Sapwellimen Koht Manaman en Kaweid Uhk A Kaidehn Elen Madamadau en Sampah

“Kitail kin ale, kaidehn elen madamadau en sampah, ahpw manaman me sang rehn Koht, pwe kitail en kak ese mehkan me Koht kin ni kadek ketikihong kitail.”​—1 KOR. 2:12, NW.

1, 2. (a) Ni ahl dahieu me Kristian mehlel kan kin wie mahmahwen? (b) Peidek dah kan me kitail pahn tehkpene?

KRISTIAN mehlel kan kin wie mahmahwen! Atail imwintihtio me inenen kehlail, widing, oh koahieklahr nan mahwen. Mie nah dipwisou en mahwen ehu me kin uhdahn doadoahk mwahu me kalowedier pali moron en aramas akan. Ahpw kitail sohte anahne pehm me kitail luwet de sohte atail koapworopwor en powehdi. (Ais. 41:10) Mie neitail mehn perepe ehu me kak pelianda soangen uhwong koaros.

² Atail mahwen kin wiawi ni karasaras. Atail imwintihtio iei Sehdan me Tepil, oh dipwisou en mahwen me e kin keieu doadoahngki iei “elen madamadau en sampah.” (1 Kor. 2:12, NW) Mehn perepe me kitail kin keieu doadoahngki pwehn pelianda ahn Sehdan uhwong kan iei sapwellimen Koht manaman. Pwe kitail en pweida nan mahwen wet oh kolokolte atail nanpwungmwahu rehn Koht, kitail anahne peki sapwellime manaman oh pil kasalehda wah kan nan atail mour. (Kal. 5:22, 23) Eri, dahkot elen madamadau en sampah, oh ia duwen eh tapiada kamwakid aramas tohto? Ia duwen atail kak ese ma elen madamadau en sampah wet kin kamwakid kitail? Oh dahme kitail kak sukuhlki sang rehn Sises duwen atail en ale sapwellimen Koht manaman oh pelianda elen madamadau wet?

Dahme Kahrehda Elen Madamadau en Sampah Wet Rekla Wasa Koaros?

3. Ia wasa elen madamadau en sampah kohsang ie, oh dahme e kin wiahiong aramas?

³ Elen madamadau en sampah kin tepisang “kaunen sampah wet,” Sehdan, oh kin uhwong sapwellimen Koht manaman. (Sohn 12:31; 14:30; 1 Sohn 5:19) E kin kamwakid aramas akan oh kin kaweid irail pwe ren uhwong kupwuren Koht oh sapwellime koasoandi.

4, 5. Ia duwen elen madamadau me kohsang Sehdan eh tepida rekla wasa koaros?

⁴ Ia duwen madamadau wet me kohsang Sehdan eh tepida rekla wasa koaros? Keieu, Sehdan pitihdi Ihp nan mwetuwel en Ihden. E kamehlelehiong Ihp me en uhtohrda sang Koht pahn kamwahwihala eh mour. (Sen. 3:13) Ahpw e likamw douluhl! (Sohn 8:44) E pitihdi liho pwe en kasonge Adam en sapeikiong Siohwa. Pwehki pilipil me Adam wiahda, tohnsampah mihlahr nan dihp, oh met imwikihla ar kin men idawehn ahn Sehdan madamadau en sapeik.​—Wadek Episos 2:1-3.

⁵ Sehdan pil kamwakid tohnleng tohto me uhd wiahla ngehn saut akan. (Kaud. 12:3, 4) Arail uhwongada Koht wiawi mwohnte Nohliko ni mwehin Noha. Tohnleng pwuko kamehlele me e pahn wia kamwahu ehu ong irail ma re pahn kesehla dewerail nanleng oh idawehnla ni soh namenek ar ineng kan me sohte konehng ren ahneki. (Sud 6) Ngehn saut pwukat, me solahr ahneki paliweren aramas, kin sewese Sehdan “pitipitih sampah pwon.” (Kaud. 12:9) E kansensuwed pwe pali moron en aramas sohte kin pohnese me ngehn saut pwukat kin kamwakid irail.​—2 Kor. 4:4.

Elen Madamadau Wet Kin Kamwakid Uhk?

6. Iahd me elen madamadau en sampah kak kamwakid kitail?

⁶ Me tohto sehse ia duwen Sehdan eh kin kamwakid aramas, ahpw Kristian mehlel kan sukuhlki sang nan Paipel ia duwen eh kin wia met. (2 Kor. 2:11) Ni mehlel, elen madamadau en sampah sohte kak kamwakid kitail, ahpw ihte ma kitail mweidohng. Kitail en kasawih peidek pahieu me pahn kasalehda ma kitail kin mwekidki sapwellimen Koht manaman de elen madamadau en sampah.

7. Ia ehu ahl me Sehdan kin song en katohre kitail sang rehn Koht?

⁷ Dahme ei pilipil en mehn kamweit kan kin kasalehda duwen ngehi? (Wadek Seims 3:14-18.) Sehdan kin song en katohre kitail sang rehn Koht sang ni eh kasonge kitail en poakohng tiahk lemei. Tepilo ese me Siohwa ketin kalahdeki mehmen me kin poakohng tiahk lemei. (Lep. Pad. 6:16-19) Kahrehda, Sehdan kin song en doadoahngki pwuhk kan, kasdo, koul, oh pil video game kan pwe en kamwakid kitail en men wia tiahk samin oh tiahk lemei. Sehdan kin perenki ma kitail kin poakohng soahng suwed kan me e kin kasongehki kitail, mehnda ma kitail pil kin poakohng dahme pwung.​—Mel. 97:10.

8, 9. Soangen peidek dah kan kitail en idek rehtail me pid mehn kamweit kan?

⁸ Ni pali teio, sapwellimen Koht manaman kin kamwakid irail kan me kin ale met pwe ren mwakelekel, ahneki popohl rehn meteikan, oh diren kalahngan. Kitail anahne idek rehtail, ‘Ei pilipil en mehn kamweit kan kin sewese ie en kakairada irair mwahu kan?’ Erpit sang powe “sohte kin mwalaun.” Irail kan me kin mweidohng sapwellimen Koht manaman en kamwakid irail sohte kin padahngki duwen mwakelekel oh popohl ong mehn mparail kan oh pil ahnsowohte perenki kilang tiahk lemei oh tiahk samin nan imwarail kan.

⁹ Siohwa ketin kasik kitail en poadidi ong ih kelehpw. Ahpw Sehdan pahn itarkihte ma kitail pahn kaudokiong ih pak ehu, duwehte me e men Sises en ketin wia. (Luk 4:7, 8) Kitail en idek rehtail: ‘Mehn kamweit kan me I kin pilada kin sewese ie I en poadidi ong Koht kelehpw? Ei pilipil kan kin kahrehda en apwal de mengei ong ie I en pelianda elen madamadau en sampah? I anahne wekidala ei kin pilada mehn kamweit kan?’

10, 11. (a) Me pid kepwe kan, dahme elen madamadau en sampah kin kangoange aramas en wia? (b) Soangen madamadau dahieu Mahsen en Koht kin kangoange kitail en ahneki?

¹⁰ Ia ei madamadau ong kepwe kan? (Wadek Luk 18:24-30.) “Mehkan me aramas kin kilang oh ahnehda” oh noahrok kepwe kin wia kisehn elen madamadau en sampah. (1 Sohn 2:16) E kin kakairada ineng en kepwehpwehla rehn me tohto. (1 Tim. 6:9, 10) Elen madamadau wet kak kahrehiong kitail en kamehlele me en ahneki kepwe tohto pahn kihda epwel mwahu kohkohlahte. (Lep. Pad. 18:11) Ahpw Sehdan pahn kana ma kitail poakohng mwohni laudsang atail poakohng Koht. Kitail en idek rehtail, ‘Ei mour kin nsenohkihte kepwe kan?’

¹¹ Weksang met, Mahsen en Koht kin kangoange kitail en ahneki toupahrek ong mwohni oh en doadoahk laud pwehn apwalih pein kitail oh atail peneinei. (1 Tim. 5:8) Sapwellimen Koht manaman kin sewese irail kan me kin ale manaman wet pwe ren alasang sapwellimen Siohwa irair en kadek sapan. Irail kin kesempwalki aramas akan laudsang dipwisou kan oh perenki ehukihong meteikan dahme re ahneki ni ahnsou me re kak. (Lep. Pad. 3:27, 28) Re sohte kin kesempwalki arail naineki mwohni laudsang arail kin papah Koht.

12, 13. Weksang elen madamadau en sampah, ia duwen sapwellimen Koht manaman eh kak kamwakid kitail ni ahl mwahu?

¹² Ia duwe, ei irair kin kasalehda sapwellimen Koht madamadau de elen madamadau en sampah? (Wadek Kolose 3:8-10, 13.) Elen madamadau en sampah kin kangoange ahnepen aramas. (Kal. 5:19-21) Dahme kin kamwakid kitail kin sansalda kaidehn ahnsou me soahng koaros kin mwahu, ahpw ni ahnsou me kahpwal mie, duwehte ma emen riatail Kristian eh pohnsehsehla kitail, de kansensuwedihala kitail de wia dihp ong kitail. Pil ni ahnsou me kitail kin mihmi ni imwatail, ele e kin sansalda ma kitail kin mweidohng sapwellimen Koht manaman de elen madamadau en sampah en kamwakid kitail. Kitail anahne kasawih pein kitail. Idek rehmw, ‘Erein sounpwong weneu samwalahro, ei irair kin duwehla irair en Krais de e pwuralahng mwomwen ei kin lokaia oh wiewia suwed kan?’

¹³ Sapwellimen Koht manaman kak sewese kitail en ‘pwilikihdi mour mering en mahso iangahki eh wiewia kan’ oh ‘pwuhriong nan likoun mour kapw en aramas kapw.’ Met pahn sewese kitail en kalaudehla atail limpoak oh kadek. Kitail pahn kin men mahkohng meteikan, mehnda ma mie kahrepe kitail en kaulimki irail. Ni atail kin kilang sapwung kan, kitail solahr pahn kasalehda “mwakar koaros, soangen ineng suwed koaros, soangen lingeringer koaros, soangen men pei koaros, soangen lahlahwe koaros, soangen kailok koaros.” Ahpw kitail pahn nantihong en “loallamwahupene.”​—Ep. 4:31, 32.

14. Ia duwen me tohto nan sampah ar kin kilengwohng Mahsen en Koht?

¹⁴ I kin wauneki oh poakohng koasoandi en Paipel me pid tiahk? (Wadek Lepin Padahk 3:5, 6.) Elen madamadau en sampah kin uhwong Mahsen en Koht. Irail kan me kin mweidohng madamadau wet en kamwakid irail kin pohnsehsehla ire kan en Paipel me re apwalki kapwaiada. Re kin uhd pilada madamadau oh tiahk en aramas. (2 Tim. 4:3, 4) Ekei kin pohnsehsehla douluhl Mahsen en Koht. Irail kin peikasalki kesempwalpen oh mehlelpen Paipel, oh medewe me re loalokong. Irail katikala mehlelpen dahme Paipel koasoanehdi me pid kamwahl, ohl mwahuki ohl, lih mwahuki lih, oh mweipeseng en pwopwoud. Re kin padahngki me “me suwed me mwahu oh me mwahu me suwed.” (Ais. 5:20) Ia duwe, kitail kin mweidohng madamadau wet en kamwakid kitail? Kitail kin likih loalokong en aramas iangahki pein atail ni ahnsou me kitail lelohng kahpwal kan? De kitail kin nantihong idawehn kaweid kan en Paipel?

15. Dahme kitail anahne wia pwe kitail en dehr likihte pein atail loalokong?

¹⁵ Sapwellimen Koht manaman kin kahrehiong kitail en wauneki Paipel. Duwehte sounmelkahkao, kitail kin wiahki Mahsen en Koht serepatail oh kamarainpen alatail. (Mel. 119:105) Kitail sohte kin likih pein atail loalokong, ahpw kitail kin likih Mahsen en Koht en sewesei kitail kitail en ese dahme pwung oh dahme sapwung. Kitail sohte kin sukuhlki en waunekihte Paipel ahpw en pil poakohng kosonned kan en Koht.​—Mel. 119:97.

Sukuhlki Sang Sapwellimen Sises Mehn Kahlemeng

16. Dahme kitail anahne wia pwe kitail en ahneki “kupwur en Krais”?

¹⁶ Pwe kitail en ale sapwellimen Koht manaman, kitail anahne kakairada “kupwur en Krais.” (1 Kor. 2:16) Pwe kitail en ahneki sapwellimen Sises Krais elen madamadau, kitail anahne esehla mwomwen sapwellime madamadau oh wiewia kan oh kahlemengih. (Rom 15:5; 1 Pit. 2:21) Medewehla ekei ahl akan me kitail kak wia met.

17, 18. (a) Dahme kitail sukuhlki sang Sises duwen kapakap? (b) Dahme kahrehda kitail en “kaukaule pekipeki”?

¹⁷ Kapakapki sapwellimen Koht manaman. Sises kin louloukin sapwellimen Koht manaman en sewese ih mwohn eh lelohng kahpwal kan. (Luk 22:40, 41) Kitail pil anahne peki sapwellimen Koht manaman. Siohwa kin ketikihda sapwellime manaman ong koaros me kin peki reh ni pwoson. (Luk 11:13) Sises mahsanih: “Kumwail kaukaule pekipeki, kumwail ahpw pahn ale; kumwail kaukaule raparapahki, kumwail ahpw pahn diar; kumwail kaukaule letelet, e ahpw pahn ritidahng kumwail. Pwe koaros me kin peki kin ale, oh koaros me kin rapahki kin diar, oh koaros me kin letelet e pahn ritidahng.”​—Mad. 7:7, 8, NW.

¹⁸ Ni atail kin peki sapwellimen Siohwa manaman oh sawas, kitail en dehr mwadangete uhdi. Ele kitail anahne kapakapki ire ehu pak tohto oh pil kalaudehla ahnsoun kapakap. Ekei pak, Siohwa kin ketin mweidohng sapwellime aramas akan en kasalehda uwen laud en arail nsenoh oh mehlelpen arail pwoson mwohn eh kin ketin sapengla arail kapakap kan.a

19. Dahme Sises kin ahnsou koaros ketin wia? Dahme kahrehda kitail anahne kahlemengih?

¹⁹ Peikiong Siohwa ni unsek. Sises kin ahnsou koaros ketin wia soahng kan me kin kaperenda Semeo. Mie pak me dahme Sises men wia kin weksang kupwuren Semeo. Ahpw ni soh peikasal e patohwanohng Semeo: “Kaidehkin nsenei, pwe kupwuromwihte en pweida.” (Luk 22:42) Nna idek rehmw, ‘I kin peikiong Koht ni ahnsou me apwal?’ Atail peikiong Koht kin kesempwal ong atail mour. Kitail anahne peikiong ih ni unsek pwe ih me Sounkapikpatail, Utupen atail mour oh me kin ketin apwahpwalih kitail. (Mel. 95:6, 7) Eri, kitail uhdahn anahne peik, pwe ma soh a kitail sohte pahn kak ale kupwuramwahu en Koht.

20. Dahme Sapwellimen Sises mour kin pidada? Ia duwen atail kak kahlemengih?

²⁰ Esehla mwahu Paipel. Ni ahnsou me Sises ketin pelianda en Sehdan kasonge eh lelepek, e kin ketin doadoahngki iren Paipel kan. (Luk 4:1-13) Ni ahnsou me e ketin sapeng irail akan me kin uhwong ih, Sises kin ketin doadoahngki Mahsen en Koht. (Mad. 15:3-6) Sapwellimen Sises mour kin pidada eh mwahngih oh kapwaiada kosonned en Koht. (Mad. 5:17) Kitail pil men audehkihda atail madamadau Mahsen en Koht me kin kakehlaka atail pwoson. (Pil. 4:8, 9) Mwein ekei kitail kin apwalki rapahki ahnsou ong pein atail onop oh onop en peneinei. Kitail anahne koasoanehdi ahnsoun onop sang ahnsou kan me kitail kin doadoahngki ong soahng teikan.​—Ep. 5:15-17.

21. Koasoandi dahieu kitail kak doadoahngki pwe kitail en esehla mwahu oh doadoahngki Mahsen en Koht?

²¹ “Ladu lelepek oh loalokong” kin sewesekin kitail koasoandi en Kaudok en Peneinei ni soutik ong ehuehu wihk, pwe kitail en ahneki ahnsou ong pein atail onop oh pil onop en peneinei. (Luk 12:42) Ke kin doadoahngki mwahu koasoandi wet? Pwe ken ahneki madamadau en Krais, ke pahn kak kapatahiong nan omw koasoandi en onop ire kan me pid duwen padahk kan en Sises? Ke kak doadoahngki ire kan nan neitail sawasepen Paipel kan me pid sapwellimen Sises padahk kan, de pil pwuhken “Sukuhlki Sang Sounpadahk Lapalapo.” Ke sou ekei pak kapatahiong mepwukat nan omw koasoandi en Kaudok en Peneinei?

Kitail Kak Kalowehdi Sampah

22, 23. Dahme kitail anahne wia pwe kitail en kalowehdi sampah?

²² Pwe sapwellimen Koht manaman en kaweid kitail, kitail anahne pelianda elen madamadau en sampah. Met sohte mengei. Kitail anahne pei kehlail. (Sud 3) Ahpw kitail kak kana! Sises mahsanihong sapwellime tohnpadahk kan: “Sampah pahn kalokei kumwail, ahpw kumwail koapworopwor, pwe I kalowedier sampah!”—Sohn 16:33.

²³ Kitail pil kak kalowehdi sampah ma kitail kin pelianda eh elen madamadau oh wia uwen atail kak en ale sapwellimen Koht manaman. Ni mehlel, “ma Koht pahn ketin uhpalihkin kitail, ihs me pahn pelian kitail?” (Rom 8:31) Ni atail ale sapwellimen Koht manaman oh idawehn eh kaweid kan me mi nan Paipel, kitail pahn diar nsenamwahu, popohl, peren oh koapworopwor en mour soutuk nan sampah kapw me kerendohr.

[Nting tikitik me mi pah]

Ke Tamataman?

• Dahme kahrehda elen madamadau en sampah kin rekla wasa koaros?

• Peidek pahieu dah kan me kitail anahne idek rehtail?

• Soahng siluh dah kan me kitail sukuhlki sang Sises duwen ale sapwellimen Koht manaman?

[Kilel nan pali 10]

Ia duwen ekei tohnleng ar wiahla ngehn saut akan?

[Kilel nan pali 12]

Sehdan kin doadoahngki elen madamadau en sampah pwehn kamwakid kitail, ahpw kitail kak powehdi met