Sapwellimen Koht Aramas Akan Anahne Kasalehda Kadek
“Eri iet me Siohwa kin ketin kupwurki kitail en wia, kitail en wia dahme pwung oh kasalehda kadek oh en iang Koht kekeid ni ahl konehng.”—MAIKA 6:8, New World Translation.
1, 2. (a) Dahme kahrehda e sohte kapwuriamwei ong kitail ni en Siohwa kin kasik sapwellime aramas akan en kasalehda kadek? (b) Peidek dah kei me pid kadek me konehng kitail en medemedewe?
SIOHWA iei Koht en kadek. (Rom 2:4; 11:22) Ia uwen en tepin pwopwoudo, Adam oh Ihp, ele kin kalahnganki met! Nan mwetuwel en Ihden, ira kin kilang soangen kapikipik kan me kin kasalehda en Koht kadek ong aramas akan, me aramas akan kak perenki. Oh Koht kin kaukaule kadek ong koaros, pil ong irail akan me sohte kin kalahnganki oh pil aramas suwed akan.
2 Pwehki aramas wiawihda ni rasehng Koht, irail pil kak kasalehda irair kan en Koht. (Senesis 1:26) E sohte kapwuriamwei me Koht kin ketin kasik kitail en kasalehda kadek. Maika 6:8 kasalehda me sapwellimen Koht aramas akan anahne kasalehda “kadek.” Ahpw, ia wehwehn kadek? Iaduwen ah kin ehuiong sapwellimen Koht irair teikan? Pwehki aramas kak kasalehda kadek, dahme kahrehda sampah wia wasa diren lemei oh apwal ehu? Dahme kahrehda kitail nin duwen Kristian kei, anahne en kasalehda kadek ni atail kin ehuiong meteikan?
Ia Wehwehn Kadek?
3. Iaduwen ahmw pahn kawehwe kadek?
3 Kadek kin sansalda ni atail kin men de inengieng wia soahng kan me pahn wia kamwahu ehu ong meteikan. E kin sansalda ni atail wiewia en sawas oh doadoahngki lokaia me kin kasalehda me kitail kin medemedewe meteikan. Kadek iei en wia soahng me pahn mwahu ahpw kaidehn mehkan me pahn kauwehla. Aramas kadek men kin mwahu ong meteikan, pehmtik, poakehla mehteikan oh peren ong meteikan. E kin kadek, oh kasalehda me e kin medewe meteikan. Wahnpoaron Pohl kaweidki Kristian kan: “Kumwail sapwellimen Koht aramas; e ketin loalloalei kumwail oh ketin pilkumwailda pwe en sapwellimankinkumwailla. Ihme kahrehda kumwail en limpoak ong me mi nan apwal akan, kadek, mpahi oh karakarahk, aktikitik oh kanengamah.” (Kolose 3:12) Eri, kadek kin wia kisehn en Kristian mehlel akan likou ni karasaras.
4. Iaduwen Siohwa ah tiengla mwowe oh kasalehda kadek ong aramas akan?
4 Siohwa Koht ketin tiengalahr mwowe oh kasalehda kadek. Nin duwen me Pohl mahsanih, “kalahngan en Koht atail Sounkomour, Koht me sansalehr” me “e ketin komourkinkitailla sang ni e ketin kamwakelekinkitailla oh kitail en ahneki mour kapw ki sapwellime ngehn sarawi.” (Taitus 3:4, 5) Koht kin ketin kamwakelehdahr irail Kristian keidi ko nan sapwellimen Sises nta me wehwehki e doadoahngki kesempwalpen sapwellimen Sises tomw kin irailla. Irail pil wiliakapwala ki ngehn sarawi, wiahla “kapikpik kapw ehu” nin duwen sapwellimen Koht kei ni pali ngehn. (2 Korint 5:17) Patehng met, Koht pil kin kasalehda kadek oh limpoak ohng irail “pokon kalaimwun,” me kamwakelehdahr arail likou kan oh pwetepwetlahr nan ntahn Simpwulo.”—Kaudiahl 7:9, 14; 1 Sohn 2:1, 2.
5. Dahme kahrehda irail akan me kin idawehn ngehn en Koht anahne kasalehda kadek?
5 Kadek pil wia kisehn wahn ngehn en Koht oh sapwellime kehl. Pohl mahsanih: “A iet akan wahn ngehno: limpoak, peren, popohl, kanengamah, kadek, kamwahu, pwoson, opampap, liksang me suwed. Sohte kosonned ehu me kin uhwong mepwukat.” (Kalesia 5:22, 23) Eri, e soh konehng irail akan me kin mwekidki sapwellimen Koht ngehn en pil kasalehda kadek ong meteikan?
Kadek Mehlel Kaidehn Luwet Ehu
6. Ahnsou dah me kadek kin wia luwet ehu oh pwekida?
6 Ekei aramas kin kilangwong kadek nin duwen luwet ehu. Re kin pehm me aramas emen anahne en kehlail, pil lemei ekei pak, pwe meteikan en kak kilang ah kehl. Ahpw, ni mehlel kehl mehlel me anahn pwe emen en kak uhdahn kadek oh liksang kasalehda kadek sapwung. Pwehki kadek mehlel wia kisehn sapwellimen Koht wahn ngehn kan, e sohte kak en wia luwet ehu de kin song en pohnsehse tiahk sapwung kan. Kadek sapwung ni pali teio iei luwet ehu me kin kahrehda emen en kin mwomwen pohnsehse oh wia tiahk sapwung kan.
7. (a) Iaduwen Ilai kasalehda me e sohte kin kehlail de tengedi nan ah koasondi? (b) Dahme kahrehda elder anahne liksang kasalehda kadek sapwung?
7 Song medewe karasaras en samworo lapalap en Israel, Ilai. E sohte kin wia ah pwukoa en panawih nah pwutak riemeno, Opni oh Pineas, me kin wia pwukoa kan en samworo kan nan Impwalo. Pwehki ira sohte itarki uwen ara pwais me kosonnedo koasonehdi sang ni meirong kan, ira padahkiong emen ladu ko en kin idingki aramas me wia meirongo en kihsang uduk en mahno mwohn wihn mahno pahn kukda pohn pei sarawio. Nein Ilai pwutak riemeno kin wia dipen nenek ong irail lih kan me kin doadoahk ni wenihmw en Impwalo. Ilai sohte kausala Opni oh Pineas ahpw e kin ihte panawih ira ni ahl ehu me sohte uk. (1 Samuel 2:12-29) Ihme “mahsen sang rehn Koht inenen malaulau mehlel nan rahn pwuko”! (1 Samuel 3:1) Kristian elder kan anahne en kanahieng pwe re de kasalehda kadek sapwung ong irail me suwed kan me kak wia keper ehu ong pali ngehn en mwomwohdiso ehu. Kadek mehlel sohte kin maskun ong lokaia de tiahk suwed kan me pahn uhwongda Koht.
8. Iaduwen Sises kasalehda kadek mehlel?
8 Atail Soun kahlemengih Sises Krais sohte kin kasalehda kadek sapwung. Ih me wia mehn kahlemeng keieu mwahu en kadek mehlel. Karasepe ehu, ‘e kin poakehla irail aramas akan me wiekaulahr pwehki sohte silepahr.’ Irail me mohngiong mehlel kan sohte kin masak en keido mpen Sises oh irail pil kin wahdo neirail seri tikitik kan reh. Medewehla kadek oh limpoak kadek me e kin kasalehda ni ah kin “koledi seri kan oh kin kapaiada irail.” (Madiu 9:36; Mark 10:13-16) Mendahki Sises kin kadek ahpw e kin tengediengete dahme pwung mwohn silangin Semeo nanleng. Sises sohte kin pwungkihla suwed akan en wiawi; e sapwellimaniki kehl sang Koht en kadeikada irail kaun en lamalam mwalaun ko. Nin duwen me kileldier nan Madiu 23:13-26, pak kei e kin pwurehng mahsanih: Meid suwed ong kumwail, sounkawehwehn kosonned oh Parisi kan, mwalaun amwailen!”
Kadek oh Sapwellimen Koht Irair Teikan
9. Iaduwen kadek kin ehuiong kanengamah oh kamwahu?
9 Kadek kin iangete irair teikan me kin pwarada sang sapwellimen Koht ngehn sarawi. E kileldi nanpwungen “kanengamah” oh “kamwahu.” Ei, aramas emen me kin kadek kin kasalehda irair wet ki ah kanengamah. E pil kin kanengamah ohng irail akan me sohte kin kadek. Kadek kin ehuiong kamwahu ni ahl ehu me e kin sansalda ni ah kin wia mehkan me pahn wia kamwahu ehu ong meteikan. Ekei pak, lepin lokaia en Krihk “kadek” nan Pwuhk Sarawi kin kawehwehdi ong “kamwahu.” Irair wet, kadek, me inenen rek nanpwungen Kristian kan en mahs oh irail aramas pakan kan kin inenen pwuriamweikihla met me kahrehda nin duwen me Tertullian kasalehda, irail kin kahdaneki irail akan me kin idawehn Sises, ‘aramas en kadek.’
10. Iaduwen kadek oh limpoak kin ehupene?
10 Mie ehupene ehu nanpwungen kadek oh limpoak. Me pid sapwellime werek ko, Sises mahsanih: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:35) Oh me pid limpoak wet, Pohl mahsanih: “Limpoak me kanengamah oh kadek.” (1 Korint 13:4) Kadek kin ehuiong limpoak nan lepin lokaia “limpoak kadek” me kin kalapw pwarada nan Pwuhk Sarawi. Met iei kadek me kin kohsang ni lokaia lelepek ni limpoak. Lepin lokaia en Ipru “limpoak kadek” kin ahneki wehwe laudsang en pehmtik ong meteikan. Met iei kadek me pahn ni limpoak ehuiong patehng mehkot ehu lao mehn akadeio pweida. Sapwellimen Siohwa limpoak kadek kin sansalda ni ahl tohto. Karasepe ehu, e kin sansalda sang ni sapwellime doadoahk en kapitala oh apwalih mehteikan.—Melkahka 6:4; 40:11; 143:12.
11. Soangen likilik dah me sapwellimen Koht limpoak kadek kin kihong kitail?
11 Sapwellimen Siohwa limpoak kadek kin kakerenihdo aramas akan reh. (Seremaia 31:3) Ni sapwellimen Koht ladu lelepek kan kin anahne sawas, re kin wehwehki me Siohwa pahn kasalehda limpoak kadek. E sohte kak sohpeiweisang irail. Eri, irail kak kapakap oh ahneki pwoson, nin duwen me sounmelkahkaho nda: “I kin koapworopworki sapwellimomwi limpoak poatopoat; I kin peren, pwehki komwi pahn ketin doareiehla.” (Melkahka 13:5) Pwehki sapwellimen Koht limpoak me lelepek, sapwellime ladu kan kak liki ih ni unsek. Irail kak koapworopworki met: “Kauno sohte pahn ketin kesehla sapwellime kan; e sohte pahn ketin kesehla irail kan me kisehn sapwellime.”—Melkahka 94:14.
Dahme Kahrehda Sampah Wet Inenen Lemei?
12. Iahd oh iaduwen kaunda lemei tepida?
12 Pasapengpen peidek wet kin pid dahme wiawi nan mwetuwel en Ihden. Ni tepin poadopoad en aramas, ngehn ehu me ahnekihda lamalam en roporop oh aklapalapla, tepida koasonehdi en wiahla kaun en sampah wet. Imwilahn ah pilahno, e wiahla “kaun en sampah wet,” ni mehlel e wia kaun lemei men. (Sohn 12:31) E wiahla Sehdan me Tepil, kaun en me kin uhwongda Koht oh aramas koaros. (Sohn 8:44; Kaudiahl 12:9) A pilahn roporop en kauwada kaunda ehu me pahn duwehte sapwellimen Koht kaunda en kadek sansalda mwurinte kapikipikda en Ihp. Ihme kahrehda kaunda suwed tepidahr ahnsou me Adam pilada en saledek sang kaundahn Koht, oh soikala kadek en Koht. (Senesis 3:1-6) Adam oh Ihp sohte uhdahn pein kaunda ira, pwe ni mehlel ira mihla pahn kaunda roporop oh pohnmwahso en Tepil.
13-15. (a) Ia imwilahn ahn emen pahn soikala en Siohwa kaunda pwung? (b) Dahme kahrehda sampah wet inenen diren lemei?
13 Medewehla ekei imwila suwed en ara pilipil. Adam oh Ihp pekous sang wasahkis nan sampah me wia paradais ehu. Ira pidoi sang wasahkis me rek en wahnsahpw oh mengei en diarada wahnsahpw oh wahn tuhke kan me mwahu ong paliwar oh kohla mihla nan irair apwal likin mwetuwel en Iden. Koht mahsanihiong Adam: “Pwehki omw dukiong omw pwoudo oh tungoalehda wahntuhke me I keinepwihsang uhko, pwehki soahng wet me ke wiadahr, pwelen sampah pahn rialahr. Ke pahn doadoahk laud erein omw mour, pwe pwelen sampah en kawosada kisin mwenge me pahn itarohng uhk. E pahn kawosada dihpw tekatek oh reh, oh ke pahn kin tungoale wahntuhkehn nanwel kan.” Kerialahn pwelen sampah wehwehkiong me koadoahkiada pwelen sampah pahn inenen apwal. Keinek en Adam ko me pehm imwilahn keria wet ni dihpw tekatek oh reh kan wosala me kahrehda semen Noah, Lamek kosoiaki duwen ‘weirek en nan pehrail me kohsang ni Siohwa ah kerialahr pwehl.—Senesis 3:17-19; 5:29.
14 Adam oh Ihp pil weliankihdi meleilei ohng medek. Koht mahseniong Ihp: “I pahn katohtowehla omw apwal kan ni omw pahn kin liseian, oh kalaudehla omw medek en neitik, ahpw ke pahn kin ininangihete omw pwoud, oh ih me pahn kin kaunuhkada.” Mwuri, Kain, nein Adam oh Ihp mesenih wiahda tiahk lemei ehu ni ah kemehla rie pwutak Eipel.—Senesis 3:16; 4:8.
15 “Sampah unsek mih pahn manaman en me suwedo,” wahnpoaron Sohn mahsanih. (1 Sohn 5:19) Duwehte me kaundao, sampah rahnwet kin kapwarehda irair suwed kan me iangahki roporop oh pohnmwahso. Ihme kahrehda e sohte kapwuriamwei en kilang uwen laudlahn lemei oh mwersuwed! Ahpw irair en sampah sohte pahn duduwehte soahng wet. Siohwa pahn tehkada mwahu pwe sapwellime Wehi en direkila kadek ah kaidehn tiahk lemei oh mwersuwed.
Pahn Wehin Koht, Kadek Pahn Inenen Sansal
16. Dahme kahrehda en Koht kaunda ki Sises Krais kin sansalki kadek, oh met kin kahrehong kitail en wia dah?
16 Siohwa oh ih me wia Nanmwarki pilipilda ohng Wehin Koht, Sises Krais, anahne sapwellimanki aramas akan en kin wia aramas kadek kei. (Maika 6:8) Sises Krais kasalehiong kitail mehn karasepe mwahu duwen iaduwen kadek ah pahn inenen sansal ni ah pahn kaunda Wehin Semeo. (Ipru 1:3) Met kak sansal sang sapwellime mahsen kan me kasalehda duwen likamw en irail kaun en palien lamalam ko, me kin katoutouwiheki aramas akan mehn wisik toutou kan. E mahsanih: “Kumwail kohdo rehi, kumwail me pwangadahr oh toutoukilahr amwail mehn wisik kan, I ahpw pahn kakoamoaleikumwailla. Kumwail ale oh kapaikada ei mehn wisiket, oh kumwail padahngki sang ie. Pwe I me opampap oh nan kapehd karakarahk; kumwail ahpw pahn diar kommoalpen ngenomwail kan. Pwe mehn wisik me I pahn kihong kumwail me mengei, oh audepe kan me marahra.” (Madiu 11:28-30) Pali moron en kaun akan en sampah, kaun en palien lamalam de kaun teikan, kin kapwangehkihda aramas akan pwukoa kan me kin katoutouwih irail ahpw sohte me kin kasalehiong aramas pwukat ahr kalahnganki ahr doadoahk kan. Ahpw dahme Sises kin anahne sapwellime aramas akan en wia kin pwungiong ahr anahn akan oh koahiek kan. Sapwellimen Sises mehn wisik inenen wia kakommoalpen irail me pwangadahr! Met soh pil kamwekid kitail en duwehte ih oh pil kadek ong meteikan?—Sohn 13:15.
17, 18. Dahme kahrehda kitail kak liki me irail me kin iang Krais kaunda nanleng oh irail akan me kin wia weliepe sampah pah pil kasalehda kadek?
17 Mahsen en Sises ong sapwellime wahnpoaron ko kasalehda duwen wekpeseng en kaundahn Wehin Koht oh kaundahn aramas. Pwuhk Sarawi mahsanih: “Tohnpadahk ko ahpw akamaikihda ihs me pahn lapalap rehrail. Sises ketin mahsanihong irail: ‘Nanmwarki kan en sampah kin sapwellimanki manaman en kaunda wasa pohn sapwellimarail aramas akan, oh aramas akan kin kamwarehki arail kaun akan ‘Mwohnsahpw Kalahngan.’ Ahpw e sohte pahn duwehte rehmwail; pwe me keieu lapalap rehmwail pahn duwehte me keieu tikitik, oh me kin kaun pahn duwehte lidu. Pwe ihs me lapalap rehn me kin mwohndiong nin tehpel pwe en konot, de me kin papah? kaidehkin me kin mwohndiong nin tehpel? Ahpw iet, ngehi I kin mihmi rehmwail duwehte papah men.’ ”—Luk 22:24-27.
18 Kaun en aramas akan kin rapahki pwe ren lapalapala ni ahr kin ‘kakaun pohn’ aramas teikan oh raparapahki mwar laud kan oh lemeleme me mwar pwukat pahn wia irail en mwahusang aramas ako me re kin kaunda. Ahpw Sises koasoia me lapalap mehlel kohsang ni papah meteikan—pwerisekiong oh kaukaule papah mehteikan. Irail koaros me pahn iang Krais kaun nanleng de pil wia weliepe pohn sampah anahne en kaukaule idawehn ah mehn kahlemeng en karakarahk oh kadek.
19, 20. (a) Iaduwen Sises kin kasalehda uwen sapwellimen Siohwa kadek? (b) Iaduwen atail kak kahlemengih Siohwa oh kasalehda kadek?
19 Kitail pil kilang ekei iren kaweid limpoak kan me Sises ketikihda. Pwehn kasalehda uwen kadek en Siohwa, Sises mahsanih: “Ma kumwail pahn poakohngete irail kan me poakohng kumwail, soangen pai dah me kumwail koapworopworki en ale? Pwe me dipan akan pil kin poakohng irail kan me kin poakohng irail. Oh ma kumwail pahn wia me mwahu ongete me kin wia mwahu ong kumwail, soangen pai dah me kumwail koapworopworki en ale? Pwe me dipan akan pil kin wia soahngohte. Oh ma kumwail pahn kihong mehkot ong irail kante me kumwail kasikasik kasapahlpe sang rehr, soangen pai dah me kumwail kasikasik en ale? Pwe me dipan akan pil kin kihong me dipan akan pwe re en ale dupukpe! Eri soh, kumwail poakohng amwail imwintihti kan oh wia mwahu ong irail; kumwail kihong irail mehkot ahpw dehr kasikasik kasapahlpe sang rehrail. Pwe katingpamwail pahn laud mehlel oh kumwail pahn wiahla sapwellimen Koht, Wasa Lapalahpie. Pwe e kin ketin kalahngan ong me kin dup suwed kan oh me suwed akan. Kumwail eri kin kalahngan, duwehte Samamwail me ketin kupwurkalahngan.”—Luk 6:32-36.
20 Kadek en Koht kin sohte roporop. E sohte kin peki mehkot oh sohte pil kin kasik kasapahlpe. Siohwa kin ni kadek “dakerki sapwellime ketipin pohn me suwed oh me mwahu kan, oh kin ketin kamwerehdi keteu pohn me lelepek oh me dipan akan.” (Madiu 5:43-45; Wiewia 14:16, 17) Ni atail kahlemengih Samatail nanleng, kitail kin kaidehn ihte liksang kamedekih irail me soh kalahngan akan ahpw kitail pil kin mwahu ong irail pil iangahki me pil wia atail imwintihti. Ni atail kin kasalehda kadek, kitail kin kasalehiong Siohwa oh Sises me kitail men mour pahn kaundahn Wehin Koht, ahnsou me aramas koaros pahn kin kasalehda kadek oh pil soangen irair teikan en Koht.
Dahme Kahrehda Kitail en Kasalehda Kadek
21, 22. Dahme kahrehda kitail anahne kasalehda kadek?
21 Ong Kristian mehlel men, en kasalehda kadek wia mehkot me inenen kesempwal. E kin kasalehda me ngehnin Koht doadoahk nan loaletail. Oh pil laud sang met, ni atail kin kasalehda kadek, kitail kin kahlemengih Siohwa oh Krais Sises. Kadek pil wia irair ehu me irail akan me pahn sohsohki Wehin Koht anahne ahneki. Kahrehda kitail anahne en limpoak kadek oh sukuhliki en kasalehda irair wet.
22 Ia ekei ahl konehng kan me kitail kak kasalehda kadek nan atail mour en ehu ehu rahn? Artikel en mwuhr pahn kasalehda met.
Iaduwen Ahmw Pahn Sapeng?
• Ia wehwehn kadek?
• Dahme kahrehda sampah wia wasa ehu me direkihla lemei?
• Iaduwen atail ese me kadek kin powehdi sapwellimen Koht kaunda?
• Dahme kahrehda kasalehda kadek kin kesempwal ong irail akan me men iang mih pahn koasoandi en Wehin Koht?
[Kilel nan Pali 7]
Elder Kristian kan kin nantiong kasalehda kadek ni arail kin ehuiong tohn mwomwohdiso
[Kilel nan Pali 9]
Sapwellimen Siohwa limpoak kadek sohte pahn likidmeliehla sapwellime ladu kan ni ahnsou apwal akan
[Kilel nan Pali 10]
Siohwa ni kadek kin ketin mweidohng ketipin en daker oh keteu en mweredi pohn aramas akan koaros