Ke Kak Kihda Sawas?
1 Wahnpoaron Pohl kaweidki tohnmwomwohdiso kan en “nsenohki emenemen.” (1 Korint 12:25, New World Translation) Ihme karehda, kitail en kasalehda atail nsenohki meteikan oh men kihda sawas ma eh anahn. Karasepe ehu, ekei sister kan nanpwungatail kin kekeirada neirail seri kan nan padahk mehlel kelepw. Sister pwukat kin weuwa pwukoah koaros en kaiahn en pali ngehnin neirail seri kan. Ni mehlel, re warohng kitail en kangoange irail oh kihong irail sawas “nin duwen arail anahn akan.” (Rom 12:13a, NW) Ke kak sewese irail?
2 Ahl Akan Me Ke Kak Sawas: Wahla peneinei kan me kin ihte kak iang mehn peidaid en wehipokon ong mihding kan oh kapokon kan kin kak saipidi nein peneineio mwohni. Sewese nohno men apwalih nah kisin seri kan ni mihding kan kin kak sewese nohno en paiekihda laud prokram en mihdingo. Me pil duwehte met, sewese ih ni ahnsou me e kin kahre seri kan nan kalohk kak kamarahra ah pwukoah. Kasalehda nsenohki mehlel seri kan—kompoakepahkin irail—kak kamwekid seri kan ni ahl me mwahu. Ekei pak lukehdo peneineio me nohno kelepw de pahpa kelepw en iang omw peneinei onop pahn wahdo kakehl en pali ngehn.
3 En Loalokong: Kitail en kanahieng dehr idingkiohng irail me pehm me re sohte anahne sawas atail sawas. Oh pil, kitail sohte men liderehla wiewiahn ehu peneinei nindoken atail kihda sawas. Ni mehlel, sister kan oh pwopwoud kan me pahn keieu pwungong sewese emen sister me anahne sawas.
4 Kangoang kin kohieng Kristian koaros en “idawehnla elen kasamwo meteikan” ong emenemen. (Rom 12:13b, NW) Sewese riatail brother oh sister kan ni pali ngehn iei ehu ahl me kitail kin kasalehda limpoak en Krais me kitail ahneki nanpwungatail.—Sohn 13:35.