Ke Kin Wadek Makisihn kan?
1 Pwopwoud ehu me wia misineri nan Aperika koasoiahki duwen neitail makisihn kan: “The Watchtower kin sewese kiht en pepehd ni pali ngehn. Ehuehu makisihn kin kangoange oh kakehle kiht.” Ke kin kalahnganki makisihn kan duwehte pwopwoudo? Ke kin men wadek makisihn kan ahnsou me ke kin ale irail?
2 Ni mehlel, kaunopada artikel kan me kin mihmi nan makisihn pwukat kin anahne doadoahk laud oh ahnsou laud, ahpw ni minit keite aramas emen pahn kak wadekala artikel pwukat. Pwehki ahmw wehwehki duwen met, iaduwen—ke pahn ihte kilang artikel kan, kilangete kilel kan oh ekei pakte wadek artikel ehu me ke perenki? E pahn wia elen loalokong ma kitail pahn wia laud sang met. E pahn keieu mwahu ma kitail pahn koasoanehdi atail ahnsou pwehn wadek oh kasawihada oh doudouloale artikel koaros nan makisihn kan koaros. Dahme kitail kak sukuhliki sang makisihn pwukat kak kakehlail atail pali ngehn iangahki sewese kitail en kaunopada ong kalohk. Ma kitail ngoangki wadek makisihn kan, kitail kak kangoange meteikan en pil wadek makisihn kan.
3 Iaduwen Kitail Kak Kamwahuwihala Atail Koasoandi en Wadawad: Ke kak kamwahuwihala ahmw koasoandi en wadek makisihn kan? Iet mehn sawas riau me kin seweseier aramas tohto: (1) Koasoanehdi ahnsoun wadek makisihn kan rahn koaros. Ma ke pahn koasoanehdi minit 10 de 15 ehuehu rahn pwehn wadek noumw makisihn kan, ke pahn pwuriamweiki uwen tohto en makisihn kan ke kak wadekla nan ehu wihk. (2) Wiahda pein ahmw koasoandi pwehn kileledi mehnia artikel ke wadekehr. Mwein ke kak ntingihdi mehkot limwahn oaralap en artikel pwe ke pahn tamataman me ke wadekehr artikelo. Ma ke sohte pahn wia met, ke kak sapwungala oh sohte wadek ekei artikel nan makisihno de pil sohte wadek makisihno pwon. Ahnsou me ke wiahda koasoandi ieu, e pahn kesempwal ken kolokolete koasoandio.—Menlau tehk Pilipai 3:16.