Iaduwen Kitail Kak Tepida Onop en Paipel Rehn Irail akan me Ale Makasihn kan
1. Ia atail mehn akadei ni ahnsou me kitail kihla makasihn kan?
1 Ni Rahn Kaunop kan, kitail kin kihla makasihn en Watchtower, Awake! oh Kahn Iroir nan doadoahk en kalohk. Ahpw, met wia keieun kahkte pwehn lel atail mehn akadei en padahkiong aramas mohngiong mehlel kan padahk mehlel. Mie ekei sawas kan me mih pah me pid iaduwen kitail kak kihla pwuhken Loalokong ni ahnsou me kitail pwurehng pwurala rehn tohnihmw oh tepida onop en Paipel. Ke kak kawekila padahk pwukat ong ahmw wasahn kalohk oh koasoi ni pein ahmw lokaia kan. Ke kak doadoahngki pil ehu ahl ma e pahn mwahu ong uhk.
2. Iaduwen kitail kak doadoahngki pali 4-6 en pwuhken Loalokong pwehn tepida onop en Paipel?
2 Doadoahngki Pali 4-6 en Pwuhko: Ni ahnsou me ke pahn pwurala rehn tohnihmw, ke kak nda: “Makasihn kan me I kihong uhk kin koasoia duwen Paipel. Menlau tehk dahme kahrehda wadawad en Paipel inenen kesempwal.” Wadek Aiseia 48:17, 18; Sohn 17:3; de pil ehu iren Paipel me konehng. Mwurin ahmw kasalehda pwuhken Loalokong oh kihong tohnihmwo pwuhko, ke kak pousehla duwehte met:
◼ “Paipel kin kihong kitail koapworopwor mehlel ong ahnsou kohkohdo.” Kasalehiong tohnihmwo pali 4-5 oh idek, “Kitail koaros men neitail seri kan en paieki soangen irair en sampah me kileldi wasaht. Dahme ke lemeleme anahne wiawi pwe met en pweida?” Ma tohnihmwo mweidohng, kasalehiong ih irelaud 1 oh kamwomwada ni mwotomwot onop en Paipel ni soh isepe sang ni amwa koasoipene parakrap ehu de riau.
◼ De ke kak nda, “Aramas tohto kin diarada pasapengpen arail peidek kan me pid Paipel sang ni arail doadoahngki pwuhk wet.” Pahkalahng audepen pwuhko, oh idek: “Mehnia oaralap me ke men keieu tehk?” Pahkalahng irelaudo me re pilada. Kawehwehda iaduwen peidek kan me kileldi pah nan ehu ehu pali kin kasalehda ire kesempwal kan nan ehu ehu parakrap. Kamwomwada onop en Paipel sang ni amwa koasoipene ekei parakrap kan, oh uhd koasoanehdi en pwurehng pwurala reh.
3. Iaduwen kitail kak tepida onop en Paipel mwurin kitail kihla makasihn kan me kin pid duwen (a) suwedlahn irair en sampah? (b) peneinei? (c) dahme kahrehda kitail kak kamehlele Paipel?
3 Kihda Ehu Peidek ni Ahnsou me Ke Tepin Tuhwong Tohnihmw: Pil ehu ahl iei en kaunopada ong return visit ni ahnsou me kitail tepin tuhwong tohnihmw. Mwurin tohnihmwo ale makasihn kan, kihda ehu peidek oh inoukihong ih en sapengki peideko ni ahnsou me ke pahn pwurala reh. Nantihong wiahda koasoandi sansal en pwurala, oh kolokol ahmw inou. (Madiu 5:37) Ni ahnsou me ke pahn pwurala reh, katamankin tohnihmwo peideko, oh ni mwotomwot wadek oh koasoipene pasapeng sang pwuhken Loalokong. Kihong ih pwuhko pwe e kak kilang wasa me ke wadewadek. Met iei ekei karasepe kan.
◼ Ma makasihn me ke kihla kin pid duwen suwedlahn irair en sampah, ke kak nda, “Ni ahnsou me I pahn pwurodo, kitail kak koasoipene duwen pasapengpen peidek wet sang nan Paipel, Soangen wekidekla dahieu me Koht pahn ketin wahdo pohn sampah?” Doadoahngki pali 182-4 ni ahnsou me ke pahn pwurala. De ke kak kihda peidek wet, “Dahme kahrehda Koht kin ketin mweidohng lokolok kan?” Ni ahnsou me ke pahn pwurala, kasalehiong tohnihmwo parakrap 3-5 nan irelaud 8.
◼ Ma makasihn me ke kihla kin pid duwen peneinei, mwohn ke pahn samwalahr, ke kak kihda peidek wet, “Dahme emenemen tohn peneinei kak wia pwe mouren peneinei en nsenamwahu?” Ni ahnsou me ke pahn pwurala, koasoipene parakrap 22-23 nan irelaud 15.
◼ Ma makasihn me ke kihla kin pid duwen dahme kahrehda kitail kak kamehlele Paipel, ke kak kihda peidek wet ong ahnsou me kumwa pahn pwurehng koasoipene, “Paipel kin uhdahn pwung ni palien sains?” Ni ahnsou me ke pahn pwurala, koasoipene parakrap 14 nan irelaud 2.
4. Dahme kitail kak wia ma tohnihmw sohte men ale pwuhken Loalokong?
4 Ni kaimwiseklahn ehu ehu koasoipene, kihda pil ehu peidek me kumwa pahn koasoipene ni ahnsou me ke pahn pwurala. Ma onopo tepida kaukaule wiawi, onopki pwuhk wet ni koasoandi sang tepin pwuhko lel imwin pwuhko. Dahme ke kak wia ma tohnihmw sohte men ale pwuhken Loalokong? Ke kak kaukaule kihong ih makasihn kan oh koasoipene oaralap en Paipel kan reh. Ni ahmw pahn kakairada ah ineng en esehla Paipel, mwein mwuhr e pahn pwungki tepida onop en Paipel.
5. Dahme kahrehda kitail en nantihong wia laudsang en kihlahte makasihn kan rehn aramas akan?
5 Watchtower oh Awake!, oh Kahn Iroir pahn kamwakid ahn emen ineng en sukuhliki dahme Paipel kin uhdahn padahngki. Kahrehda, nantihong tepida onop en Paipel kan rehn irail akan me ale makasihn kan. Ni ahl wet, kitail kak peikiong sapwellimen Sises kehkehlik en “katohnpadahk . . . , oh padahkiong irail.—Madiu 28:19, 20, NW.