“Ih Kisakis me Keieu Mwahu me I Alehdi”

Iei met pepehm en serepein men me sounpar 13 ni eh alehdi kisin kidi men nin duwen kisakis ehu. Emen lih me kin pweida mwahu nan pesines nda me computer me eh pahpao kihong ih ni eh pwulopwul nan sukuhl wia kisakis ehu me wekidala eh mour. Emen ohl me eh pwoudo pein wiahda oh kisikisehkin ih card en keieun sounpar me ira pwopwoudida nda me kisakiso iei me keieu mwahu me e alehdi.

Sounpar koaros, aramas tohto kin kihong ahnsou laud en rapahkihda kisakis “keieu mwahu” ong kompoakparail de kisehrail men ong ahnsou tohrohr ehu. Oh pali laud en aramas akan pahn perenki rong soangen pepehm kan me duwehte me kileldi poweo. Ia duwen kowe? Ke kin perenki kisikise emen de ale kisakis ehu me ke uhdahn kalahnganki?

Wiewia pwukat kak uhdahn kaperen, kaidehn ihte pwehki dahme kisakiso kak wiahiong emen me alehdi, ahpw dahme e kak wiahiong me wia kisakiso. Met mehlel pwehki Paipel mahsanih: “Kihwei kaperen sang ale.” (Wiewia 20:35) Peren me kohsang en kihkihwei pil kin laudla ma me alehdi kisakiso kin uhdahn kesempwalki.

Eri, ia duwen omw kisakis eh kak kahrehda peren laud ong kowe oh me pahn aleo? Oh ma ke sohte kak kisakiski dahme “keieu mwahu,” dahme ke kak wia pwe me alehdi kisakiso en uhdahn kalahnganki?