Kalohk Ni Rahn en Holiday kan
1 Mendahki ma Kristmas de Pahrakapw kin kohsang kaudok likamw kan, aramas rar rar kei me dene irail Kristian kan kin kasarawi rahn pwukat ehu ehu pahr. Aramas tohto kin uhdahn kamehlele me Koht kin kupwurki aramas en kasarawi rahn en Kristmas oh Pahrakapw. Ahpw, iaduwen kitail kak sewese irail me mohngiong mehlel en mwekidki Rongamwahu en Wehin Koht nan ahnsou me aramas tohto kin kasarawi Kristmas oh Pahrakapw?
2 Elder kan pahn wiahda koasoandi en kalohk tohrohr ni ahnsou me aramas tohto kin kommoalki holiday kan, pwehki pali laud en kitail pahn pil kommoal sang doadoahk nan ahnsou pwukat. Mwein kuloak en tepida ihmw-lel-ihmw pahn pil wukila pwe tohnihmw kan pahn meir pwand ni rahnen kommoal kan.
3 Ni ahnsou me kitail pahn kalohk, kitail pahn kilang me aramas tohto pahn kedirepwki aramas me re lukehdo nan imwarail kan oh pil wiahda mwenge. Kitail wehwehki me soangen ahnsou pwukat kin wia mehkot kesempwal ong irail, eri, kitail en kak kasalehda wahu ni atail pahn koasoi mwotomwot oh mwadang koasoia dahme kahrehda kitail lel imwarail kan. Ma kitail kin kadek, mwein re pahn tamataman atail kadek ong irail oh kak rong ehu rahn.
4 Kitail sohte kin iang kasarawi pwukat pwe e kin poahsoanda pohn kaudok likamw en mehn liki kan, oh kitail sohte pahn nda soangen rahnmwahu kan duwehte “Merry Christmas” de “Happy New Year.” Ahpw, kitail anahne doadoahngki atail loalokong oh kadek ahnsou me aramas pahn nda soahng pwukat. E sohte pahn mwahu en kawehwe me kitail sohte kin wia soangen rahnmwahu pwukat de kanamenekihala aramaso pwe e wia soangen rahnmwahu ong uhk, ahpw, pali laud en ahnsou kitail kak ndahte “Kalahngan” pwehn kasalehda me kitail kalahngankihong aramaso pwe re men rahnmwahuih kitail. Ma aramas akan kin idek rehtail duwen dahme kitail kamehlele, kitail kak kasalehong irail dahme ntingihdi nan pwuhken Reasoning, pali 176-178 oh 180.
5 Mendahki ma aramas tohto sohte kin uhdahn perenki rong duwen Rongamwahu en Wehio oh re kin perenki kasarawi rahn en holiday kan me poahsoanda kaudok likamw en mehn liki, kitail kak koapworopworki me Siohwa pahn kapaiada atail nannanti en rapahki irail me mohngiong mehlel, pwe ih “soangen tohnkaudok kan me Sahmo ketin kupwurki en kaudokiong ih,” oh e pahn kahluwa irail ong sapwellime pwihn.—Sohn 4:23, 24.