Kesinenda Teng Oh Iang Kilang Sapwellimen Siohwa Rahn En Komour!

“Kumwail pahn koasoaneikumwaildi, oh kesinenda teng oh iang kilang sapwellimen Siohwa rahn en komour.”​—2 KRONIKEL 20:17, NW.

1, 2. Dahme kahrehda uhwong me kin kohsang “Kok me kohsang sapwen Makok” kin suwed sang kahpwal en terrorism?

EKEI aramas kin kawehwe lepin lokaiahn wet: “terrorism” oh nda me e kin wehwehki uhwong laud me kin wiawi ong kousoan en aramas akan nan sampah pwon. E wehwe me soangen uhwong pwukat aramas tohto kin perkihda. Ahpw, mie ehu uhwong me laud sang oh keper sang uhwong en terrorism kan, oh irail tohnsampah sasairki uhwong laud wet. Uhwong laud dahieu pahn wiawi ehu rahn?

² Uhwong wet iei uhwong me pahn kohsang “Kok me kohsang sapwen Makok,” me Paipel mahsanih nan pwuhken Esekiel irelaud 38. E wia koasoi ehu me aramas pein kalaudehla me dene uhwong wet me keper sang terrorism? Soh, pwe Kok sohte pahn ihte uhwong koperment en aramas akan. E pil pahn uhwong sapwellimen Koht wehin nanleng! Ahpw, Koht me weksang aramas akan, pwe aramas akan sohte kak pweida douluhl kihsang uhwong kan, ahpw Sounkapikpatail kak powehdi uhwong me kin kohsang rehn Kok.

Uhwong Me Pahn Kohwong Sapwellimen Koht Koperment

3. Luhk dahieu me kohieng kaun akan en sampah wet sang ni pahr 1914, oh iaduwen irail kin mwekidki luhk wet?

³ Kahpwal me kin wiawi nanpwungen sapwellimen Koht Nanmwarki oh koasoandi suwed en Sehdan kin wiawi tepida sang ni ahnsou me Wehin Koht kaunda sang nanleng nan pahr 1914. Ni ahnsowo, luhk kohwong kaun en aramas akan en utungada Kaun me Koht ketin pilada. Ahpw, irail kahng wia met, nin duwen e kohpadahr: “Ar nanmwarki kan kahngohdilahr; ar kaun akan koasoakoasone nanpwungarail re en uhwong Kauno oh pil uhwong sapwellime nanmwarki me e ketin piladahr. Re ahpw nda, “Kitail kasaledengkitailla sang pahn ara kosonned, oh kesehweisang kitail ara manaman.’ ” (Melkahka 2:1-3) Uhwong kaundahn Wehio pahn wiawi ni keieu kehlail ni ahnsou me Kok en Makok pahn tepida uhwong Wehio.

4, 5. Iaduwen aramas kin pelianda sapwellimen Koht wehin nanleng?

⁴ Mwein kitail pahn medemedewe, iaduwen aramas akan pahn kak pei ong koperment soh-sansal me mihmi nanleng. Paipel kin kasalehda me koperment wet kin wiawihkihda “lopw pahnen pahkido me aleier kamaiauparail nin sampah,” oh “Sihmpwulo,” iei Sises Krais. (Kaudiahl 14:⁠1, 3; Sohn 1:29) Pwehki koperment kapw wet kin mihmi nanleng, Paipel kin kadanehki koperment wet: “nanleng kapw,” oh aramas akan me pahn mih nin sampah wet adaneki “sampah kapw ehu.” (Aiseia 65:17; 2 Piter 3:⁠13) Pali laud en irail 144,000, me kin iang Krais kakaun kanekehlahr arail pwukoa ni lelepek nin sampah. Irail kin kasalehda me irail warohng en ale ahr pwukoa kapw en papah Koht nanleng.

⁵ Ahpw, luwen 144,000 kin mihmi nin sampah. Sang rehn aramas 15,000,000 me iang towehda Sak en Soutik en Kauno nan pahr 2002, ihte aramas meh 8,760 kin kasalehda duwen ahr kin alehdier luhk en kohdahla nanleng. Emen me kin uhwong luwen tohn Wehio kin ni mehlel uhwong sapwellimen Koht Wehi.​—Kaudiahl 12:17.

Nanmwarkio Kalowehdi Eh Imwintihti kan

6. Ia kupwuren Siohwa oh Krais ong aramas akan me kin uhwong sapwellimen Koht aramas akan?

⁶ E kohpadahr dahme Siohwa pahn ketin wia ong irail akan me kin uhwong sapwellime Wehi: “Kauno ahpw ketin kiparamat sang nan mwoale nanleng, oh ketin kumwuski arail koasoandi kan. Ih eri ketin engiengda oh mahseniong irail, oh kamasangkinirailda sapwellime engieng. E ketin mahsanih, ‘I kasapwiladahr nei nanmwarki pohn ei dohl sarawio Saion.’ ” (Melkahka 2:4-6) Ahnsowo lelehr en sapwellimen Siohwa kaweid ong Krais en “kalowehdi eh imwintihti kan.” (Kaudiahl 6:2) Ia kupwuren Siohwa ong kalokolok kan me kin kohwong sapwellime aramas akan ni ahnsou me Krais pahn kalowehdi eh imwintihti kan? Siohwa kin kilangwong kalokolok wet ni mwomwen irail kin uhwong ih oh sapwellime Nanmwarki me wie kakaun. Siohwa mahsanih, “Mehmen me pahn sair kumwail pahn rasehng ah kin sair sapwellimei edinperen ko.” (Sekaraia 2:⁠8, NW) Sises mahsanih me dahme aramas pahn wiahiong rie keidi kan de kahng wiahiong rie keidi kan, Sises me irail wiahiong.​—Madiu 25:40, 45.

7. Dahme kahrehda irail “pokon kalaimwun,” me Kaudiahl 7:9 kin koasoiada, pahn kak pehm uhwong me pahn kohsang rehn Kok?

⁷ Ni mehlel, aramas akan me kin utungada irail luwen me keidi kan pahn pil pehm uhwong me pahn kohsang Kok. Towe pwukat en sapwellimen Koht “sampah kapw” iei pwihn en “pokon kalaimwun” me kohsang “nan wehi koaros, ni kadaudok koaros, nan sahpw koaros, oh lokaia koaros.” (Kaudiahl 7:⁠9) Irail kin “uh mwohn mwoahlo oh mwohn Sihmpwulo, likawih likou pwetepwet reirei.” Irail kin kenikenla rehn Koht oh Krais Sises. “Kolokol tehn paini,” re kin kapinga Siohwa nin duwen emen me ahneki pwung en wia Kaunepen lahng oh sampah, oh me kin wiliandi ih iei, sapwellime Nanmwarki, Sises Krais, “Sihmpwul en Kohto.”​—Sohn 1:29, 36.

8. Dahme uhwong me kin kohsang rehn Kok pahn kahrehong Krais en wia, oh met pahn imwikihla dah?

⁸ Ni ahnsou me Kok pahn uhwong sapwellimen Koht aramas akan, met pahn kamwekidada sapwellimen Koht Nanmwarki en tepiada mahwen en Armakedon. (Kaudiahl 16:14, 16) Aramas akan me kin kahng utungada sapwellimen Siohwa kaunda pahn kamakamala. Ahpw irail akan me kin dadaurete lelepek ong Wehin Koht mendahki ahr kin lelong kalokolok, pahn pitsang. Wahnpoaron Pohl ntingihdi duwen met: “Ih met kadehdepen sapwellimen Koht kadeik pwung, pwehki ni imwilahn soahng pwukat kumwail pahn warohng towehla sapwellime Wehi me kumwail kin lokolongki. Pwe Koht pahn ketin wia me pwung; e pahn ketin kaloke irail kan me kin kalokei kumwail, oh e pil pahn ketin kamaiauda kumwail kan me kin mihmi pahn lokolok, oh pil iangahkin kiht. E pahn ketin wia met ni en Kaun Sises eh pahn ketido sang nanleng, iangahki sapwellime tohnleng manaman akan, oh pil iangahki mpwulen kisiniei, pwe en kaloke irail kan me pohnsehse Koht oh irail kan me sohte kin peikiong Rongamwahu en Kaun Sises.”​—2 Deselonika 1:5-8.

9, 10. (a) Iaduwen Siohwa sewese Suda en kalowehdi ahr imwintihti kehlail kan? (b) Dahme Kristian akan nan rahnwet anahne en wia?

⁹ Armakedon pahn wiawi ni imwin kahn kamakam kohwalap iei ahnsou me Krais pahn mahweniong me suwed kan koaros. Ahpw sapwellime tohnpadahk kan sohte pahn iang mahwen wet, duwehte ni pahr kid kei samwalahro, irail towe kan en keinek riau en wehin Suda pil sohte anahne iang mahwen ehu me wiawi nan arail ahnsou. Mahweno iei mahwen en Siohwa, oh ih me ketin kalowehdi imwintihti kan. Pwuhk Sarawi mahsanih: “Ahnsou me re tapihada koul, Kauno ahpw ketin kapingada karis ko. Mehn Ammon oh mehn Mohap uhd mahweniongada karis en mehn Edom oh kamwomwala; mwuhr re ahpw uhd uhpene nanpwungarail ni pei eikek. Ni karis en mehn Suda ko ar lel ni wasahn iroir ehu me mi nan sapwtehno, re kilenglahng imwintihti ko oh kilangada irail koaros wonohn nanpwel melahr. Sohte emen me pitla.”​—2 Kronikel 20:22-​24.

¹⁰ Dahme Siohwa kohpadahr, pweida: “Kumwail sohte pahn pei nan mahwen wet.” (2 Kronikel 20:17) Met kin wia mehn kahlemeng ehu ong Kristian akan en idawehn ni ahnsou me Sises Krais pahn “kolahng kalowehdi eh imwintihti kan.” Ni ahnsouwet, irail kin pil nantiong pelianda me suwed, ahpw irail sohte kin doadoahngki kesik kan ahpw tehtehn mahwen kan ni pali ngehn. Irail kin “mweidohng ahr mwahu en powehdi me suwed.”​—Rom 6:13; 12:17-​21; 13:12; 2 Korint 10:3-5.

Ihs Me Kok Pahn Doadoahngki Pwehn Uhwong Sapwellimen Koht Aramas akan?

11. (a) Irail irail me Kok pahn doadoahngki en uhwong sapwellimen Koht aramas akan? (b) Dahme kitail anahne wia ma kitail men pepehd ni pali ngehn?

¹¹ Kok en Makok iei Sehdan me Tepil ni ahnsou e piskendihlahng sampah nan pahr 1914. Nin duwen ngehn emen, e sohte kak kelepw uhwong sapwellimen Koht aramas akan, kahrehda e pahn doadoahngki aramas en kapwaiada dahme e mwahuki irail en wia. Ihs irail me Sehdan pahn doadoahngki? Pwuhk Sarawi sohte kin padahkiong kitail ni oaretik, ahpw e kin kihda ire kei me pahn kak sewese kitail en wehwehki ihs irail. Ni ahnsou me kitail kin kilang pweidahn kokohp kan en Pwuhk Sarawi, kitail pahn ekis ekis wehwehkihla ihs irail. Sapwellimen Siohwa aramas akan kin nantihong iresangirail en dehr kin lemelemengki mehkan me pid duwen keseupen ihs aramas pwukat, ahpw irail kin pepehd ni pali ngehn oh tetehk duwen mwekid en politik kan oh pelien lamalam akan me kin pid pweidahn kokohp en Pwuhk Sarawi.

12, 13. Ia kokohp en Daniel me e kohpadahr duwen kaimwiseklahn uhwong me pahn kohwong sapwellimen Koht aramas akan?

¹² Soukohp Daniel ntingihdi duwen kaimwiseklahn uhwong me pahn kohwong sapwellimen Koht aramas akan: “E [nanmwarki en pali epeng] pahn mahwen ni eh engieng, oh kemehla aramas tohto. E pil pahn kauwada sapwellime impwal en nanmwarki nanpwungen sehdo oh nahna sarawio.”​—Daniel 11:44, 45.

¹³ Ni ahnsoun Pwuhk Sarawi, “sehdo” iei Sehd Mediderenien, oh “nahna sarawio” iei Saion, me Siohwa ketin mahsanih: “I kasapwiladahr nei nanmwarki pohn ei dohl sarawio Saion.” (Melkahka 2:6; Sosua 1:4) Ihme kahrehda, sahpwo me mih “nanpwungen sehdo oh nahna sarawio” kin wia kilelepen sahpw kaselel ieu ni pali ngehn ong irail Kristian keidi kan. Irail sohlahr kin iang aramas akan me kin doh sangehr Koht, oh irail kin kasikasik en iang Sises Krais kakaun sang Wehin nanleng. E sansal, kokohp en Daniel pil kin pweida ni ahnsou me nanmwarki en paliepeng pahn ni elen lemei uhwongada sapwellimen Koht ladu keidi kan, iangahki iengarail pokon kalaimwun.​—Aiseia 57:20; Ipru 12:22; Kaudiahl 14:1.

Dahme Sapwellimen Koht Aramas akan Pahn Wia?

14. Wiewia siluh dah kei me sapwellimen Koht aramas akan anahne wia ni ahnsou me irail pahn lelong uhwong laudo?

¹⁴ Dahme sapwellimen Koht aramas akan pahn anahne wia ni ahnsou me uhwong pahn tepiada wia ong irail? Eri, sapwellimen Koht wehi ni ahnsoun Seosapat, kin wia mehn kahlemeng mwahu ong kitail. Arail towe kan ale kaweid en kapwaiada soahngen wiewia silu pwukat: (1) koasoaneiraildi, (2) kesinenda teng, oh (3) iang kilang sapwellimen Siohwa rahn en komour. Rahnwet, iaduwen sapwellimen Koht aramas akan pahn kapwaiada mahsen pwukat?​—2 Kronikel 20:17.

15. Iaduwen sapwellimen Siohwa aramas akan pahn koasonehiraildi?

¹⁵ Koasoaneiraildi: Sapwellimen Koht aramas akan pahn nantihong utungada Wehin Koht. Irail pahn doulahte kolokol soupoupali en Kristian akan. Irail pahn “dadaur oh loalenohng” arail doadoahk en papah Siohwa ni lelepek oh doulahte kapingahki Siohwa pwehki sapwellime limpoak-kadek ong wehi pokon. (1 Korint 15:58; Melkahka 118:28, 29) Uhwong kan ni ahnsouwet de ni ahnsou kohkohdo sohte kak kahrehong irail en uhdi oh kesehla ahr kin kenikenla rehn Koht.

16. Ni ahl dahieu sapwellimen Siohwa aramas akan pahn kesinenda teng?

¹⁶ Kesinenda teng: Sapwellimen Siohwa aramas akan sohte pahn song en doarehirailla ahpw irail pahn likih Siohwa ni unsek. Ih kelepw pahn kak doare sapwellime aramas akan sang sampah liseliping wet, oh E pil ketin inoukihong kitail me e pahn ketin wia met. (Aiseia 43:10, 11; 54:15; Koul Kedepwidepw kan 3:26) Ma kitail pahn likih Siohwa, kitail pil anahne likih sapwellimen Koht pwihn sansal nan sampah me E kin ketin doadoahngki erein sounpar tohto pwen kapwaiada sapwellime kupwur kan. Ahnsowo, e pahn kesempwal Kristian mehlel akan en likih iengarail tohnkaudok akan me Siohwa oh sapwellime Nanmwarki idihada pwehn apwalih irail. Ohl lelepek pwukat pahn kahre sapwellimen Koht aramas akan. Pohnsehsela arail kaweid kan pahn kak kahrehong kitail en lelong kahpwal.​—Madiu 24:45-​47; Ipru 13:7, 17.

17. Dahme kahrehda sapwellimen Koht aramas lelepek kan pahn iang kilang sapwellimen Siohwa rahn en komour?

¹⁷ Iang kilang sapwellimen Siohwa rahn en komour: Aramas koaros me kin wiahla Kristian lelepek kan oh likih Siohwa pahn ale komourparail. Lao lel kaimwiseklahn aua, irail pahn wia uwen arail kak en kalohkiseli duwen sapwellimen Siohwa rahn en kadeik. Kepikpikda kan koaros pahn anahne wehwehki me Siohwa iei Koht mehlelo oh E kin ketin sapwellimaniki aramas lelepek kan nin sampah. Sohlahr pahn mie akamaikipene ma sapwellimen Siohwa kaunda me pwung de soh.​—Esekiel 33:33; 36:23.

18, 19. (a) Iaduwen koul en kana ehu me mih nan pwuhken Eksodus irelaud 15 kin kasansalehda duwen pepehm akan en aramas akan me pahn pitsang uhwong me pahn kohsang rehn Kok? (b) Dahme konehng sapwellimen Koht aramas akan en wia ni ahnsouwet?

¹⁸ Sapwellimen Koht aramas akan pahn pwurehng kehlailda oh pedolong nan sampah kapwo, irail pahn ngoangki koulki koul en kana ieu, duwehte me mehn Israel en mahs wia mwurin irail pitsangehr sang Sehd Weitahta. Irail kin kalahnganki Siohwa me kin ketin perehla irail, nin duwen pwihn ehu oh nin duwen emen emen aramas akan, oh re pahn koulki koul ehu me wiawi mahs mahsie: “I pahn koulkihong Kauno apwoat koulen, kapingpen roson lapalap en sapwellime powehdi. . . . Kauno iei sounpei kommwad men. [“Siohwa,” NW] iei mware. . . . Maing Kaun, meid kapwuriamwei roson en nin limomwi palimaun, me kin sipedpeseng at imwintihti kan. Komw ketin kamwomwalahr sapwellimomwi imwintihti kan, ni roson lapalap en powehdi; engieng en nan kupwuromwi kamwasikairaillahr, rasehng mpwulen kisiniei me kin karoangehla dihpw meng. . . . Komw ketin loalopwoatohng sapwellimomwi inowo, ni omwi ketin kahluwaier aramas akan me komw ketin kapitalahr; ni manaman en sapwellimomwi roson, komw ketin kahluwadohng irail nin limomwi sarawi. . . . Komw ketin kahluwairaildo oh koasoanediong irail pohn sapwellimomwi nahna, Maing Kaun, wasa me komw ketin wiahda ie mwoalomwi, Tehnpas me pein komwi ketin wiahda. Maing Kaun, komwi me pahn ketin nanmwarki erein dih koaros kohkohlahte.”​—Eksodus 15:1-​19.

¹⁹ Pwehki atail koapworopwor en mour soutuk kin kehlailda, met kin wehwehki me iet ahnsou mwahu ehu ong sapwellimen Koht aramas akan en kasalehda arail lelepek ong Siohwa oh pwurehng kakehlailiala atail pwoosn en papah ih nin duwen atail Nanmwarki poatopoat men!​—1 Kronikel 29:11-​13.

Ke Kak Kawehwe?

• Dahme kahrehda Kok pahn uhwong irail me keidi kan oh pwihn en sihpw teikan?

• Iaduwen sapwellimen Koht aramas akan pahn koasoanehiraildi?

• Iaduwen sapwellimen Koht aramas akan pahn kesinenda teng?

• Iaduwen sapwellimen Koht aramas akan pahn iang kilang sapwellimen Siohwa rahn en komour?

[Kilel nan Pali 26]

Siohwa sewese Seosapat oh sapwellime aramas akan en kana, oh irail sohte anahne iang mahwen

[Kilel nan Pali 28]

Irail me keidi kan oh sihpw teikan kin utungada sapwellimen Siohwa kaunda

[Kilel nan Pali 30]

Duwehte mehn Israel kan en mahs, sapwellimen Koht aramas akan pahn koulki koul en kana ieu ni ahnsou keren