1 Sawas ong Soikala Kahpwal kan

KAMAMSAKAU

Delphine, me kitail koasoia nan oaralap en mwoweo, medewe me eh kapwunod kan kin kahrehiong ih en men kalaudehla eh niminim. Paipel sohte keinepwi sakau en wai ma aramas sohte kin nim daulihala. Ahpw e mahsanih: “Dehr patehng aramas me kin kamam sakau.” (Lepin Padahk 23:20) Kamamsakau kin kahrehda soumwahu laud, kauwehla nanpwungmwahu, oh pil kahrehda mehlahn aramas rar rar kei nan ehuehu pahr. Ma aramas kin idawehn kaweid erpit kan en Paipel, irail pahn kak soikala soangen kahpwal pwukat.

Delphine kapwaiada met. Eri e nda: “I esehda me sakau sohte kin kamwahwihala ei kapwunod kan. I kapwaiada kaweid erpit me kohsang Pilipai 4:6, 7, me mahsanih: ‘Dehr pwunodki mehkot, ahpw nan amwail kapakap akan kumwail en peki dahme kumwail kin anahne.’ Nipwong koaros ni ei kin pehm me ei pwunod kin lalaudla, I kin kapakap ong Siohwa. I kin padahkihong ih ei pepehm koaros, iangahki ei pepehm en lingeringer, medek, oh nsensuwed, oh I kin peki ni ngidingid en ketin sewese ie en diar ahl me pahn kalaudehla ei madamadau pwung. Manda nimenseng, I kin tehk mwahu me I uhdahn kihsang soangen pepehm ko koaros rehi. Ei kin kalapw kapakap ong Siohwa kin sewese kalaudehla ei madamadau pwung. I koasoanehdi en sohla pwurehng nim sakau. Meleilei wet uhdahn kesempwal ong ie, kahrehda I men kolokolte.”

TIAHK SAMIN

Tiahk samin iei me pil kin kahrehda nsensuwed laud. Ahpw kaweid kan en Paipel kak sewese kitail en soikala soangen kahpwal pwukat sang ni atail tehk duwen ekei kahrepe kan​—karasepe, en kalahiong emen oh en kilang kilel de kasdo suwed. Emen mwahnakapw me ede Samuel nda: “E kin uhdahn mengei en kalahiong emen. Ekei pak I sohte lelki de mwahuki serepein men, ahpw I kak ese me serepeino mwahukin ie, kahrehda e kaperen en kalahiong ih.” Samuel diarada me meteikan kin nda me e kin kalapw kalahiong meteikan​—mehnda ma e sohte nsenki wia met. Met kahrehda e lemehda en doulahte kalahiong meteikan. Ahpw tiahk wet kin kapwunode ih. Met e nda: “Tiahk wet keper pwehki e kin kakairada pepehm en roporop.”

Samuel wadek oaralap ehu me mi nan website en jw.org ong me pwulopwul kan. Oh e medewe duwen Lepin Padahk 20:11 me mahsanih: “Seri men pil kin kasalehda mwomwe sang ni eh wiewia kan; ke kak ese ma e lelepek oh mwahu.” Ia duwen met eh sewese ih? Samuel esehda me eh kin kalahiong meteikan wia tiahk ehu me samin oh sohte pwung. Met e nda: “I pil sukuhlki me me pwulopwul men me kin kalahiong meteikan kin kakairada soangen irair me kakete kahrehiong ih en wia ohl de lih pwopwoud suwed men. I tepida medemedewe ia pahn duwen pepehm en lih me I pahn pwoudiki ehu rahn ma e kilang ie kalahiong emen lih tohrohr. Met kahrehiong ie en wehwehki me tiahk wet keper. Mehnda ma e mengei en wia tiahk wet, ahpw e sapwung.” Samuel wiahda wekidekla kan. Eh soikala kalahiong meteikan pil sewese ih en soikala tiahk samin.

Antonio pil ahneki kahpwal en tiahk samin me laudsang met. E sohte kin uhdihsang kilang kilel de kasdo suwed. Mendahki e pwoudiki lih emen me e uhdahn poakohng, e kin pwurepwurehng lohdi pahn kasongosong wet. E nda me eh kin medemedewe 1 Piter 5:8 uhdahn sewese ih. Iren Paipel wet mahsanih: “Kumwail onohnop oh mwasamwasahn. Pwe amwail imwintihtio, Tepil, kin kohkohseli duwehte laion emen me kin weriwer, raparapahki ihs me e pahn kadallehla.” Antonio nda: “Kilel oh kasdo suwed kan inenen reklahr nan sampah, oh kilel pwukat kak tengala nan omw madamadau. Iren Paipelo uhdahn sewese ie en medewe ia wasa kasongosong pwukat kin uhdahn kohsang ie. I anahne sukuhlki en mwadangete tamanda me kilel oh kasdo suwed pwukat uhdahn kohsang Tepilo. Met I ese me Siohwa kelehpw me kak ketin sewese ie en ‘onohnop oh mwasamwasahn’ pwe I en kak pelianda kasongosong pwukat nan ei madamadau, mohngiong oh nan ei mouren pwopwoud.” Antonio alehdi sawas me e anahne oh e kesehlahr soangen tiahk samin wet. Met pil sewese ih en soikala kahpwal kan me suwedsang.

E sansal me Paipel kin kihda kaweid mwahu kan me kak sewese kitail en soikala kahpwal inenen laud kan. Ahpw ia duwen soangen kahpwal kan me wereilahr rehtail oh kin pwurepwurehng wiawi. Kitail pahn tehkpene ia duwen Mahsen en Koht eh kak sewese kitail en apwalihala soangen kahpwal laud pwukat.