2 Sawas ong Kamwahwihala Kahpwal kan

PWUNOD DAULIHALA

Rosie nda: “I kin kalapw pwunodki duwen soahng kan. Nan ei madamadau, I kin kalaudehla kahpwalo sang dahme uhdahn wiawi.” Mehnia iren Paipel me sewese ih? Ehu iei Madiu 6:34, me mahsanih: “Dehr kin pwunodki dahme pahn wiawi lakapw; pwe lakapw pahn pwukoahki pein eh pwunod. E sohte konehng kumwail en kin katohtowehla kahpwal akan me rahn akan kin wadohng kumwail.” Met Rosie nda me mahsen en Sises pwukat sewesehier ih en uhdihsang eh kin pwunodki dahme pahn wiawi lakapw. E pil nda: “Mieier ei kahpwal oh I sohte anahne kapatahiong ni ei pahn kin pwunupwunodki irair kan me sohte wiawi de sohte pahn wiawi.”

Yasmine pil pehm me eh pwunod laud pahn powehdi ih. E nda: “I pahn kin sengiseng rahn riau nan wihk ehu, oh I sohte kak meir mwahu ekei nipwong kan. I medewe me ei madamadau sapwung kan kin ekisekis kemeiehla.” Mehnia iren Paipel me sewese ih? E nda me 1 Piter 5:7 kin sewese ih. Ireo mahsanih: “Kumwail mweidohng ih [Koht] amwail pwunod koaros, pwehki eh kin ketin apwahpwalih kumwail.” Yasmine nda: “Ekisekis, I kin kapakap ong Siohwa oh e kin ketin sapengala ei kapakap kan. I pehm me lapalahn wisik toutou ehu kohsang pohn pwopweiet. Ei madamadau sapwung kan kin pwurepwurehng kohda, ahpw met I ese ia duwen ei pahn apwalihala.”

SOHTE KIN MWADANG WIAHDA

Peinakapw men me ede Isabella nda: “I leme I sohsohki sang ei pahpao kahpwal en sohte kin mwadang wiahda doadoahk de pwukoa ehu ni ahnsou me I alehdi. Met pwehki e pil kin wia met. I kin kasohwe ei pahn mwadang kapwaiada soahng kesempwal kan pwe I en dehr wia mehkot​—ihte kommoal de kilang TV. Soangen tiahk wet keper pwehki e kin kalaudehla kapwunod oh kahrehda emen en wia doadoahk me sohte mwahu.” Ehu kaweid me sewese ih iei me sansalda nan 2 Timoty 2:15, me mahsanih: “Wia uwen omw kak mwohn silangin Koht, pwe en ketin pwungkin uhk, nin duwen soundoadoahk men me sohte kin namenengki eh doadoahk.” Isabella nda, “I sohte men ei doadoahk en kanamenekihiehla mwohn Siohwa pwehki ei sohte kin mwadang wiahda doadoahk ehu.” Eh irairo met uhdahn mwahusang mahs.

Duwehte met, Kelsey nda: “Ma mie doadoahk ehu me I pahn kanekehla erein ahnsou ehu, I kin pwilikihdi oh sohte wia lao ahnsowo kereniong lel. I pahn kin sengiseng, sohte meir, oh pwunod. Met sohte mwahu ong ie.” Kelsey diar sawas nan Lepin Padahk 13:16, me mahsanih: “Aramas me mie eh lamalam men kin medemedewe mwohn eh pahn wia mehkot; ahpw me soaloalokong men kin kalohkiseli pein eh pweipwei.” Kelsey kawehwehda dahme e sukuhlki sang eh doudouloale ire wet: “E wia elen loalokong en kin koahiek oh koasoanehdi mahs dahme ke pahn wia. Met mie nei kisin pwuhk ehu pohn ei tehpelo me I kin kilelehdi doadoahk kan me I pahn wia, oh e kin sewese ie en idawehn ei koasoandio oh sohte awih lao pwandala.”

KELEKELEHPW

Kirsten nda: “Ei pwoudo kohkohsang ie oh nait seri pwulopwul pahmen ko.” Mehnia iren Paipel me sewese ih? Lepin Padahk 17:17 mahsanih: “Kompoakepah kan kin kasalehda ar limpoak ahnsou koaros. Ia katepen eh mie kompoakepahmw ma e sohte seweseiuk ni ahnsou apwal?” Kirsten diar sawas sang rehn irail kan me pil kin papah Siohwa duwehte ih. Dahme e diarada? E nda: “Kompoakepahi kan kin sewese ie ni ahl tohto! Ekei kin kihdi ni ei wenihmwo wahnrohs oh mwenge de soahng kan me re pwainda sang sidohwa. Pak siluh mie kisin pwihn ehu me sewese ie oh nei seri ko keseusang ehu ihmw ong ehu ihmw. Emen pil sewese ie en diarada ei doadoahk. Kompoakepahi kan kin ahnsou koaros sewese ie.”

Delphine, me kitail koasoia mwoweo, pil kin ahneki kahpwal en kelekelehpw. E taman mwurin eh luhssang soahng koaros: “I pehm me I kin kilikilang aramas akan ar ehupene oh wiewia dahme re kin wia, ahpw ngehi, I kin kelekelehpw oh uhdahn nsensuwed.” Iren Paipel ehu me sewese ih iei Melkahka 68:6, me mahsanih: “E [Koht] kin ketikihong me lekdeklahr akan ar wasahn kousoan.” Delphine nda: “I ese me iren Paipelo sohte ihte koasoakoasoia duwen uhdahn ihmw ehu ahnsou wet. Ahpw, I wehwehki me Koht kin ketikihda ong kitail wasa ehu me sohte mie keper oh me kin sewese kitail en karanihala irail kan me kin poakohng Siohwa. I pil wehwehki me I sohte kak karanihala meteikan lao I pahn karanihala mahs Siohwa. Eri Melkahka 37:4 sewese ie: ‘Rapahki omw peren rehn KAUN-O; oh e ahpw pahn ketikihong uhk dahme ke keieu inengieng.’”

E pil nda: “I wehwehki me I anahne uhdahn karanihala Siohwa. E ketin wia Kompoakepah men me keieu mwahu. Ngehi eri ntingihedi soangen wiewia kan me I kak iang meteikan wia, pwe I en kak kompoakepahnkihla irail me pil kin poakohng Siohwa. I sukuhlki en kilang soahng mwahu kan rehn meteikan oh pohnsehsehla arail soh unsek kan.”

Ei mehlel, kompoakepatail kan me kin papah Koht sohte unsek. Sounkadehdehn Siohwa kan pil kin ahneki kahpwal kan duwehte koaros. Ahpw kaiahn sang Paipel kin kamwakid aramas akan en sewese meteikan ahnsou koaros me re kak. E wia elen loalokong en kompoakepahnki soangen aramas pwukat. Ahpw ia duwe, kaweid kan en Paipel pil kak sewese kitail ong kahpwal kan me kitail sohte kak apwalihala rahnwet, duwehte kohwahki soumwahu oh pahtou laud?