Sohn Sounpapidais​—Mehn Kahlemeng Ehu me Kak Sewese Kitail en Kolokol Atail Peren

MIE pwukoa doadoahk ehu me ke uhdahn men wia nan mwomwohdiso ahpw ahnsou wet ke sohte kak wia? Mwein emen tohrohr me ahneki pwukoa wet. De mwein ke kin wia pwukoa, de pwais kaselel wet mahso. Ahpw pwehki ahnsou wet ke mahlahr, ahneki soumwahu, kahpwal en mwohni, de pwukoahn peneinei me irehdi dahme ke kak wia. De pwehki wekidekla kan nan sapwellimen Koht pwihn, mwein ke anahne uhdihsang omw pwukoa doadoahk me ke kin wiewia ahnsou reirei. Sohte lipilipil soangen kahrepe dah me ke ahneki, ele ke pehm me ke sohte kin wiewia soahng koaros me ke men wia nan sapwellimen Koht doadoahk. Nan soangen irair pwukat, kitail kak wehwehki me ele ekei pak ke kin nsensuwedkihla met. Ahpw dahme kak seweseiuk en dehr kin ahnsou koaros mworusala de nsensuwedla laud? Ia duwen omw kak kolokol omw peren?

Kitail kak sukuhlki mehkot kesempwal duwen en kolokol atail peren sang ni atail medemedewe duwen mehn kahlemeng mwahu en Sohn Sounpapidais. Sohn ahneki pwais me inenen kaselel, ahpw ele e sohte kasik dahme pahn wiawi nan eh mour. Ele e sohte medewe me ahnsou me e selidi nan imweteng pahn reireisang ahnsou me e wia eh doadoahk en kalohk. Mendahki met, Sohn pousehlahte ahneki peren, oh e kolokol madamadau wet erein eh mour. Dahme sewese ih? Oh ia duwen atail kak kolokolete atail peren mehnda ma mie soahng kei me kansensuwedihala kitail?

PWUKOA EHU ME WADOHNG SOHN PEREN

Mpen sounpwong en April nan pahr 29, Sohn tapiada doadoahko me Siohwa ketikihong ih, me iei en kaunopada aramas akan ong pwarodohn Mesaia, ndinda: “Kumwail koluhla, pwe Wehin nanleng kerendohr.” (Mad. 3:2; Luk 1:12-17) Me tohto mwekidki met. Ni mehlel, pokon en aramas tohto kin seiloakdo sang wasa doh pwehn rong eh padahk oh me tohto rehrail mwekidki, koluhla oh papidaisla. Sohn pil ni eimah padahkihong kaunen pelien lamalam ko me kin medewe re mwahusang meteikan duwen arail pahn pakadeikda ma re sohte wekila. (Mad. 3:5-12) Dahme Sohn wia me keieu kesempwal nan eh doadoahk en kalohko iei ni eh papidaisihala Sises mpen October pahr 29. Sang ahnsowo kohla, Sohn padahkihong meteikan ren idawehnla Sises, Mesaiao me mie inoupe.​—Sohn 1:32-37.

Pwehki pwukoa tohrohr me Sohn ahneki, Sises kak mahsanih: “Sohte emen me ipwidi sang rehn lih akan me lapalapasang Sohn Sounpapidais.” (Mad. 11:11) Sohn uhdahn perenki kapai kan me e alehdi. Duwehte Sohn, me tohto rahnwet alehdi kapai kaselel kan sang rehn Koht. Karasepe, medewehla emen brother me adaneki Terry. Ih oh eh pwoudo, Sandra, doadoahngki pali laud en ara ahnsou ong papah Siohwa daulih sounpar 50. Terry nda: “I ahneki pwukoa kaselel tohto. I papah nin duwen pioneer men, tohn Pedel men, pioneer tohrohr men, sounapwalih me kin seiloak, oh met I pil pwurehng wia pioneer tohrohr men.” E uhdahn kaperen en alehdi pwukoa kan nan sapwellimen Koht doadoahk, ahpw kitail anahne doadoahk laud pwehn kolokol atail peren ni ahnsou me atail irair kan wekila. Kitail pahn sukuhlki duwen met sang mehn kahlemeng en Sohn.

AHNSOU KOAROS KALAHNGANKI DAHME SIOHWA KETIN MWEIDOHNG UHK KEN WIA

Sohn Sounpapidais kolokolete eh peren pwehki e kin kalahnganki pwais kaselel kan me e ahneki. Medewehla karasaras wet. Mwurin Sises eh ketin papidaisla, ahn Sohn doadoahk en kalohko tepida tikitikla ahpw sapwellimen Sises doadoahk en kalohko tepida kekeirda. Nein Sohn tohnpadahk ko pwunodkihda met oh kohdo reh nda: “Kilang, memenet kin wiewia papidais, oh koaros kin kohkohla reh.” (Sohn 3:26) Sohn sapengki: “Mehmen me lih kamwohdo mi reh, iei ih me ohl kamwohdo. Ahpw kompoakepahn ohl kamwohdo uhdahn perenkihda ngilen ohl kamwohdo ni eh kesihnen mpe oh rongorong ih. Eri, ei peren unseklahr.” (Sohn 3:29) Sohn sohte pelianda Sises de pil medewe me pwukoa me e ahnekio solahr kesempwal pwehki sapwellimen Sises doadoahko kesempwalsang. Ahpw, e kolokolete eh peren pwehki e kesekesempwalkihte eh pwukoa nin duwen “kompoakepahn ohl kamwohdo.”

Ahn Sohn madamadau sewese ih en kolokolete eh peren mendahki eh pwukoao sohte mengei. Karasepe, sangete ni eh ipwidi, Sohn wia Nasaraid men, kahrehda e sohte mweimwei en nim wain. (Luk 1:15) Sises mahsanihki duwen mouren Sohn: “Sohn eh pwarodo oh sohte kin mwengemwenge de niminim.” Ahpw, Sises oh sapwellime tohnpadahk kan sohte mi pahn kosonned en Nasaraid oh re ahneki saledek duwehte aramas teikan. (Mad. 11:18, 19) Pil ehu, Sohn sohte wiahda manaman kan, ahpw e ese me sapwellimen Sises tohnpadahk kan, iangahki ekei me kin idawehn ih nin tapio, kak wiahda manaman kan. (Mad. 10:1; Sohn 10:41) Sohn sohte kin medemedewe laud duwen wekpeseng en nah tohnpadahk kan oh sapwellimen Sises tohnpadahk kan, ahpw e kin pousehlahte kedirepwki pwukoa me Siohwa ketikihong ih.

Ma kitail pil kin kesempwalki pwukoa me kitail ahneki ahnsou wet nan sapwellimen Siohwa doadoahk, kitail kak kolokolete atail peren. Terry, me kitail koasoiapene mwoweo, nda: “I kin nsenohkihte ehuehu pwukoa me I alehdi.” Ni eh medewehla duwen eh doadoahngki pali laud en eh ahnsou ong papah Siohwa, e nda: “Sohte mehkot me I koluhkihla ahpw ihte me I kin tamataman iei ahnsou kaselel kan.”

Kitail kak kalaudehla atail peren ma kitail kin medewe duwen dahme kahrehiong pwukoa kan nan sapwellimen Siohwa doadoahk en uhdahn kesempwal. E uhdahn wia pwais kaselel ehu en wia “iengen Koht tohndoadoahk kan.” (1 Kor. 3:9) Dipwisou kesempwal ehu pahn kaselelte ma kitail kin ahnsou koaros apwalih mwahu. Ni ahlohte, kitail pahn kolokolete atail peren ma kitail kin medemedewehte duwen pwais kaselel en iang Siohwa doadoahk. Kitail sohte pahn kapahrekiong atail nannanti laud ong ahn meteikan ar nannanti laud. Kitail sohte pahn medewe me doadoahk me Siohwa ketikihong kitail sohte kesempwalsang doadoahk me e ketikihong meteikan.​—Kal. 6:4.

MEDEMEDEWEHTE SOAHNG KAN ME KESEMPWAL ONG SIOHWA

Ele Sohn ese me eh doadoahk en kalohko sohte pahn pousehlahte wiawi ahnsou reirei, ahpw e sohte leme me e pahn mwadangete imwisekla. (Sohn 3:30) Nan pahr 30, mpen sounpwong weneu mwurin Sohn papidaisihala Sises, Nanmwarki Erod salihedi ih nan imweteng. Ahpw, Sohn pousehlahte padahngki dahme pwung. (Mark 6:17-20) Dahme sewese ih en kolokolete eh peren erein wekidekla pwukat? E kin pousehlahte medemedewe soahng kan me kesempwal ong Siohwa.

Ni Sohn eh wie sensel, e alehdi ripoht duwen sapwellimen Sises doadoahko eh wie lalaudla. (Mad. 11:2; Luk 7:18) Sohn uhdahn kamehlele me Sises iei Mesaiao, ahpw ele e men ese ia duwen Sises eh pahn ketin kapwaiada soahng koaros me Paipel mahsanih Mesaiao pahn ketin kapwaiada. Pwehki Sohn ese me Mesaiao pahn ketin wiahla nanmwarki, ele e men ese ma sapwellime kaunda pahn kereniong wiawi. Mwein e pil medewe ma Sises pahn ketin kapitala ih sang nan imweteng. Sohn men kalaudehla eh esehla dahme Sises pahn ketin wia, eri e kadarala nah tohnpadahk riemen en kalelapak rehn Sises: “Ih komwi me pahn ketido, de sen kasik emen tohrohr?” (Luk 7:19) Ni ara pwurodo, Sohn ele rong kanahieng ara kawehwehda me Sises ketin kamwahwihala soumwahu kan oh ketin kapwureirahla pwehn padahkihong Sohn: “Me maskun kan kilangadahr wasa, me dangepel kan alialu mwahu, me tokutok kan mwakelekeldahr, me salengepon kan rongadahr wasa, me melahr akan mourdahr oh me semwehmwe kan rongadahr rongamwahwo.”​—Luk 7:20-22.

Dahme nein Sohn tohnpadahk ko padahkihong ih uhdahn kakehlakahda ih. E kamehlelehiong ih me Sises kin ketin kapwaiada kokohp kan duwen Mesaiao. Mendahki Sises sohte ketin kapitala Sohn sang nan imweteng, Sohn ese me eh doadoahk en kalohko kesempwal. Eri mendahki eh mi nan soangen irairo, mie kahrepen eh peren.

Duwehte Sohn, ma kitail kin kilangwohngete atail papah Siohwa, kitail pahn kak dadaur oh ahneki peren oh kanengamah. (Kol. 1:9-11) Kitail kak dadaurete sang ni atail en wadek Paipel oh doudouloale, oh katamankihong kitail me atail doadoahk nan sapwellimen Koht doadoahk kaidehk mehkot mwahl. (1 Kor. 15:58) Sandra nda: “En wadek ehu irelaud en Paipel ehuehu rahn kin sewese ie en karanihala Siohwa. E kin sewese ie en medemedewehte ih a kaidehn ngehi.” Kitail pil kak tetehk rohng kan duwen doadoahk me riatail Kristian kan kin wiewia ong Siohwa, oh met kak sewese kitail en dehr medemedewehte pein kitail ahpw en nsenohki dahme Siohwa kin ketin wiewia. Sandra nda: “Prokram en JW Broadcasting^® nan ehuehu sounpwong kin sewese kiht en karanihala sapwellimen Koht pwihn, oh sewese kiht en kolokolete at peren nan at pwukoau.”

Sohn Sounpapidais kasalehda “roson duwehte Elaisa” erein ahnsou mwotomwot me e wia doadoahk en kalohk, oh duwehte Elaisa, ih “aramas emen me ahneki pepehm me duwehte kitail.” (Luk 1:17; Seims 5:17) Ma kitail alasang eh mehn kahlemeng en kasalehda kalahngan oh kilikilangete atail kin papah Siohwa, kitail pil kak kolokolete peren nan doadoahk en Wehio, sohte lipilipil dahme kak wiawi nan atail mour.