Pahpa Oh Elder​—Kapwaiada Pwukoah Riau Pwukat

“Pwe ma aramas emen sohte ese duwen eh pahn apwalih pein eh peneinei, ah iaduwen eh pahn kak apwalih mwomwohdisohn Koht?”​—1 TIMOTY 3:5.

1, 2. (a) Nan tepin pahr kan en Kristian, iaduwen sounapwalih kiripw kan oh sounapwalih pwopwoud kan me sohte naineki seri kin kak apwalih riarail Kristian kan? (b) Iaduwen Akwila oh Persila kin wia mehn kalimeng ehu ong pwopwoud tohto rahnwet?

SOUNAPWALIH KAN nan mwomwohdisohn Kristian kan en mahs kin wia ohl kiripw kei de ohl pwopwoud kei me sohte naineki seri de ohl kei me naineki seri. Ni mehlel ekei Kristian ko kak idawen kaweid en wahnpoaron Pohl me e kihda nan nah keioun kisinlikou ong mehn Korint kan, irelaud 7, duwen en kolokol irair en kiripw. Sises mahsani: “A rehn ekei, sang ni pein nsenarail pwehki Wehin Koht re sohte kin men pwopwoud.” (Madiu 19:12) Soangen ohl kiripw pwukat, duwehte Pohl oh mwein ele ekei ienge werek kan me kin iang ih seilokseli, pahn kak saledek en seilokseli pwehn sewese rierail Kristian kan.

² Paipel sohte kasalehda ma Parnapas, Mark, Sailas, Luke, Timoty, oh Taitus me kiripw. Ma irail pwopwoud, e sansal me re saledek sang pwukoahn peneinei pwe ren kak seilokseli nan soangen doadoahk en kalohk kan. (Wiewia 13:2; 15:39-41; 2 Korint 8:16, 17; 2 Timoty 4:9-11; Taitus 1:5) Arail pwoud kan ele kin iang irail, duwehte Piter oh “wahnpoaron teikan,” me sansal kin kare arail pwoud kan ni arail kin seiloklahng wasa kan. (1 Korint 9:5) Akwila oh Persila kin wia karaspen pwopwoud ehu me kin men keseuseli, ni ara kin idawen Pohl sang Korint kohlahng Epsos, oh mwuri kohlahng Rom, oh pil pwurelahng Epsos. Paipel sohte kasalehda ma mie neira seri. Ara papah loaloapwot riera Kristian kan karehong “mwomwohdiso kan koaros en wehi kan” en kalahngankin ira. (Rom 16:3-5; Wiewia 18:2, 18; 2 Timoty 4:19) Rahnwet, mehlel me mie pwopwoud tohto me, duwehte Akwila oh Persila, kak papah mwomwohdiso teikan, ele ni arail kin keseulahng wasa kan me anahnpen kalohk me laud.

Pahpa oh Elder

3. Dahme kasalehda me elder kan nan tepin pahr kan en Kristian iei ohl pwopwoud kei me naineki seri?

³ E sansal me nan senturi keiou C.E., pali moaron en Kristian elder kan iei ohl pwopwoud kei me naineki seri kan. Ni ahnsou me Pohl kasalehda irair kan me ohl emen en akedeiong pwehn kak “wiahla kaunen mwomohdiso,” e kosoia me soangen Kristian menet pahn wia “emen me pahn apwahpwalih mwahu eh peneinei, oh nah seri kan pahn peikiong ni wahu unsek.”​—1 Timoty 3:1, 4.

4. Dahme elder pwopwoud kan me naineki seri anahne wia?

⁴ Duwen me kitail tehkehr, kaidehn idihd ehu sounapwalih men en naineki seri, de en pwopwoudla. Ahpw ma e pwopwoud, pwehn warohng wiahla emen elder de emen ministerial servant, Kristian men anahne kasalehda tapwi pwung oh limpoak ong ah pwoud oh kasalehda me pein ih kak kolokol nah seri kan en peikiong. (1 Korint 11:3; 1 Timoty 3:12, 13) Ma e luwetiohng apwalih tohnimwe met kak kihsang en brohtero pwukoah tohror kan nan mwomwohdiso. Dahme karehda? Pohl kawehwe: “Pwe ma aramas emen sohte ese duwen eh pahn apwalih pein eh peneinei, a ia duwen eh pahn kak apwalih mwomwohdisohn Koht?” (1 Timoty 3:5) Ma tohn ah peneinei sohte men peikiong, iaduwen meteikan pahn mwekidki met?

“Naineki Seri Kan Me Pwoson”

5, 6. (a) Dahme seri kan anahne kasalehda nin duwen me Pohl padahkiong Taitus? (b) Dahme elder kan me naineki seri anahne wia?

⁵ Ni ah kaweidih Taitus en idiada sounapwalih kan nan mwomwohdisohn Krihd, Pohl panauwihki: “Duwen me mah men eh uhdahn pahn pwung; duwen eh pahn pwoudiki lihtehmen, oh duwen nah seri kan ar uhdahn pahn souleng oh sohte kin tiahk suwed de sapeik. Pwehki sounkaweid en mwomwohdiso menet eh pahn apwahpwalih sapwelimen Koht doadoahk.” Ia wehwehn e warohng “naineki seri kan me uhdahn pahn souleng [pwoson]”?

⁶ Lepin lokaiao “seri kan me uhdahn souleng [pwoson]” kin wehwehkiong seri kan me inoukidahr ar mour ong Siohwa oh papdaisla de me pwulopwul kan me wie kekeiradahng inou oh papdais. Tohn mwomwohdiso uhdahn pahn kasik me nein elder seri kan pahn tiahk mwahu oh peik. E pahn sansal me elder men kin nantiong wia uwen ah kak koaros pwehn kekeirada pwoson rehn nah seri kan. Nanmwarki Solomon intingihdi: “Padahkihong kisin seri men duwen eh pahn momour, eri, e pahn tamatamante erein eh mour.” (Lepin Padahk 22:6) Ahpw iaduwen ma me pwulopwul men me aleiehr soangen kaian wet ahpw sohte men papah Siohwa de wiahda dihp toutou ehu?

7. (a) Dahme karehda e sansalki me kosonnedo nan Lepin Padahk 22:6 kak wekila? (b) Ma nain elder men seri men sohte pilada en papah Siohwa, dahme karehda met sohte pahn karehong eldero en mwadangete kohsang ah pwukoah?

⁷ E sansal me lepin padahk wet me sansalda mwowe kaidehn kosonned idihd ehu. E sohte kin irehdi koasoandi en pilipil saledek. (Deuderonomi 30:15, 16, 19) Ni ahnsou me pwutak emen de serepein emen lelehr sounpar me re kak alehda pwukoah kan, re anahne wiahda arail koasoandi me pid inou oh papdais. Ma elder men ni sansal kihdaehr sawas en pali ngehn me anahn, oh kaweid, oh kaian, ahpw me pwulopwulo sohte pilada en papah Siohwa, pahpao sohte pahn mwadang kohsang ah pwukoah nin duwen sounapwalih men. Ni pali teio, ma elder men naineki seri kan me saikinte lel soupar en alehda pwukoah kan me kin koukouson rehn pahpa oh nohno oh, koaros, kin luwetala ni pali ngehn oh lelohng nan apwal, pahpao solahr pahn kak “apwahpwalih mwahu eh peneinei.” (1 Timoty 3:4) Mouren wasaht iei me, e pahn sansal me sounapwali men kin nantiong uwen ah kak koaros en ‘naineki seri kan me uhdahn pahn souleng [pwoson] oh sohte kin tiahk suwed de sapeik.’a

Pwoudiki “Lih Emen me Soh Pwoson”

8. Ia pahn wiewiahn elder men ong ah pwoud me sohte pwoson?

⁸ Me pid Kristian ohl akan me pwoudiki me soh pwoson kan, Pohl intingihdi: “Ma ohl souleng men pwoudkidahr lih emen me sohte eh pwoson, liho ahpw inoukihda me e pahn werekiong ohlo erein eh mour, ohlo sohte pahn mweisang liho . . . Pwe . . . lih me sohte eh pwoson pil sarawihkilahr eh patehng ohl soulengo. Ma soh, wahnedira kan pahn rasehng nein me sohte ar pwoson kan; ahpw soh, pwe re me sarawi oh keniken pahn silangen Koht. Pwe, . . . ia duwen omw kak ese, ohl souleng men kowehn, ma ke kak komourala omw pwoudo de soh?” (1 Korint 7:12-14, 16) Lepin lokaiao “soh pwoson” wasaht sohte kin wehwehki me lih men me sohte ah pelien lamalam ahpw e kin wehwehki me lih emen me saikinte inoukihda ah mour ong Siohwa. E kak wia emen mehn Suhs, de me kin pwoson koht likamw kan. Rahnwet, elder men ele kin pwoudiki lih emen me iang ehu pelien lamalam tohror, de pwoudiki lih emen me sohte kin kamehlele Koht, de emen me kin kamehlele me sohte Koht. Ma liho men mihmihte rehn ohlo, ohlo endehr mweisang pwehki en liho pelien lamalam me weksang ah. Ohlo ‘uhdahn pahn kin pohnese me iei irail me luwet, oh irail uhdahn pahn waunekin irail,’ ni ah kin koapworopworki en komourala liho.​—1 Piter 3:7; Kolose 3:19.

9. Nan sahpw akan me kosonned en wasao kin mweidong pwopwoudo pwung en padahkiong neirail seri kan padahk kan en ahn emen emen pelien lamalam, iaduwen elder men en mwekidki met, oh dahme met pahn wiahiong ah pwukoah kan?

⁹ Ma sounapwaliho naineki seri, e pahn kasalehda tapwi pwung ni ah pahn wia ohl pwopwoud mwahu men oh pahpa mwahu men ni ah kekeirirailda ni “kaian oh lamalam en Siohwa.” (Epsos 6:4) Kosonned en sahpw tohto kin mweidohng pahpa oh nohno pwung en kihong neirail seri kan kaian en pelien lamalam. Nan soangen irair wet nohno pahn men kasalehda ah pwung ni ah pahn padahkiong nah seri kan padahk kan oh wiewia kan en ah pelien lamalam, ele me pahn pil iangahki wairaillahng ni ah ihmw sarawio.b Ahpw ni mehlel, seri kan anahne idawen arail insen mwakelekel me kaianda sang Paipel me pid endehr iang wia tiahk kan en kaudek likamw. Nin duwen tapwin peneinei, pahpao pahn kasalehda ah pwung en onop rehn nah seri kan oh wairaillahng mihding kan nan Kingdom Hall ahnsou kan me konehng. Ni ahnsou me seri kan lel sounpar me re kak wiahda pein arail koasoandi, re pahn pein koasoanehdi menia ahl ren idawen. (Sosua 24:15) Ma ienge elder teikan oh tohnmwomwohdiso kin kilang me e kin wiewia soang kan koaros me kosonned en sahpwo kin mweidong ih en wia pwehn kaianehda nah seri kan ni ahl pwung en padahk mehlel, eri e sohte pahn kohsang ah pwukoah nin duwen sounapwalih men.

‘Apwahpwalih Mwahu Eh Peninei’

10. Ia pwukoah keiou en elder men ma e pwopwoud oh naineki seri?

¹⁰ Pil ong elder men me wia pahpa men oh me ah pwoudo pil wia emen Kristian, e sohte mengei en koasoanehdi ah ahnsou oh pein ih ong ah pwoudo, nah seri kan, oh ah pwukoahn mwomwohdiso. Pwuhk Sarawi kin kasalehda sansal me Kristian pahpa men pwukoahki apwalih eh pwoudo oh nah seri kan. Pohl intingihdi: “Eri, ma emen sohte kin apwalih kiseh kan, ahpw mehlel uhdahn kisehn pein ah peneinei, e kahmahmkihlar eh pwoson, oh e suwedsang irail kan me sohte arail pwoson.” (1 Timoty 5:8) Nan kisinlikou ohte, Pohl kasalehda me ohl pwopwoud kante me kin kasalehda me re wia ohl pwopwoud mwahu oh pahpa mwahu me pahn kak wiahla sounapwali kan.​—1 Timoty 3:1-5.

11. (a) Ni ahl dahieu elder men en “apwalih pein ah peneinei”? (b) Iaduwen met kak sewese elder men en kapwaiada eh pwukoahn mwomwohdiso kan?

¹¹ Elder men anahne “apwalih” pein ah peneinei kaidehn ni wahr te ahpw pil ni pali ngehn oh pepehm. Nanmwarki loaloakong Solomon intingihdi: “Ke dehr kauwada imwomw oh koasoanehdi loale, ke lao kaunopada omw mwaht akan nan sapwomw, oh ke wehwehkiher me ke kakehr mour sang loale.” (Lepin Padahk 24:27) Eri nin doken eh kin apwalihong eh pwoud oh nah seri kan arail anahn en war, pepehm, oh mwemweit, sounapwalih men en pil apwalihong irail arail anahn en ni pali ngehn. Met pahn anahne ahsou​—ahnou kan me e sohte pahn kak doadoahngkiong apwalih pwukoahn mwomwohdiso. Ahw soangen ahnsou ehu me kin wiahda peneinei peren oh ngehnin. Imwilahn met, ma eh peneinei kin kelail ni pali ngehn, eldero sohte pahn doadoahngkihla ahnsou laud kedikedirepwki kahpwal kan me kin pwarada nan peneinei. Met pahn kasaledekla ah lamalam pwehn kak apwalih iren mwomwohdiso kan. Ah mehn kalimeng mwahu nin duwen ohl pwopwoud mwahu men oh pahpa mwahu men pahn wahdohng mwomwohdiso kating en pali ngehn.​—1 Piter 5:1-3.

12. Nan wiewiahn peneinei dahieu pahpa kan me wia elder en wia mehn kalimeng mwahu?

¹² Apwalih mwahu peneinei kin oarepene koasoanehdi ahnsoun moangehda onop en peneinei. E keiou kesemwpwal elder kan en kihda mehn kalimeng mwahu nan ire wet, pwe peneinei kelail kan me kin wiahda mwomwohdiso en pil kelail kan. Sounapwalih men en dehr kin nohn doadoahngkihla ah ahnsou soupisengkihla ekei pwukoahn mwomwohdiso me karehda solahr ah ahnsoun onop rehn ah pwoud oh nah seri kan. Ma soang wet kin wiawihong ih, e anahne pwurehng kousapalih ah koasoandi. Ele e anahne pwurehng wiahda ah koasoandi de katikitikihela ahnsou kan me e kin doadoahngkiong soang teikan, pil iangahki en dehr alehda ekei pwukoahn mwomohdiso ekei pak.

Epwel Touparek

13, 14. Kaweid dahieu “pwihn en ladu lelepek oh loaloakong” kihong elder kan me ahneki peneinei?

¹³ Kaweid duwen en katouparekih pwukoahn peneinei oh mwomwohdiso kaidehn mehkot kapw. Erein sounpar tohto “pwihn en ladu lelepek oh loaloakong kin kihong elder kan kaweid me pid met. (Madiu 24:45) Pohnangin sounpar 37 samwalaro, The Watchtower en Septemte 15, 1959, pali 553 oh 554, kaweidiki: “Mehlel, kaidehn imwilahn met kin pid iren katouparekih soang pwukat koaros me kitail anahne kihong atail ahnsou? Nan mehn tenek wet mweidong uwe ieu me konehng en kohwong pein omw peneinei. Ni mehlel Siohwa Koht sohte pahn ketin kasik me ohl emen en doadoahngkihla ah ahnsou kan koaros nan wiewia kan en mwomwohdiso, ni ah pahn sewese rie Kristian kan oh mehn impe kan en ale komour, ahpw sohte kin apwalih komouralahn pein tohnimwe. En ohl emen ah pwukoah keiou iei ah pwoudo oh nah seri kan.”

¹⁴ The Watchtower en Nopempe 1, 1986, pali 22, kaweidiki: “ Iang towehda kalohk nin duwen peneinei ehu pahn kakerennih kumwail pene, ahpw ke anahne kihda pein amw ahnsou oh kehl en pepehm pwehn kaitarahla anahn tohtor en nomw seri kan. Ihme karehda, touparek me anahn pwehn koasoanehdi ia uwen ahnsou ke kak doadoahngkihla ong. . .pwukoah kan en mwomwohdiso ni ahnsouwohte me ke kin pil apwahpwalih anahn en ‘irail ko me kisehn amw peneinei’ ni pali ngehn, pali en pepehm, oh pali war. [Kristian men] anahne ‘kapwaiada mahs arail pwukoa doadoahk ong arail peneinei.’ (1 Timoty 5:4, 8)”

15. Dahme karehda elder me mie eh pwoud oh nah seri anahne kupwurokong oh dehdehki?

¹⁵ Lepin padahk en Pwuhk Sarawi ehu mahsani: “Ihmw kan kin kokouda pohn poahson me poahsoanki kupwurokong oh dehdehki.” (Lepin Padahk 24:3) Ehi, pwe sounapwalih men en kapwaiada ah pwukoahn mwomwohdiso oh ni ahnsouwohte kakehle eh peneinei, e uhdahn anahne kupwurokong oh dehdehki. Nin duwen me Pwuhk Sarawi kasalehda, e ahneki pwukoahn epwel tohtosang ehu. Eh pwukoahn peneinei oh pwukoahn mwomwohdiso kin iang pidada. E anahne irair en dehdehki pwehn kak katouparekih pwukoah pwukat. (Pilipai 1:9, 10) E anahne kupwurokong pwehn kak koasoanehdi pwukoah dahieu me keiou kesemwpwal. (Lepin Padahk 2:10, 11) Ahpw uwen e pehm me e pwukoahki apwalih eh pwukoahn mwomwohdiso, e anahne pohnese me nin duwen ohl pwopwoud men oh pahpa men, eh pwukoah keiou me Koht ketikihong iei en apwalih oh komourala eh peneinei.

Pahpa Mwahu Kan me kin Pil Wia Elder Mwahu

16. Kapai dahieu elder men ahneki ma ih pil pahpa men?

¹⁶ Elder men me naineki seri tiahk mwahu kan kin wia kapai ehu. Ma e sukuhlkiehr en apwali mwahu eh peneinei, e kak sewese peneinei teikan nan mwomwodiso. E wehwehki mwahu arail kahpwal kan oh kak kihda kaweid me kasalehda dahme kin pein lelohng ih. E inenin kaperen, pwe elder kid kei nan sampah pwon kin pweida mwahu nin duwen ohl pwopwoud kan, pahpa kan, oh sounapwalih kan.

17. (a) Dahme ohl emen me wia pahpa oh pil elder en dehpa manokehla? (b) Iaduwen ekei tohn mwomwohdiso en kasalehda wehwe?

¹⁷ Pwe ohl emen me ahneki peneinei en kak wiahla elder, e anahne wia Kristian mah men, me nin doken e kin apwalih eh pwoud oh nah seri kan, pil kak koasoanehdi ah wiewia kan pwehn kak kihong meteikan nan mwomwohdiso ah ahnsou oh pein ih. En dehpa manokehla me ah doadoahk en apwalih sapwelimen Koht aramas kan kin tepiada sang nan ihmw. Ni arail kin ese me elder kan me pwopwoud oh naineki seri kin ahneki pwukoahn apwalih arail peneinei oh pwukoahn mwomwohdiso, tohn mwomwohdiso kan sohte pahn ngidingidki kawehla en elder kan arail ahnsou. Karaspe ehu, elder men me naineki seri kan me pahn sukuhl ni menseng en rahn mwuri ele sohte kak ahnsou koaros mihmi mwurin mihding en ni soutik kan. Tohn mwomwohdiso teikan anahne wehweki met oh kasalehda ese lamalam.​—Pilipai 4:5.

Kitail en Kesemwpwalki Neitail Elder kan

18, 19. (a) Atail kasawih 1 Korint irelaud 7 karehong kitail en pohnese dah? (b) Ia pahn atail lamalam ong soangen Kristian ohl pwukat?

¹⁸ Atail kasawih kisinlikou keiou en Pohl irelaud 7 ong mehn Korint kan karehong kitail en kilang me, mwurin ahn Pohl kaweido, mie irail ohl kiripw tohto me kin doadoahngki arail saledek pwehn papah mehkan me pid Wehio. Pil mie irail brother pwopwoud kid kei me sohte naineki seri me, ni arail kin apwalih mwahu arail pwoud kan, kin papah nin duwen sounapwalih kan nan district kan, nan circuit kan, nan mwomwohdiso, oh rahn ohpis kan en Watch Tower, oh arail pwoud kan kin utung irail nan doadoahk pwukat. Ikmwuri, nan mwomwohdisohn sapwelimen Siohwa aramas kan me kereniong lel me 80,000, mie pahpa tohto me kaidehn ihte kin apwalih limpoak arail pwoud kan oh neirail seri kan ahpw kin pil alehda ahnsoun papah riarail Kristian kan nin duwen silepe limpoak kei.​—Wiewia 20:28.

¹⁹ Wahnpoaron Pohl intingihdi: “Me mah kan me wiewia doadoahk mwahu duwehte sounkaweid kan, irail uhdahn pahn ale pweipwei laud, met me mehlel ong irail me kin doadoahk laudki arail padahk oh peneu.” (1 Timoty 5:17) Ehi, elder kan me kin apwalih mwahu arail peneinei oh mwomwohdiso warohng kitail en limpoakohg oh wauneki. Kitail en ni mehlel “wauneki aramas koaros me duwehte ih.”​—Pilipai 2:29.

[Nting tikitik kan me mi pah]

Kousapahl

◻ Dahme kitail esehki me elder tohto nan tepin pahr kan C.E. kin pil wia ohl kei me pwopwoud oh naineki seri?

◻ Dahme elder kan me pwopwoud oh naineki seri anahne wia, oh pwehkida?

◻ Ia wehwehn naineki “seri pwoson kan,” ahpw iaduwen ma nain elder seri men sohte pilada en papah Siohwa?

◻ Ni ahl dahkei elder men en “apwalih irail ko me tohn ah peneinei”?

[Kilel nan pali 30]

Peneinei kan me kelail kin pil wiahda mwomwohdiso kan en kelail