Nantihong Tang ni Kanengamah nan Weiro

“Kitail en nantihong . . . atail kin tang kehlail ni atail kin weirentang.”​—IPRU 12:1.

1, 2. Dahme Paipel karasahkihong mouren Kristian mehlel kan?

EHUEHU pahr aramas tohto nan sampah kin iang marasong kan. Ekei me kin iang soangen weirentang pwukat uhdahn marahra oh re men kana. Ahpw pali laud en sounweiren tang teikan ese me re sohte kak kana. Dahme keieu kesempwal ong irail iei ren kanekehla weiro.

² Paipel pil koasoia duwen weirentang ehu. E kawehwehda me mwomwen mour en Kristian mehlel kan kin rasehng weirentang me pahn mie kisakis. Irail akan me kin nantihong mour nin duwen Kristian kan oh loalopwoatohng Siohwa kin duwehte sounweiren tang kan me men kanekehla weiro. Wahnpoaron Pohl ntingihedi duwen soangen weirentang wet nan nah kisinlikou ong Kristian kan nan Korint. E koasoia: “Kumwail ese mwahu duwen uhpenehn sounweiren tang kan​—sounweiren tang kan koaros kin iang tang, ahpw mehtehmen rehrail me kin ale kisakis. Eri, ih pil duwen kumwail, kumwail tang idipek pwe kumwail en iang ale kisakis.”​—1 Kor. 9:24.

3. Ia wehwehn dahme Pohl nda me mehtehmen me kin ale kisakis?

³ Eri ni Pohl eh koasoia me mehtehmen me kin ale kisakis, met wehwehki me Kristian tehmen me pahn ale kisakis en mour? Soh. E kin koasoakoasoia kahrepen sounweiren tang kan ar kin weir. Kristian kan nan Korint ese me sounweiren tang koaros kin akadeiong kana, mehnda ma emente me pahn ale kisakis. Ihme kahrehda sounweiren tang koaros kin kaunopada mwahu oh tang uwen arail kak koaros. Re kin nantihong pwe ren kana. Pohl men rie Kristian ko ren nantihong pwe ren loalopwoatohng Siohwa oh kanekehla weiro. Kristian koaros me kin wia soahng wet kak alehdi kisakis en mour soutuk.

4. Dahme kitail anahne ese duwen weirentang me Kristian kan kin wia?

⁴ Koasoi pwukat kin kangoange kitail ahpw pil ahnsowohte kahrehiong kitail en medewe mwahu mwomwen atail mour. Ma mwomwen atail mour kin kaperenda Siohwa, kitail ahneki koapworopwor kaselel en mour kohkohlahte nanleng de nan Paradais nin sampah. Ahpw mouren Kristian kan rasehng weirentang reirei ehu nan ahl ehu me diren keper. Mie soahng tohto me kak kahrehiong kitail en tang wawai de kauhkitaildi sang atail kin papah Siohwa. (Mad. 7:13, 14) Met wiawihongehr ekei sapwellimen Siohwa ladu kan. Soangen lidip oh keper dah kan me mi nan weirentang en mour? Ia duwen omw kak pereiukasang mepwukat? Dahme ke kak wia pwe ken kanekehla oh kana nan weiro?

Kitail Anahne Dadaur Pwehn Kana

5. Dahme Pohl kawehwehda nan Ipru 12:1?

⁵ Pohl ntinglahng Kristian mehn Suhs kan nan Serusalem oh Sudia. E pil pwurehng koasoia duwen sounweiren tang kan. (Wadek Ipru 12:1.) E kawehwehda kahrepen Kristian akan ar anahne usehlahte nan arail weirentang oh dahme re anahne wia pwe ren kanekehla weiro. Keieu, kitail pahn koasoiapene kahrepen Pohl eh ntingkihlahng mehn Suhs ko kisinlikou wet oh dahme e men ren wia. Mwuri, kitail pahn koasoiapene dahme kitail kak sukuhlki sang dahme e ntingihedi.

6. Dahme kaunen pelien lamalam akan song wiahiong Kristian kan?

⁶ Tepin Kristian kan mour nan ahnsou apwal ehu. Met kin mehlel ong mehn Suhs Kristian kan nan Serusalem oh Sudia pwehki kaunen pelien lamalam en mehn Suhs kan kin song en idingkihong aramas akan en peikiong irail. Sounpar 30 mwowe, re kahrehiong aramas akan en kamehlele me Sises Krais kin uhwong palien koperment oh wia aramas suwed men me konehng mehla. Irail kaunen pelien lamalam pwukat kemelahr Sises Krais oh met re men kauhdi irail me kin kalohkiseli duwen ih. Kitail kak wadek dahme wiawi mwurin Pendekos pahr 33 nan pwuhken Wiewia kan. Pak tohto, re kaloke Kristian kan pwe ren katokehdi arail kalohk. Eri ahn Kristian ko arail mour inenen apwal.​—Wiewia 4:1-3; 5:17, 18; 6:8-12; 7:59; 8:1, 3.

7. Soangen ahnsou apwal dah me Kristian ko me Pohl ntinglahng mi loale?

⁷ Pil ehu kahrepe me Kristian ko mour ni ahnsou apwal ehu iei pwehki ohlahn Serusalem eh kereniong wiawi. Sises ketin kaweidkin irail me Koht pahn ketin kauwehla Serusalem. E ketin padahkihong irail dahme pahn wiawi mwowe oh dahme re uhdahn anahne wia pwe ren pitla. (Wadek Luk 21:20-22.) Sises mahsanihong irail: “Kumwail pein mwasamwasahn kumwail. Kumwail dehr kedirepwehkin kumwail mwenge laud oh sakau kehlail, oh pwunod kan en sampah wet; pwe Rahno kakete leledohng kumwail ni ahnsou mwadang.”—Luk 21:34.

8. Dahme ele kahrehiong ekei Kristian ko ren katikala de uhdihsang arail doadoahk en papah Siohwa?

⁸ Pohl ntinglahng Kristian mehn Suhs ko sounpar 30 mwurin Sises eh mahsanih mahsen pwukat. Dahme wiawihong Kristian pwukat erein sounpar 30 ko? Pwehki kahpwal kan de arail pwunodki arail anahn en ehuehu rahn, ekei sohla sukuhlki duwen Siohwa oh kolokol arail nanpwungmwahu reh. (Ipru 5:11-14) Ekei Kristian mwein medewe me e pahn mengei ren mour duwehte pali laud en mehn Suhs teikan. Re ele medewe me met sohte sapwung pwehki mehn Suhs ko pil kamehlele Koht oh peikiong Kosonned en Moses. Pil mie ekei nan mwomwohdiso me song idingkihong meteikan ren peikiong Kosonned en Moses oh tiahk en mehn Suhs kan. Ekei Kristian ko kamehlele irail, oh meteikan rong irail pwehki ar masepwehk. Dahme Pohl koasoia pwehn kangoange rie Kristian ko ren pousehlahte mour duwehte Kristian kan oh dadaur loalopwoatohng Siohwa?

9, 10. (a) Ni kaimwiseklahn pwuhken Ipru irelaud 10, dahme Pohl koasoia me Kristian mehn Suhs kan anahne wia? (b) Dahme kahrehda Pohl ntingihedi duwen wiewiahn pwoson en sapwellimen Siohwa ladu en mahs kan?

⁹ Siohwa ketin kamwakid Pohl en ntingkihlahng kisinlikou en kangoang wet ong Kristian mehn Suhs kan. Nan irelaud 10, mahs e kawehwehiong irail me Kosonned en Moses “wia kamwomwada soh dehde ehu en kamwahu kan me pahn kohdo” oh ihte sang ni meirong en Sises diparail kan kak lapwada. Ni kaimwiseklahn irelaud 10, e padahkihong irail me re anahne dadaurete pwe ren paiekihda meirong wet. E koasoia: “Kumwail uhdahn pahn kin kanengamah, pwe kumwail en kapwaiada kupwur en Koht oh ale mehkan me e ketin inoukihong kumwail. Pwe, duwen Pwuhk Sarawi eh mahsanih, ‘Ahnsou tehr kis, a ih me ketiket kohdo pahn leledo; e sohte pahn pwapwand.’”​—Ipru 10:1, 36, 37.

¹⁰ Pohl kangoangehki Kristian mehn Suhs ko lokaia pwukat pwe ren dadaurete. Nan irelaud 12, e pwurehng kangoange irail en dadaurete oh padahkihong irail en nantihong tang nan weiro me re pahn wia. Ahpw mwohn eh nda met, Koht ketin kamwakid ih en ntinglahng irail duwen mehkot tohrohr, oh kitail wadek duwen met nan irelaud 11. Nan irelaudo, e kawehwehda dahkot pwoson mehlel Koht sang ni eh ntingihedi soahng kan me aramas me ahneki pwoson mehlel kin wia. Dahme kahrehda e koasoia duwen pwoson mwohn eh pwurehng koasoia duwen nannanti en kanengamah? Pwehki e men irail en wehwehki me re anahne dadaurete oh eimah pwe ren kasalehda ar pwoson mehlel Siohwa. E koasoia me mahs, tohto ohl oh lih me kolokol arail loalopwoatohng Siohwa mehnda ma re mi nan apwal laud. Arail mehn kahlemeng kan pahn sewese Kristian mehn Suhs ko en dadaurete nan kahpwal kan. Mwurin Pohl eh koasoia wiewiahn pwoson en sapwellimen Siohwa ladu kan, e padahkihong Kristian mehn Suhs ko: “Sounkadehde pwukat me tohto kapilkitailpenehr duwehte depwek kalaimwun ehu. Eri, kitail kesehsang kitail mehkoaros me kerempwa kitail, oh dihp me kin salihkitaildi, oh kitail en nantihong nan atail mour me kitail tapihadahr, rasehng atail kin tang kehlail ni atail kin weirentang.”​—Ipru 12:1.

Sounkadehde kan me Duwehte Depwek Ehu

11. Dahme kitail anahne tamataman ni atail kin medewe duwen mehn kahlemeng en ‘sounkadehde ko me duwehte depwek kalaimwun ehu’?

¹¹ Pohl nda me sapwellimen Siohwa ladu kan iei “sounkadehde pwukat me tohto kapilkitailpenehr duwehte depwek kalaimwun ehu.” Re kin loalopwoatohng Siohwa lao lel ar mehla, oh arail mehn kahlemeng kan kin kasalehda me Kristian kan kak loalopwoatohng Siohwa mehnda ma re mi nan apwal laud. ‘Sounkadehde pwukat me duwehte depwek’ de irail sapwellimen Siohwa ladu en mahs kan rasehng sounweiren tang kan me tang mwahu nan weiro oh kanekehla. Medemedewe arail mehn kahlemeng kan kak kangoange Kristian mehn Suhs pwukat ren pousehlahte nan arail weirentang oh wia uwen arail kak ren kanekehla. Kitail pil kak wia met.

12. Dahme kitail kak sukuhlki sang pwoson en irail ako me Pohl koasoia?

¹² Kitail kak sukuhlki sang pwoson en irail ako me Pohl koasoia pwehki tohto irail ahneki irair me duwehte atail. Karasepe, Noha mour ni ahnsou me Siohwa ketin kasohrehkihla sampah nohliko. Oh met kitail momour mwohnte Siohwa eh pahn ketin kasohrehla en Sehdan sampah. Siohwa ketin mahsanihong Eipraam oh Sara ira en kohkohlahsang imwarao. E ketin inoukihong ira me kadaudokara kan pahn wiahla wehi ehu me pahn papah ih, ira eri awiawih pwehn ketin kapwaiada sapwellime inowo. Siohwa ketin kangoangehkin kitail en dehr mourki pein nsenatail ahpw, kitail en wia soahng koaros me e ketin kupwurki. E ketin inoukihong kitail me ma kitail pahn wia met, e pahn ketin wiahla kompoakepatail oh e pahn ketin kapaikitailda. Moses sapasapal ahnsou reirei nan sapwtehn keper ehu pwehn lel nan Sapwen Inowo. Kitail kin mour nan sampah suwed ehu oh kitail kin awiawih sampah kapw me Siohwa ketin inoukihong kitail. E kesempwal kitail en medemedewe mouren irail me lelepek pwukat. Kitail kak kahlemengih soahng kan me re kin wia me kaperenda Siohwa oh sukuhlki sang soahng kan me sohte kin kaperenda ih.​—Rom 15:4; 1 Kor. 10:11.

Dahme Sewese Irail Ren Kanekehla Weiro?

13. Dahme kahrehda en Noha irairo apwal? Dahme sewese en kapwaiada mehkoaros me Siohwa ketin mahsanihong en wia?

¹³ Dahme sewese sapwellimen Siohwa ladu pwukat ren dadaurete weiro oh kanekehla? Tehk dahme Pohl ntingihdi duwen Noha. (Wadek Ipru 11:7.) Noha saikinte kilang nohlik eh kemehla aramas oh mahn koaros. (Sen. 6:17) Sohte pak ehu nohlik wiawi. Ahpw Noha sohte medewe me nohliko sohte kak wiawi. Dahme kahrehda? Pwehki e kamehlele me Siohwa pahn ketin wia soahng koaros me e ketin mahsanih. Eri Noha sohte medewe me e apwal en peikiong Siohwa. Paipel mahsanih: “Noha eri ahpw kapwaiada mehkoaros me Koht ketin mahsanih.” (Sen. 6:22) Noha anahne wia soahng tohto. E anahne kauwada warihmwo, kihpene mahn akan, nekidpene kenen eh peneinei oh mahn akan kanarail mwenge, kairehki aramas akan nohliko, oh sewese eh peneinei ren pwoson laud Siohwa. Kaidehn ahnsou koaros e mengei ong Noha en kapwaiada soahng koaros me Siohwa mahsanihong en wia. Ahpw pwehki eh pwoson Siohwa, e nantihong kapwaiada doadoahk koaros me e anahne wia. Siohwa eri ketin doarehla Noha oh eh peneinei oh ketikihong irail kapai tohto.

14. Nan soangen irair dah me Eipraam oh Sara kasalehda ara pwoson Koht? Dahme kitail kak sukuhlki sang ara mehn kahlemeng?

¹⁴ Pohl pil koasoia me Eipraam oh Sara iang kisehn ‘sounkadehde me kapilkitailpenehr duwehte depwek kalaimwun ehu.’ Ira wekidala ara mour ni Koht eh ketin mahsanihong ira en kohkohlahsang imwara nan Ur. Ira sehse dahme pahn wiawihong ira. Ahpw ira uhdahn pwoson Siohwa oh peikiong ih mehnda ma ira mi nan apwal. Paipel mahsanihki Eipraam “semen irail kan koaros me pwoson Koht” pwehki eh wiahiong Siohwa tounmetei tohto. (Rom 4:11) Kristian mehn Suhs ko eseier duwen mouren Eipraam oh eh peneinei, kahrehda Pohl koasoiahte ekei arail wiewiahn pwoson. Ahpw ire pwukat kin itar en kasalehda uwen kehlail en arail pwoson. Pohl koasoia duwen irail: “Aramas pwukat koaruhsie pwoson, ahpw re melahr. Re sohte ale mehkan me Koht ketin inoukidahr; ahpw, sang wasa doh me re kilang oh perenkihda, re pil kadehdehda ni sansal duwen ar mehn liki oh mehn keiru kei nin sampah.” (Ipru 11:13) Arail pwoson Koht oh nanpwungmwahu reh kin sewese irail en dadaurete nan weirentango.

15. Dahme kahrehda Moses pilada soangen mour me e ahneki?

¹⁵ Moses pil emen sapwellimen Siohwa ladu me kisehn ‘sounkadehde ko me duwehte depwek kalaimwuno.’ Moses pil kohkohlahsang imwe duwehte Eipraam. Moses pwilikihdi lingan oh kepwe kan en tehnpesen nanmwarki. E pilada “iang sapwellimen Koht aramas akan lokolok.” Dahme kamwakid en wia met? Pohl sapengki: “E kilikilengwohngete keting me pahn kohdo. . . . E wonlahte mwowe nan eh seiloak, likamwete e kilang Koht me soh sansal.” (Wadek Ipru 11:24-27.) Moses ese me mie mehkot me kesempwal sang “perenki dihp ahnsou mwotomwot.” E kin ahneki nanpwungmwahu reh oh ese me sapwellime inou koaros pahn pweida. Met me sewese en mwekid ni eimah oh dadaurete nan apwal oh en doadoahk laud en kahrehsang mehn Israel kan Isip kohlahng Sapwen Inowo.

16. Ia duwen atail ese me Moses sohte nsensuwedla pwehki eh sohte kak pedolong nan Sapwen Inowo?

¹⁶ Eipraam oh Moses mehla mwohn Siohwa eh ketin kapwaiada sapwellime inou ong ira. Mwohnte mehn Israel ko arail pedolong nan Sapwen Inowo, Koht ketin mahsanihong Moses: “Ke pahn ireirowohngete sahpwo sang wasa doh, ahpw ke sohte pahn iang pedolong nan sahpw me I pahn kihong mehn Israel kan.” Pwehki Moses oh Aaron ara sapeikiong Siohwa ni pihl en Meripa, ira sohte iang pedolong nan Sapwen Inowo. Ira mweidohng aramas kahngohdi ko ren kemwehlihrahda kahrehda ara wiahda mwekid me kasohwauwih Koht. (Deud. 32:51, 52) Moses sohte nsensuwedla pwehki eh sohte kak iang pedolong nan Sapwen Inowo. E sohte medewe me Siohwa ketin wiahda pilipil sapahrek. Kitail ese met pwehki e peki rehn Siohwa en ketin kapaiada aramas ako. Kaimwiseklahn eh koasoi ong irail iei: “Israel, ia uwen omw pai! Sohte emen me duwehte kowe, wehi ehu me KAUN-O kin ketin apwahpwalih. Pein KAUN-O me wia omw mehn sansar oh noumw kedlahs.”​—Deud. 33:29.

Mehn Kasukuhl ong Kitail

17, 18. (a) Dahme kitail sukuhlki sang ‘sounkadehde ko me duwehte depwek kalaimwuno’? (b) Dahme kitail pahn koasoiapene nan iren onop en mwuhr?

¹⁷ Kitail sukuhlkier mouren ekei irail me kisehn ‘sounkadehde ko me kapilkitailpene duwehte depwek kalaimwuno’ me en kanekehla weiro, kitail anahne pwoson laud Koht oh sapwellime inou kan. (Ipru 11:6) Pwoson wet anahne kamwakid mwomwen atail mour ahnsou wet. Kitail ese me Koht ketin inoukihong kitailehr ahnsou mwahu mwohtail. Kitail kak esehla “Koht me soh sansal.” Kitail ahneki nanpwungmwahu rehn Koht kahrehda kitail kak nannanti nan weirentango.​—2 Kor. 5:7.

¹⁸ Weir me Kristian kan kin iang inenen apwal. Ahpw kitail kak kanekehla weiro. Nan iren onop en mwuhr, kitail pahn koasoiapene soahng teikan me kak sewese kitail en kanekehla weiro.

Ke Kak Kawehwehda?

• Dahme kahrehda Pohl ntingihedi duwen wiewia pwoson en “sounkadehde” en mahs ako?

• Ia duwen mehn kahlemeng en ‘sounkadehde ko me kapilkitailpene duwehte depwek kalaimwuno’ eh kak sewese kitail en nannanti nan weirentango?

• Dahme ke sukuhlki sang mehn kahlemeng en Noha, Eipraam, Sara oh Moses?

[Kilel nan pali 21]

Eipraam oh Sara perenki pwilikihdi ara mour nsenamwahu nan Ur