Watchtower ONLINE LIBRARY
Watchtower
ONLINE LIBRARY
Ponapean
  • PAIPEL
  • SAWASEPEN PAIPEL KAN
  • MIHTING KAN
  • km 10/14 pp. 3-7
  • Iahd me Wehin Koht Tepida Kakaun?​—Pali 1

Sohte kasdo ong met

Kupwurmahk, mehkot sapwung en kihda kasdo

  • Iahd me Wehin Koht Tepida Kakaun?​—Pali 1
  • Atail Doadoahk ong Wehio—2014
  • Sawaspen Oaralap kan
  • Ire kan me Duwehte Met
  • “RAPAHKI” PWE KEN WEHWEHKI
  • EN NEPUKADNESAR OURAMAN
  • OARALAP EN PWUHKEN DANIEL
  • “EREIN SOUNPAR ISUH”
  • Iahd me Wehin Koht Tepida Kakaun?​—Pali 2
    Atail Doadoahk ong Wehio—2014
  • Mour me Keieu Mwahu
    Atail Mour en Kristian oh Kalohk—Doaropwehn Kasukuhl ong Mihting (2016)
  • Wehin Koht Wie Kakaun ni Ahnsou Wet!
    Pereperenki Mour Kohkohlahte!​—Koasoiapene Duwen Paipel
  • Sukuhl Sang Omw Sapwung kan
    Atail Mour en Kristian oh Kalohk—Doaropwehn Kasukuhl ong Mihting—2017
Kilang Pil Ekei
Atail Doadoahk ong Wehio—2014
km 10/14 pp. 3-7

KOASOAKOASOIONG MEHN MPATAIL

Iahd me Wehin Koht Tepida Kakaun?​—Pali 1

Dahme kileldi pah iei mwomwen koasoakoasoipene ehu me kakete wiawi nanpwungen Sounkadehdehn Siohwa men oh tohnihmw men. Kitail medewehla me Sounkadehdehn Siohwa men me ede Cameron kohla ni imwen emen ohl me ede Jon.

“RAPAHKI” PWE KEN WEHWEHKI

Cameron: Jon, I uhdahn perenki ata kin kaukaule koasoiapene duwen Paipel.a Rahn teio ni ata koasoakoasoipene, ke kihda ehu peidek duwen Wehin Koht. Ke idek dahme kahrehda Sounkadehdehn Siohwa kan kamehlele me Wehin Koht tepida kakaun nan pahr 1914.

Jon: Ei, I wadewadek ehu noumwail pwuhk, oh e nda me Wehin Koht tepida kakaun nan pahr 1914. Met kalaudehla ei men esehla pwehki ke nda me soahng koaros me ke kamehlele poahsoanda sang nan Paipel.

Cameron: Pwung, se kin.

Jon: Ke ese, I wadekalahr Paipel pwon. Ahpw I sohte kak taman ehu iren Paipel me koasoia duwen pahr 1914. Eri I kohla nan online Paipel oh rapahki pahr “1914.” Ahpw sohte wasakis nan Paipel e pwarada loale.

Cameron: Jon, I kapinga iuk ong kahrepe riau. Keieu, ke wadekalahr Paipel pwon. Ele ke uhdahn poakohng Mahsen en Koht.

Jon: Ei I kin. Sohte pwuhk ehu me duwehte Paipel.

Cameron: Ke pwung. Keriau, I men kapingahkin uhk ni omw kin pahkala iren Paipel kan ni omw kin song en diarada pasapengpen omw peidek kan. Ke wia duwehte dahme Paipel kangoangehkin kitail en wia: “Rapahki” pwe ken wehwehki.b E uhdahn mwahu omw kin nantihong wia met.

Jon: Kalahngan en komwi. I men pousehla sukuhlki duwen Paipel. Ni mehlel, I pil ekis kalaudehla ei roporop oh diarada ekei ire kan me pid duwen pahr 1914 nan pwuhk me kita kin onopki. I medewe e koasoia duwen nanmwarki men me ahneki ouraman ehu, me pid duwen lapalahn tuhke pwoat me paldi oh pwurehng wosada.

Cameron: Ei, Ih kokohpo men me kileldi nan pwuhken Daniel irelaud 4. E pid ouraman ehu me Nanmwarki en Papilon Nepukadnesar ahneki.

Jon: Ei, ih men. I pwurepwurehng wadek kokohpo. Ahpw ni mehlel, I saikinte wehwehki dahme kahrehda met kin pidada Wehin Koht de pahr 1914.

Cameron: Ke ese, Jon, soukohp Daniel pil sohte wehwehki uhdahn wehwehn kokohp me Koht kamwakid en ntingihdi!

Jon: Mehlel?

Cameron: Ei. Nan Daniel 12:8, e koasoia: “I rong dahme e mahsanih, ahpw I sohte wehwehki.”

Jon: Eri kaidehn ngehi kelehpw me sohte wehwehki kokohp wet. Met kahrehiong ie en ekis nsenamwahula.

Cameron: Ni mehlel, Daniel sohte wehwehki pwehki e saikinte lel ahnsou me Koht pahn ketin mweidohng aramas akan en wehwehki ni unsek wehwehn kokohp kan nan pwuhken Daniel. Ahpw met, nan atail ahnsou, kitail kak wehwehki kokohp pwukat.

Jon: Dahme kahrehda ke ndahki men?

Cameron: Na, tehk iretikitik en mwurin met. Daniel 12:9 mahsanih: “Mahsen pwukat pahn wie nekinek ni rir lao lel ni imwilahn ahnsou.” Eri kokohp pwukat pahn sansalda mwuhr, erein “imwilahn ahnsou.” Oh kita pahn koasoiapene ire wet nan ata onop en Paipel, me mehn kadehde koaros kin kasalehda me kitail momour ni ahnsowo.c

Jon: Eri, ke kak kawehwehiong ie kokohp en Daniel?

Cameron: I pahn wia uwen ei kak.

EN NEPUKADNESAR OURAMAN

Cameron: En tapiada, I pahn kousapahlih ni mwotomwot dahme Nanmwarki Nepukadnesar kilangada nan eh ouramano. Mwurin mwo kita kak koasoiapene ia wehwe.

Jon: Mwahu.

Cameron: Nan ouramano, Nepukadnesar kilangada lapalahn tuhke pwoat me leldalahng nanleng. Eri e rong sapwellimen Koht meninkeder men me ruwese tuhkeo en paldi. Ahpw, Koht mahsanih me kalewe kan en mihmihte nan pwehl. Mwurin e lel “sounpar isuh,” tuhkeo pahn pwurehng wosada.d Kokohp wet kin dokedokehte Nanmwarki Nepukadnesar. Mendahki e wia nanmwarki ndand men, duwehte tuhkeo me leldalahng nanleng, ni karasaras e paldi mwurin “sounpar isuh.” Ke tamataman dahme wiawi?

Jon: Soh, I sohte taman.

Cameron: E mwahu. Paipel kasalehda me Nepukadnesar iahkala oh e sansal me met wiawi erein sounpar isuh. Erein ahnsowo, e sohte kak kaun nin duwen nanmwarki men. Ahpw imwilahn sounpar isuh, Nepukadnesar sohla iahk oh pwurehng tapiada kakaun.e

Jon: Mwahu, I wehwehki soahng koaros me ke nda lel met. Ahpw ia duwen mepwukat koaros ar pidada Wehin Koht oh pahr 1914?

Cameron: I pahn kawehwehda ni mwotomwot kokohp wet, mie soahng riau me pweida. Kokohp wet tepin pweida ni ahnsou me en Nanmwarki Nepukadnesar eh kaunda uhdi. Kokohp wet pwurehng pweida oh met kin pid kaundahn Koht eh uhdi. Eri keriaun pweidahn kokohp wet kin dokedoke Wehin Koht.

Jon: Ia duwen omw ese me kokohp wet pwurehng pweida me pid Wehin Koht?

Cameron: Mwohn mehkoaros, se diarada mehn kadehde kei nan kokohpo. Nin duwen Daniel 4:17 koasoia me kokohpo kohieng “aramas akan wasa koaros en ese me Koht, Wasa Lapalahpie, kin ketin kaunda wehin aramas koaros. Pein ih kin ketin kak kasapwilada nanmwarki men sang nanpwungen aramas sohte lipilipil.” Ke tehk lepin mahsen wet “wehin aramas koaros”?

Jon: Ei, wasaht mahsanih “Wasa Lapalahpie, kin ketin kaunda wehin aramas koaros.”

Cameron: Pwung. Ia omw madamadau, ihs me wia “Wasa Lapalahpie”?

Jon: Ei madamadau, e koasokoasoia duwen Koht.

Cameron: Pwung. Eri met padahkihong kitail me kokohp wet sohte pidadahte duwen Nepukadnesar. E pil pidada “wehin aramas koaros,” me iei, duwen sapwellimen Koht kaunda ong tohnsampah. Oh e pahn sansal mwahu ma kita pahn kilang kokohp wet nan pwuhken Daniel pwon.

Jon: Ia duwe?

OARALAP EN PWUHKEN DANIEL

Cameron: Pwuhken Daniel kin pwurepwurehng koasoia oaralap ehute. E kin kalapw koasoia pweidahn Wehin Koht pahn kaundahn sapwellime Ohl, Sises. Karasepe, kita pahkalahng tepin irelaud kan. Ke kak menlau wadek Daniel 2:44?

Jon: Mwahu. Wasaht mahsanih: “Eri, ni ahnsou me nanmwarki ko pahn kakaun wasa, Koht en nanleng pahn ketin kauwada mwehi ehu me sohte imwi. Mwehi wet sohte pahn kak lohdi, ahpw e pahn kauwehla mwehi teikan koaros, oh pahn mihmi kohkohlahte.”

Cameron: Kalahngan. Ia duwe, ke medewe ire wet kin pidada Wehin Koht?

Jon: Hmm. I sehse.

Cameron: Na tehk wasaht, e mahsanih me Wehi wet “pahn mihmi kohkohlahte.” Met mehlel duwen Wehin Koht, ahpw ia duwen atail kak nda me koperment en aramas me kak mihmi kohkohlahte?

Jon: Soh, I leme e sohte kak.

Cameron: Iet pil ehu kokohp nan pwuhken Daniel me pid Wehin Koht. Iei kokohp me kileldi nan Daniel 7:13, 14. Me pid duwen kaunen ahnsou kohkohdo, e mahsanih: “E ahpw ale manaman en kaunda wasa, wahu, oh lingan en nanmwarki, pwe tohn wehi kan koaros, keinek koaros, oh me kin lokaiahki soangen lokaia teikan en kin papah ih. Sapwellime manaman en kaunda wasa pahn poatopoat, oh sapwellime wehi sohte pahn imwisekla.” Mie mehkot nan kokohp wet me ke rong me mwomwen ke ese?

Jon: E koasoia duwen wehi ehu.

Cameron: Ei pwung. Oh kaidehn ehu wehi sohte lipilipil. Tehk pwe e mahsanih me Wehi wet pahn kaunda “tohn wehi kan koaros, keinek koaros, oh me kin lokaiahki soangen lokaia teikan.” Met wehwehki me Wehi wet pahn kaunda sampah pwon.

Jon: I sehse me ih wehwehn iren Paipelo men, ahpw ke pwung. Ih me e mahsanihen men.

Cameron: Oh pil tehk dahme kokohp wet pil mahsanih: “Sapwellime manaman en kaunda wasa pahn poatopoat, oh sapwellime wehi sohte pahn imwisekla.” Ia duwe, ke seu pwungki me kokohp wet duwehte kokohp me kita ahpwtehn wadek nan Daniel 2:44?

Jon: Ei, e duwehte.

Cameron: Kita pahn kousapahl ni mwotomwot dahme kita koasoiahier. Kokohp nan Daniel irelaud 4 kohiengehr aramas akan pwe ren ese me “Wasa Lapalahpie, kin ketin kaunda wehin aramas koaros.” Mahsen pwukat kin kasalehda ni sansal me kokohp wet pweida laudsang kokohp me pid Nepukadnesar. Oh nan pwuhken Daniel pwon, kitail diarada kokohp kan me pid duwen pweidahn Wehin Koht pahn kaundahn sapwellime Ohl. Ke sou leme me e pwung en medewe me kokohp nan Daniel irelaud 4 pil kin pid Wehin Koht?

Jon: Mwein. Ahpw I saikinte kak wehwehki ia duwen met eh kin dokedoke pahr 1914.

“EREIN SOUNPAR ISUH”

Cameron: Eri, kita pwuralahng Nanmwarki Nepukadnesar. Tamataman me nan kokohpo, tuhkeo kin karasahiong Nanmwarki Nepukadnesar. Eh kaunda uhdi ni ahnsou me tuhkeo paldi oh mihmi nanpwel sounpar isuh, me iei, ahnsou me e iahkala ni ahnsou kei. Erein sounpar isuhwo eh imwisekla ahnsou me Nepukadnesar sohla iahk oh e pwurehng tepida kaunda. Nan keriaun pweidahn kokohpo, sapwellimen Koht kaunda pahn uhdi ahnsou kei, ahpw kaidehn pwehki mie mehkot sapwung rehn Koht.

Jon: Ia wehwehn men?

Cameron: Ni mwehin mehn Israel kan, nanmwarki kan me kakaun sang nan Serusalem alehdi kehkehlik en mwohd ni “mwoahl me KAUN-O ketin kauwada.”f Re kin wiliandi Koht ni ar kin kakaun sapwellime aramas akan. Ahpw mwuhr, pali laud en nanmwarki ko sapeikiongla Koht oh pali laud en aramas kan idawehnla arail mehn kahlemeng suwed. Pwehki mehn Israel kan sapeik, Koht ketin mweidohng mehn Papilon kan en kaloweiraildi nan pahr 607 Mwohn Krais. Sang ahnsowo kohdo, sohla nanmwarki me kin wiliandi Siohwa nan Serusalem. Ni ahl wet, Sapwellimen Koht kaunda uhdi. Lel met, ke wehwehki dahme I kawehwehiong uhk?

Jon: Ei.

Cameron: Eri pahr 607 Mwohn Krais kilelehdi tepin sounpar isuhwo, de ahnsou me sapwellimen Koht kaunda pahn uhdi. Ni imwilahn sounpar isuhwo, Koht pahn ketin kasapwilada emen kaun me pahn wiliandi Ih, ahpw met, emen me ketiket nanleng. Ih ahnsowo me kokohp ko me kita wadek nan Daniel pahn pweida. Eri peidek kesempwalo iei: Iahd me sounpar isuhwo imwisekla? Ma kita kak sapengala peidek wet, kita pahn ese iahd me Wehin Koht tepida kakaun.

Jon: E pwung. Eri met wehwehki me sounpar isuhwo imwisekla nan pahr 1914?

Cameron: Uhdahn! Ke pwung.

Jon: Ahpw ia duwen atail ese met?

Cameron: Erein sapwellime doadoahk en kalohk nin sampah, Sises ketin kasalehda me sounpar isuhwo saikinte imwisekla.g Eri e uhdahn wia ahnsou werei ehu. Sounpar isuhwo tepida sounpar epwiki kei mwohn Sises ketidihdo nin sampah, oh pousehla lao lel erein ahnsou ehu mwurin e ketidahla nanleng. Pil tamataman me wehwehn kokohp kan nan Daniel sohte pahn sansalda lao lel “imwilahn ahnsou.”h Erein sounpar kei mwohn pahr 1900, tohnsukuhl en Paipel ngoang kan uhdahn men wehwehki kokohp pwukat oh tehk kanahieng kokohp pwukat. Re tepida ekis wehwehkihla me sounpar isuhwo pahn imwisekla nan pahr 1914. Oh mwekid laud kan me wiawi nan sampah pwon sangete ahnsowo kadehdehda me pahr 1914 iei uhdahn pahr me Wehin Koht tepida kakaun nanleng. Iei pahr me imwin rahn akan de imwin ahnsou tepida nin sampah. I ese me ire pwukat kapw ong uhk en medemedewe duwe . . .

Jon: Ei. Uhdahn I pahn pwurehng wadek met pwe ien kak wehwehkihla ni sansal.

Cameron: Ke dehr pwunodki. I pil anahne ekis ahnsou ien wehwehkihla kokohp pwukat oh duwen ar pweida. Ahpw I koapworopworki me ata koasoipene sewese iuk en kilang me dahme Sounkadehdehn Siohwa kan kin kamehlele duwen Wehio kin poahsoanda sang nan Paipel.

Jon: Mehlel. I kin ahnsou koaros kapingahkin uhk omw kin likih Paipel ong dahme ke kin kamehlele.

Cameron: Oh I pil kak kilang me ke pil ahneki soangen pepehmohte. Nin duwen me I ahpwtehn nda, e nohn tohtohla ire kapw kan ken medemedewe ahnsou teieu. Mwein miehte ekei omw peidek kan. Karasepe, kita pwungkipene me sounpar isuhwo kin pid Wehin Koht oh me e tepida nan pahr 607 Mwohn Krais. Ahpw ia duwen ata ese ni pwung me sounpar isuhwo imwisekla nan pahr 1914?i

Jon: Ei, I kin medemedewe duwen men.

Cameron: Paipel me kin sewese kitail en tehk ni pwung ia uwen werei en sounpar isuhwo. Ke men tehk oaralap wet ni ei pahn pwurehng pwurodo?

Jon: Ei, mwahu.

a Ih mwomwen arail kin wia onop en Paipel ni soh isepe, Sounkadehdehn Siohwa kan kin kalapw onopki ehu ire kohlahng ehu ire duwen Paipel rehn tohnihmw kan.

b Lepin Padahk 2:3-5.

c Kilang irelaud 9 en pwuhken Dahme Paipel Uhdahn Padahngki? me Sounkadehdehn Siohwa kan wiahda.

d Daniel 4:13-17.

e Daniel 4:20-36.

f 1 Kronikel 29:23.

g Nan sapwellime kokohp me pid imwin rahn akan, Sises mahsanih: “Serusalem [me kin wiliandi sapwellimen Koht kaunda] pahn tiatipeseng pahn nehn me rotorot akan, lao ar ahnsou pahn imwisekla.” (Luk 21:24) Eri sapwellimen Koht kaunda uhdihte ni mwehin Sises oh pahn pousehlahte uhdi lao lel imwin rahn akan.

h Daniel 12:9

i Menlau kilang oaralap en Oaritik kan, “1914—Pahr Kesempwal Ehu nan Kokohp en Paipel” en pwuhken Dahme Paipel Uhdahn Padahngki?

    Pwuhk kan en lokaiahn Pohnpei (1987-2025)
    Log Out
    Log In
    • Ponapean
    • Share
    • Me Ke Mwahuki
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share