Pwurehng Pwurala Rehn Irail Me Kin Ale Makisihn kan
1 Sises kangoange sapwellime tohnpadahk kan en nantihong katohnpadahk. (Madiu 28:19) Met kin wehwehki laud sang ihte kihla pwuhk kan oh brochure kan oh makisihn kan; kitail anahne sewese aramas en kekeirada ni pali ngehn. Pwehn wia met, kitail anahne pwurehng pwurala rehrail oh sewese irail kan me kin perenki rong.
2 Ma ke kasalehongehr tohnihmw ehu artikel nan makisihn rahn teio me ke tepin tuhwong ih, e pahn mwahu en koasoia oaralapohte ni ahmw pahn pwurehng pwurala reh:
◼ “Ni ahnsou me I tuhwong komwi rahn teio, I kasalehong komwi ehu artikel nan makisihn en The Watchtower me kin kasalehda uwen kesempwal en wadek Pwuhk Sarawi. Koht kupwurki sapwellime Wehi en kaunda aramas oh wahdo meleilei ong aramas ni ahnsou kohkohdo. Nan Madiu 6:9, 10, Sises padahkiong sapwellime tohnpadahk kan en kapakapki Wehio.” Mwurin ahmw pahn wadek iren Paipel wet, kasalehong tohnihmwo brochure Kupwurki oh pahkalahng Iren Mehn Kasukuhl 6. Koasoia keieun parakrap oh koasoanehdi pil ehu ahnsou en pousehla amwa koasoia brochure ehu rahn.
3 Ma tohnihmwo kin perenki rong ekiste de sohte ah ahnsou laud en koasokoasoi, ke kak ntingihdi eden tohnihmwo nan noumw pwuhk pwehn kaukaule pwurehng pwurala reh oh kihdi makisihn kan (makisihn route):
◼ “Pwehki ke perenki makisihn kan me I kihong uhk rahn teio, I lemeleme ke pahn pil perenki ale makisihn kapw kan. I lemeleme ke pahn perenki wadek artikel wet.” Kasalehong ih artikel me ke lemeleme e pahn perenki wadek. Ma e men ale makisihno, ke kak nda: “Neit makisihn kan sohte kin pweipwei, ahpw, ma ke men wia ahmw sawas ong doadoahk wet, I pahn perenki ale.” Ke kak ndaiong ih me ke pahn pwurodo oh kasalehong ih makisihn kapw kan ehu rahn.
4 Ma tohnihmwo kin perenki wadek makisihn kan oh kin kasalehda me e kin kalahnganki irail, ke kak tepiada onop Paipel reh:
◼ “Pwehki ke kin perenki wadek makisihn en The Watchtower, I men wia kisin kamwomwada duwen iaduwen se kin onop Paipel ni aht kin doadoahngki brochure me oaralap koasoia: ‘Dahme Koht Kupwurki Kitail en Wia?’ Ma ke kak koasoanehdi minit 15 nan ehu ehu wihk, ke kak diar pasepengpen peidek kan me pid Pwuhk Sarawi.” Pahkalahng Iren Mehn Kasukuhl 1 oh kasalehda iaduwen kitail kin onop Paipel. Ke kak ndaiong tohnihmwo me onop en Paipel wet sohte pweipwei oh ke kak koasoanehdi iahd ke pahn pwurala reh.
5 Ma kitail kin kaunopada mwahu en pwurehng pwurala rehn irail me kin ale makisihn kan, kitail kak sewese irail me mohngiong mehlel kan en sukuhliki dahme Sises padahkiong kitail.—Madiu 28:20.