Koasoia Duwen Makisihn kan nan Kalohk
1, 2. Iaduwen kitail esehki me Watchtower (Kahn Iroir) oh Awake! makisihn kan kin kamwekid aramas tohto?
1 “Uhdahn mwahu, konehng atail ahnsou, oh re kin kihda mehn kangoang.” “Edin makisihn kan me kangoange ie.” Ih me aramas me kin wadek Watchtower (Kahn Iroir) oh Awake! makisihn kin koasoia me kin kasalehda me irail inenen perenki wadek neitail makisihn kan. Ehi, neitail makisihn kan kin wia mehn doadoahk kesempwal kan me kin kak lelohng “soangsoangen aramas akan” oh sewese irail sukuhliki duwen Rongamwahu.—1 Tim. 2:4.
2 Emen ohl me ahneki pisnis ale Awake! makisihn me koasoia duwen oaralap ehu me e perenki. Mwuri, e wadek Watchtower makisihn, me artikel ehu pid duwen Trinity mihmi loale oh artikel wet kahrehong ih en medemedewe laud duwen dahme e kamehlele sangete ahnsou me e tikitik. Artikel wet inenen kamwekid ih. Sounpwong weneu mwuri, e papidaisla. Pil emen ohl kin kaukaule ale makisihn kan ahpw e sohte kin wadek makisihn ko. Ahpw, ah pwoud me sohte kin men tuhwong Sounkadehde kan, kin wadek makisihn ko me ah pwoud ohl kin ale. Ni ahnsou me liho wadek duwen inou en Paipel me ehu rahn sampah pahn wiahla paradais oh aramas pwung kan pahn kousoan loale, met inenen kamwekid ah mohngiong. Mwuhr, liho, nah pwutak, oh rie serepein wiahla laud kan en Siohwa.
3. Ia kamwahupen kihla Watchtower makisihn ehu oh pil Awake! makisihn ehu?
3 Kihla Watchtower ehu oh Awake! ehu: Sang dahme kitail kilang sang ekspiriens kan nan parakrap 2, kitail sehse ihs me kin wadek neitail makisihn kan de ia mwomwen aramas kin mwekidki makisihn ko. (Ekl. 11:6) Ihme kahrehda, e pahn mwahu ma kitail pahn kihla ehu Watchtower makisihn oh ehu Awake! makasihn, mendahki kitail pahn koasoia duwen ehu rehra nan atail padahk. Ekei pak, e pahn mwahu en kihla makisihn kan me pid duwen soangsoangen oaralap kan ni ahnsou me kitail pwurala rehn tohnihmwo.
4. Dahme kitail kak wia pwehn koasoanehdi ahnsou kan me kitail kak kihla makisihn kan?
4 E pahn mwahu en koasoanehdi ehu rahn nan ehuehu wihk en kihla makisihn kan. Nan 2005 Calendar of Jehovah’s Witnesses, e kilelehdi me Rahn Kaunop koaros iei “Magazine Day” (“Rahn en Kihla Makisihn”). Ahpw, mehlel, irair en ehuehu wasa oh pil irair en emenemen sounkalohk kin wekpeseng, kahrehda ekei sounkalohk kan pahn kihla makisihn kan pil ehu rahn likin Rahn Kaunop. Doadoahk en kihla makisihn kin wia kisehn ahmw koasoandi?
5. Ia ekei ahnsou kan me kitail kak kihla makisihn, oh dahme kak sewese kitail en wia met?
5 Koasoanehdi Pein Ahmw Mehn Akadei: Ma kitail pahn wiahda pein atail mehn akadei en kihla makisihn, met pahn sewese kitail en nantihong kihla makisihn kan ahnsou koaros. Mie emen me ke kin kaukaule wahla makisihn kapw kan reh? Ke kin idek rehn aramas me ke tuhwong nan kalohk ma re men wadek makisihn kan? Ke kin kihla makisihn kan ahnsou me ke kin kalohk nanial, nan wasahn pisnis oh pil wasa teikan me aramas kin mihmi ie? Ke kin wahda makisihn kan ni ahnsou me ke kin seiloak, netinet oh pil ni ahnsou me ke kin tuhwong toahkte de aramas teikan (appointments)? Nantihong isaneki ahnsou mwahu kan koaros en sewese aramas teikan paiekihda Watchtower oh Awake! makisihn kan.
6. Iaduwen atail kak doadoahngki mwahu makisihn en mahs kan?
6 Kitail pil kak wiahda atail mehn akadei en kihla makisihn en mahs kan me mihmi rehtail. Mendahki kitail sohte kihla makisihn kapw kan erein sounpwong ehu de riau sang rahn me kileledi pohn makisihn kan, audepen makisihn kan kin katapante. Kihong aramas me kin perenki wadek makisihn pwukat. Ong aramas rar rar kei, Watchtower oh Awake! makisihn kan kin audaudki “koasoi kan . . . ni ahnsou me konehng.” (Lepin Padahk 25:11) Kitail en doadoahngki makisihn kan en sewese aramas tohto en sukuhliki duwen Siohwa oh papah Ih.