Pwurehng Pwurala Rehn Irail kan me Perenki Ale Doaropweo Kingdom News
1 Kitail kin perenki iang doadoahk en kihseli Kingdom News No. 35, me oaralap koasoia: “Aramas Koaros Pahn Kak Limpoakpene?” Wasa koaros, sounkalohk kan kin nantiong en kalohkong aramas koaros me kin perenki rong oh kasalehiong irail Kingdom News wet. (Madiu 10:11) Mendahki kihseli doaropweo pahn uhdi nan werengen November, ma mie wasa kan me kitail saikinte kalohkong oh ma mie doaropwe kan me luwehdi, elder kan mwein pahn idek rehn sounkalohk kan ma re kak pousehla arail kihseli Kingdom News No. 35.
2 Kingdom News wet kamwekidahlahier aramas tohto. Re kilangehr me pali tohtohn aramas sohlahr kin kasalehda limpoak oh ihme kahrehda, aramas pwukat kin pwonopwonki dahme pahn wiawi ni ahnsou kohkohdo. (2 Tim. 3:3) Kitail men pwurehng pwurala rehn aramas kan me kin perenki rong.
3 Kingdom News Kin Kamwekid Aramas: Ahnsou me doadoahk en kihseli Kingdom News wiawi nan 1995, emen lih alehier nah doaropweo iang towehda mihding ehu ni Kingdom Hall pwe e men sukuhlki dahme Sounkadehdehn Siohwa kan kin kamehlele. Ahnsou me e iang towehda mihdingo, e ndaiong emen Sounkadehde me e men onop Paipel reh oh mwurin mwo, e sohte kin tokedihsang iang mihding kan koaros. Sohte pwand, e pil ntingihdi kisin likou ehu ong eh pelien lamalam me e kin iang mahso oh ndaiong irail en kihsang nan neirail pwuhk kan edeo!
4 Ni ahnsouwet, aramas tohto wadekehr dahme ntingihdi nan Kingdom News No. 35. Dahme re medemedewe duwen dahme re wadek? Mendahki ma re perenki wadek neirail doaropwe de soh, pali moron en aramas kan sohte pahn mwekidki dahme re wadek lao emen Sounkadehde pahn pwurehng pwurala rehrail. Ke koasoanehdi me ke pahn pwurehng pwurala rehrail? Limpoak mehlel ong mehteikan pahn kamwekid kitail en wiahda atail koasoandi en pwurehng pwurala rehrail. Kitail anahne pwurehng pwurala rehn koaros me perenki wadek doaropweo.
5 Dahme Ke Pahn Koasoia Ahnsou Me Ke Pwurehng Pwurala? Ke kak koasoia me dahme ntingihdi nan Kingdom News kin pid atail ahnsou oh mwurin mwo ke kak idek rehn tohnihmwo peidek me pahn kahreong ih en medemedewe duwen met. Rong kanaieng dahme tohnihmwo koasoia pwe ken wehwehki eh madamadau. Mwurin mwo, ke kak kasalehda ehu ire nan brochure Kupwurki me Kingdom News kasalehdahr. Ma tohnihmw perenki rong duwen ireo, ke kak tepiada onop Paipel reh.
6 Iet ekei padahk kan me ke kak song wia ahnsou me ke pwurehng pwurala rehn irail kan me perenki wadek neirail “Kingdom News” No. 35:
◼ “Mwein ke tamanda noumw doaropwe me I kihong uhk rahn teio. Dahme ntingihdi loale kin doakdoake ire ehu me kin katohrehpeseng aramas rahnwet—sohla limpoak ong mehteikan.” Koasoia mehn kamehlel me ntingihdi ni pali 2 nan Kingdom News pahnangin sawaspen oaralap “Limpoak ong Mehn Mpatail Wia Tikitikla.” Mwurin mwo, ke kak idek rehn tohnihmwo, “Ke lemeleme me ih Kupwuren Koht aramas en sohla limpoakpene nanpwungarail?” Mweidong en sapeng. Pakalahng iren mehn kasukuhl 5 nan brochure Kupwurki, oh tepiada onop Paipel reh.
◼ “Ni ahnsou me kita tuhpene rahn teio, I kihong uhk doaropwe ieu me oaralap koasoia ‘Aramas Koaros Pahn Kak Limpoakpene?’ Ke lemeleme me sampah pahn duwehte met ehu rahn?” Mweidong en sapeng. Pakalahng iren mehn kasukuhl 6 nan brochure Kupwurki, oh wadek parakrap 6. Mwurin mwo, wadek sapwellimen Koht inou me ntingihdi nan Maika 4:3, 4. Ma tohnihmwo kin perenki rong, kihong ih nah brochure oh tepiada onop Paipel reh.
◼ “Ahnsou me I tuhwong uhk rahn teio, I kihong uhk doaropwe me oaralap koasoia ‘Aramas Koaros Pahn Kak Limpoakpene?’ E koasoia me Sounkadehdehn Siohwa kan kin men onop Paipel rehn aramas ni soh isepe. I pwurodo pwehn kasalehiong uhk pwuhko me se kin doadoahngki. [Kasalehda pwuhken Mour Kohkohlahte.] Pwuhk wet kin kawehwe ni sansal iahd aramas koaros pahn limpoakpene, oh e pil kin sapengla peidek kan me mwein ke kin pwonopwonki: Dahme kahrehda aramas kin mahla oh mehla? Dahme kahrehda Koht mweidong suwed en mihmi? Dahme kin wiawi ni ahnsou me kompoakpatail mehla?” Mwurin mwo, ke kak idek reh, “I kak kamwomwada iaduwen se pahn onop rehmw?” Ma tohnihmwo sohte kak, idek reh ma e men ale pein nah pwuhk. Ma ehi, kihong ih pwuhko oh kawehwehda duwen koasoandi en sawas ong doadoahk en kalohk me kin wiawi sampah pwon. Koasoanehdi iahd kumwa kak pwurehng tuhpene.
7 Ni ahnsou me kitail kihpesengehr Kingdom News No. 35 wasahn kalohk pwon, luhwen sounpwongo kitail kak kihla makisihn Watchtower oh Awake! Ahnsou me kitail pwurehng pwurala rehn aramas me perenki rong, kitail kak idek rehn tohnihmwo ma re men ale neirail subscription.
8 Doadoahk en kihseli Kingdom News No. 35 kak kamwekid kitail koaros en kalaudehla atail kalohk. Ni atail kin ale sawas sang Siohwa, kitail kak kaskasik me doadoahk wet pahn pweida, oh aramas en wehwehkihla me kupwuren Koht iei me aramas koaros en limpoakpene nanpwungarail. Siohwa pahn kapaiada atail nannanti en pwurehng pwurala rehn aramas kan me perenki wadek neirail Kingdom News.