Kalaudehla Atail Koahiek nan Doadoahk en Kalohk—Kihla Pwuhken Paipel Padahngki

Dahme Kahrehda E Kesempwal: Pwuhken Paipel Padahngki iei ehu dipwisoun doadoahk me kesempwal nan neitail koakon en kasukuhl. Ahpw, mwohn atail pahn kak doadoahngki pwehn onop rehn emen, kitail anahne mahs pwilikihdi reh pwuhko. Ihme kahrehda, kitail koaros en nantihong en kin koahiekla kihla pwuhken Paipel Padahngki nan doadoahk en kalohk. (Lep. Pad. 22:29) Tohto soangen wiepen kihla pwuhk wet, oh sounkalohk kan en doadoahngki wiepe kan me kin pweida mwahu ong irail.

Ia Duwen Omw Pahn Wia Met:

Kihda ehu peidek me ke pahn kak doadoahngki en kamwakid tohnihmwo en men rong pasapengpe nan ehu irelaud en pwuhko. Ele ke pahn pilada ehu peidek kan me mi ni tepin ehuehu irelaud. Mwurin omw rong ahn tohnihmwo pasapeng, wadek ehu iren Paipel me konehng oh kasalehiong ih ehu parakrap pahnangin oaralapo oh mwein kumwa kak koasoiapene ni mwotomwot.
Pil ehu wiepe iei ke kak doadoahngki pali kan ni tepin pwuhko pwe tohnihmwo en men rong oh kowe eri ahpw kasalehiong tohnihmwo mehnia pali nan pwuhko me kihda pasapeng sang nan Paipel. Karasepe, ele ke kak koasoia rongen kahpwal ehu me ahpwtehn wiawi oh kohda nan nuhs oh kawehwehda me aramas tohto pil kin medemedewe pasapengpen peidek kan me kohda nan pali 3. De ele ke kak nda me ke pwarek mehn mpomw kan pwehn ehukihong irail ehu koapworopwor en mour mwahu ni ahnsou kohkohdo. Kowe eri kasalehiong kilel kan nan pali 4-5 oh idek, “Mehnia rehn inou pwukat me ke men kilang en pweida?” Pil ehu wiepe iei ke kak nda me ke pwarala ni mwotomwot pwehn sewese aramas akan en diarada pasapengpen peidek kesempwal kan me pid mour. Kowe eri kasalehiong tohnihmwo peidek kan me kilikilel nan pali 6, oh idek mehnia rehrail me e perenki esehla duwe.
Idek ma tohnihmw men onop Paipel ni omw tepin tuhwong. Ele ke pahn nda: “Se kin kasalehiong aramas akan sawaspen Paipel wet. Mie pak me ke kilang? [Mweidohng tohnihmw en sapeng.] Ma mie omw kisin ahnsou, I men kamwomwada ia mwomwen omw kak doadoahngki pwuhk wet iangahki noumw Paipel.”

Song Wia Met Erein Sounpwongo:

Praktis nan erein amwail kaudok en peneinei.
Ni ahnsoun kalohk, ehukihong iengomw sounkalohk teikan dahme ke koasoanehdi en koasoia. (Lep. Pad. 27:17) Wekidala omw kisin wiepen koasoi kan ma e sohte kin pweida.