Pwoudikihda “Ihte Emen me Kin Idawehn Kauno”​—Kaweid Wet Doadoahkte?

Ekei sapwellimen Koht ladu kan pil kin nda met. Ahpw re ese me Siohwa ketin kupwurki sapwellime ladu kan ren pwoudikihda “ihte emen me kin idawehn Kauno,” me iei en pwoudiki Kristian kante. (1 Kor. 7:39) Eri, dahme kahrehda re ndahki koasoi pwukat?

DAHME KAHREHDA EKEI KIN PEIKASAL

Irail kan me wia soangen koasoi pwukat ele pehm me sister kiripw kan tohtohsang brother kiripw kan. Ih met me kin wiawi nan sahpw tohto. Tehk karasepe riau: Nan Korea, sister kiripw kan tohtohki persent 57 oh brother kiripw kan persent 43. Oh Sounkadehde kan nan sapwen Colombia kasalehda me sister kiripw kan tohtohki persent 66 oh brother kiripw kan persent 34.

Nan ekei sahpw, pahpa nohno kan me kaidehn Sounkadehdehn Siohwa kin kasik mwohni oh kisakis pweilaud tohto ni ahnsou me neirail serepein kan pwopwoudida. Ekei brother kan sohte kak kihda de pwainda soahng pwukat. Pwehki met, sister men ele medewe me e apwal en rapahkihda “ihte emen me kin idawehn Kauno” pwehn pwoudikihda. Eri ele e kin idek “I uhdahn kak diarada emen nanpwungen riei Kristian kan me mwahu ien pwoudiki?”a

KOAPWOROPWORKI SIOHWA UHDAHN KESEMPWAL

Ma mie pak ke kin ahneki soangen madamadau pwukat, ke kak kamehlele me Siohwa kin ketin mwahngih omw irair. Ni mehlel, e kin ketin mwahngih duwen omw pepehm ong ire wet.​—2 Kron. 6:29, 30.

Ahpw, Siohwa ketin kasalehda ni sansal nan sapwellime Mahsen me kitail en pwoudikihda ihte emen me kin idawehn Kauno. Dahme kahrehda? Pwehki e ketin mwahngih dahme mwahu ong sapwellime aramas akan. Kaidehn ihte e ketin kupwurki en pere sapwellime ladu kan sang nsensuwed me kohsang arail wiahda pilipil sapwung, ahpw e pil ketin kupwurki irail en nsenamwahu. Ni mwehin Nehmaia, ahnsou me mehn Suhs tohto pwoudikihda mehn liki kan me sohte kin kaudokiong Siohwa, Nehmaia koasoiahda duwen mehn kahlemeng suwed en Solomon. Mendahki “Koht kin ketin loalloale” Solomon, “lih en liki kan me kahrehiong Nanmwarki Solomon nan dihp.” (Neh. 13:23-26) Eri ong kamwahuparail, Koht ketin kaweid sapwellime ladu kan en pwoudikihda ihte tohnkaudok mehlel kan. (Mel. 19:7-10; Ais. 48:17, 18) Kristian mehlel kan kin uhdahn kalahnganki Koht eh kin ni limpoak ketin apwahpwalih irail oh re kin liki sapwellime kaweid kan. Eri sang ni arail kin uhpahiong ih nin duwen arail Kaun, re kin pohnese me ih me Kaunepen Lahng oh Sampah.​—Lep. Pad. 1:5.

Kitail uhdahn sohte men ‘kapahrek kitail ong me seupwoson akan’ me kakete kahrehiong kitail en uhdihsang papah Koht. (2 Kor. 6:14) Kristian tohto rahnpwukat kin peikiong sapwellimen Koht kaweid kan me kin ahnsou koaros wia mehn perepe mwahu, oh re wehwehkidahr me re wiadahr pilipil mwahu. Ahpw ekei kin pilada en sohte wia met.

KAWEID WET DOADOAHKTE

Maggy,b emen sister sang Australia, koasoiahda dahme wiawiong ih ni ahnsou me e tepida iang emen me sohte iang padahk mehlel: “I solahr kin iang towehda mihting tohto ihte pwehn iang ih. Ei nanpwungmwahu rehn Siohwa uhdahn tikitikla.” Ratana sang India mwahukihda ienge tohnsukuhl men me tepida onop Paipel. Ahpw mwuhr, pwutako kasalehda me kahrepen eh wia met iei pwehn tepida iang Ratana. Ratana sohla iang padahk mehlel oh iangala ehu pelien lamalam tohrohr pwe ira en pwopwoudida.

Pil ehu karasaras iei me wiawiong Ndenguè nan sahpw en Cameroon. E pwopwoudida ni eh sounpar 19. Mwohn eh pahn pwopwoudida, pwutak me e pahn pwoudikio inoukihong ih me e pahn kak saledek en wia eh kaudok. Ahpw wihk riau mwurin ara pwopwoudida, eh pwoudo sohte mweidohng en iang towehda mihting kan. Ndenguè nda: “I kin loaleid oh sengiseng. I tehkada me I sohla kak kaunda pein ei mour. I kin kalapw nsensuwed oh koluhkihla ei pilipilo.”

Mehlel, kaidehn koaros me sohte mi nan padahk mehlel me pwoudikihda brother men de sister men kin lemei oh sohte kasalehda toupahrek. Ahpw, mehnda ma ke sohte ahneki kahpwal pwukat ni omw pwoudiki emen me sohte mi nan padahk mehlel, ia duwen met eh kak kamwakid omw nanpwungmwahu rehn Samatail limpoak nanleng? Ia omw pepehm ni omw esehda me ke sohte peikiong kaweid me e ketikihda pwehn wia kamwahupomw? Ahpw me keieu kesempwal, ia pahn duwen sapwellimen Koht pepehm ong omw pilipilo?​—Lep. Pad. 1:33.

Riatail Kristian kan nin sampah pwon kak kadehdehda mehlelpen ireo me en pwoudikihda “ihte emen me kin idawehn Kauno” iei kaweid me keieu mwahu. Me kiripw kan kin koasoanehdi teng ren kaperenda kupwuren Koht ni arail kin men pwoudikihte emen sang sapwellime tohnkaudok kan me mwahuwong irail. Michiko, sister kiripw men nan Sapan, koasoanehdi teng en peikiong Koht mendahki eh peneineio kin song en kahrehiong ih en pwoudiki emen me sohte mi nan padahk mehlel. Patehng met, e kin kilang me ekei kompoakepah kan oh meteikan kin diarada arail pwoud nan mwomwohdiso. E nda: “I kin pwurepwurehng ndaiong ie me pwehki Siohwa iei ‘Koht en peren’ men, atail nsenamwahu sohte kin poahsoankihda ma kitail pwopwoud de soh. I pil kamehlele me e kin ketikihong kitail dahme mohngiongitail kin inengieng. Eri ma kitail men pwopwoud ahpw kitail sohte kak diar emen me kitail men pwoudiki, e pahn keieu mwahu kitail en awih mahs.” (1 Tim. 1:11) Kedekedeo, Michiko pwoudikihda brother mwahu men, oh e perenkihda eh peikiong sapwellimen Siohwa kaweid.

Ekei brother pil kin awih pwehn diar emen me mwahuwong irail en pwoudiki. Bill sang Australia iei emen. E wehkada me ekei pak e kin mwahukihda lih akan me kaidehn kisehn mwomwohdiso. Ahpw, e koasoanehdi teng en dehr karanihala irail. Dahme kahrehda? E sohte men tepida ‘kapahrek ih ong me seupwoson akan.’ Nan sounpar kan sang ahnsowo kohdo, e kin men esehla ekei sister ahpw re sohte ahneki soangen pepehmohte. Bill awihki sounpar 30 mwohn eh tuhwongada sister men me mwahuwong ih. Bill koasoia: “Sohte me I koluhkihla. I paiekihda pwehki se kin ehupene kohla kalohk, onop, oh wia kaudok. I kin perenki tuhwong oh werekiong kompoakepahn ei pwoudo pwehki irail koaros kin iang ie kaudokiong Siohwa. Se kin doadoahngki kaweid en Paipel kan ong at mouren pwopwoud.”

EREIN OMW AWIAWIH SIOHWA

Dahme ke kak wia erein omw mweidohng Siohwa en ketin apwalihala omw irairo? Ehu iei en medewe duwen dahme kahrehda ke sohte pwopwoudida. Ma ke pehm me keieun kahrepeo kin poahsoankihda kaweid en Paipel en pwoudikihda “ihte emen me kin idawehn Kauno,” ke warohng ale kaping pwehki omw wauneki kehkehlik wet sang Koht. Ke kak kamehlele me Siohwa kupwurperenkihda omw koasoanehdi teng en peikiong sapwellime Mahsen. (1 Sam. 15:22; Lep. Pad. 27:11) Ke kak pousehlahte kapakapkihong Koht dahme mi nan omw mohngiong. (Mel. 62:8) Ni omw kin kapakapohng ih ni mehlel oh sohte uhdi, omw nanpwungmwahu rehn Siohwa pahn kehlailla. Ehuehu rahn omw nanpwungmwahu rehn Koht pahn kehlailla ni omw kesihnenda teng mendahki ke lelohng soangen kasongosong koaros. Kamehlele me Siohwa kin ketin nsenohki sapwellime ladu lelepek koaros oh me ke kesempwal mwohn silangih. E kin ketin nsenohki omw anahn akan oh omw ineng kan. E sohte ketin inoukihda en ketikihong koaros arail pwoud. Ahpw, ma ke uhdahn anahne pwopwoudida, Koht ketin mwahngih ahl me keieu mwahu pwehn kaitarala ineng mwahu kan me ke ahneki.​—Mel. 145:16; Mad. 6:32.

Ekei pak ele ke ahneki pepehm duwehte sounmelkahka Depit, me nda: “Maing KAUN, komw ketin kupwure ie met! Solahr ei koapworopwor. Komw dehr ketin rirweisang ie.” (Mel. 143:5-7, 10) Nan soangen ahnsou pwuko, mweidohng ahnsou pwe Samatail nanleng en ketin kasalehiong uhk dahme e ketin kupwurki ong uhk. Ke kak wia met sang ni omw kihong ahnsou en wadek sapwellime Mahsen oh doudouloale dahme ke wadewadek. Ke pahn ese ia sapwellime kehkehlik kan oh ke pahn kilang ia sapwellime wiewia ong sapwellime aramas akan mahso. Sang ni omw kin rong ih, e pahn kalaudehla omw likih me omw kin peikiong ih wia elen erpit.

Pil soahng dah kan me kak kahrehiong omw mour en kiripw en nsenamwahu oh pweida mwahu? Ke kak doadoahngki omw mouren kiripw pwehn kakairada omw kadek, pwerisek, peren, omw poakohng Koht, omw adamwahu oh koahiek en dehdehki irair kan. Met uhdahn kesempwal ong mouren peneinei ehu en nsenamwahu. (Sen. 24:16-21; Rud 1:16, 17; 2:6, 7, 11; Lep. Pad. 31:10-27) Rapahki mahs Wehin Koht sang ni omw wia uwen omw kak nan doadoahk en kalohk oh pwukoa teikan en Kristian. Omw wia met pahn wia mehn perepomw. Bill, me kitail koasoia mwoweo, ndahki duwen sounpar ko me e men pwopwoudida: “Sounpar ko mwadang en nekla! I doadoahngki ahnsowo en papah Siohwa nin duwen pioneer men.”

Ei, en pwoudikihda “ihte emen me kin idawehn Kauno” uhdahn kak wiawi. Omw peikiong kaweid wet kak sewese iuk ken kawauwih Siohwa oh wahdo paiamwahu me ke kak ahneki kohkohlahte. Paipel mahsanih: “Meid pai aramas me kin wauneki KAUN-O, me kin alehki eh peren sang ni eh kin kapwaiada sapwellime kosonned akan. Eh peneinei pahn paiamwahu oh kepwehpwe, oh e pahn paiamwahu kohkohlahte.” (Mel. 112:1, 3) Eri koasoanehdi teng ken peikiong sapwellimen Koht kaweid me en pwoudikihda “ihte emen me kin idawehn Kauno.”