Apwalih en Soumaso Dipwisou kan

¹ Nan ahnsoun Paipel kan emen sounkohwa kin ahneki pwukoa likilik ehu. Eipraam kihong nah sounkohwao pwukoahn rapahkihda en nah pwutako, Aisak, eh pwoud. (Senesis 24:​1-4) Met wehwehki me sounkohwao pwukoahki tehk me en mie kadaudok en Eipraam. Ia uwen met kin wia pwukoah laud ehu! Ihme e sohte kapwuriamwei en wahnpoaron Pohl mahsanih: “A ia duwe, dahme konehng en kin mie rehn sounkohwa kan? Re en kin likilik pahn ar kaun akan.”​—⁠1 Korint 4:2.

Kristian Sounkohwa kan

² Paipel kin mahsanihki ekei kisehn doadoahk en kalohk en Kristian nin duwen pwukoahn sounkohwa. Karasepe ehu, wahnpoaron Pohl mahsanihong mehn Episos kan: “Koht, nan sapwellime kupwur kalahngan e ketikihong ie kohwa doadoahk wet ong kamwahupamwail.” (Episos 3:2; Kolose 1:​25) E kin kilangwohng ah pwukoahn wahlahng wehi kan rongamwahuwo nin duwen pwukoahn sounkohwa ehu me e anahne apwalih ni lelepek. (Wiewia 9:​15; 22:21) Wahnpoaron Piter ntingilahng rie Kristian me keidi kan: “Kumwail ritingadahng emen emen kumwail koaros imwamwail kan, sohte mwahn kin kaulimala. Emen emen kumwail, nin duwen sounkohwa mwahu en sapwellimen Koht kapai kan, en kin doadoahngki ong ni kamwahupen meteikan, kapai me e alehsangehr rehn Koht.” (1 Piter 4:​9, 10; Ipru 13:16) Mendahki dahme Kristian ko nan tepin pahr ahneki ni wahr, soahng pwukat koaros kin kohsang ni mahk kalahngan en Siohwa. Ihme kahrehda, irail kin wia sounkohwahn dipwisou ko oh anahne doadoahngki dipwisou pwukat ni ahl en Kristian.

³ Rahnwet, Sounkadehdehn Siohwa kan kin pil ahneki soahngen madamadauwohte. Irail kin inoukihong Siohwa Koht pein irail oh kin kilangwong soahng koaros me re ahneki​—⁠arail mour, arail kehl, arail kepwe kan​—⁠me iei wahn “sapwellimen Koht mahk kalahngan me sansalda ni soangsoangen ahl akan.” Nin duwen sounkohwa mwahu kei, re pehm me re pwukoahki mwomwen arail doadoahngki soahng pwukat ong Siohwa Koht. Patohngete met, re aleier loalokong en rongamwahuwo. Met pil ehu mehn likilik me re men doadoahngki ni ahl me keieu mwahu: en kalinganada mwaren Siohwa oh en sewese mehteikan en loalokongkihla padahk mehlel.​—⁠Madiu 28:19, 20; 1 Tim. 2:​3, 4; 2 Tim. 1:​13, 14.

⁴ Iaduwen Sounkadehdehn Siohwa kan kin apwaliala arail pwukoah kan nin duwen sounkohwa kei? Ripoht en pahr samwalahrohte kasalehda me, nan sampah pwon re doadoahngkihla awa lik kei kalkalohki “rongamwahu en Wehio” oh kin onopki Paipel rehn aramas daulih meh 4,500,000. (Madiu 24:14) Arail lelepek nin duwen sapwellimen Siohwa sounkohwa kei kin pil sansalkihda arail sawas kadek ong doadoahk en Wehio nan sampah pwon oh arail kin utung Kingdom Hall kan nan pein arail wasa, oh arail kin kadek kasamwo soundoulik kan oh mehteikan, oh pil arail kin kadekong irail ko me uhdahn anahne sawas​—⁠duwehte irail kan me kin mihla pahn kalokolok pwehki mahwen kan. Nin duwen pwihn ehu, Kristian mehlel kan kin apwalih mwahu en Soumaso dipwisou kan.

“Ladu Lelepek oh Loalokong”

⁵ Kaidehn aramaste me ahneki pwukoahn sounkohwa, ahpw pil nin duwen pwihn ehu e pil ahneki pwukoah wet. Sises ekerki mwomwohdisohn Kristian keidio pohn sampah “ladu lelepek oh loalokong.” (Luk 12:42) Pwukoahn “ladu lelepek” menet iei en ketikihda “mwenge” oh en tiengla mwowe kalohki rongamwahuwo nan sampah pwon. (Kaudiahl 12:17) Me pidada met, pwihn en ladu lelepeko, me Governing Body kin mwete, ahneki pwukoah ehu sang rehn Koht en apwalih mwahu ah “koahiek kan” ni wahr oh pali ngehn. (Madiu 25:15) Me pahrekiong mehn kalimeng en ‘ladu lelepeko,’ ehu ehu rahn ohpis kin nantiong doadoahngki mwohni kan me aramas sawaskihda ni ahl ehu me pwung, ong kekeiradahn mehkan me pid Wehio. Soahngen sawas pwukat koaros kin kohsang dipwisou kan me aramas kihong Society en apwalih, oh “ladu lelepek oh loalokong” kin pwukoahki en tehk mwahu me dipwisou pwukat kin kadoadoahkong kahrepeo me kilelediong oh me ren doadoahngki ni elen loalokong, kasohtik oh en mie lipwe.

⁶ Ehu karasepen kadoadoahk loalokong en mwohni me aramas sawaskihda kin sansalda ni kekeiradahn ntingdahn pwuhk kan me Sounkadehdehn Siohwa kan wia erein pahr 1900 lel met. Kohpeseng en Paipel iangahki pwuhk en sawas kan en Paipel​—⁠makasihn kan, pwuhk kan, brochure kan, kisin pwuhk kan, tract kan oh Kingdom News kan​—⁠kin keieu kadoadoahk pwehn kaparakihseli “rongamwahuwo” erein “imwin rahn” pwukat. (Mark 13:10; 2 Tim. 3:1) Oh makasihn Watchtower kin keieu wia dipwisou en kihda “mwenge ni ahnsou me konehng” ong “tehnpas en Koht” oh iengerail kan, “pokon kalaimwun” en “sihpw teikan.”​—⁠Madiu 24:45; Episos 2:​19; Kaudiahl 7:9; Sohn 10:16.

⁷ Nin tepio, misihn en nting en pisnes teikan me kin ntingihda nein Sounkadehdehn Siohwa pwuhk kan koaros. Ahpw erein pahr 1920 samwa, re koasoanehdi me doadoahko pahn pweida mwahu oh e pil pahn wahdo kating en pali ngehn ma pein sapwellimen Siohwa ladu kan pahn pein wia arail nting kan. Tepida tikitik nan 1920, doadoahk wet en ntingihda pwuhk kedekedeo kekeirada nan Brooklyn, New York, lau e uhdahn laudla uwehte deupen ihmw laud pahieu. Ntingpen pwuhk teikan pil wiawi nan sahpw teikan, ahpw nan pali moron en sahpw pwukat, Mahwen Keriau en Sampah kauhdi.

⁸ Ahpw mendahki ia uwen laud en kekeiradahn doadoahk en ntingihda pwuhk kan nan United States, pwuhk pwukat saikinte itar ong aramas koaros nan sampah pwon. Ihme kahrehda, nan pahr kan mwurin mahweno, doadoahk en ntingihda pwuhk kan kin wiawihda de kadoadoahkehr nan sahpw tohto teikan, me iangahki Canada, Denmark, England, Greece, South Africa, Switzerland, oh West Germany. Lau lel nan pahr 1970 samwa, Australia, Brazil, Finland, Ghana, Japan, Nigeria, oh Philippines pil iangehr wia doadoahk en ntingihda pwuhk kan en Society. Ekei sahpw pwukat kin pil wiahda pwuhk kan me kili kekeluwak. Pil nan tepin 1970, misineri kan en Gilead kin pil ale kasukuhl en wiahda pwuhk kan oh re kin kohla nan ekei sahpw pwukat pwehn sewesehki brother ko nan sahpw ko wiahda pwuhk kan.

⁹ Erein pahr 1980 samwa, nempehn sahpw akan me kin wiahda makasihn kan tohtohkihla sahpw 51.a Ia uwen met kin wia kadoadoahk mwahu en dipwisou kan en soumaso! Ia uwen met kin wia mehn kadehde kehlail en doadoahk en Wehio! Oh ia uwen met kin wia mehn kadehde kehlail duwen utuht kadek en emen emen Sounkadehdehn Siohwa me kin ‘kawauwihki Siohwa arail kepwe kesempwal kan’! (Lepin Padahk 3:9) Ihme, re kadehdehda me pein irail kin wia sounkohwa mwahu kei en dahme Siohwa kapaikinirailda ni soangen ahl akan.

Wekidekla Ehu

¹⁰ Erein pahr 1970 samwa oh tepin pahr 1980 samwa, kekeirada kapw kan wiawihda nan doadoahk en wiahda pwuhk kan, oh Sounkadehdehn Siohwa kan kin alehda wiepe kapw kan en wiahda pwuhk kan. Mahso, re kin doadoahngki wiepen letterpresses. Kedekedeo, met pil wekila ni arail tepiada doadoahngki mehn nting kapw en ahnsouwet (offset printing). Pwehki met, pwuhk kaselel kan pil wiawihkihda kilel de mahlen kan me mih ni poh kan, ahpw sohla mahlen de kilel me ihte poh toantoal iangahki ehu poh tohrohr me mehn nting en mahso (letterpresses) kin ihte kak wiahda. Pil ehu, kadoadoahkpen computer pil wekidala doadoahk en nting. Sounkadehdehn Siohwa kan wiahda ehu prokram en computer me adaneki MEPS, ehu kadoadoahkpen computer me kin ntingihda soangsoangen lokaia kan me ahnsouwet kin sewese wiawihdahn pwuhk kan ni soangsoangen lokaia daulih 370. Sohte ehu prokram en computer likin nein Society MEPS me kak kapahrekiong ah kin kak wiahda pwuhk kan ni soangsoangen lokaia tohto.

¹¹ Pwehki sawaspen kadoadoahkpen MEPS computer oh wiepe teikan duwehte electronic mail (e-mail), ehu kekeirada laud pil wiawihda ni arail wiahda mwengehn ngehn kan ni ahnsou me konehng. Mahso, ni arail kin doadoahngki wiepe mering kan en wiahda pwuhk kan, makasihn kan me kin kawehwehsang ni makasihn en lokaiahn wai kin kak kawehwehong ni lokaia teikan mwurin sounpwong kei, ekei pak mwurin sounpahr ehu. Ahnsouwet, makasihno The Watchtower kin wiakinteieu wiawihda ni lokaia tohrohr 115, oh Awake! ni lokaia 62. Met kin wehwehki me nan sampah pwon pohnangin persent 95 en irail ko me kin towehda onop en Watchtower ehu ehu wihk rehn Sounkadehdehn Siohwa kan kin onopki oaralap tehieu ni ahnsou tehieu. Ia uwen met wia kapai ehu! Ni mehlel en Soumaso dipwisou kan kin kadoadoahkla mwahu ni wiepe kapw pwukat!

Anahn Wekpeseng kan en Koasoandi en Pwihn

¹² Wiepe kapw pwukat wekidala koasoandi en anahn en pwihn en wiahda pwuhk kan en Sounkadehdehn Siohwa kan sampah pwon. Misihn kapw kan me re doadoahngki met me adaneki web offset presses kin doadoahk mwadang sang misihn me re doadoahngki mahso me adaneki letterpresses, ahpw re preilaud. Kadoadoahkpen computer kan me kin utung soangen doadoahk wet, duwehte nting, kawehwe, mahlen, oh nting teikan, nin doken en kin kak wia doadoahk tohto sang misihn meringo, pil pweilaud. E mwadang sansalda me re sohlahr kak kasohtiki mwohni en wiahda makasihn nan sahpw tohrohr 51. Ihme kahrehda, nan pahr 1990 kan, “ladu lelepeko” pil pwurehng kasawih irairo. Ia imwilahn keseu wet?

¹³ Roporop kan kasalehda me “dipwisou kesempwal kan” me Sounkadehdehn Siohwa kan oh kompoakeparail kan sawaskihda pahn mwahu en kadoadoahk ong wiahda pwuhk kan ma doadoahk en wiahda pwuhk wasa koasoa kin kapatapatpene. Ihme nempehn rahn ohpis kan me kin wiahda pwuhk pil malaulaula. Sehmen kin uhd pwukoahki wiahda makasihn oh sawas en pwuhk en Paipel ong sapwen Iurop tohto oh pil iangahki Palikapi en Iurop, iangahki ekei sahpw akan me mahso kin pein wiahda makasihn kan oh pwuhk kan. Itali kin wiahda makasihn kan oh pwuhk kan ong ekei wasa kan nan Aperika oh palieir en palimesen Iurop, iangahki Krihs oh Albania. Nan Aperika, Nigeria oh South Aperika te me kin wiahda makasihn kan oh pwuhk kan. Nan sampah pwon, soahngen kapatapatpenehn sahpw kan me kin wiahda makasihn oh pwuhk kin pil wiawi.

Irair kan en Kasawih

¹⁴ Lau lel July 1998, wiawihdahn makasihn kan pahn sohla wiawi nan sahpwen Iurop tohto, iangahki Austria, Denmark, France, Greece, Netherlands oh Switzerland. Britain, Finland, Sehmen, Itali, Spain, oh Sweden pahn uhd wiahda pwuhk kan oh makasihn kan ong sapwen Iurop. Ni ahl wet, re kak irehdi pweipwei kan me sohte anahn oh doadoahngki sawas kan ni ahl ehu me pahn mwahu ong doadoahk wet nan sampah pwon. Iaduwen re koasoanehdi mehnia sahpw kan me pahn pouslahte wia sahpw me pahn kin wiahda pwuhk kan oh makasihn kan oh mehnia sahpw me sohla pahn wiahda pwuhk kan oh makasihn kan? Ni arail kin kolokol ah kosonned en apwalih ni loalokong dipwisou kan en soumaso, “ladu lelepeko” kin ni keneinei kasawiada katepen en wiahda pwuhk oh makasihn kan nan ehu ehu sahpw.

¹⁵ Kahrepen ekei sahpw sohla kin wiahda pwuhk kan oh makasihn kan oh ekei sahpw kin patpene oh wia doadoahk wet iei pwehn mie katepe. Pwe ehu sahpw en wiahda pwuhk kan ong sahpw tohto teikan kin kamengeila doadoahk wet oh re kak doadoahngki mwahu misihn en wiahda pwuhk kan me pweilaud. Doadoahk en wiahda pwuhk kan kin ahnsouwet wiawi wasa me pweinen dipwisou en wiahda pwuhk kan me pweitikitik, oh dipwisoun wiahda pwuhk kan kak diarek wasa pwukat, oh wasahn kadarpeseng pwuhk pwukat pil mengei ong met. Ihme kahrehda, en soumaso dipwisou kan kin kadoadoahkla ni ahl me pwung. Ni mehlel, sohla wiahda pwuhk kan nan ehu sahpw sohte kin wehwehki me doadoahk en kalohk wasao pahn uhdier. Miehte pwuhk tohto sahpw pwukat, oh Sounkadehdehn Siohwa kid kei nan sahpw ko pahn pouselahte ni ngoang padapadahkiong mehn imparail kan “rongamwahu en popohl.” (Episos 2:​17) Pil ehu, koasoandi sapahl wet kin imwikihla kapai tohto.

¹⁶ Pwehn kasalehda ehu kapai, iei me pali tohtohn misihn en wiahda pwuhk kan en ahnsouwet kin pekedersang Denmark, Greece, Netherlands oh Switzerland oh pekederlahng Nigeria oh Philippines. Irail kan me semenih koadoahke misihn pwukat nan Bethel sang sapwen Iurop kan pil alehda luk en iangedo misihn ko oh kasukuhliong brother kan en sahpwo kadoadoahkpen misihn pwukat. Ihme kahrehda, sahpw ko kin ahnsouwet kak wiahda soahngen makasihn me wiepe mwahu duwehte me sahpw teikan kin wia.

¹⁷ Tehk pil ehu kapai: Pweinen wiahda makasihn kan kin ahnsouwet pweipweilahte nan ekeite sahpw kan me kin pousehlahte wiahda pwuhk kan. Pwehki met, nan sahpw kan me sohla kin wiahda pwuhk kan, mwohni kan kin ahnsouwet kak kadoadoahkong doadoahk teikan, duwehte kauwada Kingdom Hall kan oh sewese apwalih anahn en riatail Kristian kan nan sahpw semwehmwe. Ihme kahrehda, doadoahngki ni keneinei dipwisou kan en soumaso kin wehwehki me mahsen en Pohl ong mehn Korint kan kin kak kadoadoahk lipwalipw ong Kristian koaros en sampah: “I sohte men kamarahrahla en mehteikan wisik oh uhd katoutouwihkumwailla. Ahpw I men koaros en soangen pahrekteieu; pwe nan amwail reken dipwisou ahnsou wet, me uhdahn konehng kumwail en sewesehki irail kan me sohte ar dipwisou. . . Ih duwen koaros ar pahn kin soangen pahrekteieu.”​—⁠2 Kor. 8:​13, 14.

¹⁸ Pwehki doadoahk en wiahda pwuhk oh makasihn me re kapatahpene sahpw kan en wiahda, met kin kahrehong Sounkadehdehn Siohwa kan nan sampah pwon en kerenpene sang mahso. E sohte wia kahpwal ehu ong Sounkadehde kan nan Denmark en mweidala neirail makasihn kan en wiawihda nan Sehmen, mendahki mahso re kin pein wiahda neirail makasihn kan. Re kalahnganki doadoahk en riarail Kristian kan nan Sehmen. Sounkadehde kan nan Sehmen kin suwedki pwe arail sawas kan kin kadoadoahk pwehn pwainda pwuhken Paipel kan ong sapwen Denmark​—⁠de ong Russia, Ukraine, oh sahpw teikan? Soh douluhl! Re perenki ese me sawas kan sang rehn riarail kan nan sahpw ko kak ahnsou wet kadoadoahk ong doadoahk katapan teikan.

Apwalih Dipwisou Kan

¹⁹ Nan Kingdom Hall en Sounkadehde kan en Siohwa nan sampah pwon, mie ehu koakon en sawas me kilel powe “Sawas ong Doadoahk en Society nan Sampah Pwon​—⁠Madiu 24:14.” Sawas pwukat me sohte kohsang pekipek kan me kin kohieng nan koakon ko kin kak kadoadoahk ong anahn teikan me kohda. “Ladu lelepek” oh ehu ehu rahn ohpis me kin koasoanehdi iaduwen ren doadoahngki sawas pwukat. Ihme kahrehda, ni ahnsou me kosonned kin mweidong, mwohni me kin kohdiong nan koakon en sawas ehu nan ehu sahpw kak utung doadoahk en Sounkadehde kan en Siohwa nan ehu sahpw me dohki mwail kid kei. Sawas kan kin kadoadoahk pwehn kihda sawas karuwaru kan ong me pwoson teikan me kin mihla pahn lokolok pwehki irair kan me duwehte melimel, rerrer en sahpw, oh mahwen kan nanpwungen tohnsahpw ehu. Oh soangen sawas pwukat kin kadoadoahk nan ekei sahpw pwehn apwalih misineri kan nan sahpw daulih 200.

²⁰ Nin duwen kosonned ehu, nan mwomwohdisohn Sounkadehdehn Siohwa kan, re kin pakairki mehkan me pid mwohni pak ehute nan sounpwong ehu​—⁠oh ong ahnsou kiste. Sohte delen meirong me aramas kin kihseli nan Kingdom Hall de ni kapokon kan. Re sohte kin pil pekih rehn aramas kan mwohni kan. Makasihno The Watchtower kin audaudki artikel ehute pahr ehu me kin kawehwehda iaduwen irail ko me men kihda sawas ong Watch Tower Bible and Tract Society kak wia met pwehn kak utung doadoahko nan sampah pwon. Makasihno Awake! sohte kin koasoia nein Society mwohni kan. Eri, iaduwen, doadoahk lap wet nan sampah pwon en kalohki rongamwahuwo, oh kokou Kingdom Hall kan me anahn, oh apwalih irail ko nan doadoahk en kalohk kaukaule, oh sewese Kristian kan me anahne sawas kin wiawihda? Siohwa ketin kapaiada sapwellime aramas kan ni ahl kaselel ehu ki ngehnin kadek kisakis. (2 Korint 8:2) Se pahn doadoahngki ahnsou mwahu wet en kalahngkiong koaros me iang kisehn ‘kawauwihki Siohwa arail dipwisou kesempwal kan.’ Re kak koapworopworki me “ladu lelepek” pahn kaukaule apwapwalih dipwisou kan en soumaso. Oh se kapakapki me Siohwa pahn kaukaule kapaiada koasoandi koaros me wiawihda ong kalaudlahn doadoahko nan sampah pwon.

[Nting tikitik me mi pah]