Ke Kin Mweidohng Siohwa en Ketin Wia Pwaisomw?

“Kumwail pousehlahte rapahki mahs wehio oh sapwellime irair pwung, oh soahng pwukat teikan koaros ahpw pahn kowohng kumwail.”​—MAD. 6:33, NW.

1, 2. (a) Ihs irail “Israel en Koht” me kitail wadek nan Kalesia 6:16 (NW)? (b) Ihs irail “kadaudok eisek riaun Israel” me kitail wadek nan Madiu 19:28?

NI OMW wadek ahd wet Israel nan Paipel, dahme ke kin medewe? Ke kin medewe nein Aisek pwutak Seikop me adanekihla Israel mwuhr? De ke kin medewe kadaudoke ko, wehin Israel? Paipel pil koasoia duwen “Israel en Koht” irail iei meh 144,000 me keikihdi sapwellimen Koht manaman pwe ren wiahla nanmwarki oh samworo kan nanleng. (Kal. 6:16, NW; Kaud. 7:4; 21:12) Ahpw mie pil ehu ire tohrohr me ahd wet Israel kin kadoadoahkohng. Kitail kak wadek met nan Madiu 19:28.

² Sises mahsanih: “I men kumwail en ese pwe kumwail me ehk riemen me ideidawehn ie, kumwail pahn iang mwohd nan mwoalen kadeik oh iang kadeikada kadaudok eisek riaun Israel, ahnsou me Nein-Aramas pahn ket nan mwoale lingan nan sapwellime Mwei Kapw.” Nan iretikitik wet, “kadaudok eisek riaun Israel” iei irail me pahn mour kohkohlahte nan Paradais nin sampah. Meh 144,000 pahn papah nin duwen sounkopwung oh samworo kei ong irail.

3, 4. Mehn kahlemeng mwahu dah me me keidi lelepek kan kin wia?

³ Duwehte samworo kan oh mehn Lipai kan mahs, me keidi kan rahnwet medewe me arail papah Siohwa uhdahn kesempwal. (Nemp. 18:20) Me keidi kan sohte kin kasik ren ale sapwarail nin sampah. Ahpw, Kaudiahl 4:10, 11 kasalehda me re pahn usehlahte papah Siohwa nanleng, wasa me re pahn wiahla nanmwarki oh samworo kei rehn Sises Krais.​—Esek. 44:28.

⁴ Ni arail mihmi sampah, me keidi kan anahne mourki mour ehu me pahn kasalehda me Siohwa wia pwaisarail. Arail papah Koht me keieu kesempwal. Wahnpoaron Piter koasoia: “Kumwail nantihong laudsang mahs pwe sapwellimen Koht luhk oh pilipil ong kumwail en wiahla momour poatopoat ehu.” (2 Pit. 1:10) Me keidi pwukat wia met sang ni arail pwoson sapwellimen Krais meirong en tomw oh usehlahte idawehn. Arail koahiek oh irair en mour wekpeseng, ahpw re sohte kin medewe me arail souitar en wia kahrepe ehu pwe ren sohte kin papah Koht. Weksang met, re kin mwohneki mahs arail papah Koht nan arail mour oh wia uwen arail kak koaros. Oh re wia mehn kahlemeng mwahu ong irail me ahneki koapworopwor en mour nin sampah.

5. Ia duwen Kristian koaros ar kak wiahki Siohwa pwaisarail? Dahme kahrehda met kakete apwal?

⁵ Sises mahsanih me Kristian koaros, mehnda ma re ahneki koapworopwor en mour nanleng de nin sampah, re anahne tounmeteikihla pein irail oh kapaikada ar tuhkehn kalokolok. (Mad. 16:24) Aramas rar rar kei me ahneki koapworopwor en mour nan Paradais nin sampah kin kaudokiong Koht oh idawehn Krais ni ahl wet. Re sohte kin itarki papah Koht ekiste ma re ese me re kak wia laudsang. Me tohto wekidala arail koasoandi kan oh kihsang soahng kan me sohte nohn kesempwal oh wiahla pioneer kei. Meteikan kin nantihong wia sawaspen pioneer ekei sounpwong nan ehuehu pahr. Mendahki meteikan ar sohte kak pioneer, re kin wia uwen arail kak nan kalohk. Re duwehte Mery me keiekihdi Sises leh pwohmwahu. Sises mahsanih: “Tiahk kaselel ehu me e wiahiong ie. . . . E wiadahr uwen me e kak.” (Mark 14:6-8) Kitail mi nan sampah ehu me Sehdan kakaun, kahrehda e apwal en wia mehkoaros. Kitail anahne doadoahk laud oh likih Siohwa. Kitail pahn tehk ahl pahieu me kitail kak wia met.

Rapahki Mahs Wehin Koht

6. (a) Ia duwen aramas akan ar kin kasalehda me ihte mour wet iei pwaisarail? (b) Dahme kahrehda e mwahu en alasang Depit?

⁶ Sises ketin padahkihong sapwellime tohnpadahk ko ren rapahki mahs Wehio oh sapwellimen Koht irair pwung. Aramas akan kin rapahki dahme keieu mwahu ong irail. Paipel kin koasoiahki irail duwehte “me kin ahneki mehkoaros me re inengieng nin sampah.” (Wadek Melkahka 17:1, 13-15.) Aramas pwukat sohte nsenohki Siohwa. Me tohto kin nsenohki ahneki mour nsenamwahu, peneinei, oh kihong neirail seri kan arail sohso. Nan mour en sampah wette me mie pwaisarail. Depit weksang irail. E men ahneki “adamwahu” rehn Siohwa. Mwuhr, nah pwutak Solomon koasoia me kitail koaros anahne wia met. (Ekl. 7:1) Duwehte Asap, Depit ese me kompoakepahnki Siohwa me keieu kesempwal. Met kahrehiong Depit peren. Nan atail ahnsou, Kristian tohto kin kasalehda me arail papah Siohwa kesempwal sang arail doadoahk en mwohni.

7. Kapai dah me emen brother alehdi ni eh rapahki mahs Wehio?

⁷ Jean-Claude, elder men kin kousoan nan Central African Republic oh e naineki seri silimen. E apwal en diar doadoahk nan sahpwo, oh pali laud en aramas akan kin wia soahng koaros pwe ren kolokol arail doadoahk. Ehu rahno, eh kauno ndahng Jean-Claude en tepida doadoahk nipwong. Doadoahko pahn tepida kuloak 6 elep ni soutik, rahn koaros. Jean-Claude ndaiong eh kauno me e anahne apwalih eh peneinei arail anahn akan oh pil sewese irail en ahneki nanpwungmwahu rehn Koht. E pil nda me e anahne sewese mwomwohdiso me e iang. Eh kauno ndaiong: “Ma ke pahn paiamwahu ahneki doadoahk, ke anahne manokehla soahng koaros iangahki omw pwoudo, noumw seri kan, oh omw kahpwal kan. Ke anahne poadidiong omw doadoahkente. Eri pilada, omw pelien lamalamen de omw doadoahk.” Ma kowe mwo, dahme ke pahn wia? Jean-Claude ese me ma e sohla doadoahk, Koht pahn ketin apwalih. E pil pahn wia soahng tohto ni eh papah Koht oh Siohwa pahn ketin apwalih eh peneinei ar anahn akan. Ihme kahrehda e kohla mihting. Mwurin mwo, e onopadahng kohla doadoahk, mehnda ma e sehse ma e wie doadoahkte de soh. Ni ahnsowohte, telepwohn ehu kohla. Eh kauno solahr doadoahk, ahpw brothero wie doadoahkte.

8, 9. Ia duwen atail kak wiahki Siohwa pwaisatail duwehte samworo kan oh mehn Lipai kan?

⁸ Ekei kumwail kakete mi nan soangen irair wet. Mwein ke kin pwunodki ia duwen omw pahn apwalih omw peneinei ma ke sohla doadoahk. (1 Tim. 5:8) Ahpw mehnda ma met wiawi de soh, ke pahn esehda me Koht sohte pahn ketin mweidohng irail kan me kin wiahki ih pwaisarail oh mwohneki mahs sapwellime doadoahk nan arail mour en mworusala. Ni Sises eh ketin padahkihong sapwellime tohnpadahk ko ren rapahki mahs wehio, e ketin inoukihong irail me Koht pahn ketikihong irail soahng teikan koaros duwehte dahme re kin kang, nim, de likawih.—Mad. 6:33.

⁹ Medewehla mehn Lipai kan me sohte ale sapwarail sapwen sohso. Pwehki arail doadoahk me kaweid wehio en wia kaudok min, re anahne likih me Siohwa ketin wia pwaisarail oh pahn ketin apwalih arail anahn akan. (Nemp. 18:20) Mendahki kitail sohte kin doadoahk nan tehnpaso duwehte samworo kan oh mehn Lipai kan, kitail kak likih Siohwa duwehte irail. Ni atail kerenlahngehr imwin ahnsou, kitail kak kasik me mour pahn apwal ong kitail me kaidehn kisehn en Sehdan sampah. Kahrehda e uhdahn kesempwal kitail en likih Koht eh kin ketin apwalih kitail.​—Kaud. 13:17.

Rapahki Mahs Sapwellimen Koht Irair Pwung

10, 11. Ia duwen ekei ar likih Siohwa me pid arail doadoahk? Menlau kihda karasaras.

¹⁰ Sises ketin padahkihong sapwellime tohnpadahk kan ren ‘rapahki mahs sapwellimen Koht irair pwung.’ (Mad. 6:33, NW) Met wehwehki me kitail kin idawehn sapwellimen Siohwa madamadau ong dahme pwung oh sapwung a kaidehn dahme aramas kin medewe. (Wadek Aiseia 55:8, 9.) Ekei aramas kin padok tipaker oh netikihla, a ekei kin kasukuhliki meteikan mahwen, de wiahda dipwisoun mahwen kan mwohn ar wiahla Kristian kei. Ahpw mwurin arail esehla padahk mehlel, pali laud en irail pilada en wekidala arail doadoahk pwe ren kak papidaisla.​—Ais. 2:4; 2 Kor. 7:1; Kal. 5:14.

¹¹ Ihme Andrew wia. Ni ahnsou me ih oh eh pwoud sukuhlki duwen Siohwa, ira pilada en papah ih. Andrew uhdahn perenki eh doadoahk ahpw e uhdihsang. Dahme kahrehda? Pwehki pwihn me e kin doadoahk ong kin pidada mahwen, ahpw e men wia dahme Siohwa mahsanih me pwung. Ni ahnsou me Andrew sohla doadoahk, mie nah seri riemen oh uwen nah mwohni itarongete sounpwong kei. E mwomwen me sohte eh sohso duwehte mehn Lipai ko. Ahpw e likih Koht oh rapahki eh doadoahk. Met ni arail kin tamanda ahnsowo, Andrew oh eh peneinei kak nda mehlelpen mahsen pwukat: “Kumwail dehr lemeleme me KAUN-O me nohn luwet pwehn komourkumwailla.” (Ais. 59:1) Pwehki re kin kanahieng pwehn dehr kedirepwkihla soahng kan me sohte nohn kesempwal nan arail mour, Andrew oh eh pwoud kakehr iang doadoahk en pioneer. E nda me ekei pak ira kin pwunodkihda epwel en mwohni, wasahn kousoan, arail roson mwahu oh pil pwehki ara wie mahmahla. Ahpw ahnsou koaros Siohwa kin ketin sewese irail. Re kak nda ni mehlel me arail kin papah Siohwa iei kapai ehu oh ih me keieu kesempwal aramas men en ahneki.​—Ekl. 12:13.

12. Irair dahieu me kitail anahne pwehn rapahki mahs sapwellimen Koht irair pwung? Menlau kihda ehu karasaras nan omw wasa.

¹² Sises ketin mahsanihong sapwellime tohnpadahk ko: “Ma mie pwoson rehmwail, mehnda ma e pahn uwehte kisin weren kadiring kis, kumwail pahn kak ndahng nahna wet, ‘Tohrekweisang met, tohrekla mwo,’ a e pahn wiawi. Kumwail pahn kakohng mehkoaros.” (Mad. 17:20) Ia duwe, ke pahn rapahkihte sapwellimen Koht irair pwung ma e pahn kahrehiong uhk kahpwal kan? Ma ke saikinte uhdahn kamehlele me ke kak wia met, ehukihong meteikan nan mwomwohdiso. Omw pahn rong duwen Siohwa eh ketin sewese irail pahn uhdahn kakehlakahda omw pwoson.

Kalahnganki Dahme Siohwa Kin Ketikihda

13. Ni atail wia uwen atail kak en papah Siohwa, dahme kitail pahn kasik?

¹³ Ma ke kesempwalki omw pwais en papah Siohwa, ke kak kamehlele me e pahn ketikihong uhk mehkoaros me ke anahne duwehte eh ketin wiahiong mehn Lipai ko. Nna medewehla duwen Depit. Mehnda ma e rukuruk nan pwoahr, e kamehlele me Koht pahn ketin sewese. Kitail pil kak likih Siohwa mehnda ma e mwomwen me sohte me kak sewese kitail. Tamataman me ni Asap eh pedolong ‘nan Tehnpesen Koht,’ e wehwehkihda eh kahpwalo. (Mel. 73:17) Ni ahlohte, kitail anahne koapworopworki Siohwa me e pahn ketikihong kitail dahme kitail anahne pwe kitail en kolokol atail nanpwungmwahu reh. Met pahn kasalehda me kitail kesempwalki atail papah Siohwa sohte lipilipil soangen irair dah kitail mi loale. Kitail pahn mweidohng Siohwa en ketin wia pwaisatail.

14, 15. Dahme kitail anahne wia ni ahnsou me mie wekidekla ehu pwarada me pid atail kin wehwehki ekei iren Paipel? Dahme kahrehda?

¹⁴ Ke kin likih Siohwa ni eh ketin sewese kitail en wehwehkihda ire loal kan me pid Koht nan Paipel? (1 Kor. 2:10-13) Wahnpoaron Piter wiahda mehn kahlemeng mwahu duwen met. Sises mahsanihong mehn Suhs kan: “Ma kumwail sohte pahn tungoale uduk en Nein-Aramas, oh nim ntah, nahn, mour soutuk sohte pahn mi loalamwail.” Tohto tohnpadahk ko medewe me Sises ketin mahmahsanih uhdahn uduk oh nta oh re koasoia: “Padahk pwoatet meid nohn apwal! Ihs me kak rong?” Irail eri “mweikihsangehr oh solahr men idawehn.” Ahpw Piter koasoia: “Maing, ihs me se pahn patohla reh? Sapwellimomwi mahsen kan, iei mahsen en mour soutuk.”​—Sohn 6:53, 60, 66, 68.

¹⁵ Piter sohte uhdahn wehwehki dahme Sises mahsanih. Ahpw e koapworopworki me Siohwa ketin sewese aramas akan en wehwehkihla padahk mehlel. Ma mie wekidekla pwarada nan padahk en Paipel ehu me kitail kin wehwehki, ke pahn song en wehwehki kahrepen wekideklao? (Lep. Pad. 4:18) Ni mwehin wahnpoaron ko, mehn Peria kan kin “ngoangki mehlel rong mahseno, oh rahn koaros irail kin onopki Pwuhk Sarawi.” (Wiewia 17:11) Ma ke kahlemengih irail, ke pahn kalaudehla omw kesempwalki omw kin papah Koht. Ke pahn uhdahn kalahnganki omw wiahki Siohwa pwaisomw.

Pwoudikihte Emen me Kin Idawehn Kauno

16. Ia duwen Kristian kiripw kan arail kak mweidohng Koht en ketin wia pwaisarail nin duwen 1 Korint 7:39 (NW) mahsanih?

¹⁶ Pil ehu ahl me Kristian kan kin anahne tamataman kupwuren Koht iei ar kin peikiong kehkehlik en Paipel en pwoudikihte emen me “kin idawehn Kauno.” (1 Kor. 7:39, NW) Me tohto kin pilada ren sohte pwopwoud pwe ren dehr sapeikiong kehkehlik wet. Koht kin ketin apwalih mwahu irail kan me kin wia met. Dahme Depit wia ni eh sangatada oh pehm me sohte me kak sewese? E peki sawas rehn Siohwa. Depit koasoia: “I patohwanohng ei kaulim kan koaros; I patohwan wehkadahng ei apwal akan koaros.” (Mel. 142:1-3) Seremaia kin lelepek papahki Koht ahnsou reirei nin duwen emen me kiripw.

17. Dahme emen sister kiripw kin wia ma e kin pehm me e sangat?

¹⁷ Sister men nan Amerika koasoia me e sohte koasoanehdi en wia kiripw men. E men pwopwoudida ma e tuhwong emen me konehng en pwoudiki. Eh nohno kaidehn Sounkadehde men, e sohte katapanki ihs me nah serepeino pahn pwoudiki. Ihte e men nah serepeino en pwopwoudida. Sistero idek rehn eh nohno ma e men pwukoahki eh pwopwoud suwed. Ahpw ni liho eh kilangada me nah serepeino ahneki doadoahk mwahu, e kin apwalih mwahu pein ih oh e nsenamwahu, e sohla koasoiaiong duwen pwopwoud. Ekei pak, sistero kin sangatada. E koasoia: “I kin song koapworopworki Siohwa. E sohte ketin likidmelieiehla.” Dahme sewese en likih Siohwa? E koasoia: “Kapakap kin sewese ie ien pehm me Koht ketin ieiang ie oh I sohte kin kelekelehpw. Wasa Lapalahpie kin ketin karonge ie, eri I sou pahn pehm me I kesempwal oh nsenamwahu? E kin likih me Paipel mahsanih: “Kihwei kaperen sang ale.” Eri e kin song en sewese meteikan oh sohte kasik mehkot sang irail. E doula koasoia: “Ni ei kin medewe, ‘Dahme I pahn kak sewesehki emen?’ I kin ahneki peren.” (Wiewia 20:35) E kin wiahki Siohwa pwaise, oh e kin perenki papah.

18. Ia duwen Siohwa eh kak ketin sapwellimankinuhkala?

¹⁸ Sohte lipilipil soangen irair dah ke ahneki, ke kak mweidohng Koht en ketin wia pwaisomw. Ma ke pahn wia met, ke kak iang wia sapwellime aramas nsenamwahu kan. (2 Kor. 6:16, 17) Eri Siohwa ketin sapwellimankinuhkala duwehte eh ketin wiahiong sapwellime ladu teikan mahs. (Wadek Deuderonomi 32:9, 10.) Duwehte Koht eh ketin sapwellimankihla Israel nanpwungen wehi kan, e kak ketin pilada sapwellimankinuhkala oh apwalih iuk mwahu.—Mel. 17:8.

Ia Duwen Omw Pahn Sapeng?

Ia duwen omw kak mweidohng Siohwa en ketin wia pwaisomw

• sang ni omw kin rapahki mahs Wehin Koht oh sapwellime irair pwung?

• sang ni omw kin kalahnganki dahme Siohwa kin ketikihong uhk?

• sang ni omw pahn peikiong sapwellimen Koht kehkehlik en pwoudikihte emen me kin idawehn Kauno?

[Blurb nan pali 16]

Siohwa kin ketin wiahla pwaisatail ni atail kin mwohneki mahs atail papah ih nan atail mour

[Kilel nan pali 17]

Mehn kahlemeng en Seremaia kin kangoange ie