Pwunodki Soahng Keper Kan

Alona nda: “Ni ei rong ngilen sairengo, mohngiongiet tepida kumwukumw oh I tangala ni wasahn ruksang pakudang. Ahpw mehnda ei mi wasao I pil pwunodte. E kin uhdahn suwed ni ei mi liki, pwehki sohte wasahn rukala. Ehu pak, ni ei alialudihla nanialo, I tepida sengiseng oh sohla kak esingek. Mwurin awa kei I ahpw meleileidi. Ahpw ngilen sairengo pil pwurehng tepida.”

Mie soahng tohto me kin kahrehda keper likin mahwen. Karasepe, ni omw diarada me kowe de emen me ke poakohng ahneki soumwahu keper ehu, met kak wia mehkot me uhdahn kapwuriamwei. Oh ong meteikan, en perki dahme pahn wiawi ahnsou kohkohdo kak kahrehda pwunod. Re kin pwunodki, ‘Ia duwe, nait seri kan, de neirail seri kan, pahn mour nan sampah ieu me diren mahwen, mwersuwed, samin, wekwekilahn nan wehwe, oh soumwahu lusulus?’ Ia duwen atail kak powehdi soangen kapwunod pwukat?

Ni eh ese me soahng suwed pahn wiawi, “aramas me mie eh lamalam pahn kilang apwal eh kohkodohng, e pahn tangasang.” (Lepin Padahk 27:12) Oh duwehte atail kin song en pere roson en paliwaratail, kitail kak wia kahk kan me pahn pere roson en atail madamadau oh pepehm. Mehn kamweit kan me kin kasalehda tiahk lemei oh pil rohng kan me kin kasalehda kilel kamasepwehk kan kin kalaudehla pein atail oh pil ahn neitail seri kan pwunod. Atail soikala kilang soahng kilel lemei pwukat sohte wehwehki me kitail kin pohnsehsehla mehlelpen mepwukat. Koht sohte ketin wiahda kitail en medemedewehte soahng suwed kan. Ahpw kitail kak medemedewe “soahng kan me mehlel, . . . me pwung, me mwakelekel, me kaselel.” Ma kitail wia met, Koht en popohl pahn ketikihong nan mohngiongitail oh atail madamadau popohl.​—Pilipai 4:8, 9.

KESEMPWALPEN KAPAKAP

Pwoson mehlel kin sewese kitail en powehdi pwunod. Paipel kin kangoange kitail en ‘mwasamwasahn pwe kitail en kak kapakap.’ (1 Piter 4:7) Kitail kak peki sapwellimen Koht sawas oh pil erpit oh eimah pwehn dadaur pahn atail irairo, oh koapworopworki me “e kin ketin karonge atail pekipek kan.”​—1 Sohn 5:15.

Paipel kawehwehda me Sehdan, kaidehn Koht, iei “kaunen sampah wet” oh me “sampah unsek mi pahn manaman en Me Suwedo.” (Sohn 12:31; 1 Sohn 5:19) Ihme kahrehda ni Sises eh ketin padahkihong kitail en kapakapki: “Komw ketin nekid kiht sang ni me suwed en Sehdan,” e mwahngih me Sehdan uhdahn mie oh me Siohwa kak ketin doare kitail. (Madiu 6:13) Alona nda: “Ahnsou koaros me ngilen sairehngo tepida, I kin peki Siohwa en ketin sewese ie en powehdi ei pepehm kan. Ei pwoudo pil kin delepwohnih ie oh iang ie kapakap. Kapakap kin uhdahn sawas.” Met duwehte dahme Paipel mahsanih: “E [Siohwa] kin ketiket limwahn irail kan me kin likweriong, irail akan me kin likweriong ni mehlel.”​—Melkahka 145:18.

ATAIL KOAPWOROPWOR ONG AHNSOU KOHKOHDO

Nan sapwellime Kapahrek en Pohn Dohl, Sises ketin padahkihong sapwellime tohnpadahk kan en kapakapki: “Mweimwi en pweida wasa koaros.” (Madiu 6:10) Wehin Koht pahn ketikihsang douluhl pwunod kan koaros me keper. Koht pahn ketin doadoahngki Sises, me iei “Nanmwarkien Popohl,” pwe en ketin “katokehdi mahwen wasa koaros nin sampah.” (Aiseia 9:6; Melkahka 46:9) “Ih [Koht] me pahn ketin kapwungala nanpwungen wehi, . . . Sohte wehi ehu pahn mahweniong ehu wehi, de pil pwurehng onopada ong mahwen. . . . re sohte pahn perki mehkot.” (Maika 4:3, 4) Peneinei kan kin nsenamwahu oh “pahn kauwada imwarail kan oh kousoanla loale . . . Re pahn wiahda ar mwetuwel en wain oh pahn kin nsenamwahuki wahn wain kan.” (Aiseia 65:21) Oh “sohte emen me kin kousoan nan sahpwo pahn kaulimkihla eh soumwahu.”​—Aiseia 33:24.

Mendahki mie kaweid kan me kak pere kitail sang kahpwal rahnpwukat, kitail sohte kak ahnsou koaros pere kitail sang “paisuwed” de soikala mihmi wasa ehu me kahpwal ehu kitail sohte kasik wiawi. (Eklesiasdes 9:11) Nin duwen me kin wiwiawi sounpar tohto, mahwen, tiahk lemei oh soumwahu kan kin pousehlahte kemehla aramas mwahu kan. Koapworopwor dahieu me aramas mwahu pwukat ahneki?

Aramas tohtohie, me Koht kelehpw mwahngih meh depe, pahn pwurehng mourda. Met re wie memeir, oh Koht ketin tamataman irail, lao lel rahno me “koaros me mihmi nan sousou kan pahn . . . pedoisang nan arail sousou kan.” (Sohn 5:28, 29) Ni Paipel eh mahsanih duwen kaiasada, e kamehlelehiong kitail me “koapworopwor wet me mihmi rehtail rasehng peipwung ehu nan kapehditail kan, me teng, kehlail.” (Ipru 6:19) Oh Koht “ketikihda kadehdepen met ong emenemen ni eh ketin kaiasadahr [Sises] sang mehla!”​—Wiewia 17:31.

Ahpw ahnsou wet, irail kan me songosong en kaperenda Koht pahn pil lelohng kapwunod kan. Sang arail wia kahk mwahu kan, karanihala Koht ni kapakap oh kalaudehla arail pwoson koapworopwor me Paipel ketikihda ong ahnsou kohkohdo, Paul, Janet, oh Alona kin pweida mwahu nan arail kin powehdi kapwunod kan. Duwehte me e ketin wiahiong irail, “Koht, me iei tepin koapworopwor, en ketin audehkinkumwailda soangen peren koaros oh popohl pwehki amwail pwoson, pwe amwail koapworopwor en pil kin kekeirkihda.”​—Rom 15:13.