Iaduwen Ke Kin Mwekidki Soukautih?
1 Soukautih kin wehwehki pepehm en sohte kin nsenohki mehkot. Met kin kalap wiawi oh kin apwal en powehdi ni ahnsou me kitail kin tuhwong aramas me soukautih nan atail wasahn kalohk. Iaduwen ke kin mwekidki aramas soukautih kan? Ahnsou me kitail kin kalap tuhwong aramas soukautih nan kalohk, e kin kahrehong uhk en sohla men kalohk? De ke kin powehdi pepehm wet pwehn nannanti tuhwong irail me men rong duwen Wehio?
2 Keieu, medemedewe duwen ia kahrepe aramas kin soukautihla nan ahmw wasahn kalohk. Re kin nsensuwed pahn arail kaun en wehi kan de kaun en pelien lamalam kan? Re kin pehm me sohte koapwoaroapwoar ong irail pwe arail kahpwal kan me inenen apwal? Re sohte kin kamehlele ma re kin rong inou kan me soahng koaros pahn mwahula? Re sohte men medewe soahng ngehnin kan ma re sohte kak mwadang kilang kapai sansal kan?
3 Kasalehda Koapwoaroapwoarki Wehio: Sohte kahpwal ehu me Wehio sohte kak kamwahuiala. Eri, ahnsou me kitail kak, kitail anahne koasoia inou kan en Wehio, oh ma kitail kak, kasalehda iren Paipel kesempwal kan. (Ipru 4:12) Ahpw, iaduwen ke kak koasoiaiong aramas men duwen met lao ke kak koasoia inou kan en Wehio?
4 Aramas anahne wehwehki duwen kahrepen kitail kin kohla rehrail. Re anahne wehwehki me kahrepe kitail kin kohla rehrail iei pwehki atail limpoak ong irail oh kitail kin nsenohki tohnsahpwo. Kitail kak doadoahngki peidek pwehn medemedewe duwehte: “Dahme ke lemeleme pahn kamwahuiala [kahpwal ehu me mih wasao me ke kin kalohk ie]?” Ma peideko sohte kamwekidih, song pil ehu.
5 Nan ehu wasa me aramas kepwehpwe kin mie, tohnihmw kan sohte kin men rong duwen Wehio. Ahpw, sounkalohk kan en wasao kin medemedewe dahme re pahn tepin koasoi me pahn kamwekid tohnihmw kan en men rong. Pwopwoud ehu, ahnsou me ira men kihla pwuhken Knowledge, ira doadoahngki tepin koasoi wet: “Ke lemeleme kasukuhl mwahu kin kesempwal ma ke men pweida nan sampah rahnwet? Ke kin pwungki me kasukuhl mwahu pahn pil wehwehki kasukuhl en Paipel?” Nan mwurin souwas ehu ira kihla pwuhk siluh, emen rehrail me ale pwuhk kan iei lih men me mwuhr nda me e wadek pwuhken Knowledge pwon oh men onop Paipel.
6 Ahnsou me ke kin koasoiong aramas me soukautih, song soangsoangen tepin koasoi oh idek rehrail peidek en madamadau kan oh doadoahngki kehl me kohsang Mahsen en Koht. Ke kak sewese mehteikan en ahnekihla koapwoaroapwoar kaselel en Wehio.