Kapingkalahngan ong Siohwa oh E Pahn Ketin Kupwuramwahwihiuk

1. Dahme kahrehda kitail kin kapingkalahngan ong Siohwa?

SIOHWA kin ketikihong kitail “soangen wiawi sapan koaros oh kisakis mwahu koaros.” (Seims 1:17) Iei ih me Sounsilepatail limpoak oh me kin ketin apwahpwalihkin kitail soahng koaros me kitail anahne. (Mel. 23:1-3) Siohwa uhdahn ketin warohng atail kapingkalahngan. Ih me “perehpatail oh atail kehl,” ahpw mehlel ni atail kin lelohng lokolok. (Mel. 46:1) Kitail ahneki soangen pepehmohte me sounmelkahkao ahneki ni eh ntingihedi: “Kapingkalahngan ong Siohwa, pwehki ih me kupwur mwahu; Sapwellime limpoak poatopoat pahn mi kohkohlahte.”​—Mel. 106:1, NW.

2, 3. (a) Dahme kak kahrehiong kitail en sohla kasalehda kalahngan? (b) Peidek dah kan me kitail pahn koasoiapene nan iren onop wet?

² Dahme kahrehda kitail anahne kapingkalahngan ong Siohwa? Nin duwen me kokohpdahr, aramas akan ni imwin rahn akan uhdahn sohte kin kasapahlkalahnganki mehkot. (2 Tim. 3:2) Me tohto sohte kin kalahnganki soahng mwahu kan me Siohwa ketin wiahiong irail. Kitail mi nan sampah noahrok ehu me kin kangoange aramas tohtohie ren pwainda tohtohsang dahme re uhdahn anahne. Met imwikihla me tohto en sohla itarki dahme re ahnekier. Duwehte mehn Israel kan mahs, kitail kak sohla kalahnganki oh kesempwalki kapai kan me kitail ahneki oh pil atail nanpwungmwahu keren rehn Siohwa.​—Mel. 106:7, 11-13.

³ Pil medewehla duwen dahme kak wiawi ni atail kin lokolok pahn kahpwal kan. Atail kahpwal kan ele kak wiahla mehkot inenen laud oh kahrehda kitail en medemedewehte kahpwal ko a kaidehn kapai kan me kitail ahneki. (Mel. 116:3) Ia duwen atail kak kolokolte atail kalahngan? Ia duwen atail kak kolokol madamadau pwung mendahki kasongosong laud kan? Kitail pahn tehkpene met.

‘MAING SIOHWA . . . IA UWEN TOHTOHN SOAHNG KAPWURIAMWEI KAN ME KOMW KETIN WIAHIONG KIHT’

4. Ia duwen atail kak kolokol atail kapingkalahngan ong Siohwa?

⁴ Kitail anahne nanti laud pwe kitail en kolokolte atail kapingkalahngan ong Siohwa. Keieu, kitail anahne pohnese kapai kan me Siohwa ketikihong emenemen kitail. Oh kitail pil anahne medemedewe kanahieng ia duwen kapai pwukat ar kin kasalehda sapwellimen Koht limpoak laud ong kitail. Ni sounmelkahkao eh wia met, e inenen pwuriamweikihla soahng kapwuriamwei kan koaros me Siohwa ketin wiahiong ih.​—Wadek Melkahka 40:5; 107:43.

5. Dahme kitail kak sukuhlkihsang wahnpoaron Pohl duwen kasalehda kalahngan?

⁵ Kitail kak sukuhlki ia duwen atail en kapingkalahngan ong Siohwa sang ni atail medemedewe mehn kahlemeng en wahnpoaron Pohl. Kitail ese me Pohl kin doudouloale kapai kan me e ahneki pwehki e kin kalapw kalahngankihong Koht ni kapakap. Pohl pohnese me e kin “lahlahwe mahso, oh pil kaloke oh kauwe” Kristian kan. E kin kalahnganki me, mendahki eh wiewiahn mahso, Koht oh Krais ketin kasalehiong ih mahk kalahngan oh ketikihong ih pwais kaselel en kalohk ong meteikan. (Wadek 1 Timoty 1:12-14.) Pohl pil uhdahn kalahnganki rie Kristian kan oh kin kalapw kalahngankihong Siohwa arail irair mwahu kan oh arail kin papah ni lelepek. (Pil. 1:3-5, 7; 1 Des. 1:2, 3) Pohl kin mwadang en kalahngankihong Siohwa soahng koaros me rie Kristian ko wiahiong ih ni eh kin dadaur pahn kahpwal kan. (Wiewia 28:15; 2 Kor. 7:5-7) E sohte kapwuriamwei ong kitail me Pohl kangoange Kristian kan ni ahl wet: “Kumwail en kin kasapahlkalahngan . . . oh pil peneupene nanpwungamwail ni soangen loalokong koaros. Kumwail koulki koulen kaudok oh koul sarawi kan; kumwail kouliong Koht, kapinga ih.”​—Kol. 3:15-17.

DOUDOULOALE OH KAPAKAP SEWESE KITAIL EN KOLOKOL ATAIL KALAHNGAN

6. Dahme kahrehda ke kin kalahngan ong Siohwa?

⁶ Ia duwen atail kak alasang ahn Pohl mehn kahlemeng? Kitail kak doudouloale dahme Siohwa ketin wiahiong emenemen kitail. (Mel. 116:12) Ma emen idek rehmw “Soangen kapai dah kan sang rehn Siohwa me ke kalahnganki?” ia duwen omw pahn sapeng? Ke pahn nda me omw nanpwungmwahu rehn Siohwa? De mahkpen dipomw kan pwehki sapwellimen Krais meirong? Ke pahn ndaiong ih duwen riomw Kristian kan me kin sewese iuk ni ahnsou apwal kan? Ke pahn ndaiong ia uwen omw kalahnganki omw pwoudo de noumw seri kan? Kihong ahnsou en doudouloale soangen ahl tohto me Koht ketin kapaiada iuk. Met pahn kamwakid uhk en kasapahlkalahngan ong ih rahn koaros.​—Wadek Melkahka 92:1, 2.

7. (a) Dahme kahrehda kitail anahne kasalehda kalahngan ong Siohwa nan atail kapakap? (b) Ia duwen omw pahn paiekihda omw kasalehda kalahngan nan omw kapakap?

⁷ Ni atail doudouloale kapai koaros me kitail ahneki, kitail pahn men kalahngankihong Siohwa ni kapakap. (Mel. 95:2; 100:4, 5) Ekei aramas kin kapakap ihte pwehn peki soahng kan rehn Koht. Ahpw Siohwa ketin kupwurperenki atail kapakap me pil kin pidada kapingkalahngan ong ih pwehki dahme kitail ahnekiher. Nan Paipel, kitail diarada mehn kahlemeng tohto duwen sapwellimen Koht ladu kan, duwehte Ana oh Esekaia, me ni kapakap kasalehda arail kalahngan ong Siohwa. (1 Sam. 2:1-10; Ais. 38:9-20) Eri alasang arail kasalehda kalahngan, oh kalahngankihong Siohwa pwehki dahme e ketin wiahiongehr uhk. (1 Des. 5:17, 18) Ni omw wia met, ke pahn nsenamwahu, omw limpoak ong Koht pahn kekeirda, oh ke pahn wiahla kompoakepah oh kolokolte omw nanpwungmwahu reh.​—Seims 4:8.

8. Dahme kak kahrehiong kitail en sohla kasalehda kalahngan?

⁸ Ma kitail sohte kanahieng, e kak mengei ong kitail en sohla kalahnganki sapwellimen Siohwa kisakis mwahu kan. Dahme kahrehda? Pwehki kitail sohte unsek oh kitail sohsohki irair en soh kalahngan sang Adam oh Ihp. Siohwa ketikihong Adam oh Ihp paradais ehu ira en kousoan loale oh ketin tehk mwahu me ira ahneki soahng koaros me ira anahne. Ira kakete mour kohkohlahte ni popohl. (Sen. 1:28) Ahpw ira sohte kalahnganki kapai kan me ira ahneki. Ira noahrok oh ira men ahneki laudsang mepwukat. Imwilahn met, ira luhssang soahng koaros. (Sen. 3:6, 7, 17-19) Kitail mi nan sampah ehu me sohte kin kasalehda kalahngan, oh kitail pil kakete sohla kalahnganki soahng koaros me Siohwa ketin wiahda ong kitail. Kitail kakete sohla kalahnganki atail nanpwungmwahu keren rehn Koht de atail pwais kaselel en iang kisehn pirien en sapwellime aramas akan nin sampah pwon. Mehkan nin sampah kakete kerempwahla kitail. (1 Sohn 2:15-17) Pwehn soikala lidip wet, kitail anahne doudouloale kapai tohto me kitail ahneki oh kin kaukaule kalahngankihong Koht pwais kaselel me kitail ahneki en wia sapwellime aramas akan.​—Wadek Melkahka 27:4.

NI ATAIL KIN DADAURETE PAHN KAHPWAL KAN

9. Ni atail lelohng kahpwal laud kan, dahme kahrehda kitail anahne doudouloale kapai kan me kitail ahneki?

⁹ Ahneki irair en kalahngan pahn sewese kitail en dadaurete pahn kahpwal laud kan. Kitail ele kin pehm me kitail sohla kakohng irair apwal kan me kin mwadangete wekidala atail mour, duwehte salelepek en atail pwoud, soumwahu laud ehu, mehlahn emen me kitail poakohng, de kahpwal kan sang melimel de rerrer en sahpw ape. Atail doudouloale sapwellimen Siohwa kapai kan pahn kansenamwahwih kitail oh kakehlaka kitail en dadaurete. Tehk dahme wiawi ong ekei riatail Kristian kan.

10. Ia duwen Irina eh paiekihda eh kin doudouloale kapai kan me e ahneki?

¹⁰ Irina,a pioneer men nan Amerika, me mahs pwoudiki elder men me sohla lelepek ong ih oh kohkohsang ih oh neira seri kan. Dahme sewese Irina en kaukaule papah Siohwa ni lelepek? E nda: “I kalahnganki Siohwa eh kin ketin apwahpwalih pein ngehi. Sang ni ei pilada en kalahnganki soahng koaros me mwahu nan ei mour, I kak kilang ia uwen e wia pwais kaselel ehu me Samatail nanleng ketin mwahngih oh poakohng ie. I ese me e sohte pahn ketin meliehla ie.” Mendahki Irina lelohng kahpwal laud nan eh mour, eh kolokol peren kin sewese ih en kak pweida ni eh dadaur pahn mepwukat oh en kangoange meteikan.

11. Dahme sewese Kyung-sook en dadaur mendahki e ahneki soumwahu laud ehu?

¹¹ Kyung-sook, me kin kousoan nan Eisia, iang eh pwoudo pioneer daulih sounpar 20. Ni soh kasikpe, toahkte kan padahkihong ih me e ahneki kanser en ngolungol oh re ndahng me e pahn mourki sounpwong siluh de weneu. Mendahki ih oh eh pwoudo lelohng kahpwal tohto mwoweo, ahnsou koaros ira kin ahneki roson mwahu. Kyung-sook nda: “Soumwahu wet uhdahn kansensuwedihala ie. I pehm me I luhssang soahng koaros, oh I uhdahn masepwehkada.” Dahme sewese Kyung-sook en dadaurete? E nda: “Pwohng koaros mwohn ei pahn meirla, I kin doudahla pohn imwato oh kapakapki ni ngihl laud duwen soahng limau me I kin kalahnganki rahno. Eri I kin nsenamwahula oh met kamwakid ie en kasalehiong Siohwa ei limpoak ong ih.” Ia duwen Kyung-sook eh paiekihda kapakap pwukat me e kin wia nipwong kan? E nda: “I wehwehkihda me Siohwa kin ketin sewese kitail ahnsou apwal kan oh kapai kan me kitail ahneki nan mour kin tohtohsang kahpwal kan.”

12. Dahme kin sewese kansenamwahwihala Jason mwurin eh pwoudo mehla?

¹² Jason, me kin papah nan ohpis en Sounkadehdehn Siohwa kan nan Aperika, doadoahngkihier pali laud en eh ahnsou ong papah Siohwa daulih sounpar 30. E nda: “Sounpar isuh samwalahro, ei pwoudo mehla, oh medek me I ahneki kin kak inenen laud. Ei kin medemedewehte dahme e lelohng ni eh pelian soumwahu en kanser kin uhdahn kansensuwed.” Dahme kin sewese Jason? E nda: “Mie ehu pak me I tamanda ahnsou kaperen ehu me ngehi oh ei pwoudo ahnekipene, oh I kalahngankihong Siohwa ni kapakap mehn kataman wet. I kehn nsenamwahu oh mwuhr tepida kin kaukaule kalahngankihong Siohwa soangen mehn kataman kaperen pwuko. Pepehm en kalahngan kin wekidala laud ei kin kilangwohng soahng kan. Medek me I ahneki pwe ei pwoudo sohla mie kin mihmihte, ahpw ei kalahngankihong Siohwa ei ahneki mouren pwopwoud mwahu oh pil pwais kaselel en papah ih rehn emen me uhdahn poakohng ih kamwahwihala ei madamadau.”

13. Dahme sewese Sheryl en dadaurete mendahki pali laud en eh peneineio mehla?

¹³ Melimel laud Haiyan me lel Philippines kerenlahng imwin pahr 2013 kihsang Sheryl, me sounparte 13 ahnsowo, kereniong soahng koaros. E nda: “Sohla imwei oh pil pali laud en ei peneinei sohla mie.” Eh pahpa, nohno, oh rie meh silimen mehla nan lapake kehlailo. Dahme sewese Sheryl en dadaurete pahn kahpwal wet ahpw sohte lingeringerkihda dahme wiawiong ih? Sheryl kin kasalehdahte kalahngan ong Siohwa pwehki e kin doudouloale kapai koaros me e ahnekier. E nda: “I kilang soahng koaros me riei Kristian kan wiadahr pwehn sewese oh kangoange irail kan me anahne sawas. I ese me riei Kristian kan koaros nan sampah wie kapakapkin ie.” E pil nda: “I uhdahn kalahnganki me Siohwa iei ei Koht. E kin ahnsou koaros ketikihong kitail dahme kitail anahne.” Mehlel, ni atail kin kalahnganki kapai kan me kitail ahneki, kitail kin soikala nsensuwed laud. Met pahn sewese kitail en dadaur pahn kahpwal koaros me kitail ele pahn lelohng.​—Ep. 5:20; wadek Pilipai 4:6, 7.

‘I PAHN PEREPEREN . . . PWEHKI SIOHWA’

14. Koapworopwor kaperen dahieu me kitail ahneki? (Menlau kilang tepin kilel.)

¹⁴ Nan poadopoad, sapwellimen Siohwa aramas akan kin kalahnganki kapai kan me re ahneki. Mwurin re pitsang Parao oh nah sounpei ko nan Sehd Weitahtaho, mehn Israel ko koul ni peren, kapinga oh pil kasalehda kalahngan ong Siohwa. (Eks. 15:1-21) Rahnwet, ehu kapai me kitail kin keieu kesempwalki iei atail ese me ahnsou keren medek solahr pahn mie. (Mel. 37:9-11; Ais. 25:8; 33:24) Medewehla ia pahn mwomwen atail pepehm ahnsou me Siohwa pahn ketin kasohrehla sapwellime imwintihti koaros oh kasamwo kitail ong sampah kapw me popohl oh pwung kin mi ie. Kitail pahn uhdahn kalahngankihong Siohwa rahno.​—Kaud. 20:1-3; 21:3, 4.

15. Dahme ke koasoanehdi ken wia erein pahr 2015?

¹⁵ Erein pahr 2015, kitail kasikasik soangen kapai tohto sang rehn Siohwa. Mehlel, ele kitail pahn lelohng ekei kahpwal kan. Ahpw sohte lipilipil dahme pahn wiawi, kitail ese me Siohwa sohte pahn ketin likidmeliehla kitail. (Deud. 31:8; Mel. 9:9, 10) E pahn ketin pousehlahte ketikihong kitail soahng koaros me kitail anahne pwe kitail en papah ih ni lelepek. Kitail en koasoanehdi teng en ahneki madamadau me Apakuk ahneki ni eh nda: “Mehnda ma tuhke pik kan sohte pahn wa, oh sohte wahn wain me pwarada nan mwetin wain kan; mehnda ma tuhke olip kan sohte pahn wa, oh sohte wahnsahpw nan mohs akan; mehnda ma sihpw koaros pahn mehla, oh wasahn kamwenge kou pahn tehnla; ahpw I pahn pereperen oh nsenamwahu, pwehki KAUN-O Koht, iei ei sounkomour.” (Apak. 3:17, 18) Erein pahr 2015, kitail en pousehlahte doudouloale kapai koaros me kitail ahneki oh mwekidki en idawehn kaweid en iren pahro me koasoia: “Kapingkalahngan ong Siohwa, pwehki ih me kupwur mwahu.”​—Mel. 106:1, NW.