“Kamwarak Werentuhkehn Wehio” Ni Ahnsoun Kitail kin Kihong Aramas Makasihn kan
1 Koul 133 (nan pwuhken koul en lokaiahn wai) (Koul 68 nan pwuhken koul en lokaiahn Pohnpei) me kohsang pwuhken koul Sing Praises to Jehovah kin koasoia “Kamwerehdi War en Wehio.” Koul wet kin poahsoanehda pohn karasaras me Sises koasoia oh e karasahki doadoahk en katohnpadahk duwehte kamwarak werentuhke. (Madiu 13:4-8, 19-23) Ekei lepin lokaia nan koulo kin koasoia: “Depe en omw war mwerdi ong pwehl me mwahu/Kin kak nin duwen omw doadoahk.” Iaduwen kitail kak kamwahuiala atail kalohk ong aramas? Ehu ahl iei en wiahda oh nantiong pwurehng pwurala rehn aramas me kin perenki wadek neitail makasihn kan (makasihn route).
2 Ma kitail kin wiahda makasihn route kan rehn aramas akan, e pahn imwikihla kamwahupe tohto. (1) Kaukaule pwurehng pwurala rehn aramas akan pahn kahrehong ahmw wiahda nanpwung mwahu rehrail. (2) Ke pahn kaukaule kihong aramaso makasihn kan The Watchtower oh Awake! oh makasihn pwukat kin audaudki soahng kan me kak doarehla ah mour. (3) Sang ahmw koasoiong aramaso, ke pahn sewese ih en kekeirada ah ineng en men esehla duwen padahk mehlel, oh mwuhr, mwein e kak tepida onop Paipel.—1 Piter 2:2.
3 Iaduwen Ke Kak Tepida Makasihn Route: Ni ahnsoun emen kin kasalehda me e perenki wadek neitail makasihn kan, kawehwehong ih me makasihn koaros kin audaudki artikel kan me aramas kin perenki wadek oh ke pahn perenki wahla reh makasihn kapw kan ehu ehu sounpwong. Mwurin ke kohkohsang ihmwo, ntingihdi eden aramaso, iawasa e kin mihmi ie, rahno me ke koasoiong ih, oh mehnia makasihn me ke kihong ih oh artikel me ke koasoia, oh oaralap kan me tohnihmwo kin perenki wadek.
4 Ke kak tepida ehu makasihn route rehn aramas malaulau kei. Mwurin mwo, ke kak kapataiong ekei aramas pwehn wahla rehrail makasihn kapw kan. Ahnsou me ke kilang me aramas kan me ke kin wahla rehrail makasihn kapw kan tohtohla, ke kak koasoanehdi pwehn kohla rehn irail ko me kin mihmi nan wasatehkis ehu ahnsou. Ntingihdi mehnia makasihn ke kihla oh ihs me ale makasihn kan. Pil ntingihdi dahme kumwa koasoiapene oh dahme ke pahn koasoia ahnsou me ke pahn pwurehng pwurodo pwehn kahrehong ih en men rong padahk mehlel.
5 Kohla Rehn Aramas me kin Ahneki Pisnis kan oh Aramas Teikan me kin Doadoahk: E sansal sangete mahs lel ahnsou wet me aramas tohto me kin ahneki sidowa kan oh aramas tohto me kin doadoahk kin perenki ale neitail makasihn kan kaukaule. Emen elder kin kaukaule kihong ohl men me wia Mayor en arail kahnimw makasihn kan. Emen sounkalohk tepida onop Paipel rehn emen ohl me mahki sounpahr 80 oh me kin ahneki pisnis me kin netkihla dipwisou en wia ihmw. Mwohn e tepida onop, sounkalohk menet kin wahwahla rehn ohlo makasihn kapw kan erein sounpahr 10!
6 Emen sister me wia doadoahk en pioneer pidelong nan sidowa ehu oh tuhwong pwopwoud ehu me mwomwen sohte perenki rong. Ahpw, pwehki re ale makasihn kan, e kin kaukaule kohla rehra pwehn kihong ira makasihn kapw kan. Kedekedeo, sister medemedewe me e sohlahr pahn pwurala rehra pwe re mwomwen sohte kin perenki rong oh ahnsou me e kin wia peidek ong ira, re sohte kin nda mehkot. Ahpw, sistero kapakap oh kihong pwopwoudo pwuhken Mour Kohkohlahte. Liho wadek pwuhko oh koasoia: “I ahpwtehn diarada padahk mehlel!” Sistero tepida onop Paipel rehn pwopwoudo oh mwurin mwo, re papidaisla. Pwehki sister nannanti oh kin kalapw pwurehng pwurala rehn pwopwoudo, e imwila mwahu.
7 Ahnsou me Ke Pahn Pwurehng Pwurala Rehn Aramas akan: Ni ahnsou me ke ale noumw makasihn kapw, e pahn mwahu ma ke pahn wadek makasihno pwon. Kasawihada makasihno pwehn rapahki ire kan me ke lemeleme aramas kan pahn perenki wadek. Ni ahnsou me ke pwurehng pwurala rehn aramas men, ke kak nda: “Ni ahnsou me I wadek artikel wet, I medemedewe me komw pahn pil perenki wadek artikelohte.” Sounkalohk koaros, me laud oh pwulopwul kan, kak wiahda arail makasihn route. Pil me pwulopwul kan kak nda: “I perenki tuhwong komwi rahnwet. Noumw makasihn kapw kan, The Watchtower oh Awake!, ahpwtehn kohdo. I lemeleme ke pahn perenki wadek artikel wet me oaralap koasoia . . .”
8 Kangoange tohnihmwo en kasikasik makasihn kan me kohkohdo. Ma ekei artikel kin koasoia oaralap ehu oh oaralap wet pahn pouslahte nan artikel kan en makasihn kan me kohkohdo, ke kak kasalehong tohnihmwo me re pahn perenki wadek artikel pwukat koaros. Menlau dehr manokehla me ni ahnsou me ke kin pwurehng pwurala rehn aramas akan pwehn kihong irail neirail makasihn kapw, ke kak wadek pwurala pwukat “return visit.” Ahpw, me keieu kesempwal, kitail en tamataman me atail mehn akadei iei en tepida onop Paipel rehn aramas akan.
9 Kaukaule Pwurehng Pwurala Rehn Aramas akan: Ke kak wia ahmw makasihn route ahnsou me mwahu ong uhk—ni menseng, mwurin souwas, ni soutik de ni imwin wihk kan mwurin ke iang kalohk ihmw-lel-ihmw. Ma ke sohte kak wia ahmw makasihn route pwe ke soumwahu de seiloak, peki rehn emen sounkalohk nan ahmw peneinei de nan mwomwohdiso me ren wahla makasihn kapw kan ong irail ko me ke kin kaukaule tuhwong. Ni ahl wet, irail me ke kin kaukaule tuhwong pahn kak ale neirail makasihn kapw kan.
10 Ehu elen kamwarak war en Wehio iei en kaukaule wahla makasihn kapw kan, The Watchtower oh Awake!, rehn irail kan me mihmi nan ahmw makasihn route. Ni ahnsou me ke pahn padahkiong irail duwen padahk mehlel, re pahn wehwehki duwen Wehio oh ehu rahn re pahn iang uhk pil wia doadoahk en katohnpadahk.—Madiu 13:8, 23.