Kauwehla Madamadau Likamw Koaros me Kin Uhwong Loalokong en Koht!

1. Kehkehlik dahieu me wahnpoaron Pohl ntingihong Kristian keidi kan?

WAHNPOARON Pohl kehkehlingki: “Kumwail uhdihsang amwail kahlemengih aramas en koasoandi en mwehi wet.” (Rom 12:2) Pohl ntingihedi lepin lokaia pwukat ong tepin Kristian kan. Dahme kahrehda e kihda kehkehlik laud wet ong ohl oh lih akan me inoukihong Koht arail mour oh keikihdi sapwellimen Koht manaman?​—Rom 1:7.

2-3. Ia duwen Sehdan eh kin song en kahrehiong kitail en sohpeisang Siohwa, ahpw ia duwen atail kak kihsang “soahng kan me teng oh kehlail” nan atail madamadau?

² Pohl kin pwunod pwehki ekei Kristian kan kin mwekidki madamadau keper kan me ahn Sehdan sampah kin kihda. (Ep. 4:17-19) Met pil kak wiawihong kitail. Pwehki e uhdahn men kitail en sohpeisang Siohwa, Sehdan, koht en koasoandi suwed wet, kin doadoahngki soangsoangen wiepe kan pwehn kamwakid kitail. Karasepe, ma kitail men wia aramas kesempwal de ndand kei, e pahn doadoahngki met pwehn song en kahrehiong kitail en sohpeisang Siohwa. Ele e pil kin doadoahngki soahng kan nan atail mour duwehte mwomwen atail tikida, atail tiahk, de dahme kitail sukuhlki pwehn kahrehiong kitail en ahneki soangen madamadau me e men kitail en ahneki.

³ Ia duwe, kitail kak kihsang “soahng kan me teng oh kehlail” nan atail madamadau? (2 Kor. 10:4) Tehk ia duwen Pohl eh sapengala peidek wet: “Se kin kauwehla madamadau likamw oh soangen aklapalap koaros me kin uhwong loalokong en Koht, oh se kin salihedi madamadau koaros pwe en peikiong Krais.” (2 Kor. 10:5) Ei, sapwellimen Siohwa sawas kak sewese kitail en kihsang atail madamadau sapwung kan. Duwehte wini eh kak kihsang soahng suwed kan en poisin, Mahsen en Koht kak sewese kitail en kihsang soahng suwed kan en ahn Sehdan sampah.

“WEKIDALA ELEN AMWAIL MADAMADAU”

4. Wekidekla dah kan me tohto rehtail anahne wiahda ni ahnsou me kitail tepin esehla padahk mehlel?

⁴ Medewehla duwen wekidekla kan me ke anahne wiahda ni ahnsou me ke tepida esehla padahk mehlel en Mahsen en Koht oh pilada en papah Siohwa. Ong me tohto rehtail, met kin pidada atail en uhdihsang wia soahng kan me sapwung. (1 Kor. 6:9-11) Ia uwen atail kalahnganki me Siohwa ketin sewese kitail en powehdi soangen wiewiahn dihp pwukat!

5. Soahng riau dah kan me Rom 12:2 kasalehda?

⁵ Ahpw, kitail en dehr pehm me kitail sohte anahne pil wiahda wekidekla tohto. Mehnda ma kitail uhdihsang wia dihp laud kan me kitail kin wia mwohn atail papidaisla, kitail kin anahne doulahte doadoahk laud pwehn soikala wia soahng sohte lipilipil me pahn kasonge kitail en pwuralahng wia dihp laud pwukat. Ia duwen atail kak wia met? Pohl nda: “Uhdihsang amwail kahlemengih aramas en koasoandi en mwehi wet, ahpw wekidala pein kumwail sang ni amwail wekidala elen amwail madamadau.” (Rom 12:2) Eri kitail anahne wia soahng riau. Keieu, kitail anahne “uhdihsang . . . kahlemengih,” de mweidohng sampah wet en kamwakid kitail. Keriau, kitail anahne ‘wekidala pein kitail’ sang ni atail wekidala elen atail madamadau.

6. Dahme kitail sukuhlkihsang sapwellimen Sises mahsen kan me kileldi nan Madiu 12:43-45?

⁶ Wekidekla me Pohl koasokoasoia kin pidada laudsang ihte en wekidala mwomwatail. E kin pidada soahng koaros duwen kitail. (Menlau kilang koakon me oaralape “Wekila de Mwomwehdahte Wekila?”) Kitail anahne uhdahn wekidala elen atail madamadau​—atail madamadau, pepehm oh ineng kan me mi loalatail. Eri kitail koaros anahne pein idek rehtail, ‘Wekidekla kan me I kin wiahda pwehn wiahla Kristian men kin ihte ong ia pahn mwomweiet mwohn meteikan, de I uhdahn wiahla Kristian men nan mohngiongiet oh ei madamadau?’ Wekpeseng wet kesempwal. Nan sapwellime mahsen me kileldi nan Madiu 12:43-45, Sises ketin kasalehda dahme kitail anahne wia. (Wadek.) Lepin lokaia pwukat kasalehda ire mehlel kesempwal wet: E sohte itar en ihte kihsang madamadau sapwung kan; kitail anahne wiliandi madamadau pwukat ong madamadau kan me Koht ketin kupwurki.

“ONOHNSAPAHLIH AMWAIL ELEN MADAMADAU”

7. Ia duwen atail kak wekidala dahme mi nan mohngiongitail oh atail madamadau?

⁷ Ia duwe, kitail kak wekidala atail ineng kan de dahme uhdahn mi nan mohngiongitail oh atail madamadau? Mahsen en Koht mahsanih: “Kumwail anahne usehlahte onohnsapahlih amwail elen madamadau, oh kumwail anahne pwuhriong nan mour kapw me wiawihda nin duwen kupwuren Koht ni pwung mehlel oh loalopwoat mehlel.” (Ep. 4:23, 24) Ei, kitail kak wekidala dahme mi loalatail, ahpw e sohte mengei en wia met. Kitail anahne wia laudsang ihte pelianda ineng oh wiewia sapwung kan. Kitail anahne wekidala atail “elen madamadau.” Met kin pidada atail en wekidala atail ineng kan, atail wiewia kan, oh kahrepen atail kin wia soahng kan. Kitail anahne pousehlahte nannanti wia met.

8-9. Ia duwen karasaras en brother men eh kasalehda duwen anahn en wekidala dahme mi nan mohngiongitail oh atail madamadau?

⁸ Kitail tehk ehu karasaras en emen brother me kin wia tiahk lemei mahso. E kin kamamsakau oh pei, ahpw e uhdihsang mepwukat oh kedekedeo papidaisla. Met wia mehn kadehde mwahu ong kisin wasao me e kin kousoan ie. Ahpw ni soutik ehu, ahnsou kis mwurin eh papidaisla, e lelohng kasongosong ehu me e sohte kasik. Ohl sakau men kohdo ni imweo oh men peiong ih. Nin tapio, brothero pelianda eh ineng en men pei. Ahpw ni ahnsou me ohlo kauwe mwaren Siohwa, brother kapwo solahr kak kolokol eh kanengamah. E kohieila oh kemehda ohlo. Dahme kahrehda e wiahki met? Mehnda ma eh onop en Paipel sewese ih en pelianda eh ineng en men pei, e saikinte kak wekidala eh elen madamadau. E sohte wekidala dahme uhdahn mi nan eh mohngiong oh madamadau.

⁹ Ahpw, brother menet sohte uhdihsang eh nannanti en wekila. (Lep. Pad. 24:16) E ale sawas sang elder kan oh pousehlahte kekeirda mwahu. Kedekedeo e wiahla elder men. Ehu ni soutiko, likin Wasahn Kaudok, e pil lelohng soangen kasongosongohte me e lelohng sounpar kei mwowe. Ohl sakau men pahn peiong emen elder ko. Dahme brothero wia? Ni meleilei oh aktikitik, e lokaiaiong ohl sakauo, sewese ohlo en meleileidi, oh pil sewese kahrehla ohlo ni imweo. Dahme kahrehda mwekid en brothero weksang nin tapio? Brothero wekidala eh elen madamadau. E wiahla aramas emen me uhdahn meleilei oh aktikitik. Met wahdo kaping ong Siohwa!

10. Dahme kin pidada wiahda wekidekla pwukat?

¹⁰ Wekidekla pwukat sohte kin mwadang wiawi de pein wiawi. Kitail anahne ‘nantihong wia uwen atail kak’ pwehn doadoahk laud erein sounpar tohto. (2 Pit. 1:5) Wekidekla pwukat sohte pahn wiawi ihte pwehki kitail papahier Siohwa ahnsou werei. Kitail anahne wia uwen atail kak en wekidala ihs uhdahn kitail nan loalatail. Mie kahk kan me pahn sewese kitail en wiahda wekidekla wet. Kitail tehkpene ekei kahk pwukat.

IA DUWEN ATAIL EN WEKIDALA ATAIL ELEN MADAMADAU

11. Ia duwen kapakap eh kin sewese kitail wekidala atail elen madamadau?

¹¹ Tepin kahk kesempwal me kitail anahne wia iei kapakap. Kitail anahne kapakap duwehte me sounmelkahkao wia, e patohwan: “Maing Koht, komw ketin wiahiong ie ehu mohngiong mwakelekel, oh ketikihong nan kapehdiet ehu [“madamadau kapw,” NW] oh loalopwoat.” (Mel. 51:10) Kitail anahne pohnese atail anahn en wekidala atail elen madamadau oh peki sawas sang rehn Siohwa. Ia duwen atail kak kamehlele me Siohwa pahn ketin sewese kitail wiahda wekidekla wet? Kitail kak ale kangoang sang dahme Siohwa ketin inoukihong mehn Israel keptakai kan ni mwehin Esekielo. E mahsanih: “I pahn ketikihong irail mohngiong kapw oh lamalam kapw. . . . oh ketikihong irail mohngiong peik,” me iei, mohngiong ehu me kin men idawehn sapwellimen Koht kaweid. (Esek. 11:19) Siohwa ketin kupwurki sewese mehn Israel pwukat en wekila, oh e pil kupwurki sewese kitail.

12-13. (a) Nin duwen me Melkahka 119:59 kasalehda, dahme kitail anahne doudouloale? (b) Peidek dah kan me kitail en pein idek rehtail?

¹² Keriau en kahk kesempwal me kitail anahne wia iei en doudouloale. Ni atail wadek kanahieng Mahsen en Koht rahn koaros, kitail anahne doadoahngki ahnsou pwehn doudouloale, de medewe laud, duwen dahme kitail wadek pwe kitail en kak esehda soangen madamadau oh pepehm dah kan me kitail anahne wekidala. (Wadek Melkahka 119:59; Ipru 4:12; Seims 1:25) Kitail anahne esehda soangen madamadau oh pepehm kan me madamadau en sampah wet kin kamwakid kitail en ahneki. Kitail anahne pohnese ni mehlel atail luwet kan oh doadoahk laud pwehn kihsang luwet pwukat.

¹³ Karasepe, pein idek rehmw: ‘Mie ekis pepehm en peirin de luwak rehi?’ (1 Pit. 2:1) ‘I kin pehm me I mwahusang meteikan pwehki wasa me I kohsang ie, sukuhl me I ale, de uwen mwohni me I kin ale?’ (Lep. Pad. 16:5) ‘I kin kilengdiong meteikan me sohte ahneki soahng kan me I ahneki de irail kan me kohsang ehu wasa tohrohr?’ (Seims 2:2-4) ‘I kin perenki soahng kan me ahn Sehdan sampah kin kihda?’ (1 Sohn 2:15-17) ‘I kin perenki mehn kamweit kan me kin kasalehda tiahk samin oh tiahk lemei?’ (Mel. 97:10; 101:3; Eimw. 5:15) Pasapengpen peidek pwukat ele pahn kasalehda soahng kan me ke anahne kapwungala. Ni atail powehdi madamadau oh pepehm kan me “teng oh kehlail” rehtail, kitail pahn kaperenda Samatailo nanleng.​—Mel. 19:14.

14. Dahme kahrehda e uhdahn kesempwal en pilada kompoakepah mwahu kan?

¹⁴ Kesiluh en kahk kesempwal iei kitail en pilada kompoakepah mwahu kan. Mehnda ma kitail pohnese de soh, kompoakepatail kan kin uhdahn kamwakid kitail. (Lep. Pad. 13:20) Ni wasahn doadoahk de imwen sukuhl, kitail kin mi rehn irail kan me sohte pahn sewese kitail en medewe soahng kan ni ahl ehu me Koht kupwurki. Ahpw, kitail kak diar kompoakepatail me keieu mwahu nan atail mihting en Kristian kan. Iei wasao me kin kamwakid kitail en kak “kasalehda limpoak oh wiewia mwahu kan.”​—Ipru 10:24, 25, ntp.

KITAIL EN “KEHLAIL NI PWOSON”

15-16. Ia duwen Sehdan eh kin song en wekidala atail madamadau?

¹⁵ Ahpw tamataman me Sehdan koasoanehdi teng en wekidala atail madamadau. E kin doadoahngki soangen wiepen padahk koaros pwehn kauwehla madamadau mwahu me Mahsen en Koht kin kamwakid kitail en ahneki.

¹⁶ Sehdan kin pousehlahte idek soangen peidekohte me e idek rehn Ihp nan mwetuwel en Ihdeno: “Mehlel apwoat me Koht ketin . . . ?” (Sen. 3:1) Nan sampah wet me Sehdan kaunda, kitail kin kalapw rong duwen soangen peidek kan me kakete kahrehiong kitail en peikasalki dahme kitail kamehlele, duwehte: ‘Mehlel me Koht sohte ketin pwungki pwopwoud en nanpwungen ohl ohl oh lih lih? Mehlel me Koht sohte kupwurki ken wia kasarawien Krismas oh rahnen ipwidi? Mehlel me Koht ketin kasik ken dehr ale doken nta? Mehlel me Koht limpoak men ketin kasik ken sohte werekiong irail me ke poakohng me piskenla?’

17. Dahme kitail en wia ni emen eh idek rehtail peidek kan duwen dahme kitail kin kamehlele pwehn song en kahrehiong kitail en peikasalki, oh dahme Kolose 2:6, 7 kasalehda me kak wiawi?

¹⁷ Kitail anahne kamehlelehiong pein kitail dahme kitail kin kamehlele. Ma kitail sohte sapengala peidek kesempwal kan duwen dahme kitail kin kamehlele, kitail kak tepida peikasalki dahme kitail kamehlele. Peikasal pwukat kak kedekedeo kahrehiong kitail en ahneki madamadau sapwung oh kauwehla atail pwoson. Eri dahme kitail anahne wia? Paipel mahsanihong kitail en kawekila atail madamadau, pwe kitail en kak kadehdehiong kitail “dahme Koht kupwurki me mwahu, dahme e kin ketin kupwurperenki oh dahme unsek.” (Rom 12:2) Sang ni atail kin kaukaule onop, kitail kak kadehdehiong pein kitail padahk mehlel kan me kitail sukuhlkihsang Paipel. Kitail kak uhdahn kamehlele me sapwellimen Siohwa koasoandi kan kin pwung. Eri, duwehte tuhke ehu me kalewe kan poadidi teng, kitail pahn poadidi teng oh “kehlail ni pwoson.”​—Wadek Kolose 2:6, 7.

18. Dahme pahn sewese kitail en pere kitail sang soahng suwed kan en ahn Sehdan sampah?

¹⁸ Kitail kelehpw me kak katengehdi atail pwoson, eri pousehlahte onohnsapahlih omw elen madamadau. Kapakap ahnsou koaros oh peki sawas sang sapwellimen Siohwa manaman. Doudouloale laud oh doulahte tetehk omw madamadau oh wiewia kan. Rapahki kompoakepah mwahu kan me pahn seweseiuk en kawekila omw madamadau. Ni omw wia mepwukat, ke pahn kihsang oh pereiuk sang soahng suwed kan en ahn Sehdan sampah oh pweida ni omw kauwehla “madamadau likamw oh soangen aklapalap koaros me kin uhwong loalokong en Koht.”​—2 Kor. 10:5.