Koht Kin Ketin Kalokalokei Kitail?
“I leme tembatsu ieu met (kalokolok sang Koht), ahpw I poakehla irail kan me lelohng kahpwal wet.” Ih met me emen ohl en politik en Sapan koasoia mwurin rerrer en sahpw me kehlailki 9.0 oh iloak laud me lel sahpwo nan March 2011.
Ni ahnsou me aramas rielopw rienen (220,000) mehkihla rerrer en sahpw nan Haiti nan January 2010, emen ohl ndand sang pelien lamalam ehu me kin padahk nan TV koasoia me met wiawi pwehki aramas en wasao kin “miniminiong tepil” oh re anahne “sohpeiong Koht.”
“Kadeikpen loalatail melahr oh solahr kin katapanki mehkot, ihme kahrehda Koht kupwurki panginkitailda.” Iei me emen padre en Kadolik koasoia ni ahnsou me pokon en aramas ehu kohla ni kasarawi ehu pwe ren ale kisakis oh wiakinteieu tangalong oh tiakidi oh kemehla aramas 79. Met wiawi nan Manila, Philippines. Ehu doaropwehn rohng nan sahpwo ripohtki me “persent 21 en aramas laud kin kamehlele me Koht ketin sapwadada sapwellime engieng me kahrehda engk en sahpw, melimel, oh kahpwal teikan” kin kalapw lelohng sahpwo.
SANGETE mahs, aramas kin ahneki madamadau me dene Koht me kin ketikihdo soangen kahpwal pwukat pwehn kaloke aramas suwed kan. Nan pahr 1755, mwurin aramas 60,000 mehkihla rerrer en sahpw, kisiniei oh iloak laud me lel Lisbon, Portugal, emen ohl loalokong Voltaire peidengki: “Ia duwe, tiahk de wiewia suwed me kin kalapw dierek nan Lisbon laudsang Paris, wasa me mehkan me aramas kin perenki kin rek ie?” Ei, aramas tohto kin medemedewe ma mehlel Koht kin ketin doadoahngki soangen kahpwal pwukat pwehn kaloke aramas. Nan sahpw tohto, re kin kahdaneki soangen kahpwal pwukat doadoahk en Koht.
Pwehki soangen madamadau pwukat, kitail anahne idek: Mehlel ieu Koht kin ketin kalokehki aramas akan soangen kahpwal pwukat? Kahpwal laud me wiwiawi ahnsou wet iei kalokolok kei sang rehn Koht?
Pwehn kapwukoahnki Koht kahpwal pwukat, ekei kin doadoahngki iren Paipel kan me koasoia duwen Koht eh ketin doadoahngki keteu, rerrer en sahpw oh kisiniei pwehn kasorehla aramas. (Senesis 7:17-22; 18:20; 19:24, 25; Nempe 16:31-35) Ahpw petehkpen iren Paipel pwukat kin kasalehda me mwohn ehuehu mwekid pwukat, mie soahng siluh me weksang dahme aramas kin medewe. Keieu, Koht kin ketin padahkihong aramas akan dahme pahn wiawi. Keriau, kahpwal kan me kin wiawi ahnsou wet kin kemehla aramas mwahu oh pil suwed, ahpw Koht kin ketin pilada en kasohrehla aramas suwedte, de irail kan me sohte men rong sapwellime kehkehlik kan. Kesiluh, Koht kin ketikihda ahl ong aramas mwahu kan pwe ren kak pitila.—Senesis 7:1, 23; 19:15-17; Nempe 16:23-27.
Sohte mehn kadehde me Koht me kin ketin kahrehda kahpwal pwukat me kauwelahr mouren aramas tohto rahnwet. Pahn mie ahnsou ehu me kahpwal pwukat solahr pahn wiawi? Dahme kitail kak wia nan soangen irair pwukat? Kitail pahn diar pasapeng kan nan ire kan mwuhr.