Pilida Artikel kan me Pahn Kamwekid Aramas en Perenki Rong
1 Duwehte sounkadar arep kan kin kanaieng iaduwen re kin kadarala arep kan, sounkalohk tohto nan mwomwohdiso kin pweida mwahu ma re kin pilida artikel kan nan makasihn en The Watchtower oh Awake! pwehn kasalehong aramas artikel kan me re pahn perenki wadek. Sounkalohk kan anahne pilida ihs me pahn perenki mehnia artikel. Iaduwen kitail kak wia met?
2 Keieu, sounkalohk kan anahne wadek makasihno pwon. Mwurin mwo, re kak idek pein rehrail, Ihs me men wadek artikel wet? Mwurin mwo, ke pahn nannanti tuhwong aramaso me pahn perenki wadek artikelo. Ni ahnsou me sounkalohk kan kasik me tohto pahn perenki wadek makasihn ehu, re anahne oaht tohto sang dahme re kin kalap oaht.
3 Tohto me kin Wauneki Neitail Makasihn kan: Emen ohl me kin subscribe neitail makasihn oh kin doadoahk nan wasahn wiahda ehu makasihn me ndand nan Nigeria koasoaiaki Awake!: “I men kapinga noumwail makasihn pwehki e wia makasihn me aramas kin keieu perenki wadek.” Oh pil emen ohl me kin kalap wadek neitail makasihn kan koasoia: “Noumwail makasihn kan kin rasehng takai kesempwal kan me dirkihla erpit! Ahnsou koaros I kin diarada oaralap kan me I kin perenki wadek nan noumwail makasihn kan.”
4 Neitail makasihn kan kin koasoia soangsoangen ire kan, iangahki Pwuhk Sarawi, wiewiahn sampah, mour en peneinei, kahpwal nanpwungen aramas, poadoapoad en aramas, sains, mahn kan, tuhke kan oh soahng tohto. Oh pil, emen kin men wadek mehkot me kin pid duwen pein eh anahn akan, irair kan oh ah doadoahk. Pwehki kitail kin koasoiong aramas tohto, oh emen emen kin ahneki pein arail kahpwal kan, ihme kahrehda kitail anahne pilida artikel kan me aramas pahn perenki wadek oh met pahn sewese kitail en pweida mwahu nan atail doadoahk en kalohk.
5 Tehk dahme wiawi ahnsou me Sounkadehde riemen kihong emen me kin ntingih artikel kan nan nuhspepa neitail makasihn Awake! en September 8, 1996. Ohlo koasoia: “Mwohn I kak nda me I sohte kin perenki rong, emen Sounkadehde ko nda: ‘Iet artikel ieu me kin koasoia American Indian kan. Se wehwehki me komw kin kalap ntingihdi duwen irail.’ ” E ale makasihno oh, ahnsou me e mwengehn ni menseng, e wadek artikel kan me pid American Indian kan, oh mwuhr, e koasoia me artikel kan “inenen mwahu” oh “mehlel douluhl.”
6 Dahme Aramas Nan Ahmw Wasahn Kalohk Kin Perenki Wadek? Dahme ke kilang nan neitail makasihn kan nan sounpwong pwukat me ke lemeleme irail me kin ahneki sidohwa kan de irail me doadoahk en mwohni nan ahmw wasahn kalohk de mehn mpatail kan de iengatail tohndoadoahk kan de iengatail tohnsukuhl kan pahn perenki wadek? Dahme ke lemeleme irail me iang doadoahk en lawyer de sounpadahk de sounkaweid en peneinei de sounkaweid en tohnsukuhl kan de sounkaweid en me pwulopwul kan de sounkaweid en kahpwal en nanpwungen aramas oh irail me kin sewese aramas me ahneki kahpwal en roson en paliwar pahn perenki wadek? Medemedewe irail me ke kin tuhwong nan kalohk ni omw kilang iaduwen ke kak doadoahngki artikel kan nan makasihn pwehn kalohki padahk mehlel.
7 Ni ahnsou me ke diarada emen me kin perenki wadek duwen oaralap ieu nan makasihn en Watchtower oh Awake! oh e uhd ale nah makasihn duwen oaralapo, ke kak nda: “Ni ahnsou me ehu makasihn en mwuhr pahn koasoi duwen oaralapo, I pahn perenki wahdo noumw.” Ke kak pil wiahki aramaso ahmw makasihn route, pwurehng pwurala ekei pak pwehn kihong ih makasihn kapw kan. Ma kak, ke kak idek rehn tohnihmw kan me kin perenki oaralap ieu ma ke kak pwurehng pwurala rehrail ma oaralapo pwurehng pwarada nan neitail makasihn kan.
8 Akadeiong Sewese Aramas Ni Pali Ngehn: Sounpahr kei samwalahro, emen ohl me kin medemedewe kekeirada ni palien pisnis ale makasihn en Awake! me pid duwen oaralap me e kin perenki wadek. Ahpw, ohl menet pil wadek ehu artikel nan The Watchtower me iang Awake! oh artikel wet kahrehong ih en kasawiada pein eh kamehlele padahk en Trinity. Sounpwong weneu mwurin eh wadek artikel pwukat, e papidaisla! Ihme kahrehda, kitail en dehr pweiek en koasoiaiong irail me ale makasihn kan duwen ire kan me pid Pwuhk Sarawi. Ke kak doadoahngki brochure en Dahme Koht Kupwurki Kitail en Wia? oh idek rehn tohnihmw ma ke kak koasoia iren mehn kasukuhl ehute ni minit kei ehu ehu ahnsou me ke wahdo makasihn kapw kan.
9 Medemedewe laud ihs rehn aramas kan me ke tuhwongehr nan kalohk de nan wasahn pisnes me pahn keieu perenki makasihn kapw en The Watchtower oh Awake! Mwurin mwo, ke pahn nantiong en tuhwong irail. Nantiong tuhwong uwen tohtohn me ke kak pwehn kihong irail makasihn kan. Oh pil dehr manokehla me ma ke nantiong en tuhwong aramas koaros pwehn ren wadek neitail makasihn kan, ke kin ‘kamwerewei kenomw pilawa pohn pihl akan.’ Kedekedeo, ke pahn diarada me ke pahn pweida ni ahmw rapahki irail me perenki rong oh men wiahla tohnpadahk kapw men.—Eklesiasdes 11:1, 6.