PEIDEK KAN SANG SOUNWADAWAD KAN
Ihs me Kok en Makok me kileldi nan pwuhken Esekiel?
Erein sounpar tohto, neitail sawaspen Paipel kan kin kawehwehda me Kok en Makok iei ahd me kohwong Sehdan me Tepilo mwurin eh piskensang nanleng. Kawehwe wet poahsoankihda ire mehlel me kileldi nan pwuhken Kaudiahl me kasalehda Sehdan me Tepil nin duwen kaun en irail kan nan sampah pwon me uhwongada sapwellimen Koht aramas akan. (Kaud. 12:1-17) Ihme kahrehda kitail kin leme me Kok iei pil ehu eden Sehdan me kokohpdahr.
Ahpw, kawehwe wet kahrehda mie peidek kesempwal kei en kohda. Dahme kahrehda? Medewehla met: Me pid ahnsowo me Kok lohdi, Siohwa ketin mahsanihki Kok: “I pahn mweidohng kahleparail kan en wiahla kenen menpihr oh mahn lawalo kan.” (Esek. 39:4) Mwuri Siohwa pil ketin mahsanih: “Ni ahnsou me mepwukat koaros pahn pweida, I pahn ketikihong Kok wasahn eh seridi nan Israel . . . Kok oh nah karis koaros pahn seridi wasao.” (Esek. 39:11) Ahpw ia duwen ngehn emen eh kak “wiahla kenen menpihr oh mahn lawalo kan”? Ia duwen Sehdan eh kak alehdi “wasahn eh seridi” nin sampah? Paipel kasalehda ni sansal me Sehdan pahn selidi nan pwoahr loalo me soh kapi erein pahr 1,000, kaidehn e pahn wiahla kenen mahn de seridi.—Kaud. 20:1, 2.
Kitail ese me imwin pahr kido, Sehdan pahn sapwedekda sang pwoahr loalo me soh kapi, oh “e ahpw pahn kohwei wasa koaros ni keimw pahieun sampah pwe en pitih wehi kan, iei Kok oh Makok. Sehdan pahn kapokonepene wehi kan pwe re en mahwen.” (Kaud. 20:8) Ahpw ia duwen Sehdan eh kak pitih Kok ma pein ih me Kok? Eri, “Kok” me kileldi nan kokohp en Esekiel de nan pwuhken Kaudiahl sohte kin dokedoke Sehdan.
Eri, ihs Kok en Makok? Pwehn sapengala peidek wet, kitail anahne rapahki nan Paipel pwehn diarada ihs me kin uhwong sapwellimen Koht aramas akan. Paipel sohte ihte mahsanih duwen uhwong me kohsang ‘Kok en Makok’ ahpw e pil mahsanih duwen uhwong me kohsang “nanmwarkien paliepeng” oh “nanmwarki kan en sampah.” (Esek. 38:2, 10-13; Dan. 11:40 (NW), 44, 45; Kaud. 17:14; 19:19) Ia duwe, uhwong pwukat wekpeseng? Soh. Paipel mahmahsanih duwen uhwongohte, ahpw ahd kan me e doadoahngki wekpeseng. Dahme kahrehda kitail kak ndahki met? Pwehki Paipel mahsanih me wehi koaros nin sampah pahn iang pidada nan kaimwiseklahn uhwong wet me pahn kahrehda mahwen en Armakedon en tepida.—Kaud. 16:14, 16.
Ni atail kapahrekihpene iren Paipel pwukat koaros duwen kaimwiseklahn uhwong me kohwong sapwellimen Koht aramas akan, e pahn sansalda me ahd wet Kok en Makok kin dokedoke miniminpene ehu en wehi kan, ahpw kaidehn Sehdan. Ia duwe, “nanmwarkien paliepeng” pahn kahluwa miniminpene en wehi pwukat? Kitail sohte kak uhdahn nda met. Ahpw madamadau wet mwomwen pahrekiong dahme Siohwa ketin mahsanihki duwen Kok. E mahsanih me Kok pahn mwekid sang ‘nan eh wasa ni paliepeng, kahre lapalahn karis kehlail en sounpei sang wehi tohto, oh irail koaros pahn dak oahs.’—Esek. 38:6, 14, 15.
Duwehte met, soukohp Daniel, me pil momour ni mwehin Esekielo, koasoiahki duwen nanmwarkien paliepengo: “Rohng me pahn peidohsang palimese oh paliepeng pahn kamasakada, oh e pahn mahwen ni eh engieng, oh kemehla aramas tohto. E pil pahn kauwada sapwellime impwal en nanmwarki nanpwungen sehdo oh nahnao me Tehnpas Sarawio kokouda powe. Ahpw e pahn mehla, ni sohte emen pahn mi wasao pwehn sewese.” (Dan. 11:44, 45) E sansal me met pahrekiong dahme pwuhken Esekiel mahsanih duwen wiewia kan en Kok.—Esek. 38:8-12, 16.
Dahme wiawi mwuhr pwehki kaimwiseklahn uhwong wet? Daniel padahkihong kitail: “Ni ahnsowo tohnleng lapalap Maikel [Sises Krais], me kin sinsile noumw aramas akan [sangete pahr 1914], pahn pwarado [ni Armakedon]. Eri, e pahn mie ahnsoun apwal ehu [kahn kamakam kowahlap], soangen apwal ehu me saikinte wiawi sang ni tepin wehi kan eh miehla. Ni ahnsowo eh pahn leledo, tohn omw wehi koaros me adarail ntinting nan sapwellimen Koht pwuhk pahn mourla.” (Dan. 12:1) Mwekid wet me wiliepen Koht, Sises, ketin wia, iei me Kaudiahl 19:11-21 pil kin mahsanih duwe.
Ahpw ihs me “Kok oh Makok” me kileldi nan Kaudiahl 20:8? Erein kaimwiseklahn kasongosong ni imwin pahr kido, irail kan me uhwongada Siohwa pahn kasalehda soangen madamadau en kamaramas me ‘Kok en Makok,’ wehi kan me uhwongada sapwellimen Koht aramas akan ni imwin kahn kamakam kowahlapo, ahneki. Imwilahn pwihn riau pwukat pahn duwepenehte, iei mehla soutuk! (Kaud. 19:20, 21; 20:9) Eri e mwomwen konehng en kahdaneki koaros me uhwongada Koht ni imwin pahr kido “Kok oh Makok.”
Nin duwen tohnsukuhl kan me kin tehk kanahieng Mahsen en Koht, kitail kin kasikasik en kilang ihs me pahn wia “nanmwarkien paliepeng” ni ahnsou keren. Ahpw sohte lipilipil ihs me pahn kahluwa miniminpene wet en wehi kan, mie soahng riau me kitail uhdahn kamehlele: (1) Kok en Makok oh nah kariso pahn lohdi oh sohrala; oh (2) atail Nanmwarki, Sises Krais me wie kakaun, pahn ketin doarehla sapwellimen Koht aramas akan oh kahluwairaillahng sampah kapw ehu me popohl oh nsenamwahu mehlel kin mi ie.—Kaud. 7:14-17.