Rapahkihda Aramas me Pahn Kaukaule Ale Makasihn kan—Mwahu ong Tapiada Onop en Paipel
1. Dahme kahrehda sapwellimen Siohwa pwihn kin sangete mahs kangoange sounkalohk kan en rapahkihda aramas kan me pahn kaukaule ale makasihn kan?
1 Aramas tohto sohte kin men kitail en onop Paipel rehrail, ahpw re kin perenki wadek neitail makasihn kan. Eri, sangete mahs sapwellimen Siohwa pwihn kin kangoange sounkalohk kan en rapahkihda aramas kan me pahn kaukaule ale makasihn kan. Ni aramas kan kin kaukaule wadek neitail makasihn kan, re kin kalaudehla arail ineng en esehla mahsen en Koht. (1 Pit. 2:2) Mwein mwuri, re pahn kak wadekada mehkot me pahn sair irail oh kahrehda ren pwungkihda onop Paipel.
2. Ia duwen atail kak kalaudehla ahn irail kan me kin kaukaule ale makasihn kan ar kin men rong?
2 ‘Kalamwur’ Weren Padahk Mehlel: Kaidehn ken kihdihte makasihn, ahpw koasoiong oh song pehsehiong ih. Met pahn sewese iuk en wehwehkihla irair kan en eh mour, dahme e kin perenki oh kamehlele. Met pahn sewese iuk en koasoi ni erpit. (Lep. Pad. 16:23) Ahnsou koaros kaunopada mwohn ahmw pahn tuhwong ih. Ma kak, kasansalehda ire kesempwal ehu oh iren Paipel ehu sang nan makasihn kan. Met pahn kalamwur weren padahk mehlel me mwein pahn mi nan eh mohngiong. (1 Kor. 3:6) Kilelehdi ehuehu rahn akan me ke pwurala reh, pwuhk kan me ke kihdi reh oh oaralap oh iren Paipel dah kan me kumwa koasoiahpene.
3. Pak depe kitail anahne pwurala rehn irail kan me kitail kin kaukaule kihong neirail makasihn?
3 Pak Depe Kitail Anahne Pwurala? Ke anahne pwurala pak ehu nan sounpwong ehu pwehn wahla makasihn kapw kan ong irail kan me kin kaukaule ale makasihn kan sang rehmw. Ahpw, ma ahmw irair kak ong oh ma tohnihmwo perenki, ke pahn mwehin pilada en pwurala reh pak tohtohsang mwo. Karasepe, wihk ehu de riau mwurin ahmw pwilikihdi reh makasihn ko, ke kak pwurala oh koasoia, “I pwurodo pwehn ekiste koasoia ire ieu sang nan makasihn ko me I pwilikihdi rehmw.” Met pahn kamwakid tohnihmwo en men wadek oaralap wet nan makasihno. Ma e wadekehr met, ke kak idek reh ia eh madamadau ong oaralap wet oh koasoiahpene ni mwotomwot. De ma e kin perenki wadek neitail pwuhk kan, ke mwein kak pwurala oh kasalehiong pwuhk kan, kisin doaropwe kan de kisin pwuhk kan me kitail kin kihla nan sounpwongo.
4. Dahme kitail kak wia ekei pak pwe kitail en diarada ma irail kan me kin kaukaule ale makasihn pahn men onop en Paipel?
4 Dehr awih tohnihmwo en peki rehmw ken tepida onop reh. Kowe me pahn tepin mwekid. Mehnda ma mwowe e sohte pwungki onop Paipel, ekei pak ke kak kasalehda sang nan Kahn Iroir oaralap me koasoia “Peidek kan en Paipel Pasapengla” oh kilang ma e men kumwa en koasoiahpene. Mwein kumwa kak tepida onop kesihnente ni wenihmw. Ahpw, ma ke sohte kak tapiada onop Paipel reh, ke kak pousehlahte wahla reh makasihn pwehn kalaudehla eh men rong.