OARALAP
Ia Sapwellimen Koht Madamadau ong Mahwen?
Ia duwen omw pahn sapengala peidek wet? Me tohto kin medewe me Koht ketin kupwurki mahwen. Re kin nda me e kin ketin kehkehlikihong sapwellime tohnkaudok kan mahso en iang mahwen; Paipel kin kasalehda mehlelpen met. Ahpw meteikan nda me sapwellimen Koht Ohlo, Sises, ketin padahkihong sapwellime tohnpadahk ko en poakohng arail imwintihti kan. (Madiu 5:43, 44) Eri re medewe me mie ahnsou ehu me sapwellimen Koht madamadau ong mahwen wekila oh me rahnwet Koht solahr ketin kupwurki mahwen.
Ia omw madamadau? Koht ketin kupwurki mahwen? Ma ei, mehnia pali me e kin ketin uhpalih nan uhpene kan rahnpwukat? Omw rapahkihda pasapengpen peidek pwukat kak sewese iuk en kasawih pein omw pepehm oh madamadau ong mahwen. Karasepe, ma ke ese me Koht sohte kin ketin ihte kupwurki mahwen ahpw pil kin utung pali me ke pwungki nan ehu mahwen, ele ke pahn uhdahn nsenamwahuki me ke piladahro, oh koapworopworki me omw pali pahn kana. Weksang met, ia pahn omw pepehm ma ke esehda me Koht kin ketin uhpalih pali teio? Ele ke pahn pil wekidala omw madamadau ong ireo.
Mie mehkot me kesempwal sang met me ke anahne ese. Omw esehla ia sapwellimen Koht madamadau ong mahwen ele pahn kamwakid omw madamadau me pid duwen Koht. Ma kowe emen nanpwungen aramas rar rar kei me uhdahn medengkihla soahng kan me mahwen kin kahrehda, ke uhdahn anahne ese pasapengpen peidek wet, Ia duwe, nin duwen me ekei kin kamehlele, Koht wia emen me kin ketin mweidohng de pil kangoange soangen kalokolok me kin kohsang mahwen, de mwein e sohte ketin wia mehkot oh sohte katapanki dahme kin wiawiong irail kan me kin lokolok?
Ele ke pahn pwuriamweikihla en ese me pasapengpen Paipel inenen weksang dahme ire pwukat kasalehda. Patehng met, sangete mahs leledo ahnsou wet, sapwellimen Koht madamadau ong mahwen duduwehte. Kitail tehkpene dahme Paipel mahsanih duwen ia sapwellimen Koht madamadau ong mahwen mahs oh pil ni mwehin tepin Kristian ko, ni ahnsou me Sises ketiket sampah. Met pahn sewese kitail en kilang ia sapwellimen Koht madamadau ong mahwen rahnwet oh ma mahwen pahn iang kisehn dahme pahn wiawi ong aramas ni ahnsou kohkohdo.