Ke Kin Poakohng Sapwellimen Siohwa Mehn Kataman Kan Sang Mohngiongomw Unsek?
“I kin kapwaiada sapwellimomwi mehn kataman kan; I kin poakohng irail sang mohngiongi unsek.”—MELKAHKA 119:167, New World Translation.
1. Ia wasa kitail kin diarada nting tohto me pid duwen sapwellimen Siohwa mehn kataman kan?
SIOHWA kupwurki sapwellime aramas akan en peren. Ahpw, ma kitail men paiekihda peren mehlel, kitail anahne kapwaiada sapwellimen Koht kosonned akan oh koasoandi kan. Pwehn wia met, Siohwa ketikihong kitail mehn kataman kan. Mehn kataman pwukat kin ntingihdi nan Pwuhk Sarawi, keieu tohto nan pwuhken Melkahka 119, oh mwein Soupeidi pwulopwul Esekaia en Suda me ntingihdi Melkahka 119. Melkahka kaselel wet tepikihda lepin lokaia pwukat: “Meid pai irail kan me ar mour mwakelekel, me kin momour nin duwen kosonned en Siohwa. Meid pai irail kan me kin kapwaiada sapwellime mehn kataman kan, oh kin peikiong ni kapehd unsek.”—Melkahka 119:1, 2, NW.
2. Iaduwen sapwellimen Koht mehn kataman kan kin pid peren?
2 Kitail kin ‘momour nin duwen kosonned en Siohwa’ sang ni atail kin sukuhliki loalokong pwung en sapwellime Mahsen oh kapwaiada. Ahpw, pwehki kitail aramas soh-unsek kan, kitail anahne mehn kataman kan. Lepin lokaia “mehn kataman kan” ni lokaiahn Ipru kin wehwehki me Koht kin ketin katamankihong kitail sapwellime kosonned akan oh koasoandi kan. (Madiu 10:18-20) Kitail pahn kak ahneki peren ihte ma kitail pahn kapwaiada mehn kataman pwukat, pwe mehn kataman pwukat kin sewese kitail en dehr lohdi pahn kasongosong kan oh sewese kitail en pitsang kahpwal kan me kin imwikihla nsensuwed.
Nantihong Kapwaiada Sapwellimen Siohwa Mehn Kataman kan
3. Nin duwen dahme ntingihdi nan Melkahka 119:60, 61, dahme kitail kak likih?
3 Sounmelkahka menet kin kesempwaliki sapwellimen Koht mehn kataman kan oh e koulki met: “I sohte pahn pwand, ahpw I pahn mwadang kapwaiada sapwellimomwi mahsen kan. Aramas suwed akan wiahdahr arail mehn lidipih ie, ahpw I sohte manokehla sapwellimomwi kosonnedo.” (Melkahka 119:60, 61) Sapwellimen Siohwa mehn kataman kan kin sewese kitail en dadaur pahn kalokolok kan pwehki kitail kin likih me Samatail nanleng pahn kak kihsang mehn lidip kan me kohsang atail imwintihti kan. Ni ahnsou me konehng, e kin kasaledek kitail sang mehn lidip kan pwe kitail pahn kak pousehla wia doadoahk en kalohki Wehio.—Mark 13:10.
4. Iaduwen kitail anahne mwekidki sapwellimen Koht mehn kataman kan?
4 Ekei ahnsou, sapwellimen Siohwa mehn kataman kan kin kapwungala kitail. Kitail kin kalahnganki kaweid pwukat ahnsou koaros, duwehte sounmelkahka kin kasalehda eh kalahgan. E kapakap ong Koht: “Sapwellimomwi kaweid kan me wia kaperenpei . . . ihme I kesempwalkihki sapwellimomwi kaweid kan.” (Melkahka 119:24, 119) Kitail kin ahneki mehn kataman kan tohto sang sounmelkahkao. Iren Pwuhk Sawari epwiki kei me kin kohsang Palien Pwuhk Sarawi ni lokaiahn Ipru kin pwurehng pwarada nan Palien Pwuhk Sarawi ni lokaiahn Krihk oh ire pwukat kin katamankin kitail duwen sapwellimen Siohwa kosonned akan ong sapwellime aramas akan me kin mih pahn Kosonnedo ahpw pil pid duwen sapwellime kupwure kan ong mwomwohdisohn Kristian. Ni sapwellimen Koht ahnsou me konehng, e pahn katamankin kitail duwen sapwellime kosonned akan, oh kitail kin kalahnganki kaweid pwukat. Oh ma kitail pahn ‘nantihong kapwaiada sapwellimen Siohwa mehn kataman kan,’ met pahn sewese kitail en liksang lidip en dihp akan me kin kansensuwedihala Sounkapikpatail oh kihsang rehtail atail peren.—Melkahka 119:31.
5. Iaduwen kitail kak kalaudehla atail limpoak ong sapwellimen Siohwa mehn kataman kan?
5 Ia uwen laud atail limpoak ong sapwellimen Siohwa mehn kataman kan? Sounmelkahkao koulki met, “I kin kapwaiada sapwellimomwi mehn kataman kan; I kin poakohng irail sang mohngiongi unsek. (Melkahka 119:167, NW) Kitail pahn inenen poakohng sapwellimen Siohwa mehn kataman kan ma kitail kin kilangwong kataman pwukat nin duwen kaweid kan me kin kohsang Sahm men me kin poakepoake kitail. (1 Piter 5:6, 7) Kitail anahne sapwellime mehn kataman kan, oh atail limpoak ong mehn kataman pwukat pahn kehlailda kitail ni ahnsou me kitail pahn wehwehki iaduwen kitail kin ale kamwahupen kaweid pwukat.
Kahrepe kan me Kitail Anahne Sapwellimen Koht Mehn Kataman kan
6. Ia ehu kahrepe me kitail anahne sapwellimen Siohwa mehn kataman kan, oh dahme pahn sewese kitail en tamanda mehn kataman pwukat?
6 Ehu kahrepe kitail anahne sapwellimen Siohwa mehn kataman kan pwehki kitail kin kalapw manokehla. The World Book Encyclopedia koasoia: “Ni aramas kin mahla, re kin limanokonokla. . . . Mwein ke pil kin manokehla ni ahnsoukis, ahd de mehkot . . . Aramas kin kalapw manokehla mehkot ni ahnsoukiste, oh met adanekihla ni lokaiahn wai “retrieval failure.” Saintis kan kin karasaiong met duwehte emen me kin rapahki mehkot nan pere me pingiping. . . . Ma emen men tamataman ire kesempwal ehu, e anahne onop mwahu de medemedewe duwen ire kesempwalo mendahki e lemeleme me e wehwehkier ni unsek ire kesempwalo.” Nantihong onop oh pwurehng medemedewe sapwellimen Koht mehn kataman kan pahn sewese kitail en tamataman mehn kataman pwukat oh kapwaiada.
7. Rahnwet, dahme kahrehda kitail anahne sapwellimen Koht mehn kataman kan laudsang mahs?
7 Kitail anahne sapwellimen Siohwa mehn kataman kan nan rahnpwukat laudsang mahs, pwehki ni ahnsouwet wiewia suwed kan me keieu tohto nan poadopoad en aramas. Ma kitail pahn rong kanahieng sapwellimen Koht mehn kataman kan, kitail pahn ale loalokong me pahn sewese kitail en liksang lidip kan en sampah suwed wet. Sounmelkahkao mahsanih, “I loalokong sang ei sounpadahk kan koaros, pwehki ei kin medemedewe sapwellimomwi kaweid kan. I koahiek sang me mah kan, pwehki ei kin kapwaiada sapwellimomwi kosonned kan. I kin kadohwansang ie soangen tiahk suwed koaros, pwehki ei kin ngoangki peikiong sapwellimomwi mahsen.” (Melkahka 119:99-101) Ma kitail pahn kapwaiada sapwellimen Koht mehn kataman kan, kitail sohte pahn “idawehn mouren me rotorot akan” oh kitail sohte pahn duwehte aramas tohto me “sohte iang ahneki mour me kin sang rehn Koht, pwehki ar mihmi nan rotorot douluhl oh nan ar nan kapehd keptakai.”—Episos 4:17-19.
8. Dahme kitail kak wia pwehn sewese kitail en powehdi kasongosong kan en atail pwoson?
8 Kitail anahne sapwellimen Koht mehn kataman kan pwehki re kin kakehlahda kitail en dadaurete pahn kasongosong kan “ni imwin ahnsou.” (Daniel 12:4) Ma sohte mehn kataman pwukat, kitail pahn kakete ‘manokehla.’ (Seims 1:25) Ahpw, ma kitail pahn nantihong wia pein atail onop Pwuhk Sarawi oh pil onop Pwuhk Sarawi rehn tohnmwomwohdiso iangahki sawas sang pwuhk kan me pwihn en “ladu oh lelepek kan” kin wiahda, mehpwukat koaros pahn kak sewese kitail en powehdi kasongosong kan en atail pwoson. (Madiu 24:45-47) Sawas en pali ngehn pwukat kin sewese kitail en wehwehki dahme kitail anahne wia pwehn kaperenda Siohwa ni ahnsou kitail kin lelohng soangen kasongosong kan.
Sawas Kesempwal me kin Kohsang Atail Mihding kan
9. Ihs irail “kisakis kan me mih rehn ohl akan,” oh iaduwen irail kin sewese iengarail pwoson akan?
9 Kaitaralahn ekei atail anahnepen sapwellimen Koht mehn kataman kan kin kak kohsang mihding en Kristian akan, wasa me kaweid kin kohsang irail brother idihdda kan. Wahnpoaron Pohl ntingihdi me ni ahnsou me Sises “ketidalahng wasa ile kan, e ketiki kohda me selidi ngedehrie, oh ahpw ketin kamwerehdiong pohn aramas akan sapwellime kisakis kan me mih rehn ohl akan.” Pohl pousehla oh mahsanih: “Ekei e [Krais] ketin pilada en wahnpoaron, ekei soukohp, ekei sounkalohki Rongamwahu, ekei sounsilepe oh ekei sounpadahk kan. E ahpw ketin wiahda met pwe en kapwungala sapwellimen Koht aramas akan koaros ong doadoahk en papah me Kristian kan uhdahn pahn wia, pwe en kakairada paliwar en Krais.” (Episos 4:8, 11, 12, NW) Kitail kak kalahnganki “kisakis akan me mih rehn ohl akan”—elder idihdda kan—me kin sewese kitail en kapwaiada sapwellimen Siohwa mehn kataman kan ni ahnsou kitail kin tuhpene ong kaudok!
10. Ia mouren padahk en pwuhken Ipru 10:24, 25?
10 Atail kalahnganki sawas kan me kohsang rehn Koht pahn kamwekid kitail en iang towehda mihding kan en mwomwohdiso ni ehu ehu wihk. Pohl kin kangoange tohnmwomwohdiso kan en kaukaule tuhpene. E ntingihdi: “Kitail nsenoh sawaspene ni kasalepen atail limpoak oh atail wiewia mwahu kan. Kitail dehr tokedihsang atail tiahk en pokonpene, duwen ekei ar kin epwehnki wia. A kitail nantihong kakehlaka nan kapehd en emenemen, Kauno kerendohr.”—Ipru 10:24, 25.
11. Iaduwen atail mihding kan koaros kin sewese kitail?
11 Ke kin kalahnganki sawas kan me kitail kin alehda sang atail mihding kan? Onop en Kahn Iroir ni ehu ehu wihk kin kakehlada atail pwoson, sewese kitail en kapwaiada sapwellimen Siohwa mehn kataman kan, oh kakehlada kitail en pelianda “ngehnen sampah wet.” (1 Korint 2:12; Wiewia 15:31) Nan Mihding ong Wehi Pokon, sounkapahrek kan kin kihda kaweid kan me kohsang nan Mahsen en Koht, iangahki sapwellimen Siohwa mehn kataman kan oh mahsen kaselel kan en Sises “mahsen en mour soutuk.” (Sohn 6:68; 7:46; Madiu 5:1–7:29) Theocratic Ministry Sukuhl kin sewese kitail en koahiekla nan doadoahk en kalohk oh padahk ong aramas akan. Service Mihding iei mihding kesempwal me kin sewese kitail en kamwahuwihala atail padahk kan ni ahnsou kitail kin padahkiong meteikan duwen rongamwahu ni ihmw lel ihmw, return visit kan, de onop Pwuhk Sarawi rehn aramas akan, oh ni ahl teikan nan atail doadoahk en kalohk. Pwihn tikitik kan kin kohpene ong mihding en Onop Pwuhk en Mwomwohdiso oh met kin kamengeiong towe kan en iang pasepeng kan me kin kalapw pid duwen sapwellimen Koht mehn kataman kan.
12, 13. Iaduwen sapwellimen Koht aramas akan nan ehu sahpw en Eisia kasansalehda ia uwen laud en ahr kin kalahnganki mihding en Kristian akan?
12 Kaukaule iang towehda mihding en mwomwohdiso kan kin sewese kitail en tamanda sapwellimen Koht kosonned akan oh kin kakehle kitail ni ahnsou me mahwen kin wiawi, kahpwal en mwohni, oh kasongosong teikan en atail pwoson. Irail Kristian 70 nan ehu sahpw en Eisia kin kesempwaliki mihding kan ni ahnsou irail anahne kohkohsang imwarail kan oh mih nanwel. Pwehki irail men pousehlahte ahr kin kaukaule mihdingpene, re pwurala nan arail kahnimw me ohlahr, oh irail kihsang dipwisou kan en Kingdom Hall me luwehdi, oh irail uhd doadoahngki dipwisou pwukat en kauwada pil ehu wasahn mihding nanwel.
13 Pil ehu wasa nan sahpwohte, sapwellimen Siohwa aramas akan kin ngoangkihte papah Koht mendahki mie mahwen ni erein sounpar tohto. Aramas emen idek rehn emen elder me kin kousoan wasao: “Dahme me kin keieu sewese brother oh sister kan en ahmw wasa en miniminpene?” Dahme e sapengki? “Ni erein sounpar 19, se sohte katiasang mihding ehu. Ekei ahnsou, ekei brother oh sister kan sohte kak iang towehda mihding kan pwehki pakudang de kahpwal teikan, ahpw se sohte kapwowiala mihding kan.” Brother oh sister pwukat kin kalahnganki kesempwalpen kaweid wet: ‘dehr tokedihsang atail tiahk en pokonpene.’
14. Dahme kitail kak sukuhliki sang tiahk kan en lih mah men, Ana?
14 Ana, liohdi men me sounpar 84 “kin kaukaule iang towehda tuhpene kan nan Tehnpas Sarawio.” Pwehki e kin wia met, e kilang ahnsou me Sosep oh Mery walahng seri pwelel Sises nan Tehnpas Sarawio mwurin e ipwidi. (Luk 2:36-38) Ke kin nantihong en dehr katiasang mihding kan? Ke kin nantihong en iang towehda padahk kan koaros en atail kapokon kan? Kaweid katapan ni pali ngehn kin kohda nan kapokon kan kin kasalehong kitail ni sansal me Samatail nanleng kin ketin nsenohki sapwellime aramas akan. (Aiseia 40:11) Soangen ahnsou pwukat kin kahrehong kitail en ahneki peren laud, oh sang ni atail kin iang towehda mihding pwukat, e kin kasansalehda me kitail kin kalahnganki sapwellimen Siohwa mehn kataman kan.—Nehmaia 8:5-8, 12.
Sapwellimen Siohwa Mehn Kataman kan kin Katohrohr Kitail Sang Sampah Wet
15, 16. Iaduwen atail kin kapwaiada sapwellimen Siohwa mehn kataman kan pahn kamwekidada atail tiahk kan?
15 Kapwaiada sapwellimen Koht mehn kataman kan kin sewese kitail en tohrohrsang sampah suwed wet. Karasepe ieu, ma kitail pahn kapwaiada sapwellimen Koht mehn kataman kan, met pahn sewese kitail en dehr wia dipen nenek. (Deuderonomi 5:18; Lepin Padahk 6:29-35; Ipru 13:4) Ma kitail pahn kapwaiada sapwellimen Koht mehn kataman kan, met pil pahn sewese kitail en dehr lohdi pahn kasongosong kan en wia likamw de pirap. (Ekosdus 20:15, 16; Lipai 19:11; Lepin Padahk 30:7-9; Episos 4:25, 28; Ipru 13:18) Kapwaiada sapwellimen Siohwa mehn kataman kan kin pil sewese kitail en dehr dupuk ong meteikan, kou imwintihti, de karaun likamw.—Lipai 19:16, 18; Melkahka 15:1, 3.
16 Sang ni atail kin kapwaiada sapwellimen Koht mehn kataman kan, kitail pahn sarawihla, de katohrohrla, pwehn wia sapwellime doadoahk. Ia uwen kesempwal ong kitail en katorohrsang sampah wet! Sises ni e kapakap ong Siohwa ni kaimwiseklahn pwong en eh mour nin sampah, e peki rehn Siohwa en sewese sapwellime tohnpadahk kan: “I kihongirailehr sapwellimomwi mahsen, oh sampah kailongkiniraillahr pwehki irail kaidehn kisehn sampah, duwehte ngehi me kaidehn kisehn sampah. I sohte peki rehmwi pwe komwi en ketikinirailsang nin sampah, ahpw pwe komwi en ketin perehsang irail Me Suwedo. Duwehte ngehi me kaidehn kisehn sampah, pil ih duwen irail, kaidehn irail kisehn sampah. Komw ketin kasarawihkinirailla me mehlelo; sapwellimomwi mahsen iei me mehlel.” (Sohn 17:14-17) Kitail en pousehla kesempwaliki Mahsen en Koht, met kin katohrohrla kitail pwehn kak wia sapwellime doadoahk sarawi.
17. Dahme kak wiawihong kitail ma kitail pahn pohnsehsehla sapwellimen Koht mehn kataman kan, eri dahme kitail anahne wia?
17 Nin duwen atail kin wia sapwellimen Siohwa ladu kan, kitail kin men Koht en ketin kupwurki atail wiewia kan nan sapwellime doadoahk. Ma kitail pahn pohnsehsehla sapwellimen Koht mehn kataman kan, ngehnen sampah wet pahn pwarada nan atail lokaia kan, mehnia pwuhk kan me kitail kin wadek, mehn kamweit akan me kitail kin pilada, oh atail tiahk kan. Kitail pahn tehk pein kitail pwe kitail sohte men wiahla soangen aramas me kin poakohng mwohni, aksuwei, pohnmwahso, sohte pahn kin kalahnganki mehkot, salelepek, sempoak, lemei, loaumwohmw, kalahwasa, inengieng pein arail peren laudsang kupwur en Koht—met iei ekei irair suwed akan me aramas akan me kin dohsang Koht kin ahneki. (2 Timoty 3:1-5) Pwehki kitail kin mih ni imwin rahn akan en koasoandi suwed wet, kitail en ngidingidki kapakap ong Koht pwehn sewese kitail en kapwaiada sapwellimen Siohwa mehn kataman kan oh ‘kak dadaur eh mour mwakelekel.’—Melkahka 119:9.
18. Dahme atail kapwaiada sapwellimen Koht mehn kataman kan pahn kahrehong kitail en wia?
18 Sapwellimen Siohwa mehn kataman kan kin wia laudsang katamankihong kitail en dehr wia mehkot me sohte konehng. Kapwaiada sapwellime mehn kataman kan pahn sewese kitail en likih Siohwa ni unsek oh poakohng Ih ki mohngiong unsek, mour unsek, lamalam unsek, oh kehl unsek. (Deuderonomi 6:5; Melkahka 4:5; Lepin Padahk 3:5, 6; Madiu 22:37; Mark 12:30) Sapwellimen Koht mehn kataman kan kin kamwekid kitail en poakohng mehn mpatail kan. (Lipai 19:18; Madiu 22:39) Kitail kin kasalehda limpoak ong Koht oh mehn mpatail kan keieu sang ni atail kin kapwaiada kupwuren Koht oh ehukihong meteikan duwen “loalokong me pid duwen Koht.”—Lepin Padahk 2:1-5.
Kapwaiada Sapwellimen Siohwa Mehn Kataman kan kin Kahluwalahng Mour!
19. Iaduwen kitail kak kasalehong meteikan me kapwaiada sapwellimen Siohwa mehn kataman kan me inenen katep laud?
19 Ma kitail pahn kapwaiada sapwellimen Siohwa mehn kataman kan oh sewese meteikan en wia met, kitail pahn doarehla pein kitail oh pil irail kan me kin rong kitail. (1 Timoty 4:16) Iaduwen kitail kak kasalehong meteikan me kapwaiada sapwellimen Siohwa mehn kataman kan mie katep laud? Eri, ma kitail pahn pein kapwaiada kosonned kan en Pwuhk Sarawi, irail akan me “konehng en ale mour soutuk” pahn pein kilang mehn kadehde kan me Mahsen en Koht iei ahl me keieu mwahu ong aramas akan. (Wiewia 13:48) Re pil pahn kilang me ‘mehlelete me Koht ketiket rehtail’ oh met pahn kamwekid irail en iang kitail kaudokiong Kaunepen Lahng oh Sampah, Siohwa.—1 Korint 14:24, 25.
20, 21. Dahme sapwellimen Koht mehn kataman kan oh sapwellime ngehn sarawi pahn sewese kitail en wia?
20 Kitail pahn kak kalaudehla atail limpoak ong sapwellime mehn kataman kan ma kitail pahn pousehla onop Pwuhk Sarawi, kapwaiada dahme kitail kin sukuhliki, oh isaneki sapwellimen Siohwa sawas kan ni pali ngehn. Ma kitail pahn kapwaiada mehn kataman pwukat, re pahn kak sewese kitail en “onehda sapahl pein kitail ong ni aramas kapw me wiawihda rasehng Koht, oh me kin kasalehda pein ih ni mour mehlel en pwung oh sarawi.” (Episos 4:20-24) Sapwellimen Siohwa mehn kataman kan oh sapwellime ngehn sarawi pahn sewese kitail en kasalehda limpoak, peren, popohl, kanengamah, kadek, loalopwoat, pwoson, opampap, oh liksang me suwed—irair pwukat kin weksang irairen sampah wet me mih pahn manaman en Sehdan! (Kalesia 5:22, 23; 1 Sohn 5:19) Ihme kahrehda, kitail kak kalahnganki mehn kataman kan en sapwellimen Siohwa kosonned kan ni ahnsou kitail pahn wia pein atail onop Pwuhk Sarawi, oh mehn kataman kan sang rehn elder idihdda kan, oh nan atail mihding kan oh kapokon kan.
21 Pwehki kitail kin kapwaiada sapwellimen Siohwa mehn kataman kan, kitail kak kolokolte atail peren edetehn kitail kin lelohng kalokolok kan. (Luk 6:22, 23) Kitail en sohpeiong Koht en doarehla kitail ni ahnsou kitail kin lelohng kahpwal laud kan. Met kesempwal, pwehki wehi kan koaros kin pokonpene ong “ni mahwen me pahn wiawi ni Rahn Lapalap en Koht, Wasa Lapalahpie” nan Armakedon.—Kaudiahl 16:14-16.
22. Dahme kitail en nannantihki wia me pid duwen sapwellimen Siohwa mehn kataman kan?
22 Ma kitail men ale kisakis en mour soutuk, kitail anahne poakohng sapwellimen Siohwa mehn kataman kan oh wia uwen me kitail kak en kapwaiada irail. Eri, kitail en duwehte sounmelkahkaho me koulki met: “Sapwellimomwi kaweid kan kin pwung ahnsou koaros; komwi ketikidohng ie wehwe, I ahpw pahn kak momour.” (Melkahka 119:144) Kitail en pil kasalehda soangen ngoang me sounmelkahkao kin kasansalehda: “I patohwan likweriong komwi [Siohwa]. Komwi ketin doareiehla, I ahpw pahn kapwaiada sapwellimomwi kosonned kan.” (Melkahka 119:146) Ei, sang ni atail lokaia kan oh wiewia kan, kitail en kasalehda me kitail uhdahn kin poakohng sapwellimen Siohwa mehn kataman kan.
Iaduwen Ke Pahn Sapeng?
• Iaduwen sounmelkahkao kin kilangwong sapwellimen Siohwa mehn kataman kan?
• Dahme kahrehda kitail anahne sapwellimen Koht mehn kataman kan?
• Soangen sawas dah kei atail mihding kan kin kihda me pid duwen sapwellimen Koht mehn kataman kan?
• Iaduwen sapwellimen Siohwa mehn kataman kin katohrohrla kitail sang sampah wet?
[Kilel nan pali 27]
Sounmelkahkao kin inenen poakohng sapwellimen Siohwa mehn kataman kan
[Kilel nan pali 29]
Ke kin kahlemengih mehn kahlemeng mwahu en Ana oh kin kaukaule iang towehda mihding kan koaros?
[Kilel nan pali 30]
Atail kin kapwaiada sapwellimen Siohwa mehn kataman kan kin katohrohrla kitail nin duwen aramas mwakelekel oh aramas akan me Koht kin kupwurki pwehn wia sapwellime doadoahk