamadau en tounmetei.
• Ia duwen emen eh kak kakairada ineng en papah meteikan?
• Ia uwen kesempwal en sawas kan sang peneinei pwe ohl emen en kak papah nin duwen sounsawas men de elder men?
[Kilel kan nan pali 25]
Dahme ke kak wia pwe ken nantihong ale pwais nan mwomwohdiso?