Iahd me Wehin Koht Tepida Kakaun?​—Pali 2

AHN NEPUKADNESAR OURAMAN​—KOUSAPAHL NI MWOTOMWOT

Cameron: Jon, I perenki ei pwurehng tuhwong uhk. I kin ahnsou koaros perenki ata kin onop Paipel ehuehu wihk.a Ia iromw?

Jon: Mwahu douluhl, kalahngan.

Cameron: Mwahu pwe ke kehlail. Wihk nekiero ni ata koasoakoasoi, kita koasoiapene duwen dahme kahrehda Sounkadehdehn Siohwa kan nda me Wehin Koht tepida kakaun nan pahr 1914.b Nin duwen me kita koasoiapenehr, kita diarada mehn kadehde kesempwal ehu nan kokohp me mi nan pwuhken Daniel irelaud 4. Ke tamanda dahme kileldi wasao?

Jon: Me pid duwen en Nanmwarki Nepukadnesar ouramankihda duwen lapalahn tuhkeo.

Cameron: Ei, pwung. Nan eh ouramano, Nepukadnesar kilangada lapalahn tuhke pwoat me leldalahng nanleng. E rong sapwellimen Koht meninkeder men me ruwese tuhkeo en paldi, ahpw rah kan oh kalewe kan en mihmihte nan pwehl. Mwurin “sounpar isuh,” tuhkeo pahn pwurehng wosada.c Kita pil koasoiapene dahme kahrehda kokohpo pweida pak riau. Ke taman ia duwen eh tepin pweida?

Jon: E wiawihong Nepukadnesar, kaidehn? E iahkala sounpar isuh.

Cameron: Uhdahn pwung. E iahkala ekis ahnsou, eri eh kaunda uhdi. Ahpw nan pweidahn kokohpo me keieu laud, sapwellimen Koht kaunda pahn uhdi erein sounpar isuh. Ni ata kilangehr, me sounpar isuhwo tepida ni ahnsou me Serusalem ohla nan pahr 607 Mwohn Krais. Sang ahnsowo kohla, sohla nanmwarki nin sampah me kin wiliandi Siohwa kakaun sapwellime aramas akan. Ahpw, ni kaimwiseklahn sounpar isuhwo, Koht pahn ketin idihada Kaun kapw men me ketiket nanleng me pahn kaunda sapwellime aramas akan. Me wehwehki, imwilahn sounpar isuhwo pahn kilelehdi tepidahn kaundahn Wehin Koht nanleng. Eri, kita koasoiapenehr iahd me sounpar isuhwo tepida. Eri ma kita kak tehk ni keneinei ia uwen werei en sounpar isuhwo, kita pahn kak ese iahd me Wehin Koht tepida kakaun. Ke wehwehki dahme kita koasoiapenehr?

Jon: Ei, ata kousapahlih ire pwukat sewese ie en pwurehng tamanda dahme kita koasoia wihk nekiero.

Cameron: Mwahu douluhl. Met kita pahn koasoiapene ia uwen werei en sounpar isuhwo. I ahpwtehn nek wadek ire pwukat pwehn katamankidohng ie ire kesempwal kan. I pahn wia uwen ei kak en kawehwe ire pwukat.

Jon: Mwahu.

SOUNPAR ISUHWO IMWISEKLA​—IMWIN RAHN AKAN TEPIDA

Cameron: Nan tepin pweidahn kokohpo me pid Nepukadnesar, sounpar isuhwo iei uhdahn sounpar isuh. Ahpw nan pweidahn kokohp me keieu laud me pid Wehin Koht, sounpar isuhwo ele uhdahn werei sang uhdahn sounpar isuh.

Jon: Dah ke ndahki men?

Cameron: Keieu, taman me sounpar isuhwo tepida ni ahnsou me Serusalem ohla nan pahr 607 Mwohn Krais. Ma kita tepida wadek sang pahro, sounpar isuh pahn lel pahr 600 Mwohn Krais. Ahpw sohte mehkot kesempwal wiawi nan pahro me pid sapwellimen Koht kaunda. Oh pil, ni ata koasoiapenehr mwoweo, sounpar epwiki kei mwuri ni ahnsou me Sises ketiket nin sampah, e ketin kasalehda me sounpar isuhwo saikinte imwisekla.

Jon: Oh ei, I tamanda.

Cameron: Ekei pak, kokohp kan en Paipel kin karasahiong rahn ehu ong sounpar ehu.d Eri sounpar isuhwo kaidehn uhdahn sounpar isuh, ahpw met kin pid erein ahnsou ehu me ehuehu rahn kin wehwehki pahr ehu.

Jon: Met I wehwehki dahme ke ndindahn, rahn ehu ong pahr ehu, pwung?

Cameron: Pwung ih men. Pwuhken kaudiahl, me kin dokedoke pwuhken Daniel, sewese kitail en tehk ia uwen werei en sounpar isuhwo. E kasalehda sounpar siluh elep me pahrekiong rahn 1,260.e Eri sounpar isuh, pak riau en sounpar siluh elep, pahn wiahda rahn 2,520. Ke wehwehki dahme I ndinda?

Jon: Ei, I wehwehki. Ahpw I sohte kilang ia duwen met eh kasalehda me Wehin Koht tepida kakaun nan pahr 1914.

Cameron: Mwahu, kita kilang ma kita kak wehwehkihla met. Ma kita doadoahngki koasoandi en rahn ehu ong pahr ehu, sounpar isuhwo pahn wiahda sounpar 2,520. Wadek kohdo sang pahr 607 Mwohn Krais, sounpar 2,520 pahn lel pahr 1914.f Ih mwomwen atail lel pahr 1914, pahr me sounpar isuhwo imwisekla, ahnsou me kaundahn Sises nin duwen Nanmwarki en Wehin Koht tepida. Oh e sansal mwahu me sangete pahr 1914, mwekid laud kan kin wiawi nan sampah, mwekid kan me Paipel kohpada me pahn wiawi ni imwin rahn kan.

Jon: Mwekid laud dah kan me wiawi?

Cameron: Tehk dahme Sises mahsanih me kileldi wasaht nan Madiu 24:7. Me pid ahnsou me e pahn ketin tepida kakaun nanleng, Sises mahsanih duwen sampah: “Ehu sahpw pahn uhwong ehu sahpw, ehu wehi pahn mahweniong ehu wehi. Wasa koaros lehk lapalap oh rerrer en sahpw pahn wiawi.” Tehk me Sises ketin kohpada me lehk lapalap oh rerrer en sapw pahn wiawi erein ahnsowo. Sampah wet direkilahr kahpwal pwukat sounpar epwiki me nekiero, kaidehn?

Jon: Mehlel.

Cameron: Nan iretikitik wet, Sises pil ketin kohpada me mahwen pahn wiawi ni ahnsoun eh pahn ketier nin duwen Nanmwarki en Wehin Koht. Oh pwuhken Kaudiahl kohpada kaidehn mahwen en tohn wehi ehute ahpw mahwen kan me pahn kahpwalihala sampah pwon erein imwin rahn akan.g Ke taman iahd me mahwen keieu en sampah tepida wiawi?

Jon: E wiawi nan pahr 1914, pahrohte me ke nda me Sises ketin tepida kakaun! I sohte wehwehki met nin tapio ahpw met I wehwehki.

Cameron: Ni ata kihpene ire pwukat koaros, kokohp duwen sounpar isuhwo oh pil kokohp en Paipel teikan me kin koasoia duwen imwin rahn akan, met uhdahn sansal. Sounkadehdehn Siohwa kan kin kamehlele me Sises tepida kakaun nin duwen Nanmwarki en Wehin Koht nan pahr 1914, oh me imwin rahn kan tepida nan pahrohte.h

Jon: I songosong en wehwehkihla duwen mepwukat koaros.

Cameron: I uhdahn wehwehki. Nin duwen ei nda nin tapio, I doadoahngki ahnsou laud pwehn wehwehkihla ire pwukat. Ahpw I koapworopworki me ata koasoiapene ire pwukat sewese iuk en kilang me mendahte pahr 1914 sohte kileldi nan Paipel, dahme Sounkadehdehn Siohwa kan kin kamehlele duwen pahro kin poahsoanda sang nan Paipel.

Jon: Ei, I kin ahnsou koaros kapingahkin uhk duwen met, sohte lipilipil dahme ke kin nda, ke kin sapengki iren Paipel. Kaidehn pein omw madamadau. Ahpw I kin medemedewe dahme kahrehda e apwal en wehwehki ire wet. Dahme kahrehda Koht sohte ketin mahsaniong kitail nan Paipel me pahr 1914 pahn wia pahr me Sises pahn ketin tepida kakaun nanleng?

Cameron: Jon, omw peidek uhdahn mwahu. Ni mehlel, mie soahng tohto me sohte uhdahn kileldi nan Paipel. Eri dahme kahrehda Koht ketin mweidohng pwe Paipel en ntingdi ni ahl ehu me aramas akan anahne doadoahk laud pwehn wehwehkihla? Mwein kita kak koasoiapene duwen met ni ei pahn pwurehng pwurodo.

Jon: I mwahuki.