Sewese Aramas akan Pwe Re Pahn Perenki Ale Neirail Tract Kapw Kingdom News No. 36
1 Ke kanokehlahr kihla noumw tract kapw kan (Kingdom News No. 36) me kohwong uhk en kihseli? Tract kapwo kin wia peidek konehng ehu atail ahnsou aramas en medemedewe: “Millennium Kapw—Dahme Ahnsou Kohkohdo Kolokol Ong Uhk?” Ahnsou me pahr 2000 kohkohdo, dahme aramas kin kasikasik pahn wiawi nan millennium kapw kin wekpeseng. Kingdom News No. 36 kin koasoia dahme ekei aramas kin kasikasik oh pil kin katamankin kitail me irair en sampah wet sohte kin kihong aramas koapworopwor. Ihte millennium (pahr kid) me pahn wahdo popohl oh meleilei ong tohnsampah iei pahr kido me Krais Sises pahn kaunda sampah. Atail likih me kaundahn Sises ki Wehin Koht pahn pweida pahn kamwekid kitail en kihseli tract en Kingdom News No. 36 rehn aramas koaros.
2 Dahme Sounkalohk kan kin Koasoia Duwen Kihseli Kingdom News: Ahnsou me doadoahk en kihseli Kingdom News wiawi mahs, e kin kangoange koaros nan mwomwohdiso en ngoangki kalohk. Rahn Ohpis en Canada ntingihdi met duwen doadoahk en kihseli Kingdom News No. 35: “Sounkalohk koaros, iangahki pioneer kan, inenen perenki utungada doadoahk tohrohr wet oh re diarada aramas tohto me perenki rong.” Se lemeleme me ke pil perenki iang doadoahk tohrohr en kihseli Kingdom News No. 36.
3 Doadoahk en kihseli tract kapwo (Kingdom News No. 36) kileledi en imwisekla ni November 17, 2000. Kumwail kihong aramas koaros me mihmi nan wasahn kalohk en ahmw mwomwohdiso neirail tract kapw? Ma soh, elder kan kak kareireila doadoahko en wiawi lao lel imwin November.
4 Sang ahnsou me doadoahk wet tepida lel met, dahme aramas kin nda ahnsou me re kin ale neirail Kingdom News No. 36 nan ahmw wasa? Ekei aramas pahn kadaralahng Society kisin coupon me mihmi ni tihnsowen tract kapwo oh peki rehn Society en kadarala neirail brochure Kupwurki oh/de re pahn peki rehn Society en kararala emen Sounkadehde rehrail pwehn onop Paipel rehrail. Ahpw, pali laud en aramas me, nin tepio, perenki rong duwen oaralap en millennium sohte pahn mwekid lao lel emen Sounkadehdehn Siohwa kan pahn pwurehng pwurala reh. Kitail en pwurehng pwurala rehn aramas koaros me perenki rong. Ahnsou dah me pahn mwahu en pwurehng pwurala rehrail? E pahn mwahu ma ke pahn pwurehng pwurala mwadang.
5 Nna, tehk duwen ekspiriens pwukat me wiawi ahnsou me sounkalohk kan pwurehng pwurala rehn irail me perenki ale neirail Kingdom News No. 35. Emen pioneer nan Ireland kihong emen lih me kin ahneki wasahn mwenge nah Kingdom News. Liho perenki oaralap en tracto oh luhke sister me kihong ih en pwurala reh. Sistero pwurehng pwurala mwurin rahn riau, oh tepida onop Paipel rehn liho. Nan Denmark, sounkalohk kan kihdi Kingdom News ni ihmw ehu me sohte towe. Rahnohte, liho me kin mihmi ni ihmwo kadaralahng Rahn Ohpis en wasao coupono, oh Rahn Ohpiso uhd kadaralahng mwomwohdiso en wasao me liho mihmi nah adres. Mwohn wihko nek, sister riemen kohla rehn liho, tepida onop en Paipel reh, oh liho iang towehda ehu mihding nan Kingdom Hall!
6 Dahme Ke Pahn Nda Ahnsou Me Ke Pwurehng Pwurala: En pwurehng pwurala rehn irail me kin ale neirail Kingdom News kin mengei oh kaperen. Ni ahnsou me ke pahn wia met, e pahn mwahu en pil wahda pein noumw copy en Kingdom News No. 36 pwehki tohnihmwo mwein sohte kolokol nah doaropwe ahnsowo. Ke kak song doadoahngki iren sawas pwukat.
7 Mwurin ahmw katamankin tohnihmwo me ke tuhwong ih rahn teio oh kihong ih kisin doaropwe oh dahme kumwa koasoia, ke kak nda:
◼ “I kihong uhk kisin doaropwe me oaralap koasoia ‘Millennium Kapw—Dahme Ahnsou Kohkohdo Kolokol Ong Uhk?’ E soh kaperen en wadek me, ni ahnsou keren, kaundahn Krais Sises en pahr kid pahn wiawi oh e pahn kahrehong sampah en wiahla paradais? [Kasalehda kilel kan en paradais me mihmi nan Kingdom News No. 36.] Ni tihnsowen doaropweo, ke kak pil peki en ale noumw brochure Dahme Koht Kupwurki Kitail en Wia?” Kasalehda brochure, pakalahng Iren Mehn Kasukuhl 5, wadek keieun peidek oh parakrap 1 oh 2, oh idek rehn tohnihmwo ma re wehwehki duwen pasapengpen peideko. Wadek iren Paipel ehu de riau oh koasoia. Ma kak, wia pil ehu peidek sang Iren Mehn Kasukuhl 5 oh wadek parakrap oh koasoia, oh mwurin mwo, koasoanehdi rehn tohnihmwo en pwurehng pwurala reh oh pousehla amwa koasoipene.
8 Pwehki kitail pahn kihla brochure “Kupwurki” de pwuhken “Mour Kohkohlahte” mwurin doadoahk en kihseli tract kapwo nekier, ke kak nda:
◼ “Ni ahnsou me I tuhwong komwi rahn teio, I kihong komwi noumw doaropwe me oaralap koasoia: ‘Millennium Kapw—Dahme Ahnsou Kohkohdo Kolokol Ong Uhk?’ Nan doaropweo, e kin kasalehong aramas me emen kak kohla rehrail pwehn onop Paipel rehrail. I pwurodo rahnwet pwehn kasalehong uhk dahme se kin doadoahngki pwehn onop Paipel rehn aramas akan. [Kasalehda brochure Kupwurki oh kasalehda tihnsowen brochure; de kasalehda pwuhken Mour Kohkohlahte, oh kasalehda pali 11-13.] Millennium me Paipel kin koasoia pahn wahdo irair kan me ke kilang nan kilel pwukat. Ma ke men iang kousoan nan Paradais, ke anahne sukuhliki loalokong pwung duwen Koht. Menlau mweidohng ie en kasalehong komwi, ni mwotomwot, iaduwen se kin onop Paipel rehn aramas akan.”
9 Doadoahk en kihseli tract kapwo (Kingdom News No. 36) kin kamwekid kitail en kalaudehla atail ahnsou nan kalohk, oh met pahn kahrehda aramas tohto en rong duwen Rongmwahuwo. Doadoahk wet pil sewese aramas tohto nan wasahn kalohk en perenki rong. Atail miniminpene doadoahk nan kalohk pwehn kahrehong aramas en perenki rong pahn kak, ki sapwellimen Siohwa sawas, imwikihla atail perenki diarada pil ekei sihpw kan.—Madiu 10:11; Wiewia 13:48, 49, 52.