Ong Irail Me Poakohng Siohwa, “Sohte Mehkot Me Kak Kahrehiong Arail Pahn Pwupwudi”

1. Ia duwen emen soun weiren tang eh kasalehda me e sohte pahn uhdihsang iang weiren tang kan?

MARY DECKER ndandla ni ahnsou me e iang weiren tang ahnsou me e pwulopwul. Nan 1984, e wiahla sounweiren tang marahra me kahrehda me tohto medewe me e pahn kana nan Olympic oh alehdi kohl metel. Ahpw mehkot kansensuwed wiawi. Nan erein weren tang me reireiki meter 3,000, e lel nehn emen sounweiren tang ko oh pwupwudi. E sohte kak kanekehla weiro, ahpw e sohte uhdihsang iang weiren tang kan. Mwotomwotsang sounpar ehu mwuhr, e iang weiren tang ehu me reireiki mwail ehu oh e marahra sang lih koaros me iangehr soangen weir wet.

2. Soangen weiren tang dah me Kristian kan kin iang? Ia duwen atail en tang nan weiren tang wet?

² Momour nin duwen Kristian kei kin duwehte atail mi nan weiren tang ehu. Weir wet iei weiren tang ong mour soutuk. Kitail en dehr mweidohng mehkot sohte lipilipil en kauhkitaildihsang atail tangatang nan weir wet. Kaidehn weiren tang mwotomwot ehu met me emen anahne tang marahra pwehn kana. Oh e pil kaidehn soangen weir me emen kin tang wawai oh ekei pak uhdi. Ahpw, e duwehte marosong. Emen me kin iang marosong anahne ahneki irair en dadaurete pwehn pousehlahte tangatang lao lel ni imwi. Wahnpoaron Pohl ntinglahng Kristian kan nan Korint: “Kumwail ese mwahu duwen uhpenehn sounweiren tang kan​—sounweiren tang kan koaros kin iang tang, ahpw mehtehmen rehrail me kin ale kisakis. Eri, ih pil duwen kumwail, kumwail tang idipek pwe kumwail en iang ale kisakis.”​—1 Kor. 9:24.

3. Ihs me kak kana nan weiren tang ong mour soutuk?

³ Paipel mahsanihong kitail en tang nan weir wet. (Wadek 1 Korint 9:25-27.) Kisakiso iei mour soutuk. Weksang weir teikan, koaros me kin iang weir wet kak ale kisakis ma re dadaurete lel ni imwi. (Mad. 24:13) Emen pahn luhs nan weiro ihte ma e uhdihsang idawehn kosonned kan de uhdi mwohn weiro eh pahn imwisekla. Ihte weir wet me kisakiso iei mour soutuk.

4. Dahme kahrehda e sohte mengei en iang weiren tang ong mour soutuk?

⁴ E sohte mengei en tang nan weiren tang ong mour soutuk. Sises Krais ketin iangehr tang nan weir wet oh sohte ketin pwupwudi. Sohte emen rehtail kak wia met. Seims nda me “kitail koaros kin kalap sapwungala.” (Seims 3:2) Atail soh unsek de ahn meteikan kak kahrehda kitail en wawaila nan weiren tango de uhdi ekis ahnsou. Ma met wiawi, kitail ele anahne sawas pwehn pwurehng iang tang. Kitail en dehr pwuriamweiki ma kitail kin pwurepwurehng pwupwudi.​—1 Nan. 8:46.

MIHMIHTE NAN WEIREN TANGO MEHNDA MA KE PWUPWUDI

5, 6. (a) Dahme kahrehda sohte mehkot kak kahrehiong Kristian kan ren pwupwudi? Dahme pahn sewese Kristian men en “pwurehng pwourda” ni eh pwupwudi? (b) Dahme kahrehda ekei sohte men “pwurehng pwourda” mwurin arail pwupwudi?

⁵ Dahme kitail kin wia ni ahnsou me kitail dipekelekel de pwupwudi kin kasalehda soangen aramas dah kitail. Ekei me kin dipekelekel de pwupwudi kin pwourda oh pousehlahte papah Koht. Ekei kin pilada ren sohte koluhla. Lepin Padahk 24:16 mahsanih: “Sohte katepen uwen tohtohn aramas lelepek men eh pahn pwupwudi, ahpw e kin pwurehng pwourda; ahpw kahpwal kin kamwomwala aramas suwed.”

⁶ Mehnda ma kitail dipekelekel de pwupwudi, kitail kak pwurehng pwourda. Erein atail pahn likih Siohwa, e pahn ketin kupwurki sewese kitail nan atail kahpwal kan de ni atail wiahda sapwung kan. E pahn ketin sewese kitail en “pwurehng pwourda” pwehki e ketin mwahngih me kitail poakohng ih. Ahpw aramas suwed sohte kin men pwurehng pwourda. Re kin soikala sawas en sapwellimen Koht manaman oh sapwellime aramas akan. Ong irail me poakohng sapwellimen Siohwa kosonned kan, Paipel mahsanih,“sohte mehkot me kak kahrehiong arail pahn pwupwudi.” Met wehwehki me kitail kak pwurehng iang weiren tang ong mour soutuk.​—Wadek Melkahka 119:165.

7, 8. Ia duwen emen eh kak “pwupwudi” ahpw kenikente rehn Koht?

⁷ Ekei pak emen kin wiahda dihp pwehki mie eh luwet. Ele e kin pwurepwurehng wiahda soangen sapwungohte. Ahpw Siohwa pahn ketin kilangwohng ih nin duwen emen me pwung ma e kin pwourda ahnsou koaros, me iei koluhla mehlel oh nantihong laud pwehn wia dahme pwung. Koht ketin kilangwohng mehn Israel kan nin duwen me pwung kei erein arail kin koluhkihla arail sapwung kan. (Ais. 41:9, 10) Lepin Padahk 24:16 sohte kasansalehda sapwung kan me kitail wiahda, ahpw e kasalehda me Siohwa pahn ketin sewese kitail en “pwurehng pwourda.” (Wadek Aiseia 55:7.) Siohwa Koht oh Sises Krais ketin kamehlele me kitail pahn wia uwen atail kak oh ketin kangoange kitail en “pwurehng pwourda.”​—Mel. 86:5; Sohn 5:19.

⁸ Mehnda ma soun tang men kin dipekelekel de pwupwudi nan marosong ehu, ele e pahn miehte ahnsou en pwourda oh pousehlahte tangatang ma e mwadang pwourda. Kitail sohte ese duwen “rahno oh ahnsowo” me kaimwiseklahn weiren tang ong mour soutuk pahn leledo. (Mad. 24:36) Ahpw ma kitail kin nantihong laud en dehr pwupwudi, e pahn mengei en pousehlahte tangatang nan weiro oh kanekehla. Eri, ia duwen atail pahn kak sohte pwupwudi?

SOAHNG KAN ME KAK KAHREHDA KITAiL EN PWUPWUDI

9. Soahng limau dah me kitail pahn koasoiapene?

⁹ Kitail pahn koasoiapene soahng limau me kak kahrehiong kitail en pwupwudi: atail luwet kan, ineng kan en uduk, wiewia sapahrek nan mwomwohdiso, apwal de kalokolok oh soh unsek en meteikan. Ma ehu rehn mepwukat kin kahrehiong uhk ken pwupwudi, tamataman me Siohwa kin ketin uhdahn kanengamah oh sohte pahn ketin mwadang medewe me ke sohte kin lelepek.

10, 11. Luwet dah kan me Depit ahneki?

¹⁰ Atail luwet kan kin duwehte kisin takai kan pohn ahl. Mouren Nanmwarki Depit oh wahnpoaron Piter kak padahkihong kitail duwen luwet riau. Depit sohte kin ahnsou koaros kaunda eh ineng oh pepehm kan, oh Piter kin ekei pak masak dahme aramas kin medewehki ih.

¹¹ Nanmwarki Depit sohte kin ahnsou koaros kaunda eh ineng oh pepehm kan. Pwehki luwet wet, e wiahda dihp rehn Padsipa. Mwuri, e kereniong peiong Napal me kauwe ih. Mendahki ekei pak Depit sohte medewe mahs mwohn e wia soahng kan, e sohte uhdihsang nantihong kaperenda Siohwa. Sang sawas en meteikan, e kak “pwurehng pwourda” mwurin eh wiahda sapwung kan.​—1 Sam. 25:5-13, 32, 33; 2 Sam. 12:1-13.

12. Mendahki e wiahda sapwung kan, ia duwen Piter eh mihmihte nan weiro?

¹² Piter kin masak dahme ekei kin medewehki ih. E kin kolokol eh lelepek ong Sises oh Siohwa, ahpw ekei pak masak kin kahrehda e wiahda sapwung. Karasepe, pak siluh e kahmahmkihla me e ese Sises. (Luk 22:54-62) Ehu ahnsou, eh wiewia ong ekei Kristian kin mwomwen me irail mwahusang Kristian teikan. Piter ahneki madamadau sapwung oh meteikan nan mwomwohdiso kakete alasang. Eri Pohl kihong Piter kaweid kehlail. (Kal. 2:11-14) Ia duwe, Piter nsensuwedkihla kaweid wet oh uhdihsang tang nan weiren tang ong mour? Soh. E medewe laud duwen dahme Pohl nda, wekidala eh madamadau oh mihmihte nan weiro.

13. Dahme kahrehda soumwahu kak kahrehda kitail en pwupwudi?

¹³ Soumwahu kak kahrehda atail mour en uhdahn apwal. Pwehki met, ekei kin uhdihsang arail tang nan weiro. Karasepe, sister men nan Sapan soumwahuda laud sounpar 17 mwurin eh papidaisla. E mweidohng eh soumwahwo en kahrehiong en luwetala nan padahk mehlel oh sohla iang kalohk oh mihting. Eri, elder riemen mwemweitla reh oh kangoange. Ni eh pwurala iang mihting, brother ko nan mwomwohdiso inenen kadek ni arail rahnmwahwih kahrehda e tepida sengiseng. Met riatailo pwurolongehr nan weiro.

14, 15. Dahme kitail en wia ma kitail ahneki ineng sapwung kan? Menlau kihda ehu karasaras.

¹⁴ Me tohto kin pwupwudi pwehki ineng kan en uduk. Ma kitail kin lelohng kasongosong pwehki atail ineng kan, kitail anahne wia soahng koaros me kitail kak pwehn kolokol atail madamadau oh wiewia kan en mwakelekel pwehn pahrekiong sapwellimen Koht kosonned kan. Sises mahsanih me ma pwoaren masatail de pehtail kin kahrehda kitail en pwupwudi, kitail en “kesehweisang” rehtail. Kitail en kihsang madamadau oh wiewia samin kan me kak kahrehda kitail en uhdihsang tang nan weiro.​—Wadek Madiu 5:29, 30.

¹⁵ Emen brother me tikida nan peneinei Kristian ehu nda me erein eh kak taman, e ahneki pepehm en mwahuki ohl. E nda me ahnsou koaros me e kin patehng meteikan, e kin soansuwed oh pehm me e mwomwen weksang irail. Ni ahnsou me e sounpar 20, e wiahlahr pioneer men oh sounsawas men nan mwomwohdiso. Eri e wiahda sapwung laud ehu oh ale peneu, oh elder kan sewese ih. E kapakap, onop Paipel oh kin nantihong sewese meteikan. Soahng pwukat koaros sewese en pousehlahte tang nan weiro. Met wiawi ahnsou werei samwalahro, ahpw e nda: “Ekei ahnsou, I kin ahnekihte soangen pepehm ko, ahpw I sohte kin mweidohng ren poweiehdi. I sukuhlki me Siohwa sohte pahn ketin mweidohng ken lelohng songosong laudsang me ke kakohng. Kahrehda I kamehlele me Koht ketin medewe me I kak pweida.” Brother menet sohte mweidohng mehkot sohte lipilipil en kihsang ih nan weiro. E ese me mour nan sampah kapwo kesempwalsang sohte lipilipil dahme e anahne dadaur ni ahnsou wet. E nda: “Lao lel ahnsowo, I pahn pousehlahte pei.”

16, 17. (a) Dahme sewese emen brother me medewe me dahme wiawihong ih sapahrek? (b) Dahme kitail en tamataman duwen mwomwohdiso pwe kitail en dehr pwupwudi?

¹⁶ Kitail kakete mweidohng pein kitail en pwupwudi pwehki wiewia sapahrek en meteikan nan mwomwohdiso. Nan France, emen brother me ehu ahnsou wia elder men medewe me dahme wiawihong ih sapahrek. E lingeringerda oh uhdihsang towehda mihting kan oh kalohk. Elder riemen mwemweitla reh oh rong kanahieng ni eh kawehwehda dahme e kamehlele wiawi. Ira kangoange ih en likih Siohwa oh katamankihong me dahme keieu kesempwal iei en wia dahme kin kaperenda Koht. E rong ara kaweido oh sohte pwand, e pwurolong nan weiro.

¹⁷ Kitail koaros anahne tamataman me Sises Krais iei me Koht ketin idihada en wia Tapwin mwomwohdiso. Kitail en dehr pwunodki dahme aramas soh unsek kan kin wia. Edin peren de pwoaren mesen Sises ko likamwete “mpwulen kisiniei.” E ketin wehwehki soahng koaros me kin wiawi nan mwomwohdiso laudsang atail kak. (Kaud. 1:13-16) Karasepe, ele kitail kin medewe me mie wiewia sapahrek ehu nan mwomwohdiso. Ahpw ni mehlel ele kitail sohte wehwehki dahme wiawi oh dahme kahrehda e wiawi. Sises kin ketin kapwungala kahpwal kan nan mwomwohdiso ni ahl oh ni ahnsou me konehng. Eri kitail en dehr mweidohng dahme Kristian teikan wia en kahrehiong kitail en pwupwusang nan weiro.

18. Ia duwen atail kak lokolok atail lelepek nan apwal de kalokolok?

¹⁸ Pil mie soahng riau me kak kahrehda kitail en pwupwudi. Meh riau pwukat iei apwal de kalokolok oh soh unsek en meteikan nan mwomwohdiso. Nan sapwellime karasaras duwen ohlo me kamwarak weren tuhkeo, Sises ketin kasalehda me ekei pahn pwupwudi pwehki ar lelohng “apwal ehu de kamakam” pwehki ar wia sapwellimen Koht aramas. Atail peneinei, mehn mpatail de koperment kak kahrehiong kitail apwal de kak kaloke kitail pwehki padahk mehlel. Emen ele uhdahn pahn mi nan keper en pwupwudi ma ‘kalewe kan sohte lel wasa loal,’ me wehwehki eh pwoson luwet. (Mad. 13:6, 21) Ahpw ma kitail koasoanehdi teng en karanih Siohwa, rohng en Wehio pahn sewese kalewetail kan en kehlail. Eri ni omw pahn lelohng kahpwal, doudouloale soahng kan me “kapingpe” mie. (Wadek Pilipai 4:6-9.) Siohwa pahn ketikihong kitail kehl pwehn kolokol atail lelepek nan kahpwal akan pwe kitail en dehr pwupwusang nan weiro.

19. Ia duwen atail kak dehr pwupwudi ma emen kansensuwedihkitailla?

¹⁹ Ekei uhdihsang papah Siohwa pwehki soh unsek en meteikan. De emen kakete pwupwudi pwehki meteikan wia soahng kan me kadeikpen loale sohte pahn mweidohng en wia. (1 Kor. 8:12, 13) Ma emen kansensuwedihkitailla, kitail pahn nsensuwedla oh kohkohsang padahk mehlel? Paipel mahsanih kitail en uhdihsang kadeik oh en mahkohng meteikan, mehnda ma kitail medewe me kitail me pwung. (Luk 6:37) Ma ke nsensuwedla, idek rehmw: ‘I kin kadeik meteikan poahsoankihdahte mwomwen ahi kin mwahuki wia mehkan? I pahn kohkohsang padahk mehlel ihte pwehki soh unsek en riei Kristian men?’ Atail limpoak ong Siohwa kak sewesei kitail en dehr mweidohng dahme meteikan wia en kauhkitaildihsang en kanekehla weiren tang ong mour.

DADAURETE OH DEHR PWUPWUDI

20, 21. Dahme ke pahn wia nan weiren tang ong mour soutuk?

²⁰ Ke men ‘kanekehla weir wet’? (2 Tim. 4:7, 8) Eri, onopki Paipel oh sawasepen Paipel kan, wia roporop oh doudouloale pwe ken kak ese soahng kan me kak kahrehda ken pwupwudi. Peki rehn Siohwa sapwellime manaman pwehn kakehlailih iuk. Tamataman, ma kitail dipekelekel de pwupwudi, kitail kak pwurehng pwourda oh tang lao lel ni imwin weiro. Ele kitail kak sukuhlki sang atail sapwung kan pwe kitail en kak tang mwahusang mwoweo nan weiro.

²¹ Paipel kasalehda me kitail en tang nan weiro lao lel ni imwi ma kitail men ale kisakis en mour soutuk. Ni atail tangatang, Siohwa pahn ketikihong kitail “saledek sang apwal” de popohl. (Mel. 119:165) E pahn ketin pousehlahte sewese kitail met oh pahn ketikihong kitail kapai kan me poatopoat ma kitail kanekehla weiro.​—Seims 1:12.