Komw Kak Dadaurete Lel Ni Imwi

“Kitail en nantihong nan atail mour me kitail tapihadahr, rasehng atail kin tang kehlail ni atail kin weirentang.”​—IPRU 12:1.

1, 2. Ia wehwehn kanengamah?

WAHNPOARON POHL ntingwong mehn Ipru Kristian akan nan keieun senturi oh mahsanih: “Kumwail uhdahn anahne kanengamah.” (Ipru 10:36, New World Translation) Pwehn kasansalehda ia uwen kesempwal irair wet, wahnpoaron Piter kangoange Kristian akan: “Kumwail en kapatahiong amwail pwoson . . . kanengamah.” (2 Piter 1:5, 6) Ahpw ia wehwehn kanengamah?

² Ehu pwuhk me kin kawehwehda lepin lokaia kan ni lokaiahn Krihk ong ni lokaiahn wai kin kawehwehda “kanengamah” ni lokaiahn Krihk nin duwen emen me pahn “mihmihete oh sohte pahn tang . . . kesihnendahte.” Ehu pwuhk kin kawehwehda lepin lokaia wet, “kanengamah” ni lokaiahn Krihk: “Kanengamah iei irair ehu me kak dadaurete soahng koaros, oh sohte pahn uhdi, ahpw pahn ahneki koapworopwor laud . . . Irair wet kin sewese ohl emen en kesihnendahte oh sohpeiong ahng kehlail. Oh irair wet pil kak sewese emen en ahneki madamadau me kahpwal laud me e kin lelohng kin wia mehkot lingan ong ih, pwe e kin kilanglahng palio sang medek me e ahneki oh kilang katingpe kan.” Kanengamah kin sewese emen en kesihnenda teng ni ahnsou e pahn lelohng kahpwal akan oh e sohte pahn kesehla eh koapworopwor. Ihs me keieu anahne en ahneki irair wet?

3, 4. (a) Ihs anahne dadaurete? (b) Dahme kahrehda kitail anahne dadaurete lel ni imwi?

³ Kristian akan koaros kin, ni karasaras, mih nan weiren tang ehu oh irairen kanengamah me kin kesempwal. Mpen sounpar 65 C.E., wahnpoaron Pohl ntingihdi mahsen kangoang wet ong ienge tohndoadoahk lelepek, Timoty: “I wiahier uwen ei kak nan mour wet, me rasehng weirentang, I kanekelahr weir wet, oh I pil kolokolete pwoson.” (2 Timoty 4:7) Ni ahnsou Pohl doadoahngki lepin lokaia pwukat “I kanekehlahr weir wet,” e kin karasaiong eh mour nin duwen Kristian men nan weiren tang ehu, mie wasahn tangatang oh mie imwio. Ni ahnsowo, Pohl kin kereniong lel ni imwin weiren tango, oh ni likilik e kin kilikilangwong ale katingo. Pohl mahsanih, “Eri, sang met kohla, kisakis en kopwung, me Kauno, sounkopwung pwung men pahn ketikihongie ni rahno.” (2 Timoty 4:8, NW) Pohl uhdahn wehwehki me e pahn ale katingo pwe e dadaurete lel ni imwi. Iaduwen kitail?

⁴ Pohl ntingwong irail akan me iang weiren tang wet pwehn kangoange irail oh mahsanih: “Kitail en nantihong nan atail mour me kitail tapihadahr, rasehng atail kin tang kehlail ni atail kin weirentang.” (Ipru 12:1) Nin duwen Kristian akan, kitail kin tepikihda tang nan weiren tang wet ni ahnsou kitail inoukihong Siohwa atail mour ki Sises Krais. En tapiada mwahu nan weiren tang wet nin duwen tohnpadahk men me kesempwal, ahpw me keieu kesempwal iei me kitail en kanokehla weiren tang wet. Sises mahsanih: “Ahpw me dadaurete lel ni imwi, ih me pahn mourla.” (Madiu 24:13) Mehn kating me kin awiawih irail koaros me pahn kanokehla weiren tang wet, iei mour soutuk! Ihme kahrehda, medemedewe duwen mehn akadei ehu, eri, kitail pahn anahne dadaurete lel ni imwi. Dahme pahn sewese kitail en lel atail mehn akadei?

Mwenge Mwahu​—Inenen Kesempwal

5, 6. (a) Pwehn dadaurete nan weirentang en mour, dahme kitail anahne wia? (b) Mehnia sawas kan ni pali ngehn kitail pahn anahne doadoahngki, oh pwekihda?

⁵ Karanih kahnimw en Korint, Krihs, iei wasa me Mwadong en Isthmus kin wiawi ni ahnsoun mahs. Pohl ese me Kristian kan nan Korint uhdahn wehwehki duwen mwadong kan oh siai teikan me kin wiawi wasao. Pwehn doadoahngkihte dahme re kin wehwehki, e kin katamankinirailla duwen weiren tang en mour me re kin iang: “Kumwail ese mwahu duwen uhpenehn sounweiren tang kan​—sounweiren tang kan koaros kin iang tang, ahpw mehtehmen rehrail me kin ale kisakis. Eri, ih pil duwen kumwail, kumwail tang idipek pwe kumwail en iang ale kisakis.” Pohl kawehwehda duwen ia uwen kesempwal sounweiren tang men en mihmihte nan weiren tango oh wonoweite lel ni imwi. Ahpw dahme pahn kak sewese irail en wia met? E kapataiong met, “Sounmwadong koaros kin ale kaiahn mwahu nan ar mwadong kan.” Ei, sounmwadong kan nan mwadong en mahs kin uhpaiong kaiahn apwal ehu, oh irail kin kanahieng dahme re pahn kang oh nim, oh kaiahne mwahu arail wiewia kan koaros pwehn kak kana.​—1 Korint 9:24, 25.

⁶ Iaduwen weiren tango me Kristian akan kin iang? Emen elder nan mwomwohdiso ehu en Sounkadehdehn Siohwa kan koasoia met, “Ke anahne tehk mwahu duwen omw ketinain ni pali ngehn ma ke men dadaurete nan weirentang en mour.” Tehk duwen dahme Siohwa, “Koht me kin ketkihda irairen kanengamah,’ kin ketkihong kitail me pid ketinain en pali ngehn. (Rom 15:5) Sapwellimen Koht Mahsen, Pwuhk Sarawi, kin kihda sawas me keieu kesempwal ong kakehlailda kitail ni pali ngehn. E soh kesempwal kitail en kolokolte koasoandi mwahu en wadek neitail Pwuhk Sarawi? Ki “ladu lelepek oh loalokong,” Siohwa pil ketkihda makisihn kan en The Watchtower oh Awake! oh sawaspen Paipel teikan. (Madiu 24:45) Kaukaule onop pwuhk pwukat pahn kak kakehlailda kitail ni pali ngehn. Ei, kitail anahne koasoanehdi atail ahnsou en​—‘isaneki ahnsou mwahu’​—ong wia pein atail onop.​—Episos 5:16.

7. (a) Dahme kahrehda kitail en dehr itarki en esehla ihte tepin padahk mengei kan en Kristian? (b) Iaduwen kitail kak “nantihong keirda pwehn mahla ni pali ngehn”?

⁷ Pwen tangatang nan weiren tang en tohnpadahk en Kristian, kitail anahne “pwilikihdi tepin padahk kan duwen rongamwahuwo” oh “nantihong keirda pwehn mahla ni pali ngehn.” (Ipru 6:1) Kitail anahne en kakairada loalatail “ia uwen lauden oh tehlap oh reirei, oh ile oh loal” en padahk mehlel oh ale katinain sang “kisin tungoal kekeluwak, iei ih me aramas koahieklahr kan kin tungoale.” (Episos 3:18; Ipru 5:12-14) Karasepe ieu, pwuhk likilik pahieu me kin koasoia duwen mouren Sises ahnsou me E ketiket sampah​—Rongamwahu en Madiu, Mark, Luk oh Sohn. Sang ni atail pahn onop mwahu pwuhken Rongamwahu pwukat, kitail sohte pahn ihte esehla sapwellimen Sises wiewia kan oh esehla soangen aramas dah ih, ahpw kitail pahn dehdehkihla ia kahrepen eh kin wia dahme e wia. Eri, kitail kak “audaudki kupwuren Krais.”​—1 Korint 2:16.

8. Iaduwen mihding en Kristian akan kin sewese kitail en dadaurete nan weiren tang en mour?

⁸ Pohl kangoange ienge pwoson akan: “Kitail nsenoh sawaspene ni kasalepen atail limpoak oh atail wiewia mwahu kan. Kitail dehr tokedihsang atail tiahk en pokonpene, duwen ekei ar kin epwehnki wia. A kitail nantihong kakehlaka nan kapehd en emenemen, pwe duwen amwail ese Rahnen Kauno kerendohr.” (Ipru 10:24, 25) Mihding kan en Kristian kin kangoange kitail laud! Oh e inenen kaperen oh kansenamwahu en mihmi rehn brother oh sister limpoak kan me kin nsenohkin kitail oh men sewese kitail en dadaurete lel ni imwi! Kitail en dehr mwamwahliki sawas limpoak pwukat me kohsang rehn Siohwa. Ki atail nantihong en wia pein atail onop Paipel oh kaukaule iang towehda mihding kan, kitail en “duwehte ohl mehlel koahiek men.”​—1 Korint 14:20.

Irail Akan me Kin Kilikilang Mwadong kan en Kangoange Iuk

9, 10. (a) Ni ahl dahieu irail me kin kilikilang mwadong ehu kak kihong sawas sounmwadong emen? (b) Ihs ‘Sounkadehde pwukat me tohto kapilkitailpenehr duwehte depwek kalaimwun ehu’ me kileledi nan Ipru 12:1?

⁹ Edetehn sounweiren tang men me kaunopada mwahu, mehkot kak wiawi me pahn kahrehda e sohte pahn lel ni imwio. Pohl idek rehn irail Kristian en mahs ko: “Amwail mouren Kristian pweida mwahu mahso; a ihs me irehdihsang kumwail en peikiong me mehlelo?” (Kalesia 5:7) Ekei Kristian akan en Kalesia me tepida werek suwed, oh imwikihla arail luwetala nan ahr weiren tang en mour. Ni pali teio, utuht oh kangoang sang rehn meteikan pahn kak sewese aramas en dadaurete nan weiren tang. Met kin duwehte pwihn en poudiahl en mwadong. Ahn pokono kin ngoangki ruwes pahn kak kangkakehlailih kapehden sounmwadong kan sang nin tepio lel ni imwio. Weriwer sang pokono, patehng keseng laud kan oh lopwolopw, pahn kak kihong sounmwadong kan soangen kangoang me anahn ni arail pahn nantihong lel ni imwio. Ni mehlel, irail akan me kin kilikilang mwadong ehu pahn kak kihda sawas laud ong irail sounmwadong kan.

¹⁰ Nan weiren tang en mour me Kristian akan ieiang, ihs irail me kin kilikilang weiren tang wet? Nin duwen me ntingihdi nan Ipru irelaud 11, Pohl kin koasoia duwen sapwellimen Siohwa sounkadehde lelepek kan me kin memour mwohn Sises ketiket sampah, oh Pohl ntingihdi met: “Sounkadehde pwukat me tohto kapilkitailpenehr duwehte depwek kalaimwun ehu, . . . oh kitail en nantihong nan atail mour me kitail tapihadahr, rasehng atail kin tang kehlail ni atail kin weirentang.” (Ipru 12:1) Ni ahnsou me Pohl doadoahngki lepin lokaia depwek, e sohte doadoahngki lepin lokaia ni lokaiahn Krihk me kin wehwehki depwek sansal ehu nin duwen ia uwen laud oh mie mwomwe. Ahpw, emen me samanih wiahda dictionary, W. E. Vine kawehwehda lepin lokaia wet nin duwen “duwehte mehkot me mwomwe soh sansal ahpw kalaimwun nanleng.” Ni sansal, Pohl kin medemedewe duwen pokon en sounkadehde kan​—me ngederie, me kin rasehng depwek mosul.

11, 12. (a) Iaduwen sounkadehde lelepek kan me kin memour mwohn Sises ketiket sampah kak kangoange kitail en dadaurete nan weiren tang ehu? (b) Iaduwen kitail kak paiekihda laud sang ‘depwek kalaimwun en sounkadehde kan’?

¹¹ Irail Sounkadehde lelepek kan me memour mwohn Sises ketiket sampah kakete wiahla, ni karasaras, duwehte irail me kilikilang mwadong ehu nan atail ahnsou? Uhdahn soh. Pwe irail koaros mehlahr, awiawih ahnsoun kaiasada. Ahpw, ni ahnsou re memour, irail wiahla sounweiren tang kei me kin pweida mwahu, oh ahr mehn kahlemeng mwahu kin ntingihdi nan Paipel. Ni ahnsou me kitail kin onop iren Paipel kan, aramas lelepek pwukat pahn kak, ni karasaras, mourada nan atail madamadau kan oh kangoange kitail en dadaurete lel ni imwio.​—Rom 15:4.a

¹² Karasepe ieu, ni ahnsou me kasongosong en sampah wet pahn kasonge kitail, e soh pahn kangoange kitail ma kitail pahn wadek duwen Moses ni eh sohte lohdi pahn kasongosong kan nan Isip? Ma kitail pahn lelohng kasongosong laud ehu, tamataman duwen kasongosong laud ehu me Eipraam lelohng ni ahnsou me Koht padahkiong ih en meirongkihla nah pwutak Aisek, met pahn kangoange kitail en dehr kesehla atail pwoson. Ia uwen laud ‘depwek kalaimwun’ en sounkadehde pwukat kin kamwekid kitail pahn pidada ia uwen laud atail kin wehwehkin irail.

13. Ni ahl dahieu me Sounkadehdehn Siohwa kan nan atail ahnsou kamwekid kitail en wonowei nan weirentang en mour?

¹³ Nan rahnpwukat, Sounkadehdehn Siohwa tohto kin kapilpene kitail. Irail Kristian keidi kan oh pil ohl oh lih en “pokon kalaimwun” kin wia mehn kahlemeng mwahu nin duwen aramas me kin pwoson! (Kaudiahl 7:9) Kitail kak wadek duwen poadopoad en arail mour nan makisihn en The Watchtower oh pil nan pwuhk kan me Watch Tower Society kin ntingda.b Ni ahnsou me kitail kin medemedewe duwen arail pwoson, kitail kin ale kangoang en dadaurete lel ni imwi. Oh ia uwen kaselel en ale utuht sang kompoakpatail keren kan oh pil atail peneinei me kin pil papah Siohwa ni lelepek! Ei, mie aramas tohto me kin kangoange kitail en wonoweite nan weiren tang en mour.

Ite Mwahu Ia Uwen Marahra En Ahmw Tang

14, 15. (a) Dahme kahrehda e kesempwal kitail en pein koasonehdi mwahu ia uwen marahra kitail kak pein tang? (b) Dahme kahrehda kitail en ni toupahrek wiahda atail mehn akadei kan?

¹⁴ Ni ahnsou me sounweiren tang men pahn iang tang nan marason ehu, e anahne koasonehdi mwahu ia uwen marahra e pahn tang. Ehu makisihn me adaneki New York Runner koasoia met, “Ma ke nok tang marahra nin tepin weiren tang ehu pahn kahrehong uhk en sohte pweida. Met pahn kahrehong uhk en ngetda ni imwin tangatang de pil kak kahrehong uhk en uhdi nan lukepen weiren tang. Emen soun marason tamanda: “Sounruwese men me song en sewese kiht en kaunopada ong weiren tang kihda kaweid wet: ‘Dehr pwakih aramas me tangatang tieng. Iteongete mwahu ia uwen tangatang me ke pahn wia. Pwe ma soh, ke pahn pwangada oh uhdi sang tang.’ Ni ahi kapwaiada kaweid wet, e sewese ie en pweida nan weiren tango.”

¹⁵ Nan weiren tang en mour, sapwellimen Koht ladu kan anahne idipek. (Luk 13:24) Ahpw, tohnpadahk Seims, ntingihdi: “Erpit me kin sang powe . . . iei kin toupahrek.” (Seims 3:17) Mehlel, mehn kahlemeng mwahu en meteikan kin kangoange kitail en kalaudehla dahme kitail kin wia ni atail kin papah Siohwa, ahpw, ma kitail pahn ahneki madamadau en tohpahrek, e pahn sewese kitail en wiahda mehn akadei kan me konehng oh pwung ong pein atail irair kan. Iren Paipel wet kin katamankin kitail: “Emenemen en pein kasakasawih pein eh wiewia kan. Ma eh wiewia kan me mwahu, eri, e kak pohnmwahsohki; a ieremen e kapahrekiong en meteikan ar wiewia kan. Pwe emenemen kitail koaros uhdahn pahn pein wa eh wisik.”​—Kalesia 6:4, 5.

16. Iaduwen irair en karakarahk kin sewese kitail en koasoanehdi ni pwung ia uwen laud kitail pahn kihwei?

¹⁶ Nan Maika 6:8, peidek loal kin kohwong kitail: “Eri, iet me Kauno [“Siohwa,” NW] kin ketin kupwurki kitail en wia . . . peikiong atail Koht ni karakarahk.” Karakarahk kin wehwehki me emen pahn pohnese duwen ah luwet akan. Soumwahu de mahla me kin kerempwa kitail nan atail doadoahk en papah Koht? Kitail en dehr nsensuwedki met. Siohwa kin perenki kilang kitail en wia atail meirong ong ih nin duwen ‘uwen me kitail pahn kak kihwei, ahpw e sohte pahn kupwurperenki atail kihwei mehkot me kitail sohte kakohng.’​—2 Korint 8:12; pil kilang Luk 21:1-4.

Kitail Kainenehiongete Kapehditail kan ong Kating

17, 18. Dahme Sises kilangwong pwen sewese ih en dadaurete pahn kalokolok en tuhkeo?

¹⁷ Ni ahnsou me Pohl kawehwehong Kristian akan nan Korint duwen anahnepen dadaurete nan weiren tang en mour, e pil padahkiong irail mehkot kesempwal re en wehwehki me kin pid Mwadong en Isthmus kan. Pohl ntingihdi duwen sounmwadong kan en mwadong pwukat: “Sounmwadong koaros kin ale kaiahn mwahu nan ar mwadong kan, pwe re en kin alehdi elin kapwat ehu, ahpw e kin mwadang sohrala; a kitail kin ngidingid alehdi mwar ehu me pahn poatopoat. Ihme I sohte kin tang, pweiengki; oh ihme I kin pei, rasehng sounpaker men me sohte kin pakepakere mwahl nan wehwe.” (1 Korint 9:25, 26) Kating en sounmwadong me kana ong mwadong kan en mahs, iei nihn ehu, me wiawihkihda tehn tuhke pine de tehn tuhke teikan, de pil sang wahntuhke celery me ohla​—ni mehlel “nihn ehu me kin mwadang sohrala.” Ahpw kating dahieu kin kohwong Kristian akan me kin dadaurete lel ni imwi?

¹⁸ Wahnpoaron Pohl ntingihdi duwen atail Mehn Kahlemeng Mwahu, Sises Krais: “A, pwehki peren me e kasikasik, e sohte mwahn kupwurohkihla kanamenekpen eh pahn pwoula nin tuhkeo; eri, ahnsou wet e ketiketier ni palimaun en mwoalen Koht.” (Ipru 12:2) Sises dadaurete lao lel ni imwin eh mour en aramas pwehki e sohte ihte medemedewe kalokolok me e pahn lelohng ni e pahn pwoula nin tuhkeo, ahpw e kin kasikasik katingo, me kin pid peren me e kawauwih mwaren Siohwa, oh tomwki aramas akan, oh kakaun nin duwen Nanmwarki oh Samworo Lapalap men ni ahnsou me e pahn sewese aramas peik kan en mour soutuk nan paradais nin sampah.​—Madiu 6:9, 10; 20:28; Ipru 7:23-26.

19. Dahme kitail anahne medemedewe ni ahnsou me kitail kin wia atail doadoahk en Kristian?

¹⁹ Kitail en medemedewe duwen peren me mih mwohtail ma kitail pahn nantihong mourki mour en Kristian. Siohwa ketikihong kitail doadoahk katapan ehu en kalohki Rongamwahu en Wehin Koht oh ehukihong aramas akan loalokong pwung me kohsang Pwuhk Sarawi me kak doarehla arail mour. (Madiu 28:19, 20) Ia uwen kaperen en diarada emen me kin perenki esehla Koht mehlel oh en sewese ih tepida tang nan weiren tang en mour! Oh mehnda ma aramas akan pahn perenki rong de soh, met kin wia pwais kaselel ehu en iang doadoahk ehu me kin kasarawihla mwaren Siohwa. Ni ahnsou me kitail kin dadaurete nan doadoahk en kalohk, mehnda ma aramas akan sohte kin perenki rong de ekei kin uhwong kitail, kitail kak ahneki peren, pwehki kitail kin kaperenda Siohwa. (Lepin Padahk 27:11) Oh kating keieu kaselel me e inoukihong kitail iei mour soutuk. Ia uwen kaperen ni ahnsowo! Eri, kitail anahne medemedewe duwen kapai pwukat oh nantihong dadaurete nan weiren tang wet.

Ni En Imwi Ah Kerendohr

20. Ni ahnsou imwio wia kerendohr, iaduwen weirentang en mour pahn apwalla?

²⁰ Nan weiren tang en mour, kitail anahne pelianda atail imwintihti, Sehdan me Tepil. Ni en imwio kerendohr, e kin nantihong kadipekelekel kitail de kalomwetih kitail. (Kaudiahl 12:12, 17) E sohte mengei en wiahla sounkalohk en Wehio inouda lelepek kan, mendahki mahwen kan, duhpek kan, soumwahu lusulus kan, oh kahpwal teikan me kin kileledi “ahnsou imwio.” (Daniel 12:4, NW; Madiu 24:3-14; Luk 21:11; 2 Timoty 3:1-5) Oh pil, ekei pak, imwio kin mwomwen doh ong kitail, keieu ma kitail me tepida sangete mahs iang weiren tang en mour. Ahpw, Sapwellimen Koht Mahsen kin kamehlelehong kitail me imwio pahn uhdahn kohdo. Siohwa mahsanih me e sohte pahn pwand. Imwio kerendohr.​—Apakuk 2:3; 2 Piter 3:9, 10.

21. (a) Dahme pahn kak kakehlailkihda kitail en nantihong pousehla nan weirentang en mour? (b) Ia atail mehn akadei nin duwen imwio wia kerendohr?

²¹ Pwehn pweida nan weirentang en mour, eri, kitail anahne ale sawas sang dahme Siohwa ketkihong kitail ong ketinain en pali ngehn. Kitail pil anahne ale kangoang sang atail pahn werekiong iengatail pwoson akan, me kin pil iang weiren tang en mour. Mehnda ma kalokolok laud oh paisuwed kan kin kahrehong atail weirentang en apwal, kitail kak dadaurete lao lel ni imwi pwehki Siohwa kin ketkihong kitail “manaman lapalap eh uhdahn sapwellimen Koht, a kaidehk aht.” (2 Korint 4:7) Ia uwen kansenamwahu en ese me Siohwa kin kupwurki kitail en lel ni imwio! Eri, kitail en ngoangkihte, “nantihong nan atail mour me kitail tapihadahr, rasehng atail kin tang kehlail ni atail kin weirentang,” oh kitail uhdahn kak likih me “ma kitail sohte pahn pwangahkihda, ahnsou pahn leledo kitail ahpw pahn dolung.”​—Ipru 12:1; Kalesia 6:9.

[Nting tikitik me mi pahs]

Komw Tamanda?

◻ Dahme kahrehda kitail anahne dadaurete lao lel ni imwi?

◻ Sawas dah kei me kin kohsang rehn Siohwa me kitail en dehr soikala?

◻ Dahme kahrehda e kesempwal kitail en koasoanehdi ni pwung ia uwen marahra kitail kak tang?

◻ Peren dahieu pahn kohwong kitail ma kitail pahn pousehlahte nan weirentang en mour wet?

[Kilel nan Pali 28]

Ale kangoang sang mihding en Kristian kan