Lemmwiki Siohwa Sang Ni Menseng Lel Ni Pwong
1 “Elen loalokongla iei lemmwiki Siohwa.” (Mel. 111:10, New World Translation) Lemmwiki Siohwa kin kahrehong kitail en wia dahme mwahu oh liksang dahme suwed. (Lepin Padahk 16:6) Lemmwiki Siohwa kin wehwehki wauneki Ih nin duwen Sounkapikpatail, soangen wahu me pahn kamwekid kitail en wia uwen me kitail kak en dehr kansensuwedih Ih oh dehr sapeikiong Ih. E kesempwal kitail en kekeirada irair wet nan atail mour oh nantihong lemmwiki Siohwa sang ni menseng lel ni pwong.—Lepin Padahk 8:13.
2 Rahn koaros, Sehdan oh iangahki sampah me kin mihmi pahn eh manaman kin kasonge kitail pwehn lohdi oh wia tiahk suwed. (Episos 6:11, 12) Pwehki kitail kin wia aramas soh-unsek oh dipan, kitail kin inengieng en wia dahme suwed. (Kalesia 5:17) Ihme kahrehda, ma kitail men peikiong sapwellimen Siohwa kosonned akan, oh pil ma kitail men ahneki peren oh ale mour soutuk, kitail anahne lemmwiki Siohwa sang ni menseng lel ni pwong.—Deud. 10:12, 13.
3 Ipru 10:24, 25 kin kaweidkin kitail en pokonpene pwehn kakehlaka nan kapehden emenemen “pwe duwen amwail ese Rahnen Kauno kerendohr” (pwe kitail wehwehki me kitail mihmi nan imwin rahn akan). Ma kitail men pitsang ahnsou apwal akan, kitail anahne kaukaule iang towehda mihding kan. Atail lemmwiki Koht oh sohte men kansensuwedih Ih pahn kamwekid kitail en kaukaule iang towehda mihding kan oh kesempwaliki mihding kan koaros. Irail me kin lemmwiki Koht kin kesempwaliki pwais kan me kin kohwong irail ahnsoun mihding kan duwehte iang pasapeng kan, wia padahk kan oh wia kamwomwada kan.
4 Pil ehu ahl me kitail kak kasalehda me kitail lemmwiki Koht iei en peikiong kehkehlik me kohwong kitail en kalohki Rongamwahu en Wehio. (Madiu 28:19, 20; Wiewia 10:42) Atail mehn akadei me keieu kesempwal me pid atail doadoahk en kalohk iei en sewese meteikan en kekeirada arail lemmwiki Siohwa oh ren kapwaiada kupwuren Koht nan arail mour. Kitail kak sewese aramas en wia met ma kitail pahn pwurehng pwurala rehn irail me kin perenki rong, tepida onop Paipel rehrail, oh padahkiong irail duwen sapwellimen Koht kosonned akan. Ih duwen kitail pahn kak kasalehda me kitail lemmwiki Siohwa oh poakohng mehn mpatail kan.—Madiu 22:37-39.
5 Irail me sohte kin lemmwiki Koht sohte kin kalahnganki soahng ngehnin kan, oh re kin lohdiong ngehnen sampah (de madamadau suwed en sampah) me kin kemehla irail ni pali ngehn. (Episos 2:2) Kitail en nantihong “kapinga Koht oh pwongih ni wahu oh lemmwin.” (Ipru 12:28) Ma kitail wia met, kitail pahn kak ale kapai kan me kin kohsang atail lemmwiki Siohwa sang ni menseng lel ni pwong.