Ewen Kahk Kapahieu

Pilada Mwahu Kompoakepahmw kan

DAHME PAIPEL PADAHNGKI? “Ma ke pahn padahngki mehkot sang rehn me loalokong kan, ke pahn pil loalokongla.”​—Lepin Padahk 13:20.

IA KAHPWAL EN? Kompoakepatail kan kak kamwahwihala de kauwehla atail nsenamwahu. Arail mwekid oh lokaia pahn kamwakid mwomwen atail kin kilangwohng mour.—1 Korint 15:33.

Karasepe, medewe duwen dahme Paipel koasoiahki ohl 12 me pwurasang arail dawih Kenan. Pali laud en irail wahdo koasoi likamw ong mehn Israel ko duwen sahpw me re dawih oh kasawiho. Mendahki met, riemen irail koasoia dahme mwahu duwen Kenan oh nda me “sahpw mwahu ehu” mwo. Ahpw aramas ako alehda madamadau sapwung en lipoahrok 10 ko. Irail eri ‘sengisengki ar pwunod. Re ahpw lipahned.’​—Nempe 13:30–14:9.

Duwehte rahnwet, aramas tohto “kin lipahned oh kaulime meteikan.” (Sud 16) E apwal en kin kolokol nsenamwahu rehn kompoakepahmw me sohte kin itarki arail mour.

DAHME KE KAK WIA? Kasawih dahme kowe oh kompoakepahmw kan kin koasoia. Irail kin suweiki dahme re kin ahneki de irail kin kalapw kaulimki dahme sohte arail? Oh soangen kompoakepah dahmen kowe ong irail? Ke kin wia kompoakepahmw kan en peirin ong uhk? De ke kin kangoange irail en itarki dahme re ahneki?

Medewe mehn kahlemeng en Depit me pahn wiahla nanmwarki oh Sonadan nein Nanmwarki Sohl. Depit kin wie rukurukseli nan sahpw nahnahno. Nanmwarki Sohl perki Depit oh men kemehla ih. Mendahki Sonadan me uhdahn pahn wiahla nanmwarki mwurin eh pahpao ahpw e wiahla emen kompoakepahn Depit me keieu keren. Sonadan pohnese me Koht ketin idihada Depit pwehn uhd wiahla nanmwarki oh e pwungki sewese Depit.​—1 Samuel 19:1, 2; 20:30-33; 23:14-18.

Ke anahne soangen kompoakepah duwehte met, me kin nannanti en itarki dahme eh ahneki oh kin nsenohki dahme pahn keieu mwahu ong uhk. (Lepin Padahk 17:17) Ma ke men kompoakepahnki soangen aramas duwehte met, eri pein kowe pil anahne wia duwehte met.​—Pilipai 2:3, 4.

[Kilel nan pali 7]

Kompoakepahmw kan kin kamwahwihala de kauwehla omw nsenamwahu?