OARALAP | IA DUWEN ATAIL KAK POWEHDI PWUNOD?
Pwunod Wasa Koaros!
“I kohlahng pwain mwenge ahpw ihte me I diar kirahka kukihs—pweineo pil inenen laudla! Rahno mwuri, sohte mwahn mie mwengehn netila ni sidohwa kan.”—Paul, Zimbabwe.
“Ei pwoudo kamwohdiehdi oh nda me e pahn kohkohlahsang kiht. Ia duwen ei kak powehdi eh salelepekla ong ie? Dahme pahn wiawiong nei seri kan?”—Janet, Wehin Amerika.
“Ni ngilen saireng ko ar tepida, I tangala pwehn rukula oh wenla pohn taht ni pakudang kan ar posopos. Pei kat wie rerrerte mwurin awa kei.”—Alona, Israel.
Kitail mi ni ahnsou kapwunod kei, “ahnsou apwal ekei.” (2 Timoty 3:1) Me tohto kin pwunodki kahpwal en mwohni, ohlahn mour en peneinei, mahwen, soumwahu lusulus keper kan, oh kahpwal kan me duwehte rerrer en sahpw de melimel ape, de pil kahpwal kan me pein aramas kin kahrehda. Patehng met, mie pein atail iren kapwunod kan, duwehte: ‘War me wie lalaudla ni paliwereiet kakete soumwahu en kanser?’ ‘Soangen koasoandi en mour dahieu me nein nei seri kan pahn tikida loale?’
Kaidehn pwunod koaros kin suwed. Kitail kin pwunodada mwohn atail pahn ale sikeng ehu, wia mehkot mwohn pokon, de wia interview ehu ong doadoahk. Oh atail pwunodki keper ehu pil mwahu pwehki e kin sewese kitail en soikala kepero. Ahpw pwunod me nohn laud de pwunod ahnsou koaros kin kauwehla kitail. Ehu roporop me wiawi me keren me pidada aramas tohtohsang weninen walikid (68,000) kasalehda me pwunod me pil sohte nohn laud kin kalaudehla keper en mehla mwadang. Eri, mie kahrepe mwahu me Sises ketin kalelapak: “Ihs rehmwail me kak kareireikihla eh mour kisin ahnsou kis pwunupwunodki eh mour?” Ei, pwunod kin kamwotehla mour en aramas. Kahrehda Sises mahsanih: ‘Kumwail dehr kin pwunod.’ (Madiu 6:25, 27) Ahpw ia duwen met eh uhdahn kak wiawi?
Pasapengpen met kin pidada atail doadoahngki erpit, kakairada atail pwoson Koht ni mehlel, oh kakehlakahda atail koapworopwor ong ahnsou kohkohdo. Mehnda ma sohte atail kahpwal laud ahnsou wet, kitail kakete lelohng ni ahnsou kohkohdo. Eri kitail en kilang ia duwen kahk pwukat ar sewese Paul, Janet, oh Alona ren powehdi arail pwunod.