Wiahki Sapwellimen Siohwa Mehn Kataman Kan Kaperenpen Mohngiongomw

1. (a) Ni ahl dah kei me aramas kin mwekidki kaweid, oh dahme kahrehda? (b) Ia duwen aramas aklapalap men eh kin mwekidki kaweid?

AHN aramas akan mwekidki kaweid kan kin wekpeseng. Karasepe, ekei ele kin men ale kaweid sang aramas men me ahneki manaman ahpw ele re sohte pahn men ale sang emen me arail sounpar tehieu de emen me eh manaman tikitik. Mwein ekei kin nsensuwedla, pwunodada, de namenekla ni ar kin ale kaweid de peneu. Ahpw ekei kin mwekidkihda oh men kamwahwihala pein irail. Dahme kahrehda ahn aramas ar mwekidki kaweid kan wekpeseng? Ehu kahrepe iei aklapalap. Ni aramas aklapalap men eh kin ale kaweid, e medewe me e sohte anahne kaweido kahrehda e soikala oh sohte paiekihda.​—Lep. Pad. 16:18.

2. Dahme kahrehda Kristian mehlel kan kin kesempwalki kaweid sang Mahsen en Koht?

² Kristian mehlel kan weksang met. Kitail kin kalahnganki kaweid mwahu kan, ni mehlel ma e kohsang Mahsen en Koht. Sapwellimen Siohwa mehn kataman kan kin sewese kitail en kilang keperpen tiahk sapwung. Karasepe, kaweid pwukat kin sewese kitail en dehr lohdi nan kahpwal en men kepwehpwehla, tiahk samin me pid wia nsenen pwopwoud oh doadoahngki sakau oh wini kan ni ahl sapwung. (Lep. Pad. 20:1; 2 Kor. 7:1; 1 Des. 4:3-5; 1 Tim. 6:6-11) Patehng met, kitail ahneki “peren” me kohsang atail peikiong sapwellimen Koht mehn kataman kan.​—Ais. 65:14.

3. Soangen madamadau dah me sounmelkahkao ahneki me kitail anahne kahlemengih?

³ Pwehn kolokol atail nanpwungmwahu rehn Samatail nanleng, Siohwa, kitail anahne doulahte doadoahngki sapwellime kaweid kan nan atail mour. Kitail anahne kahlemengih madamadau en sounmelkahkao me ntingihedi: “I pahn kolokol sapwellimomwi kosonned kan kohkohlahte; pwe iei kaperenpen mohngiongi.” (Mel. 119:111) Ke duwehte sounmelkahkao me perenki peikiong sapwellimen Siohwa kosonned kan? De ekei pak ke pehm me re me nohk apwal en peikiong? Mendahki ma ekei pak e kin apwal ken ale kaweid kan, dehr mworusala. Ke kak kalaudehla omw likih me peikiong sapwellimen Koht kosonned erpit kan kin ahnsou koaros keieu mwahu ong uhk. Kitail pahn koasoiapene ahl siluh pwehn wia met.

KALAUDEHLA OMW LIKIH KOHT NI OMW KAPAKAP

4. Dahme sohte kak wekila rehn Depit?

⁴ Nanmwarki Depit ahneki ahnsou mwahu oh suwed kan nan eh mour, ahpw mehkot reh sohte kin wekila. Ahnsou koaros e kin uhdahn likih Sounkapikadao. E nda: “Maing KAUN, I kin kapakapohng komwi; Maing ei Koht, komwi me I kin likih.” (Mel. 25:1, 2) Ia duwen Depit eh sukuhlki en ahneki soangen likilik laud rehn Semeo nanleng?

5, 6. Dahme ahn Depit kapakap kan kin kasalehda duwen eh nanpwungmwahu rehn Siohwa?

⁵ Aramas tohto kin kapakap ong Koht ahnsou kante me re ahneki kahpwal laud kan. Re duwehte kompoakepah men me kin koasoiong uhk ihte ni eh anahne mwohni de e men ken wiahiong ih mehkot. Ahnsou ehu mwuhr, mwein ke tepida medewe ma kompoakepahmwo kin uhdahn poakohng uhk. Ahpw nanpwungmwahu me Depit ahneki rehn Siohwa sohte duwehte met. Erein ahn Depit mour, mehnda ma ahnsou mwahu de suwed, eh kapakap kan kin kasalehda me e kin uhdahn poakohng Siohwa oh likih.​—Mel. 40:8.

⁶ Tehk ia duwen Depit eh kin kapinga oh kasalehda kalahngan ong Siohwa: “Maing KAUN, at Kaun, sapwellimomwi roson lapalap kin sansal wasa koaros nin sampah! Kapingpomwi kin leldawohng nanleng.” (Mel. 8:1) Ke kak kilang sang dahme Depit nda uwen keren en eh nanpwungmwahu rehn Semeo nanleng? Depit eh uhdahn wauneki sapwellimen Siohwa lapalap oh lingan kahrehiong ih en kin kapinga Siohwa “sang nimenseng lel nipwong.”—Mel. 35:28.

7. Ia duwen atail koasoakoasoiong Siohwa ahnsou koaros eh kak sewese kitail?

⁷ Duwehte Depit, kitail anahne koasoakoasoiong Siohwa ahnsou koaros pwe kitail en kak kakehlaka atail likih ih. Paipel mahsanih: “Kumwail keido mpen Koht, oh e pahn ketin keiong mpamwail.” (Seims 4:8) Kapakap ong Siohwa kin kahrehiong kitail en karanihala oh met pil ehu ahl kesempwal me kitail kak ale sawas sang sapwellime manaman.​—Wadek 1 Sohn 3:22.

8. Dahme kahrehda kitail en dehr doadoahngki lepin lokaiakohte ahnsou koaros me kitail kin kapakap?

⁸ Ni omw kin kapakap, ke kin doadoahngki lepin lokaiakohte ahnsou koaros? Ma ke kin wia met, song ken doadoahngki ekis ahnsou en medemedewe mahs dahme ke pahn nda mwohn omw pahn kapakap. Pwehn karasahda: Ma ehuehu ahnsou ke tuhwong kompoakepahmw men oh pwurepwurehng ndaiong soahng tehieu, ia pahn eh pepehm? E kakete solahr men rong uhk. Siohwa sohte pahn ketin pohnsehsehla kapakap en emen sapwellime ladu loalopwoat kan. Ahpw kitail anahne song dehr pwurepwurehng nda soahng tehieu ahnsou koaros me kitail kin kapakap.

9, 10. (a) Dahme kitail anahne kapatahiong nan atail kapakap kan? (b) Dahme kak sewese kitail en kapakap sang mohngiongitail?

⁹ E sansal me ma kitail men karanihala Koht, kitail sohte kak kapakapki soahng keite. Atail kalaudehla atail koasoiaiong Siohwa atail madamadau oh pepehm loal kan, atail likih ih pahn pil laudla. Dahme kitail anahne kapatahiong nan atail kapakap kan? Paipel mahsanih: “Ni soahng koaros kumwail en kehsehkin Koht amwail pekipek kan sang ni amwail kin kapakap oh pekipek karakarahk iangahki kapingkalahngan.” (Pil. 4:6, NW) Eri, soahng koaros me pid atail mour de atail nanpwungmwahu rehn Koht kak mi nan atail kapakap kan.

¹⁰ Kitail kak sukuhlki laud sang kapakap en irail ohl oh lih lelepek kan mahs. (1 Sam. 1:10, 11; Wiewia 4:24-31) Karasepe, nan Melkahka kan, mie kapakap oh koul tohto ong Siohwa me kasalehda soangen pepehm koaros, sang nsensuwed laud lel peren laud. Atail onopki kapakap pwukat kak sewese kitail en wia kapakap sang mohngiongitail.

DOUDOULOALE SAPWELLIMEN KOHT MEHN KATAMAN KAN

11. Dahme kahrehda kitail anahne doudouloale kaweid kan en Paipel?

¹¹ Depit koasoia: “Mahsen en KAUN-O me likilik, e kin kaloalokongihala me soaloalokong kan.” (Mel. 19:7) Eri mendahki kitail saikinte lelohng soahng tohto nan atail mour, kitail kak loalokongla sang ni atail peikiong kosonned en Koht. Ahpw mie kaweid kei nan Paipel me kitail anahne doudouloale ma kitail men kolokolete atail lelepek nan soangen irair koaros nan mour. Karasepe, en doudouloale iren kaweid kan en Paipel kak sewese iuk en loalopwoatete ni omw lelohng kasongosong en wia me suwed nan sukuhl de nan doadoahk. E pil kak sewese iuk en peikiong sapwellimen Koht kosonned kan me pid doadoahngki nta, soupoupali oh doadoahngki kaweid en Paipel ni atail pilada soangen likou me kitail en likawih. Doudouloale kaweid kan en Koht pahn sewese kitail en kaunopada nan irair kan me duwehte mepwukat. Kitail eri pahn kak pilada dahme kitail pahn wia mwohn irair ehu pwarada. Soangen kaunopada wet kak sewese kitail en dehr loiong kahpwal kansensuwed kan.​—Lep. Pad. 15:28.

12. Soangen peidek dah kan kitail en medemedewe pwehn kak sewese kitail en kolokolete sapwellimen Koht mehn kataman kan?

¹² Ni atail awiawih sapwellimen Koht inou kan ar pahn pweida, kitail kin kasalehda me atail pwoson mepwukat kehlailte oh me kupwuren Koht iei me keieu kesempwal nan atail mour? Karasepe, kitail uhdahn kamehlele me Papilon Lapalap pahn kereniong kasohrala? Me pid kapai kan en ahnsou kohkohdo duwehte mour soutuk nan paradais sampah oh pil duwen kaiasada, kitail kamehlelehte mepwukat ahnsou wet duwehte atail kamehlele ni tepin atail sukuhlki? Kitail kin kolokolete atail ngoang laud ong kalohk, de kitail kin mwohneki mahs dahme kitail men wia nan atail mour? Kasarawihlahn mwaren Siohwa oh kadehdepen pwuhng en sapwellime kaunda mehkoaros kin uhdahn kesempwalte rehtail? Atail medemedewe mwahu duwen peidek pwukat kak sewese kitail en kolokol sapwellimen Koht “kosonned kan kohkohlahte.”​—Mel. 119:111.

13. Dahme kahrehda tepin Kristian ko apwalki wehwehki ire kei? Menlau kihda ehu karasaras.

¹³ Mie ire kei nan Paipel me kitail sohte uhdahn wehwehki pwehki saikinte lel ahnsou me Siohwa kupwurki en ketin kawehwehiong kitail. Sises kin pwurepwurehng ketin padahkihong sapwellime wahnpoaron ko me e pahn lelohng kalokolok oh kamakamla. (Wadek Madiu 12:40; 16:21.) Ahpw wahnpoaron ko sohte wehwehki dahme e mahmahsanih. Re wehwehkihda sapwellime mahsen ko ihte mwurin Sises ketin iasada, pwarohng sapwellime tohnpadahk ko oh ketin sewese irail en wehwehki kokohp ko duwen Krais. (Luk 24:44-46; Wiewia 1:3) Oh ihte mwurin sapwellimen Krais tohnpadahk ko arail alehdi sapwellimen Koht manaman nan Pendekos en pahr 33 me re wehwehkihda me Wehin Koht pahn kaunda sang nanleng.​—Wiewia 1:6-8.

14. Mwurin pahr 1900 samwa, mehn kahlemeng mwahu dah me riatail Kristian ko wia?

¹⁴ Pil ni ahlohte, mwurin pahr 1900 samwa, dahme Kristian mehlel kan kin kasikasik me pahn wiawi erein “imwin rahn kan” kin sapwung. (2 Tim. 3:1) Karasepe, nan pahr 1914, ekei kin medewe me re pahn kereniong kohdahla nanleng, ahpw met sohte wiawi. Kristian ko doulahte onopki Paipel oh esehda me doadoahk laud en kalohk anahne wiawi mahs. (Mark 13:10) Eri nan pahr 1922, J. F. Rutherford, me kaweid doadoahk en kalohk ahnsowo, padahkihong me pokonpene ko nan mihting tohrohr laud me wiawi Cedar Point, Ohio, nan Amerika: “Kilang, Nanmwarkio kaundahr! Kumwail iei sapwellime sounkair kan. Eri, pakairki, pakairki, pakairki Nanmwarkio oh sapwellime wehi.” Sang ahnsowo kohdo, aramas kin esehki sapwellimen Siohwa ladu kan ar kin kalohki “Rongamwahu en Wehin Koht.”​—Mad. 4:23; 24:14.

15. Dahme kahrehda e mwahu kitail en doudouloale duwen dahme Siohwa ketin wiahiong sapwellime aramas akan?

¹⁵ E kin mwahu en doudouloale ahl kaselel me Siohwa ketin kapwaiada sapwellime inou kan ong sapwellime aramas akan, mahs oh pil nan atail ahnsou. Met sewese kitail en kalaudehla atail likih me Siohwa pahn kak ketin kapwaiada kupwure ni ahnsou kohkohdo. Atail doudouloale sapwellimen Koht inou kan pahn kahrehiong kitail en pereperenki inou pwukat oh kakehlaka atail likih me mepwukat pahn pweida.

KAKEHLAKA OMW LIKIH KOHT NI OMW KAUDOK

16. Kapai dah kan kohsang atail doadoahk laud en papah Koht?

¹⁶ Siohwa iei Koht me ketin diren roson oh manaman, oh kin ketin doadoahk ahnsou koaros. Sounmelkahkao koasoia: “Maing KAUN, Koht Wasa Lapalap, sohte me kin ahneki manaman lapalap duwehte komwi.” E pil koasoia: “Ia uwen laud en sapwellimomwi manaman! Ia uwen lapalap en sapwellimomwi roson!” (Mel. 89:8, 13) Pwehki e kin ketin doadoahk ahnsou koaros, Siohwa ketin kupwurperenki ni atail kin wia uwen atail kak en papah ih oh e kin ketin kapaiakitailda. E ketin mwahngih sapwellime ladu kan koaros, ohl oh lih, me pwulopwul oh me mah me re sohte kin pohnkahke, ahpw re kin doadoahk laud. (Lep. Pad. 31:27) Kitail kin kahlemengih Sounkapikpatailo ni atail kin soupisek papah ih. Atail wia uwen atail kak nan sapwellimen Siohwa doadoahk kin kihong kitail nsenamwahu oh kaperenda kupwure.​—Wadek Melkahka 62:12.

17, 18. Ia duwen atail likih Siohwa kin laudla ni atail idawehn sapwellime kaweid kan? Menlau kihda ehu karasaras.

¹⁷ Ia duwen atail likih Siohwa eh kin kehlailla sang ni atail kasalehda pwoson nan atail wiewia kan? Medewehla dahme wiawi ni ahnsou me mehn Israel kan pahn pedolong nan Sapwen Inowo. Siohwa ketin kaweidki samworo ko ren wa kohpwahn inowo oh aluhdihla nan pillap en Sordan. Ahpw ni ahnsou me aramas ako kerenlahng pillapo, re diarada me pihlo lapake pwehki keteu en ahnsowo. Dahme mehn Israel ko wia? Ia duwe, re pahn pweiekdi oh kauwada arail impwal kan limwahn pihlo oh awiawihki wihk kei de reireisang lao pihlo tikitikla? Soh pwe re uhdahn likih Siohwa oh re peikiong sapwellime kaweid kan. Ia imwilahn met? Paipel mahsanih: “Samworo kan ahpw tieng mwohrail oh wahda Kohpwahn Inowo. Ni arail lel ni keilen Pillap Sordan oh kerediong nan pihlo, pihlo ahpw tokedi, sohla pwilipwil.” Mwurin mwo, “samworo kan me wa Kohpwahn Inoun KAUN-O ahpw kesikesihnen pohn pwehl madekeng nanwerengen Sordan, lao aramas koaros kotehla pillapo.” (Sos. 3:12-17) Medewehla ia uwen mehn Israel kan ar peren ni arail kilang lapakeho eh tokedi! Arail pwoson Siohwa kehlailla pwehki ar idawehn sapwellime kaweid kan.

¹⁸ Mehlel me Siohwa sohte kin ketin wia soangen manaman pwukat ong sapwellime aramas akan rahnwet. Ahpw e kin ketin kapaikitailda ni atail kin kasalehda pwoson oh peikiong sapwellime kaweid kan. Sapwellimen Koht manaman kin kihong kitail eimah me kitail anahne pwehn kalohki duwen Wehio nan sampah pwon. Oh Sises Krais, sapwellimen Siohwa Sounkadehde keieu kesempwal, ketin inoukihong sapwellime tohnpadahk kan me e pahn ketin utung irail nan doadoahk kesempwal wet. E mahsanih: “Kumwail eri kohwei wasa koaros oh padahkihong tohn wehi kan koaros; pwe re en wiahla nei tohnpadahk.” Ih eri ketin inoukihong irail: “Eri, kumwail en ese pwe I pahn ieiang kumwail ahnsou koaros lel ni imwin kawa [“koasoandi en mehkan,” NW].” (Mad. 28:19, 20) Sounkadehde tohto me ele kin namenek oh saloh en kalohk ong meteikan nda me sapwellimen Koht manaman sewese irail en ahneki eimah ni arail kalohk ong aramas me re ahpwtehn tuhwong.​—Wadek Melkahka 119:46; 2 Kor. 4:7.

19. Mehnda ma kitail sohte kak wia uwen laud me kitail men wia en papah Koht, dahme kitail kak kamehlele?

¹⁹ Ekei riatail Kristian kan sohte kak wia uwen laud me re men wia nan doadoahk en papah Koht pwehki ar soumwahu de mahla. Ahpw re kak kamehlele me “Samatail me kalahngan oh Koht me pwarer en kansenamwahu koaros” ketin mwahngih arail irair kan. (2 Kor. 1:3) E ketin kesempwalki mehkoaros me kitail wia nan sapwellime doadoahk. Oh kitail koaros anahne tamataman me atail komourala kin keieu pid atail pwoson meirong en Krais.​—Ipru 10:39.

20, 21. Ia ekei ahl en kasalehda atail likih Siohwa?

²⁰ Atail kaudok kin pid atail doadoahngki atail ahnsou, kehl oh kepwe kan ni uwen atail kak nan sapwellimen Koht doadoahk. Kitail men wia uwen atail kak koaros nan doadoahk en kalohk. (2 Tim. 4:5) Kitail kin perenki sewese meteikan en “marainkihla me mehlel.” (1 Tim. 2:4) E sansal me kawauwih oh kapinga Siohwa kin kakepwehpwekitailla mwohn silangin Koht. (Lep. Pad. 10:22) E pil sewese kitail en uhdahn likih Sounkapikpatail, sohte lipilipil dahme ele pahn wiawi.​—Rom 8:35-39.

²¹ Nin duwen atail koasoiapenehr, kitail anahne nantihong laud en likih sapwellimen Siohwa kaweid erpit kan. Kahrehda kitail anahne kalaudehla atail likih met sang ni atail kin kapakap. Doudouloale ia duwen Siohwa eh ketin kapwaiada sapwellime inou kan mahs oh ia duwen e pahn ketin wia met ahnsou kohkohdo. Oh doula kalaudehla omw likih Siohwa sang ni omw wiewiahn kaudok. Tamataman me sapwellimen Siohwa mehn kataman kan pahn mihmi kohkohlahte. Oh ma ke kin tehk mwahu mehn kataman pwukat, ke pahn kak mour kohkohlahte!