Ke Tamataman?

Ia duwe, ke kin wadek kanahieng Kahn Iroir kan me wiawihda nan pahr me neklahro oh pahret? Eri, kilang ma ke kak sapengala peidek kan me mi pah:

Ni kaweid kan ar kohsang sapwellimen Koht pwihn, soangen madamadau dah me brother kan, duwehte sounapwalih me kin seiloak oh elder kan nan mwomwohdiso, anahne ahneki?

Re anahne mwadangete peikiong kaweid ko. Re kak pein idek rehrail: ‘I kin kangoange riei Kristian kan en loalopwoatohng Siohwa? I kin mwadang en idawehn kaweid me I alehdihsang sapwellimen Koht pwihn?’​—w16.11, pali 11.

Iahd me Kristian mehlel kan mihla pahn manaman en Papilon?

Met wiawi mwurinte wahnpoaron ko mehla. Ni ahnsowo, pwihn en kaun en pelien lamalam kan tepida pwarada. Pelien lamalam oh koperment kin kangoange mwekid en kesehla oh uhwongada kaudok mehlel oh re kin song en kerempwahla padahk en Kristian kan me rasehng tuhke mwahu kan. Ahpw pahr kan mwohn 1914, me keidi kan tepida saledekla.​—w16.11, pali 23-25.

Dahme kahrehda ahn Lefèvre d’Étaples doadoahko kesempwalki?

Erein pahr 1520 samwa, Lefèvre kawehwehdi Paipel ni lokaiahn France pwe aramas akan en kak iang naineki. Mwomwen eh kin kawehwehda duwen iren Paipel kan kamwakid Martin Luther, William Tyndale, oh John Calvin.​—wp16.6, pali 10-12.

Ia wekpeseng en “nsenohki kapwaiada ahnepen aramas” oh “medemedewehte soahng kan me pid sapwellimen Koht manaman”? (Rom 8:6, NW)

Mehmen me kin wiewia keieun irairo kin medemedewehte oh idawehn eh ineng suwed kan, kalapw koasoia oh wiewia dahme e men wia. A mehmen me kin wiewia keriaun irairo kin kesempwalki soahng kan me pidada Koht oh sapwellime madamadau kan; soangen Kristian menet kin mweidohng sapwellimen Koht manaman en kaweid ih. Keieun irairo kin imwikihla mehla a keriaun irairo kin imwikihla mour oh popohl.​—w16.12, pali 15-17.

Ia ekei ahl me kitail kak katikala atail pwunod?

Wiahda mahs koasoandi kan me uhdahn kesempwal, en toupahrek, koasoanehdi ahnsou ehuehu rahn en kommoal, perenki sapwellimen Koht kapikipik kan, ese kamwan, oh kalapw eksersais oh kihong ahnsou en ekis meir.​—w16.12, pali 22-23.

“Kasauda Enok pwehn dehr kilang mehla.” (Ipru 11:5, NW) Ia duwen?

E mwomwen me Koht ketin kasauda Enok sang mour ong mehla ni eh sohte ese me e pahn mehla.—wp17.1, pali 12-13.

Dahme kahrehda mpahi kesempwalkihte?

Mpahi kin pidada emen eh ese duwen pein ih oh pohnese me mie soahng kan me e sohte kak de kak wia. Kitail anahne pohnese ia duwen atail wiewia kan ar kak kamwakid meteikan oh dehr nohn medewe me kitail kesempwalsang meteikan.​—w17.01, pali 18.

Mehn kadehde dah me kasalehda me Koht kin ketin kaweid pwihn me kin apwalih mwomwohdiso pwon ni tepin mwehin Kristian ko, duwehte me e ketin wiahiong Pwihn me Kin Apwalih Mwomwohdiso nan Sampah Pwon rahnwet?

Sapwellimen Koht manaman me sewese irail en wehwehkihda padahk mehlel kan en Paipel. Tohnleng kan kin iang sewese irail apwalih doadoahk en kalohk oh re kin likih Mahsen en Koht ni arail kin kihda kaweid. Mepwukat pil kin wiawi rahnwet.​—w17.02, pali 26-28.

Soahng dah kei me kin kamwakid kitail en kilangwohng pweinen pweipwei sapahlo nin duwen mehkot kesempwal?

Soahng pahieu pwukat iei: Ihs me ketikihong uhk, dahme kahrehda e ketikihda met, dahme tounmeteila pwe kisakiso en kak kohieng uhk, oh ma kisakiso kaitarala anahn kesempwal ehu. Kitail anahne doudouloale ia duwen soahng pwukat ar pidada kisakis kesempwalo.​—wp17.2, pali 4-6.

Mwurin Kristian men medemedewe irair ehu, e pahn kak wekidala eh madamadau?

Kitail kin anahne kapwaiada atail inou. Ahpw, ekei pak e pahn mwahu en pwurehng medewe duwen pilipil ehu. Koht ketin wekidala kupwure ong Ninipe ni aramas ako ar koluhla. Ekei pak, ire de kaweid kapw kan ele kin kahrehiong kitail en wia duwehte.​—w17.03, pali 16-17.

Dahme kahrehda lipahned kin keper?

Met kak kahrehiong kahpwal ehu en suwedla. Mehnda ma kitail pwung de sapwung, lipahned sohte pahn kamwahwihala irairo.​—w17.04, pali 21.