Sapwellimen Koht Madamadau ong Mahwen ni Mwehin Tepin Kristian kan

Dahme wiawi? Dahme kahrehda Koht sohte ketin mahwenki mehn Suhs ko, duwehte me e ketin wia mahsie? De dahme kahrehda e sohte ketin kamanahla irail en iang mahwen pwehn kapitirailsang nan lokolok? Ia duwe, sapwellimen Koht madamadau ong mahwen wekila? Soh. Ahpw mie mehkot me uhdahn wekila me pid mehn Suhs ko. Re soikala sapwellimen Koht Ohlo, Sises, nin duwen Mesaiao. (Wiewia 2:36) Eri, nin duwen wehi ehu, re luhssang arail nanpwungmwahu tohrohr rehn Koht.​—Madiu 23:37, 38.

Wehin Suhs oh Sapwen Inowo solahr ale pereparail sang rehn Koht, oh mehn Suhs kan pil solahr kak nda ni pwung me Koht kin ketin kupwurki de sewese arail mahwen kan. Nin duwen me Sises ketin kohpadahr, kapai kan me kin kohsang ahneki sapwellimen Koht kupwur mwahu solahr kohwong wehin Israel ahpw uhd kohwong wehi kapw ehu me mwuhr Paipel kahdaneki “Israel en Koht.” (Kalesia 6:16, NW; Madiu 21:43) Mwomwohdisohn Kristian keidi kan kadehdehda me irail me wia Israel en Koht. Ni sansal, ni mwehin tepin Kristian kan, mahsen pwukat kohwong irail: “Met kumwail wialahr uhdahn [sapwellimen Koht].”​—1 Piter 2:9, 10.

Ia duwe, pwehki tepin Kristian kan wiahlahr sapwellimen Koht aramas, Koht ketin mahwenki irail pwehn kapitirailsang kaunda lemei en mehn Rom ko? De e ketin kamanahla irail en mahweniong arail imwintihti kan? Soh, e sohte ketin wia met. Dahme kahrehda? Me pid mahwen kan me Koht ketin kamanahla, ih kelehpw me kin ketin koasoanehdi iahd mahwen ehu pahn wiawi, nin duwen me sansalda nan oaralap en mwoweo. Koht sohte ketin mahwenki tepin Kristian ko, de pil ketin kamanahla irail en iang mahwen en sampah wet. E sansal me ni mwehin tepin Kristian ko kaidehn sapwellimen Koht ahnsou en mahweniong me suwed oh arail kaunda lemei.

Eri, duwehte sapwellimen Koht ladu kan mahsie, tepin Kristian ko pil anahne awih lao sapwellimen Koht ahnsou en ketin kasohrehla me suwed oh lokolok. Erein ahnsowo, Koht sohte ketin kamanahla irail en mahweniong arail imwintihti kan. Sises Krais ketin kasalehda met ni sansal nan sapwellime padahk kan. Karasepe, e sohte ketin kaweidki sapwellime tohnpadahk kan en iang mahwen, ahpw e mahsanihong irail: “Kumwail poakohng amwail imwintihti kan oh kapakapki me kin kalokei kumwail.” (Madiu 5:44) Ni Sises eh ketin kohpada duwen ahnsou me karis en sounpei en mehn Rom ako ar pahn mahweniong Serusalem ni mwehin tepin Kristian kan, Sises ketin padahkihong sapwellime tohnpadahk ko ren dehr mihmihte oh mahwen, ahpw ren tangasang wasao, oh ih met me re wia.​—Luk 21:20, 21.

Patehng met, sapwellimen Koht manaman kamwakid wahnpoaron Pohl en ntingihedi: “Kumwail dehr pein dupuk, . . . Pwe Pwuhk Sarawi mahsanih, ‘Kaun-o ketin mahsanih, ngehi me pahn dupuk, ngehi me pahn ikih.’” (Rom 12:19) Pohl koasoia dahme Koht ketin mahsanih sounpar epwiki kei mwoweo me kileldi nan pwuhken Lipai 19:18 oh Deuderonomi 32:35. Nin duwen me kitail kilangehr nan oaralap en mwoweo, ehu ahl me Koht kin ketin ikih sapwellime aramas akan mahsie iei eh kin ketin sewese irail mahweniong arail imwintihti kan. Eri ahn Pohl koasoi ko kasalehda me sapwellimen Koht madamadau ong mahwen sohte wekila. Ni mwehin tepin Kristian kan, Koht kin ketin kilangwohngete mahwen nin duwen kahrepe mwahu ehu en ketin ikih sapwellime ladu kan oh kasohrehla soangsoangen wiepen lokolok oh me suwed kan. Ahpw, duwehte mahso, Koht kelehpw me kin ketin koasoanehdi iahd mahwen en wiawi oh ihs me pahn iang pidada.

E sansal me Koht sohte ketin kamanahla tepin Kristian kan en pei nan mahwen kan. Ahpw ia duwen rahnpwukat? Koht ketin kamanahla sohte lipilipil pwihn en aramas rahnpwukat en iang mahwen? De met iei ahnsou me Koht pahn ketin mwekid oh mahwenki sapwellime ladu kan? Ia sapwellimen Koht madamadau ong mahwen rahnwet? Oaralap en mwuhr pahn sapengala peidek pwukat.