PEIDEK KAN EN PAIPEL PASAPENGLA

Dahme pahn wiawihong tohnsampah ni ahnsou kohkohdo?

Aramas pahn uhdahn pousehlahte wia pelien sains en kakairada. Ahpw ia duwe, re pahn kak pein wiahda koasoandi ehu me aramas akan kin uhdahn nsenohki emenemen? Soh. Rahnwet, sampah direki roporop oh noahrok. Ahpw, Koht ketin kupwurki mehkot me mwahusang ong tohnsampah.​—Wadek 2 Piter 3:13.

Mahsen en Koht kawehwehda duwen koasoandi ehu nin sampah pwon ahnsou kohkohdo me aramas akan pahn poakohng emenemen. Aramas sohte pahn perki mehkot, oh sohte emen pahn kak kamedekih irail.​—Wadek Maika 4:3, 4.

Ia duwen roporop eh pahn sohrala?

Koht sohte ketin kapikada aramas en ahneki pepehm en roporop nin tapio. Ahpw sang ni tepin aramaso eh pilada en sapeik ong Koht, e luhssang eh irair unseko. Kitail sohsohki sang tepin aramaso pepehm en roporop. Ahpw Koht pahn ketin doadoahngki Sises en kahrehiong aramas en pwurehng unsekla.​—Wadek Rom 7:21, 24, 25.

Pwehn pahrekiong kupwuren Koht, Sises pwoula nin duwen meirong ehu oh kasohrehla imwila suwed en sapeik me tepin ohlo kahrehda. (Rom 5:19) Kahrehda Sises ketikihda ahnsou kaselel ehu me pahn kohdo me aramas pahn sohla ahneki roporop en wia me suwed.​—Wadek Melkahka 37:9-11.