Kalaudehla Atail Koahiek nan Doadoahk en Kalohk—Rapakihda Aramas me Pahn Kaukaule Ale Makasihn

Dahme Kahrehda E Kesempwal: Aramas tohto kin perenki wadek neitail makasihn kan ahpw sohte kin men onop Paipel rehtail. Ele re itarki arail pelien lamalam, de re pehm me sohte arail ahnsou en onop. Ahpw, ni arail kin kaukaule wadek neitail makasihn kan, ele re pahn kalaudehla arail men esehla Mahsen en Koht. (1 Pit. 2:2) Ehu ire kakete sair mohngiongirail, de arail irair kan kak wekila. En kaukaule pwarala rehrail ni mwotomwot kak kahrehiong ren ekis ahnla kitail oh sewese kitail en esehla dahme re kin perenki oh pwunodki. Ekisekis, onop en Paipel kakete tepida.

Ia Duwen Omw Pahn Wia Met:

Koasoanehdi ahnsou en wahla reh Kahn Iroir kapw ehuehu sounpwong. Mwein ke kak pwurala ekei pak erein sounpwongo en kalaudehla eh men wadek ehu ire sang makasihno me ke kihdi de en kasalehiong pwuhk me kitail kihkihseli erein sounpwongo. Ntingihdi mwahu soahng koaros me wiawi.—Kilang pali 3 en Atail Doadoahk ong Wehio January 2014.
Kaunopada ong ehuehu ahnsou en pwurala. Kaidehn ken kihdihte makasihn, ahpw koasoiong oh song pehsehiong ih pwe ken kak kalaudehla eh men rong.
Tetehk ahnsou mwahu kan en tapiada ehu onop. Ma emen me ke kin wahla makasihn reh idek rehmw dahme Paipel mahsaniheki duwen oaralap ehu, wahlahng ih ehu pwuhken onop me audaudki pasapengpen peideko oh koasoiapene. Mwohn omw pahn kohkohla, kihda ehu peidek me pid ire me kumwa koasoia oh koasoiapene ni omw pahn pwurehng pwurala. Ma ke kin kaukaule koasoiong oh mie koasoandi me ke kin pwakih ni amwa kin koasoi ni mwotomwot doadoahngki Paipel de ehu neitail pwuhken onop kan, eri ke wiewia onop en Paipel reh. Ke kihongehr tohnihmwo kisin pwuhken Rohng Mwahu oh kawehwehda mwomwen onop en Paipel ni mwotomwot? Ke kasalehiongehr ih kasdo Dahme Kahrehda Ken Onopki Paipel? oh Dahme Kin Wiawi ni Ahnsoun Onop Paipel? Mendahki ma aramaso sohte kin men onop mahs, irair kan kak wekila. Ia duwe, e pahn mwahu ma ke song pwurehng wia met?

Song Wia Met Erein Sounpwongo:

Ntingihdi irail kan me ke kak wahla makasihn rehrail. Kihong irail makasihn kapw kan, oh padahkihong irail me ke pahn walahng irail me kapw me pahn kohda.