Kalaudehla Atail Koahiek nan Doadoahk en Kalohk—Kasalehda Mwomwen Onop en Paipel ni Omw Pahn Doadoahngki Pwuhken Paipel Padahngki

Dahme Kahrehda E Kesempwal: Aramas tohto ele sohte pahn wehwehki ia wehwehn atail kin nda me kitail pahn onop Paipel rehrail ni soh isepe. Re pahn ele medewe me re pahn iang pwihn ehu onop de re pahn iang soangen kasukuhl ehu ni arail pahn kin ntingpene. Sang ni omw sohte pahn uhdahte tapihada onop reh, ke sou kawehwehda mwomwen onop? Ni minit keite, pil ni ahn tohnihmwo wenihmwo, ke kak kasalehiong aramaso ia uwen mengei oh kaperen en onopki Paipel.

Ia Duwen Omw Pahn Wia Met:

Mwurin omw pahn kasalehda ihs kowe, idek rehn tohnihmwo ma e kin pwunodki dahme pahn wiawi ni ahnsou kohkohdo.
Koasoia me aramas tohto kin ahneki soangen pwunodohte me e ahneki, oh kasalehiong ih audepe kan en pwuhken Paipel Padahngki. Kawehwehiong me pwuhk wet uhdahn kin mengei en wehwehki iren mehn kasukuhl kan me kasalehda dahme Paipel padahkihong kitail duwen ahnsou kohkohdo oh ekei oaralap teikan, oh idek reh mehnia oaralap me e men esehla.
Kihong ih ehu pwuhk wet oh kasalehiong ih irelaud me e pilada. Kawehwehiong me peidek kan me mi ni tepin irelaudo kin pasapengla nan parakrap en mwuhr kan.
Peki rehn tohnihmwo en wadek tepin parakrap ma e pehm me e men. Eri kowe wadek peidek en parakrapo, oh koasoiapene pasapeng kan. Tehk oh koasoiapene iren Paipel me kileldi nan parakrapo me kin utung pasapengo. Kasalehiong ih mwomwen omw lainihala pasapengo nan noumw pwuhk.
Tehkpene parakrap en mwuri, ahpw ni ahnsou wet peki rehn tohnihmwo en pein sapengala peideko ni pein eh lokaia.
Kapinga ih, oh wiahda koasoandi en pwurehng pwurala oh kanekehla iren mehn kasukuhlo.
Ma konehng, kasalehiong ih kasdo me mi nan jw.org Dahme Kin Wiawi ni Ahnsoun Onop Paipel?

Song Wia Met Erein Sounpwongo:

Kapakapohng Siohwa en kapaiada omw nannanti en tapiada ehu onop en Paipel.—Pil. 2:13.
Song en kawehwehda mwomwen Onop en Paipel ni omw pahn doadoahngki pwuhken Paipel Padahngki, de kasalehiong ih kasdo Dahme Kin Wiawi ni Ahnsoun Onop Paipel? Song wia met pak ehu de tohtohsang ni omw iang doadoahk en kalohk.