Sohte Elen Mour Ehu me Mwahusang Met

Dahme ke kak wia pwehn karanihala Koht? Kitail koasoiapenehr kahk kei me ke kak wia pwehn kakairada omw nanpwungmwahu keren reh:

1. Esehla oh doadoahngki mwaren Koht, Siohwa.

2. Kalapw kapakap ong ih oh onopki sapwellime Mahsen, Paipel.

3. Nantihong wia dahme kin kaperenda Siohwa.

Sang kahk siluh pwukat, ke kak nda me ke kin wiewia dahme anahn pwehn karanihala Koht? Mie wasa kan me ke pehm me ke kak kamwahwihala? Mehlel me nannanti laud anahn, ahpw medewehla imwilahn met.

Jennifer, sang Amerika, nda: “Omw nantihong laud pwehn kakairada nanpwungmwahu keren rehn Koht uhdahn katapan. Nanpwungmwahu wet kin wahdo kapai tohto, duwehte e kalaudehla omw likih Koht, omw wehwehkihla laud sapwellime irair kaselel kan, ahpw keieu, e kalaudehla omw limpoak ong ih. Sohte elen mour ehu me mwahusang met!”

Ma ke men ahneki nanpwungmwahu keren rehn Koht, Sounkadehdehn Siohwa kan pahn perenki sewese iuk. Re kak koasoanehdi en onop Paipel rehmw ni soh isepe. Re pil luke iuk ken iang towehda arail mihting kan nan arail Wasahn Kaudok me padahk kan kin poahsoankihda Paipel, wasa me ke pahn kak perenki werekiong irail me kin kesempwalki arail nanpwungmwahu rehn Koht.a Ni omw wia met, ke pil pahn ahneki pepehmohte me sounmelkahkao ahneki ni eh koasoia: “A duwen ngehi, ia uwen kesempwal en ei karanih Koht.”​—Melkahka 73:28.