OARALAP | MIE KATEPEN KAPAKAP?
Dahme Kahrehda Koht Kin Ketin Luke Kitail en Kapakap
Koht ketin luke kitail en wia kompoakepah.
Kompoakepah kan kin koasoakoasoiong emenemen pwehn kakairada arail nanpwungmwahu. Pil duwehte, Koht kin ketin luke kitail en koasoiong ih oh met kin elehda atail kak kompoakepahnkihla. E mahsanih: “Kumwail eri pahn likwerih ie. Kumwail pahn kapakap ong ie, a I pahn karongei kumwail.” (Seremaia 29:12) Ni omw koasoiong Koht, ke pahn keiong mpen Koht, oh ‘e pahn ketin keiong mpomw.’ (Seims 4:8) Paipel kamehlelehiong kitail: “E [Siohwa] kin ketiket limwahn irail kan me kin likweriong, irail akan me kin likweriong ni mehlel.” (Melkahka 145:18) Ni atail kaukaule kapakapohng Koht, atail nanpwungmwahu reh pahn pil laudla.
Koht ketin kupwurki sewese iuk.
Sises mahsanih: “Mie pahpa men rehmwail me kak kihong nah pwutak takai, ma e peki pilawa? De kemisik, ma e peki kisin mwomw? . . . kumwail ahpw kin ese kihong noumwail seri kan dahme kin mwahuwong irail; eri, a ia uwen soahng tohto me Samamwail me ketiket nanleng pahn ketikihong irail kan me kin patohwan peki reh!” (Madiu 7:9-11) Ei, Koht ketin luke iuk en kapakap pwehki e “kin ketin apwahpwalih” oh kupwurki sewese iuk. (1 Piter 5:7) E pil ketin luke iuk en patohwanohng ih omw kahpwal kan. Paipel mahsanihong kitail: “Kumwail dehr pwunodki mehkot, ahpw nan amwail kapakap akan kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros.”—Pilipai 4:6.
Mie atail anahn en men esehla Koht.
Irail kan me kin samanih mouren aramas koasoia me aramas sapw kei pehm me re anahne kapakap. Pil ekei irail kan me sohte kamehlele me mie Koht (atheists) oh irail kan me dene kitail sohte kak ese me mie Koht de soh (agnostics) pil iang ahneki soangen pepehm wet.a Met kadehdehda me aramas kepikipikihda anahn en men esehla Koht. Sises mahsanih: “Meid pai me koapworopworki Koht.” (Madiu 5:3) Ehu ahl me kitail kak kaitarala anahn wet iei sang atail kin kaukaule koasoakoasoiong Koht.
Ma kitail pwungki sapwellimen Koht luhk en kapakapohng ih, kapai dah kan me kitail kak kasik?
a Ehu wasahn roporop (Pew Research Center) kasalehda sang ripoht en pahr 2012 me persent 11 en irail pwukat (atheists/agnostics) nan Wehin Amerika kin kapakap ele pak ehu de pil tohtohsang nan ehu sounpwong.
“E [Siohwa] kin ketiket limwahn irail kan me kin likweriong, irail akan me kin likweriong ni mehlel.”—Melkahka 145:18