Kumwail Maiaudahr Pwehki Sapwellimen Koht Kalahngan

1, 2. Ia duwen Rom 5:12 eh kak sewese kitail?

PWUHKEN ROM 5:12 mahsanih: “Dihp tepidohng sampah sang rehn aramas tehmen, ahpw tialahng mehla. Eri, mehla lelohngehr aramas koaros, pwe aramas koaros dipadahr.” Kitail uhdahn esehla mwahu iren Paipel wet oh kin kalapw doadoahngki ni ahnsou me kitail kin padahkih aramas akan duwen Paipel.

² Pwuhken Dahme Paipel Uhdahn Padahngki? kin doadoahngki iren Paipel wet pak tohto. Ni atail kin onopki irelaud 3, 5, oh 6 rehn neitail seri kan oh pil meteikan, ele kitail pahn wadek Rom 5:12. Kitail kak doadoahngki iretikitik wet pwehn sewese irail en wehwehki dahme kahrehda sampah sohte wia paradais ehu, dahme kahrehda kitail anahne pweinen pweipwei sapahlo, oh dahme kahrehda kitail kin mehla. Ahpw iretikitik wet pil kak sewese kitail koaros en kalaudehla atail kalahnganki atail nanpwungmwahu rehn Siohwa. E kak sewese kitail en kalaudehla atail koasoanehdi teng en kaperenda ih oh pil kasikasik soahng kan me e ketin inoukihong kitail.

3. Dahme kitail anahne tamataman duwen irair me kitail mi loale?

³ Kitail koaros aramas dipan kei. Kitail kin wiahda sapwung rahn koaros. Ahpw Siohwa kin ketin kupwurkalahngan. E ketin mwahngih me kitail sohte unsek oh e kupwurki mahkohng kitail. (Mel. 103:13, 14) Sises padahkihong kitail en peki rehn Koht en ketin mahkohng dipatail kan. (Luk 11:2-4) Ni Siohwa eh ketin mahkohngehr sapwung kan me kitail wiahda mahso, kitail sohte anahne medemedewe sapwung pwukat. Kitail pahn tehkpene ia duwen Siohwa eh kak ketin mahkohng kitail.

IA DUWEN SIOHWA EH KAK KETIN MAHKOHNG KITAIL

4, 5. (a) Dahme kin sewese kitail en wehwehki Rom 5:12? (b) Ia wehwehn lepin lokaia wet “kupwurkalahngan” me kileldi nan Rom 3:24?

⁴ Kitail kin diarada ire kesempwal kan nan irelaud kan mwohn de mwurin Rom 5:12, ahpw mehlel irelaud 6. Ire pwukat kin sewese kitail en wehwehki ia duwen Siohwa eh kak ketin mahkohng dipatail kan. Nan irelaud 3, kitail sukuhlki me “aramas koaros wiadahr dihp.” Pohl eri kawehwehda: “Sang ni kupwurkalahngan oh sapan en Koht, irail koaros kin pwungla reh pwehki Krais Sises me kin ketin kamaiauwihirailda.” (Rom 3:23, 24) Lepin lokaiahn Krihk me kawehwehdiong “kupwurkalahngan” kin kak wehwehki wiewia ehu me uhdahn kadek oh sohte isepe, mehkot me kohwong emen me sohte koadoahkihada oh sohte warohng ale.

⁵ Emen ohl saman kawehwehda me ni Paipel eh kin mahsanih duwen sapwellimen Koht oh Krais kalahngan, e kin kalapw dokedoke dahme ira ketin wiahda pwehn doarehla aramas sang dihp oh mehla. Eri lepin lokaiahn Krihk me Paipel doadoahngki kin kihda madamadau en “kupwurkalahngan.” Kitail pahn kilang dahme Koht ketin wiahda ong kitail oh ia duwen sapwellime kalahngan eh wia kamwahu ehu ong kitail met oh kihda koapworopwor ong ahnsou kohkohdo.

6. Ihs me kak paiekihda sapwellimen Koht kalahngan?

⁶ Pwehki Adam dipada, dihp oh mehla lelohng aramas soh unsek koaros. Ihme kahrehda Paipel mahsanih me “pwehki dipen aramas tehmeno mehla tapihada kakaun.” Ahpw sang ni Siohwa eh ketin doadoahngki “aramas tehmen, iei Sises Krais,” e ketin kasalehda kalahngan lapalap oh ketikihda ahl ehu pwehn kamaiauda aramas koaros. (Rom 5:12, 15, 17) “Peik en aramas tehmen pahn kapwungala aramas koaros.” Oh re kak kasikasik “mour soutuk pwehki Sises Krais.”​—Rom 5:19, 21.

7. Dahme kahrehda sapwellimen Koht kisakis en pweinen pweipwei sapahlo wia mehkot me kadek oh me kitail sohte warohng ale?

⁷ Medewehla met: Siohwa sohte anahne ketikihda sapwellime Ohlo nin duwen pweinen pweipwei sapahl ehu. Ahpw e ketin kasalehda sapwellime kalahngan lapalap ni eh ketikihda dahme kitail anahne pwehn doareikitailla sang dihp oh mehla. Sohte emen rehtail warohng dahme Koht oh Sises ketin wiahda ong kitail. Ia uwen atail kalahnganki me ira ketin wiahda met pwe kitail en kak ale mahkpen dipatail oh mour kohkohlahte! Kitail en kasalehiong Koht ia uwen atail kalahnganki met sang ni mwomwen atail kin weweidwei nan mour.

KALAHNGANKI SAPWELLIMEN KOHT KALAHNGAN

8. Soangen madamadau dahieu kitail en kalekeikitailsang?

⁸ Kitail ese me Koht kin kupwurki mahkohng dihp kan, pil dihp laud kan. Ahpw kitail en dehr wiahki sapwellimen Siohwa kalahngan kahrepen atail en wia sapwung oh eri medewe, ‘Siohwa pahn ketin mahkohng ie.’ Ni mwehin tepin Kristian ko, pil ni ahnsou me ekei wahnpoaron ko wie momourte, mie ekei Kristian me ahneki soangen madamadau wet. (Wadek Sud 4.) Rahnwet, kitail pil anahne kanahieng kitail en dehr dukula pahn meteikan oh ekisekis tepida ahnekihda soangen madamadauo.

9, 10. Ia duwen Pohl oh meteikan ar maiaudahsang dihp oh mehla?

⁹ Pohl padahkihong Kristian kan me e sapwung en medewe me ma irail pousehlahte wiewia dihp, Koht pahn ketin mahkohngete irail. Pohl nda me re anahne kalekeirailsang soangen madamadau wet pwehki re “mehlasangehr dihp.” (Wadek Rom 6:1, 2.) Ia wehwehn met?

¹⁰ Pwehki pweinen pweipwei sapahlo, Koht ketin mahkohng dipen Pohl oh pil dipen Kristian teikan ni arail ahnsowo. Siohwa ketin keiehkiniraildi sapwellime manaman pwe ren wiahla sapwellime. Ma irail kolokolte arail lelepek, re pahn mi nanleng oh iang Krais ketin kaunda. Ahpw pwehki arail wie momourte nin sampah, ia duwen arail “mehlasangehr dihp”? Pohl doadoahngki karasaras ehu pwehn kasalehda me elen arail mour uhdahn wekilahr douluhl. E nda me mwurin Sises pwoula, e ketin iasada nin duwen ngehn emen me sohte kak mehla. Ihme kahrehda “e solahr ketiket pahn manaman en mehla.” Ni ahl ehu me rasehng met, e mwomwen me Kristian ko pil melahr. Arail mour wekila douluhl pwehki re solahr mweidohng arail ineng sapwung kan en kaunda irail. Sang ahnsowo kohla, irail kin wia uwen arail kak en mour ni ahl ehu me kin kaperenda Koht. Re wiahla “aramas mehla kei me mehsangehr dihp, ahpw aramas momour kei me kin miniminiong Koht rehn Krais Sises.”​—Rom 6:9, 11.

11. Ong kitail kan me kin kasikasik en mour kohkohlahte nin sampah, ia duwen atail “mehlasangehr dihp”?

¹¹ Ia duwen kitail? Ia duwen atail “mehlasangehr dihp”? Mahso, ele kitail kin wiahda sapwung tohto oh sohte pohnese ia sapwellimen Siohwa madamadau ong atail wiewia kan. Kitail duwehte “lidun samin oh suwed,” me iei “lidun dihp.” (Rom 6:19, 20) Ahpw ahnsou me kitail sukuhlkihsang Paipel ia kupwuren Koht ong mwomwen atail mour, kitail wiahda wekidekla kan, inoukihong ih atail mour, oh papidaisla. Kitail uhdahn inengieng en peikiong Siohwa oh mour ni ahl ehu me pahn kaperenda ih. Kitail “kasaledeksangehr dihp oh wialahr lidun pwung.”​—Rom 6:17, 18.

12. Pilipil dahieu me emenemen kitail anahne wiahda?

¹² Ahpw, miehte atail pilipil ehu. Pohl nda: “Dihp uhdahn solahr pahn kaunda paliwaramwail kan, oh kahrehiong kumwail en kapwaiada inengen pein nsenamwail.” (Rom 6:12) Kitail kak dukula pahn atail madamadau oh ineng sapwung kan, de kitail kak kaunda. Pein idek rehmw: ‘I kin mweidohng ei ineng sapwung kan en kekeirda laud kahrehda ien wia dahme suwed? De I kin mwadangete soikala?’ Ma kitail uhdahn kalahnganki sapwellimen Koht kalahngan, kitail pahn wia uwen atail kak en kaperenda ih.

KE KAK PELIANDA DIHP

13. Dahme kahrehda kitail kak uhdahn kamehlele me kitail kak wia dahme pwung?

¹³ Ni mwehin tepin Kristian ko, ekei aramas nan Korint kin pirap, wia tiahk en ohl mwahuki ohl oh lih mwahuki lih, kamwahl, kaudok ong dikedik kan, oh kamamsakau. Ahpw irail wekila ni arail esehla Siohwa oh poakohngala ih. Irail namenengki dahme irail kin wia mahs. (Rom 6:21; 1 Kor. 6:9-11) Kristian kan nan Rom pil anahne wiahda soangen wekidekla ko. Pohl ndaiong irail: “Kumwail dehpa pil mweidohng kisehn paliwaramwail en wiahda dihp, de kapwaiada ineng suwed. A kumwail mweidohng Koht pein kumwail, duwehte aramas me iasada sang mehla ong mour, oh pil mweidohng Koht paliwaramwail pwon pwe en wiahla tehtehn wiewia pwung.” (Rom 6:13) Pohl kamehlele me re kak wia dahme pwung oh pousehlahte paiekihda sapwellimen Koht kalahngan.

14, 15. Dahme kitail en pein idek rehtail?

¹⁴ Duwehte rahnwet, ele mour en mahso ong ekei riatail Kristian kan kin duwehte mouren irail ko nan Korint. Ahpw mwurin arail esehla Siohwa, re wekila oh “mwakelekelsangehr dihp.” Pwehn kaperenda Siohwa, kitail koaros wiahdahr wekidekla kan nan atail mour. Pil met kitail men kasalehda me kitail uhdahn kalahnganki sapwellimen Koht kalahngan. Eri kitail koasoanehdi teng en pelianda atail ineng sapwung kan oh doadoahngki atail mour pwehn papah Siohwa.

¹⁵ Kitail en dehr wia soangen dihp laud kan me ekei mehn Korint ko wiahda. Kitail sohte kak pousehlahte wiewia soahng pwukat ahpw ni ahnsowohte kasik me Koht pahn ketin kasalehda sapwellime kalahngan oh ketin mahkohng kitail. Ahpw ia duwen soangen dihp me ekei medewe me sohte nohn laud? Ia duwe, kitail koasoanehdi teng me kitail en peikiong Siohwa ni soahng koaros?​—Rom 6:14, 17.

16. Ia duwen atail ese me kitail en dehr wia soangen dihp kan me sohte kileldi nan 1 Korint 6:9-11?

¹⁶ Medewehla duwen wahnpoaron Pohl. E ntingihedi: “Ngehi aramas emen me pahn mehla, me netlahr pwe en wiahla lidun dihp. I sohte wehwehki dahme I kin wiewia; pwe I sohte kin kapwaiada dahme I kin men kapwaiada, ahpw I kin wia dahme I kin suwedki.” (Rom 7:14, 15) Mendahki e sohte kin wiewia soahng suwed kan me kileldi nan 1 Korint 6:9-11, e wehkada me e kin wiewiahte dihp. E men kaperenda Siohwa, eri e kin pelianda eh ineng en wia dahme sapwung. (Wadek Rom 7:21-23.) Kitail en alasang eh mehn kahlemengo oh wia uwen me kitail kak pwehn peikiong Siohwa.

17. Dahme kahrehda ken kin men mehlel?

¹⁷ Karasepe, kitail ese me pwehn papah Siohwa kitail anahne mehlel. (Wadek Lepin Padahk 14:5; Episos 4:25.) Kitail sohte men duwehte Sehdan, “semen soangen likamw koaros.” Oh kitail tamanda me Ananaias oh eh pwoudo mehkihla ara likamw. Eri kitail sohte kin likamw. (Sohn 8:44; Wiewia 5:1-11) Ahpw atail kin mehlel kin pidada laudsang atail sohte kin koasoi likamw. Ma kitail uhdahn kalahnganki sapwellimen Koht kalahngan, kitail pahn pil mehlel ni ahl teikan.

18, 19. Ia wehwehn en kin mehlel?

¹⁸ Emen ele sohte nda mehkot likamw ahpw eh wiewia kakete likamw. Karasepe, Siohwa ketin mahsanihong mehn Israel ko: “Kumwail dehr pirap, de mwersuwed, de wia likamw.” Dahme kahrehda irail anahne wiahki met? Siohwa mahsanih: “Kumwail en sarawihla, pwe ngehi, KAUN-O, amwail Koht, me sarawi.” (Lip. 19:2, 11) Mendahki kitail sohte nda mehkot likamw, ahpw ma kitail kahrehiong meteikan en kamehlele mehkot likamw, met kasalehda me kitail sohte kin mehlel.

¹⁹ Karasepe, emen ohl ndaiong eh kauno de ienge tohndoadoahk ko me e anahne nek doadoahk mwadang pwehn kohla tuhwong toahkte. Ahpw kaidehn uhdahn kahrepeo met. Uhdahn kahrepen eh pahn tuhwong toahkteo iei en ihte ale wini de pwainla mehkot. E men nek mwadang pwehn tapihada eh ahnsoun kommoalo. Ia duwe, e mehlel, de e pitipitih meteikan? Ohl menet kahrehiong meteikan en kamehlele mehkot me likamw. Ekei pak, aramas kin pitih meteikan pwehn ale dahme re mwahuki de soikala peneu. Ahpw kitail kin peikiong Siohwa, me mahsanih: “Dehr . . . mwersuwed.” Kitail men wia dahme e ketin mahsanih me pwung oh sarawi.​—Rom 6:19.

20, 21. Ma kitail kalahnganki sapwellimen Koht kalahngan, dahme kitail pil anahne soikala?

²⁰ Kitail kin soikala wiewiahn kamwahl, kamamsakau, oh dihp laud teikan. Ahpw laudsang met, kitail men soikala soahng koaros me pahn kansensuwedihala Siohwa. Karasepe, kitail sohte kin ihte soikala tiahk me pid wia nsenen pwopwoud, ahpw kitail pil kin soikala mehn kamweit kan me samin. Kaidehn ihte kitail sohte kin kamamsakau, ahpw kitail sohte kin niminim pwehn kereniong sakaula. Ele kitail anahne nantihong laud pwehn pelianda kasongosong kan duwehte mepwukat, ahpw kitail kak kana.

²¹ Kitail kin wiahki atail mehn akadei dahme Pohl nda: “Dihp uhdahn solahr pahn kaunda paliwaramwail kan, oh kahrehiong kumwail en kapwaiada inengen pein nsenamwail.” (Rom 6:12; 7:18-20) E mehlel me kitail sohte kak soikala dihp koaros. Ahpw ni atail pelianda soangen dihp koaros, kitail kin kasalehda me kitail uhdahn kalahnganki sapwellimen Koht oh Krais kalahngan me ira ketin kasalehiong kitail.

22. Keting dahieu me kitail kak kasikasik ma kitail uhdahn kalahnganki sapwellimen Siohwa kalahngan?

²² Siohwa ketin mahkohngehr dipatail kan oh kak ketin pousehlahte wiewia met. Ia uwen atail kalahnganki sapwellime kalahngan! Eri kitail en nantihong laud pwe kitail en dehr wiewia soahng kan me e mahsanih me sapwung, mehnda ma meteikan sohte wiahki mepwukat dihp kei. Keting dahieu me kitail kak kasikasik ma kitail wia met? Pohl nda: “Ahnsou wet kumwail kasaledeksangehr dihp oh wialahr lidun Koht; eri, imwilahn met kumwail kasarawihongehr Koht amwail mour unsek, oh ni imwilahn mehkoaros kumwail pahn ahneki mour soutuk.”​—Rom 6:22.